(1)

I gcomhréir le hAirteagal 14 de Threoir 2014/33/AE ó Pharlaimint na hEorpa agus ón gComhairle (2), ardaitheoirí agus comhpháirteanna sábháilteachta le haghaidh ardaitheoirí atá i gcomhréir le caighdeáin chomhchuibhithe ar foilsíodh na tagairtí dóibh in Iris Oifigiúil an Aontais Eorpaigh nó le codanna de na caighdeáin chomhchuibhithe sin, glactar leis go bhfuil siad i gcomhréir leis na buncheanglais sláinte agus sábháilteachta a leagtar amach in Iarscríbhinn I a ghabhann leis an Treoir sin, ceanglais a chumhdaítear leis na caighdeáin sin nó na codanna sin díobh.

(2)

Le Cinneadh Cur Chun Feidhme C(2016) 5884 ón gCoimisiún (3), d'iarr an Coimisiún ar CEN caighdeáin chomhchuibhithe a dhréachtú agus a athbhreithniú chun tacú le Treoir 2014/33/AE ionas gur cinnte go mbeidh siad fós ag teacht leis an úrscothacht a nglactar léi i gcoitinne, chun go gcomhlíonfaidh siad na buncheanglais sláinte agus sábháilteachta in Iarscríbhinn I a ghabhann le Treoir 2014/33/AE, sin agus, i gcás inarb ábhartha, na buncheanglais sláinte agus sábháilteachta in Iarscríbhinn I a ghabhann le Treoir 2006/42/CE ó Pharlaimint na hEorpa agus ón gComhairle (4) faoi mar a leagtar amach i bpointe 1.1 d’Iarscríbhinn I a ghabhann le Treoir 2014/33/AE.

(3)

Ar bhonn na hiarrata a leagtar amach i gCinneadh Cur Chun Feidhme C(2016) 5884, rinne CEN athbhreithniú ar na caighdeáin chomhchuibhithe EN 81-72:2015 agus EN 81-73:2016, caighdeáin ar foilsíodh na tagairtí dóibh i gCinneadh Cur Chun Feidhme (AE) 2021/76 ón gCoimisiún (5). Rinneadh an t-athbhreithniú chun na caighdeáin sin a chur in oiriúint do chreat dlíthiúil Threoir 2014/33/AE agus chun cur leis an deimhneacht dhlíthiúil agus an tsoiléireacht, lena n-áirítear trí Iarscríbhinn ZA níos beaichte a dhréachtú agus tagairtí normatacha dátaithe a thabhairt isteach. Is é an toradh a bhí air sin gur glacadh caighdeán comhchuibhithe EN 81-72:2020 maidir le rialacha sábháilteachta i ndáil le tógáil agus suiteáil ardaitheoirí lucht comhraic dóiteán, sin agus caighdeán comhchuibhithe EN 81-73:2020 maidir leis an gcaoi a n-oibríonn ardaitheoirí i gcás tine. Ní dhearnadh aon athrú teicniúil substainteach ar chaighdeáin chomhchuibhithe EN 81-72:2015 agus EN 81-73:2016.

(4)

Tá measúnú déanta ag an gCoimisiún, i gcomhar le CEN, féachaint an gcomhlíonann caighdeáin chomhchuibhithe EN 81-72:2020 agus EN 81-73:2020 an iarraidh a leagtar amach i gCinneadh Cur Chun Feidhme C(2016) 5884.

(5)

Caighdeáin chomhchuibhithe EN 81-72:2020 agus EN 81-73:2020, is caighdeáin iad a chomhlíonann na buncheanglais sláinte agus sábháilteachta is aidhm dóibh a chumhdach, buncheanglais a leagtar amach i dTreoir 2014/33/AE. Dá bhrí sin, is iomchuí na tagairtí do na caighdeáin sin a fhoilsiú in Iris Oifigiúil an Aontais Eorpaigh.

(6)

Cuirtear caighdeáin chomhchuibhithe EN 81-72:2020 agus EN 81-73:2020 in ionad chaighdeáin chomhchuibhithe EN 81-72:2015 agus EN 81-73:2016. Dá bhrí sin, na tagairtí do chaighdeáin chomhchuibhithe EN 81-72:2015 agus EN 81-73:2016, is tagairtí iad is gá a tharraingt siar ó Iris Oifigiúil an Aontais Eorpaigh.

(7)

Tarraingt siar chaighdeáin chomhchuibhithe EN 81-72:2015 agus EN 81-73:2016, is gá í a chur siar ionas go mbeidh a ndóthain ama ag monaróirí ullmhú do chur i bhfeidhm chaighdeáin chomhchuibhithe EN 81-72:2020 agus EN 81-73:2020.

(8)

Dá bhrí sin, ba cheart Cinneadh Cur Chun Feidhme (AE) 2021/76 a leasú dá réir sin.

(9)

Ón dáta a fhoilsítear an tagairt do chaighdeán comhchuibhithe in Iris Oifigiúil an Aontais Eorpaigh, is rud é comhlíonadh an chaighdeáin sin a fhágann go nglactar leis go bhfuil comhréir ann leis na buncheanglais chomhfhreagracha a leagtar amach i reachtaíocht chomhchuibhithe an Aontais. Dá bhrí sin, ba cheart an Cinneadh seo a theacht i bhfeidhm lá a fhoilsithe,