(1)

Ní mór a áirithiú le córas acmhainní dílse an Aontais go mbeidh acmhainní leordhóthanacha ann chun beartais an Aontais a fhorbairt go hordúil, faoi réir an ghá le diansmacht buiséadach. Lena chois sin is féidir, agus ba cheart, le forbairt an chórais acmhainní dílse, páirt a ghlacadh, a mhéid is féidir, i bhforbairt bheartais an Aontais.

(2)

Le Conradh Liospóin, tugadh isteach athruithe ar na forálacha a bhaineann le córas acmhainní dílse an Aontais, lena gcumasaítear catagóir acmhainní dílse atá ann a dhíothú agus catagóir nua a chruthú.

(3)

D’iarr Comhairle Eorpach an 7 agus an 8 Feabhra 2013 ar an gComhairle leanúint de bheith ag obair ar an togra ón gCoimisiún maidir le hacmhainn dhílis nua bunaithe ar cháin bhreisluacha (CBL) ionas go mbeidh sí chomh simplí agus trédhearcach agus is féidir, ionas go neartóidh sí an nasc le beartas CBL an Aontais agus le fáltais iarbhír CBL agus ionas go n-áiritheofar go gcaithfear go cothrom le cáiníocóirí sna Ballstáit uile.

(4)

I mí an Mheithimh 2017, ghlac an Coimisiún páipéar machnaimh ar a bhfuil i ndán do bheartas airgeadais an Aontais Eorpaigh. Mhol an Coimisiún raon roghanna lena nasctar acmhainní dílse ar bhealach níos sofheicthe le beartais an Aontais, go háirithe leis an margadh aonair agus le fás inbhuanaithe. De réir an pháipéir, agus acmhainní dílse nua á dtabhairt isteach, is gá aird a thabhairt ar a dtrédhearcacht, a simplíocht agus a gcobhsaíocht, ar a gcomhsheasmhacht le cuspóirí beartais an Aontais, ar a dtionchar ar iomaíochas agus ar fhás inbhuanaithe, agus ar a miondealú cothrom i measc na mBallstát.

(5)

Tá cáineadh déanta arís agus arís eile ag an gCúirt Iniúchóirí, Parlaimint na hEorpa agus na Ballstáit ar an gcóras reatha chun an acmhainn dhílis atá bunaithe ar CBL a chinneadh mar chóras róchasta. Dá bhrí sin, tháinig Comhairle Eorpach an 17 go 21 Iúil 2020 ar an gconclúid gurb iomchuí ríomh na hacmhainne dílse sin a shimpliú.

(6)

Chun ionstraimí maoinithe an Aontais a ailíniú níos fearr lena thosaíochtaí beartais, chun léiriú níos fearr a thabhairt ar ról bhuiséad ginearálta an Aontais (“buiséad an Aontais”) i bhfeidhmiú an mhargaidh aonair, chun tacú níos fearr le cuspóirí bheartais an Aontais agus chun ranníocaíochtaí na mBallstát le buiséad bliantúil an Aontais a laghdú, ar ranníocaíochtaí iad atá bunaithe ar ollioncam náisiúnta (OIN), tháinig Comhairle Eorpach an 17 go 21 Iúil 2020 ar an gconclúid go n-oibreodh an tAontas sna blianta amach romhainn chun an córas acmhainní dílse a athchóiriú agus chun acmhainní dílse nua a thabhairt isteach.

(7)

Mar chéad chéim, ba cheart catagóir nua acmhainní dílse, bunaithe ar ranníocaíochtaí náisiúnta a ríomhtar ar bhonn dramhaíl ó phacáistíocht phlaisteach neamh-athchúrsáilte, a thabhairt isteach. I gcomhréir leis an straitéis Eorpach maidir le plaistigh, is féidir le buiséad an Aontais rannchuidiú le truailliú ó dhramhaíl ó phacáistíocht phlaisteach a laghdú. Déanfaidh acmhainn dhílis atá bunaithe ar rannchuidithe náisiúnta atá comhréireach le cainníocht na dramhaíola ó phacáistíocht phlaisteach nach ndéantar a athchúrsáil i ngach Ballstát dreasacht a sholáthar chun tomhaltas plaisteach aon úsáide a laghdú, athchúrsáil a chothú agus borradh a chur faoin ngeilleagar ciorclach. Ag an am céanna, beidh sé de shaoirse ag na Ballstáit na bearta is oiriúnaí a dhéanamh chun na spriocanna sin a bhaint amach, i gcomhréir le prionsabal na coimhdeachta. Ar mhaithe le tionchar ró-aischéimnitheach ar ranníocaíochtaí náisiúnta a sheachaint, ba cheart sásra coigeartaithe agus laghdú bliantúil ar chnapshuim a chur i bhfeidhm maidir le ranníocaíochtaí Ballstát ag a raibh OIN per capita in 2017 faoi bhun mheán an Aontais. Ba cheart go bhfreagródh an laghdú do 3,8 cileagram arna iolrú faoi dhaonra 2017 na mBallstát lena mbaineann.

