(1)

Le hAirteagal 11(1) den Chonradh ar an Aontas Eorpach (CAE) ceanglaítear go dtabharfaidh institiúidí an Aontais, do shaoránaigh agus do chomhlachais ionadaíocha, trí bhealaí iomchuí, an deis a gcuid tuairimí a chur in iúl, agus iad a mhalartú go poiblí, i ngach réimse de ghníomhaíocht an Aontais. Ina theannta sin, le hAirteagal 11(2) ceanglaítear ar institiúidí an Aontais agallamh oscailte, trédhearcach, tráthrialta a choimeád ar siúl le comhlachais ionadaíocha agus leis an tsochaí shibhialta.

(2)

Le hAirteagal 15(1) den Chonradh ar Fheidhmiú an Aontais Eorpaigh (CFAE) foráiltear go seolfaidh institiúidí, comhlachtaí, oifigí agus gníomhaireachtaí an Aontais a gcuid oibre ar dhóigh chomh hoscailte agus is féidir, d’fhonn an dea-rialachas a chur chun cinn agus rannpháirtíocht na sochaí sibhialta a áirithiú.

(3)

I gcomhréir le hAirteagal 298 CFAE, agus a misin á ndéanamh acu, beidh de thacaíocht ag institiúidí, comhlachtaí, oifigí agus gníomhaireachtaí an Aontais riarachán Eorpach a bheidh oscailte, éifeachtach agus neamhspleách.

(4)

Ionas go n-oibreoidh institiúidí, comhlachtaí, oifigí agus gníomhaireachtaí an Aontais (“institiúidí an Aontais”) ar dhóigh chomh hoscailte agus is féidir, ba cheart cead a bheith ag geallsealbhóirí a dtuairimí agus a saineolas a chur ar fáil le linn an phróisis cinnteoireachta chun feabhas a chur ar cháilíocht na gcinntí atá á nglacadh agus ar an tacaíocht do na cinntí sin.

(5)

Chun an mhuinín i bpróisis pholaitiúla, reachtacha agus riaracháin an Aontais a choinneáil, ba cheart teagmhálacha le hionadaithe leasa a dhéanamh ar bhealach trédhearcach eiticiúil.

(6)

Chun na críche sin, thug Parlaimint na hEorpa, Comhairle an Aontais Eorpaigh agus an Coimisiún Eorpach Comhaontú Idirinstitiúideach maidir le clár trédhearcachta sainordaitheach (1) (“an Comhaontú Idirinstitiúideach”) i gcrích.

(7)

Tá an Chomhairle tiomanta do chreat a bhunú le haghaidh teagmhálacha trédhearcacha eiticiúla idir ionadaithe leasa agus oifigigh agus gníomhairí (“foireann”) a hArdrúnaíochta, trí phrionsabal coinníollachta a thabhairt isteach. De réir an phrionsabail sin, beidh ar ionadaithe leasa clárú sa chlár trédhearcachta ionas go mbeidh siad in ann gníomhaíochtaí áirithe a dhéanamh atá cumhdaithe ag an gComhaontú Idirinstitiúideach.

(8)

Measann an Chomhairle gurb é bunú cláir trédhearcachta, atá coiteann do Pharlaimint na hEorpa, don Chomhairle agus don Choimisiún, agus atá oscailte d’institiúidí eile an Aontais, an bealach is éifeachtaí chun prionsabal na coinníollachta a chur chun feidhme. Ba cheart cloí leis an gcód iompair a ghabhann leis an gComhaontú Idirinstitiúideach a bheith ina réamhchoinníoll chun clárú sa chlár trédhearcachta.

(9)

Ba cheart a thabhairt de chumhacht do bhrainsí an chláir thrédhearcachta, agus thar ceann na Comhairle freisin, cinntí aonair a ghlacadh a bhaineann le hiarratasóirí agus cláraithe, i gcomhréir leis an gComhaontú Idirinstitiúideach.

(10)

Níor cheart aon ní sa Chinneadh seo a léiriú mar ní a thugann ceart pribhléideach rochtana ar dhoiciméid atá i seilbh na Comhairle d’ionadaithe leasa atá cláraithe sa chlár trédhearcachta,