17.7.2015   

GA

Iris Oifigiúill an Aontais Eorpaigh

L 191/6

(1)

Foráiltear le hAirteagal 25 de Rialachán (AE) Uimh. 1306/2013 ó Pharlaimint na hEorpa agus ón gComhairle (3) go bhfuil cúlchiste atá ceaptha chun tacaíocht bhreise a chur ar fáil d'earnáil na talmhaíochta i gcás géarchéimeanna tromchúiseacha a dhéanann difear do tháirgeacht talmhaíochta nó do dháileadh talmhaíochta le bunú trí laghdú a chur i bhfeidhm, ag tús gach bliana, ar íocaíochtaí díreacha leis an sásra smachta airgeadais dá dtagraítear in Airteagal 26 den Rialachán sin.

(2)

Le hAirteagal 26(1) de Rialachán (AE) Uimh. 1306/2013, d'fhonn a áirithiú go gcomhlíontar na huasteorainneacha bliantúla a leagtar amach i Rialachán (AE, Euratom) Uimh. 1311/2013 ón gComhairle (4) ar mhaoiniú an chaiteachais a bhaineann leis an margadh agus ar mhaoiniú íocaíochtaí díreacha, foráiltear go bhfuil ráta coigeartaithe d'íocaíochtaí díreacha le cinneadh nuair a léirítear sna réamhaisnéisí ar mhaoiniú na mbeart a mhaoinítear faoin bhfo-uasteorainn sin do bhliain áirithe airgeadais go sárófar na huasteorainneacha bliantúla is infheidhme.

(3)

Is é EUR 441,6 milliún i bpraghsanna reatha iomlán an chúlchiste, le haghaidh géarchéimeanna san earnáil talmhaíochta, atá le háireamh i nDréachtbhuiséad 2016 ón gCoimisiún. Chun an méid sin a chumhdach, ní mór don sásra smachta airgeadais feidhm a bheith aige ar íocaíochtaí díreacha faoi na scéimeanna tacaíochta atá liostaithe in Iarscríbhinn I a ghabhann le Rialachán (AE) Uimh. 1307/2013 ó Pharlaimint na hEorpa agus ón gComhairle (5) i ndail leis an mbliain féilire 2015.

(4)

Léiríonn na réamhaisnéisí roimh ré ar íocaíochtaí díreacha agus ar chaiteachas a bhaineann leis an margadh agus a bheidh le cinneadh i nDréachtbhuiséad 2016 ón gCoimisiún nach bhfuil aon ghá le tuilleadh smachta airgeadais.

(5)

Le hAirteagal 26(2) de Rialachán (AE) Uimh. 1306/2013, ceanglaítear ar an gCoimisiún togra maidir leis an ráta coigeartaithe a chur faoi bhráid Pharlaimint na hEorpa agus na Comhairle tráth nach déanaí ná an 31 Márta den bhliain féilire a bhfuil feidhm ag an ráta coigeartaithe sin i ndáil léi.

(6)

Mar riail ghinearálta, feirmeoirí a chuireann iarratas ar chabhair isteach le haghaidh íocaíochtaí díreacha i ndáil le bliain féilire amháin (N), íoctar iad laistigh de thréimhse sheasta íocaíochta atá laistigh den bhliain airgeadais (N + 1). Mar sin féin, féadfaidh na Ballstáit íocaíochtaí déanacha a dhéanamh le feirmeoirí tar éis na tréimhse íocaíochta sin, laistigh de theorainneacha ama áirithe. Féadfar íocaíochtaí déanacha den sórt sin a dhéanamh i mbliain airgeadais dá éis sin. Nuair a chuirtear smacht airgeadais i bhfeidhm maidir le bliain féilire ar leith, níor cheart an ráta coigeartaithe a chur i bhfeidhm maidir le híocaíochtaí ar cuireadh iarratais ar chabhair isteach ina leith le linn blianta féilire nach iad an bhliain féilire a bhfuil feidhm ag an smacht airgeadais maidir léi. Dá bhrí sin, d'fhonn a áirthiú go gcuirfear cóir chomhionann ar fheirmeoirí, is iomchuí foráil a dhéanamh nach bhfuil an ráta coigeartaithe le cur i bhfeidhm ach amháin maidir le híocaíochtaí ar cuireadh iarratais ar chabhair isteach ina leith le linn na bliana féilire a bhfuil feidhm ag an smacht airgeadais maidir léi, beag beann ar an tráth a dhéantar an íocaíocht leis na feirmeoirí.

(7)

Le hAirteagal 8(1) de Rialachán (AE) Uimh. 1307/2013, foráiltear nach bhfuil feidhm ag an ráta coigeartaithe a chuirtear i bhfeidhm ar íocaíochtaí díreacha arna gcinneadh i gcomhréir le hAirteagal 26 de Rialachán (AE) Uimh. 1306/2013 ach maidir le híocaíochtaí díreacha atá os cionn EUR 2 000 atá le deonú d'fheirmeoirí sa bhliain chomhfhreagrach féilire. Ina theannta sin, toisc gur de réir a chéile a thabharfar na híocaíochtaí díreacha isteach, foráiltear le hAirteagal 8(2) de Rialachán (AE) Uimh. 1307/2013 nach bhfuil feidhm le bheith ag an ráta coigeartaithe maidir leis an mBulgáir ná leis an Rómáin ach amháin ón 1 Eanáir 2016 ar aghaidh agus nach bhfuil feidhm le bheith aige maidir leis an gCróit ach amháin ón 1 Eanáir 2022 ar aghaidh. Níor cheart, dá bhrí sin, feidhm a bheith ag an ráta coigeartaithe atá le cinneadh leis an Rialachán seo maidir le híocaíochtaí le feirmeoirí sna Ballstáit sin.

(8)

Go dtí an 1 Nollaig 2015, féadfaidh an Coimisiún an ráta coigeartaithe arna shocrú leis an Rialachán seo oiriúnú, ar bhonn faisnéis nua atá aige, de bhun Airteagal 26(4) de Rialachán (AE) Uimh. 1306/2013,