(8)

Thug Comhairle Eorpach an 17 go 21 Iúil 2020 dá haire, mar bhonn d’acmhainní dílse breise, go gcuirfidh an Coimisiún tograí ar aghaidh sa chéad seimeastar de 2021 maidir le sásra coigeartaithe carbóin ar theorainneacha agus maidir le tobhach digiteach d’fhonn iad a thabhairt isteach faoin 1 Eanáir 2023 ar a dhéanaí. D’iarr an Chomhairle Eorpach ar an gCoimisiún togra athbhreithnithe a chur ar aghaidh maidir le Córas Trádála Astaíochtaí AE, agus an fhéidearthacht é a leathnú chuig na hearnálacha eitlíochta agus muirí. Thángthas ar an gconclúid, gur le linn an chreata airgeadais ilbhliantúil don tréimhse ó 2021-2027 (“CAI 2021-2027”), go n-oibreoidh an tAontas chun acmhainní dílse eile a thabhairt isteach, lena bhféadfaí Cáin ar Idirbhearta Airgeadais a áireamh.

(9)

Tháinig Comhairle Eorpach an 17 go 21 Iúil 2020 ar an gconclúid gur cheart cuspóirí foriomlána na simplíochta, na trédhearcachta agus an chothromais, lena n-áirítear comhroinnt dualgas chóir, a úsáid mar threoir do shocruithe na n-acmhainní dílse. Tháinig sí ar an gconclúid freisin go bhfuil an Danmhairg, an Ísiltír, an Ostair agus an tSualainn, agus, i gcomhthéacs na tacaíochta don téarnamh agus don athléimneacht, chomh maith leis an nGearmáin, chun tairbhe a bhaint as ceartúcháin chnapshuime ar a ranníocaíochtaí bliantúla bunaithe ar OIN don tréimhse 2021-2027.

(10)

Ba cheart do na Ballstáit 25 % de mhéideanna na n-acmhainní dílse traidisiúnta arna mbailiú acu a choinneáil, mar chostais bhailiúcháin.

(11)

Ba cheart méadú ar na huasteorainneacha a bhunaítear sa Chinneadh seo maidir le hacmhainní dílse a bheith ag gabháil le comhtháthú an Chiste Eorpaigh Forbraíochta i mbuiséad an Aontais. Tá gá le corrlach leordhóthanach idir na híocaíochtaí agus uasteorainn na n-acmhainní dílse chun a áirithiú go mbeidh an tAontas in ann - i gcás ar bith - a oibleagáidí airgeadais a chomhlíonadh, fiú le linn cúlú eacnamaíoch.

(12)

Ba cheart corrlach leordhóthanach a chaomhnú faoi uasteorainneacha acmhainní dílse chun gur féidir leis an Aontas a oibleagáidí airgeadais agus a dhliteanais theagmhasacha uile a chumhdach a thagann chun bheith dlite in aon bhliain ar leith. Méid iomlán na n-acmhainní dílse a leithdháilfear ar an Aontas chun leithreasuithe bliantúla faoi chomhair íocaíochtaí a chumhdach, níor cheart go rachadh sé thar 1,40 % de shuim OINanna na mBallstát uile. Méid iomlán bliantúil na leithreasuithe faoi chomhair gealltanas a iontrálfar i mbuiséad an Aontais, níor cheart go rachadh sé thar 1,46 % de shuim OINanna na mBallstát uile.

(13)

Chun méid na n-acmhainní airgeadais a chuirtear ar fail don Aontas a choimeád gan athrú, is iomchuí uasteorainn na n-acmhainní dílse a choigeartú do leithreasuithe faoi chomhair íocaíochtaí agus do leithreasuithe faoi chomhair gealltanas arna sloinneadh mar chéatadán de OIN i gcás leasuithe ar Rialachán (AE) Uimh. 549/2013 ó Pharlaimint na hEorpa agus ón gComhairle (2) a bhfuil athruithe suntasacha ar leibhéal OIN mar thoradh orthu.

(14)

Cuireann tionchar eacnamaíoch ghéarchéim COVID-19 i dtreis an tábhacht a bhaineann lena áirithiú go bhfuil acmhainn airgeadais leordhóthanach ag an Aontas i gcás suaitheadh eacnamaíoch. Ní mór don Aontas na hacmhainní a sholáthar dó féin chun na cuspóirí sin a bhaint amach. Teastaíonn acmhainní airgeadais ar scála eisceachtúil chun aghaidh a thabhairt ar iarmhairtí ghéarchéim COVID-19, gan tuilleadh brú a chur ar airgeadais na mBallstát tráth atá a mbuiséid faoi ábhalbhrú cheana chun bearta náisiúnta eacnamaíocha agus sóisialta a mhaoiniú i ndáil leis an ngéarchéim. Dá bhrí sin, ba cheart freagairt eisceachtúil a bheith ann ar leibhéal an Aontais. Ar an gcúis sin, is iomchuí an Coimisiún a chumhachtú, ar bhonn eisceachtúil, chun iasacht shealadach suas le EUR 750 000 milliún i bpraghsanna 2018 ar mhargaí caipitil a fháil thar ceann an Aontais. D’úsáidfí suas le EUR 360 000 milliún den mhéid seo le haghaidh iasachtaí a chur ar fáil agus d’úsáidfí suas le EUR 390 000 milliún i bpraghsanna 2018 de na cistí a fuarthas ar iasacht le haghaidh caiteachais chun aghaidh a thabhairt ar iarmhairtí COVID-19 agus lena aghaidh sin amháin.

(15)

Ba cheart don fhreagairt eisceachtúil seo aghaidh a thabhairt ar iarmhairtí ghéarchéim COVID-19 agus a áirithiú nach dtiocfaidh sí chun cinn arís. Mar sin, ba cheart teorainn ama a chur leis an tacaíocht agus ba cheart formhór an chistithe a sholáthar díreach tar éis na géarchéime, rud a chiallaíonn gur cheart gealltanais dhlíthiúla i leith cláir arna maoiniú leis na hacmhainní breise sin a thabhairt faoin 31 Nollaig 2023. Beidh formheas na n-íocaíochtaí faoin tSaoráid Téarnaimh agus Athléimneachta faoi réir chomhlíonadh sásúil na ngarspriocanna agus na spriocanna ábhartha a leagtar amach sa Phlean Téarnaimh agus Athléimneachta, ar nithe iad a ndéanfar measúnú orthu i gcomhréir leis an nós imeachta ábhartha a leagtar amach sa Rialachán lena mbunaítear Saoráid Téarnaimh agus Athléimneachta, ina léirítear conclúidí na Comhairle Eorpaí an 17 go 21 Iúil 2020.

(16)

Chun an dliteanas a sheasamh a bhaineann leis na cistí atá sé beartaithe a fháil ar an iasacht, is gá na huasteorainneacha d’acmhainní dílse a ardú go hurghnách agus go sealadach. Mar sin, chun dliteanais uile an Aontais de thoradh a iasachtaí chun aghaidh a thabhairt ar iarmhairtí ghéarchéim COVID-19 a chumhdach, agus chun na críche sin amháin, ba cheart an uasteorainn do leithreasuithe faoi chomhair íocaíochtaí agus an uasteorainn do leithreasuithe faoi chomhair gealltanas araon a mhéadú 0,6 pointe céatadáin. An cumhachtú a thugtar don Choimisiún cistí a fháil ar iasacht ar mhargaí caipitil thar ceann an Aontais chun bearta lena dtugtar aghaidh ar iarmhairtí ghéarchéim COVID-19 a mhaoiniú agus chun na críche sin amháin, baineann sí go dlúth leis an méadú a tháinig ar uasteorainn na n-acmhainní dílse dá bhforáiltear sa Chinneadh seo agus, i ndeireadh na dála, le feidhmiú chóras acmhainní dílse an Aontais. Dá réir sin, ba cheart an cumhachtú sin a áireamh sa Chinneadh seo. De bharr chineál na hoibríochta seo nach bhfacthas a leithéid riamh agus mhéid eisceachtúil na gcistí atá le fáil ar iasacht, teastaíonn cinnteacht maidir le méid foriomlán dhliteanas an Aontais agus maidir leis na gnéithe bunriachtanacha a bhaineann lena aisíoc, chomh maith le straitéis iasachtaíochta éagsúlaithe a chur chun feidhme.

(17)

Tá gá leis an méadú ar uasteorainneacha na n-acmhainní dílse toisc nach mbeadh na huasteorainneacha leordhóthanach murach sin chun a áirithiú go mbeadh fáil ar acmhainní leordhóthanacha a theastaíonn ón Aontas chun na dliteanais a eascraíonn as an gcumhachtú eisceachtúil sealadach chun cistí a fháil ar iasacht a chumhdach. Is ar bhonn sealadach freisin a bheidh gá le dul ar iontaoibh an leithdháilte bhreise seo ós rud é go laghdófar na hoibleagáidí airgeadais ábhartha agus na dliteanais theagmhasacha ábhartha thar thréimhse ama de réir mar a aisíoctar na cistí a fhaightear ar iasacht agus de réir mar a théann na hiasachtaí in aibíocht. Dá bhrí sin, ba cheart go rachadh an méadú in éag nuair a bheidh na cistí uile a fuarthas ar iasacht aisíoctha agus nuair a bheidh deireadh leis na dliteanais theagmhasacha uile a bhaineann le hiasachtaí arna dtabhairt ar bhonn na gcistí sin, ar cheart gur faoin 31 Nollaig 2058 ar a dhéanaí a scoirfeadh sé.

(18)

Maidir le gníomhaíochtaí an Aontais chun aghaidh a thabhairt ar iarmhairtí ghéarchéim COVID-19, caithfidh siad a bheith suntasach agus ní mór iad a dhéanamh thar thréimhse measartha gearr. Caithfidh iasacht na gcistí teacht leis an uainiú sin. Mar sin, ba cheart deireadh a chur le gníomhaíocht nua ghlaniasachtaíochta ar a dhéanaí ag deireadh 2026. Tar éis 2026, ba cheart oibríochtaí chun iasacht a fháil a theorannú go docht d’oibríochtaí athmhaoinithe chun bainistiú éifeachtach fiachais a áirithiú. Nuair atá na hoibríochtaí á gcur chun feidhme ag an gCoimisiún trí straitéis cistiúcháin éagsúlaithe ba cheart dó an úsáid is fearr a bhaint as acmhainn na margaí chun méideanna cistí suntasacha den sórt sin a fhaightear ar iasacht agus a bhfuil aibíochtaí difriúla ag gabháil leo, lena n-áirítear maoiniú gearrthéarmach chun críche bainistithe airgid thirim, a iompar agus na coinníollacha aisíocaíochta is buntáistí a áirithiú. Ina theannta sin, ba cheart don Choimisiún Parlaimint na hEorpa agus an Chomhairle a chur ar an eolas go tráthrialta agus go cuimsitheach maidir le gach gné dá bhainistiú fiachais. A luaithe a bheidh na sceidil íocaíochta do na beartais a bheidh le maoiniú leis an iasachtaíocht ar eolas, cuirfidh an Coimisiún féilire eisiúna in iúl do Pharlaimint na hEorpa agus don Chomhairle ina mbeidh na dátaí eisiúna agus na méideanna a bhfuiltear ag súil leo don bhliain atá le teacht chomh maith le plean ina leagfar amach na híocaíochtaí príomhshuime agus úis a bhfuiltear ag súil leo. Ba cheart don Choimisiún an féilire sin a thabhairt cothrom le dáta go rialta.

(19)

Maidir le haisíoc a dhéanamh ar chistí a fhaightear ar iasacht chun tacaíocht neamh-inaisíoctha a thabhairt nó chun tacaíocht inaisíoctha trí bhíthin ionstraimí airgeadais a sholáthar nó trí sholáthar a dhéanamh do ráthaíochtaí buiséadacha, chomh maith leis an ús dlite a íoc, ba cheart an t-aisíoc sin a chistiú trí bhuiséad an Aontais. Na cistí a fhaightear ar iasacht a úsáidtear chun iasachtaí a thabhairt do Bhallstáit, ba cheart iad a aisíoc trí na suimeanna a fhaightear ó na Ballstáit is tairbhithe. Is gá na hacmhainní a leithdháileadh agus a chur ar fáil don Aontas chun gur féidir leis a oibleagáidí airgeadais agus a dhliteanais theagmhasacha uile a eascraíonn as an gcumhachtú eisceachtúil agus sealadach chun cistí a fháil ar iasacht in aon bhliain ar leith agus faoi aon imthosca, i gcomhréir le hAirteagal 310(4) agus le hAirteagal 323 den Chonradh ar Fheidhmiú an Aontais Eorpaigh (CFAE).

(20)

Méideanna nach n-úsáidtear le haghaidh íocaíochtaí úis mar a fhoráiltear, úsáidfear iad le haghaidh aisíocaíochtaí luatha roimh dheireadh CAI 2021-2027, le híosmhéid, agus is féidir iad a mhéadú os cionn an leibhéil sin ar choinníoll gur tugadh isteach acmhainní dílse nua tar éis 2021 i gcomhréir leis an nós imeachta a leagtar amach sa tríú mír d’Airteagal 311 CFAE. Ba cheart na dliteanais uile a thabhaítear de bharr an chumhachtaithe eisceachtúil agus shealadaigh sin chun cistí a fháil ar iasacht a bheith aisíoctha go hiomlán faoin 31 Nollaig 2058. Chun a áirithiú go ndéanfar bainistiú buiséadach éifeachtúil ar na leithreasuithe is gá chun aisíocaíochtaí i leith na gcistí a fhaightear ar iasacht a chumhdach, is iomchuí foráil a dhéanamh go bhféadfaí gealltanais bhuiséadacha bhunúsacha a mhiondealú i dtráthchodanna bliantúla.

(21)

Ba cheart do sceideal na n-aisíocaíochtaí prionsabal na bainistíochta fónta airgeadais a urramú agus méid iomlán na gcistí arna bhfáil ar iasacht ag an gCoimisiún a fháil faoin gcumhachtú a chumhdach d’fhonn laghdú seasta intuartha ar dhliteanais a bhaint amach le linn na tréimhse foriomláine. Chun na críche sin, na méideanna atá dlite ag an Aontas i mbliain ar leith chun an phríomhshuim a aisíoc, níor cheart go rachadh siad thar 7,5 % den uasmhéid EUR 390 000 milliún le haghaidh caiteachais.

(22)

De bharr ghnéithe chumhachtú an Choimisiúin ar cumhachtú é atá eisceachtúil, sealadach agus teoranta, chun cistí a fháil ar iasacht le haghaidh a thabhairt ar iarmhairtí ghéarchéim COVID-19, ba cheart a shoiléiriú nár cheart don Aontas, de ghnáth, úsáid a bhaint as cistí a fhaightear ar iasacht ar na margaí caipitil chun caiteachas oibríochtúil a mhaoiniú.

(23)

Chun a áirithiú gur féidir leis an Aontas a oibleagáidí dlíthiúla i leith tríú páirtithe a chomhlíonadh in am trátha i gcónaí, ba cheart rialacha ar leith a chur ar fáil leis an gCinneadh seo lena n-údarófar an Coimisiún, le linn na tréimhse méadaithe shealadaigh sin, ar na huasteorainneacha acmhainní dílse chun iarraidh ar na Ballstáit na hacmhainní airgid ábhartha a chur ar fáil go sealadach i gcás nach leor na leithreasuithe údaraithe a iontráiltear i mbuiséad an Aontais chun dliteanais a eascraíonn as an iasachtaíocht a bhaineann leis an méadú sealadach sin a chumhdach. Níor cheart don Choimisiún a bheith in ann glao ar acmhainní airgid thirim ach amháin, mar an rogha dheireanach atá aige, mura féidir leis an leachtacht is gá a ghiniúint trí bhearta eile bainistíochta airgid thirim gníomhaí a chur i ngníomh, lena n-áirítear, más gá, trí dhul ar iontaoibh maoinithe ghearrthéarmaigh ar mhargaí caipitil, chun a áirithiú go gcomhlíonfar oibleagáidí an Aontais i leith iasachtóirí in am trátha. Is iomchuí a fhoráil gur cheart don Choimisiún glaonna den sórt sin a fhógairt do na Ballstáit roimh ré mar is cuí agus gur cheart iad a dhéanamh pro rata go docht le hioncam buiséid measta gach Ballstáit, agus i gcás ar bith, agus iad a bheith teoranta don sciar atá acu den uasteorainn acmhainní dílse atá méadaithe go sealadach, arb ionann í agus 0,6 % de OIN na mBallstát. Mar sin féin, má mhainníonn Ballstát, go hiomlán nó i bpáirt, glao a chomhlíonadh in am, nó má thugann sé fógra don Choimisiún nach mbeidh sé in ann glao a chomhlíonadh, ba cheart an Coimisiún a údarú mar sin féin, ar bhonn sealadach, glaonna breise a dhéanamh ar Bhallstáit eile ar bhonn pro rata. Is iomchuí foráil a dhéanamh d’uasmhéid a fhéadfaidh an Coimisiún a ghlao go bliantúil ar Bhallstát. Táthar ag súil go gcuirfidh an Coimisiún na tograí is gá isteach chun go ndéanfar an caiteachas atá cumhdaithe ag méideanna na n-acmhainní airgid thirim a chuir na Ballstáit ar fáil go sealadach a iontráil i mbuiséad an Aontais chun a áirithiú go gcuirfear na hacmhainní sin san áireamh a luaithe is féidir chun acmhainní dílse ó na Ballstáit a chreidiúnú i gcuntais, i.e. i gcomhréir leis an gcreat dlíthiúil is infheidhme agus ar an gcaoi sin ar bhonn na n-eochracha OIN faoi seach, agus gan dochar d’acmhainní dílse eile ná d’ioncam eile.

(24)

Faoin gceathrú mír d’Airteagal 311 den Chonradh ar Fheidhmiú an Aontais Eorpaigh glacfar Rialachán ón gComhairle lena leagfar síos bearta cur chun feidhme do chóras acmhainní dílse an Aontais. Ba cheart forálacha de chineál ginearálta agus teicniúil a áireamh i mbearta den sórt sin, atá infheidhme maidir le gach catagóir d’acmhainní dílse. Ba cheart a áireamh ar na bearta sin rialacha mionsonraithe chun an comhardú a ríomh agus a bhuiséadú, chomh maith leis na forálacha agus na socruithe is gá chun bailiú acmhainní dílse a rialú agus a mhaoirsiú.

(25)

Níor cheart an Cinneadh seo a theacht i bhfeidhm go dtí go bhformheasfaidh gach Ballstát é i gcomhréir lena rialacha bunreachtúla féin, sa chaoi go n-urramófar go hiomlán an cheannasacht náisiúnta. Thug Comhairle Eorpach an 17 go 21 Iúil 2020 dá haire go bhfuil sé ar intinn ag na Ballstáit bogadh ar aghaidh le formheas an Chinnidh seo a luaithe is féidir.

(26)

Chun críocha comhsheasmhachta, leanúnachais agus deimhneachta dlíthiúla, is gá forálacha a leagan síos chun aistriú rianúil ón gcóras a tugadh isteach le Cinneadh 2014/335/AE, Euratom ón gComhairle (3) go dtí an ceann dá bhforáiltear leis an gCinneadh seo.

(27)

Ba cheart Cinneadh 2014/335/AE, Euratom a aisghairm.

(28)

Chun críocha an Chinnidh seo, ba cheart gach suim airgid a shloinneadh in euro.

(29)

De bharr an ghá atá ann iasachtaíocht a chumasú go práinneach d’fhonn bearta airgeadais chun aghaidh a thabhairt ar iarmhairtí ghéarchéim COVID-19 a mhaoiniú, ba cheart don Chinneadh seo teacht i bhfeidhm an chéad lá den chéad mhí tar éis an ceann is déanaí de na fógraí maidir leis na nósanna imeachta a ghlacadh a bheith tugtha chun críche chun an Cinneadh seo.

(30)

Chun an t-aistriú go dtí an córas leasaithe acmhainní dílse a áirithiú agus chun go mbeidh an Cinneadh seo i gcomhthráth leis an mbliain airgeadais, ba cheart feidhm a bheith ag an gCinneadh seo ón 1 Eanáir 2021,