20.3.2014   

GA

Iris Oifigiúil an Aontais Eorpaigh

38

(1)

De bhun Airteagal 13(1) de Rialachán (AE) Uimh. 510/2011 ó Pharlaimint na hEorpa agus ón gComhairle (3), tá an Coimisiún le hathbhreithniú a dhéanamh ar na rialacha mionsonraithe maidir leis an sprioc 147 g CO2/km a bhaint amach faoi 2020, faoi réir a indéantachta a dhaingniú, lena n-áirítear na foirmlí atá leagtha amach in Iarscríbhinn I a ghabhann leis an Rialachán sin agus na maoluithe dá bhforáiltear in Airteagal 11. Is iomchuí go bhfuil an Rialachán seo chomh neodrach agus is féidir ó thaobh iomaíochta de, cothrom ó thaobh cúrsaí sóisialta de agus inbhuanaithe.

(2)

I bhfianaise an naisc idir astaíochtaí CO2 agus ídiú breosla, d’fhéadfaí freisin, trí rialacha mionsonraithe a shainiú maidir le hastaíochtaí CO2 ó fheithiclí tráchtála éadroma a laghdú, cuidiú le hídiú breosla agus na costais ábhartha a laghdú d’úinéirí na bhfeithiclí sin ar bhealach costéifeachtach.

(3)

Is iomchuí soiléiriú a dhéanamh, d’fhonn comhlíonadh na sprice 147 g CO2/km a fhíorú, gur cheart leanúint le hastaíochtaí CO2 a thomhas i gcomhréir le Rialachán (CE) Uimh. 715/2007 ó Pharlaimint na hEorpa agus ón gComhairle (4) agus a bhearta cur chun feidhme, agus le teicneolaíochtaí nuálacha.

(4)

De réir na hanailíse teicniúla a rinneadh don mheasúnú tionchair, tá na teicneolaíochtaí chun an sprioc 147 g CO2/km a chomhlíonadh ar fáil agus d’fhéadfaí na laghduithe atá de dhíth a bhaint amach ag costas níos ísle ná mar a bhí measta san anailís a rinneadh roimhe seo sular glacadh an Rialachán (AE) Uimh. 510/2011. Chomh maith leis sin, tá laghdú tagtha freisin ar an difríocht idir na meánastaíochtaí CO2 reatha a bhaineann go sonrach le feithiclí tráchtála éadroma nua agus an sprioc de 147 g CO2/km. Dá bhrí sin, tá sé dearbhaithe go bhfuil sé indéanta é sin a bhaint amach faoi 2020.

(5)

Mar aitheantas ar an tionchar díréireach ar na monaróirí is lú a eascraíonn as comhlíonadh na spriocanna sonracha astaíochta a shainmhínítear ar bhonn áirgiúlacht na feithicle, ar ualach mór riaracháin an nós imeachta maolaithe agus ar a laghad a baineadh d’astaíochtaí CO2 na bhfeithiclí a dhíolann na monaróirí seo, ba cheart monaróirí atá freagrach as níos lú ná 1 000 feithicil tráchtála éadrom nua in aghaidh na bliana, a chláraítear san Aontas go bliantúil, a eisiamh ó raon feidhme na sprice maidir le hastaíochtaí sonracha agus ó phréimh na n-astaíochtaí iomarcacha.

(6)

Ba cheart go ndéanfaí simpliú ar an nós imeachta le haghaidh maolú a dheonú do mhonaróirí ísealtáirgeachta le go mbeidh níos mó solúbthachta ann maidir le cathain a bhfuil iarratas ar maolú le tíolacadh ag monaróirí den sórt sin agus cathain a bhfuil an Coimisiún le maolú den sórt sin a dheonú.

(7)

Le go mbeidh tionscal na ngluaisteán in ann tabhairt faoi infheistíocht agus faoi nuálaíocht go fadtéarmach, is rud inmhianaithe é tásca a thabhairt maidir le conas gur cheart Rialachán (AE) Uimh. 510/2011 a leasú don tréimhse tar éis 2020. Ba cheart do na tásca sin bheith bunaithe ar mheasúnú ar an ráta laghdaithe is gá i gcomhréir le spriocanna aeráide fadtéarmacha an Aontais agus ar na himpleachtaí maidir le teicneolaíocht chost-éifeachtúil do laghdú CO2 a fhorbairt d’fheithiclí tráchtála éadroma. Ba cheart don Choimisiún athbhreithniú a dhéanamh ar ghnéithe den sórt sin faoi 2015 agus tuarascáil a chur faoi bhráid Pharlaimint na hEorpa agus na Comhairle maidir le torthaí an athbhreithnithe sin. Ba cheart a áireamh sa tuarascáil sin, más iomchuí, tograí le haghaidh leasú a dhéanamh ar Rialachán (AE) Uimh. 510/2011 maidir le spriocanna astaíochta CO2 a bhunú le haghaidh feithiclí tráchtála éadroma nua don tréimhse tar éis 2020, lena n-áirítear tograí i dtaca leis an deis a d’fhéadfadh a bheith ann sprioc réalaíoch agus indéanta a leagan síos do 2025, bunaithe ar mheasúnú dearfach tionchair lena ndéanfaí iomaíochas leanúnach thionscal na ngluaisteán a mheas agus na tionscail a bhraitheann air, agus conair shoiléir laghdaithe astaíochtaí á saothrú i gcomhthráth i gcomhréir le spriocanna aeráide fadtéarmacha an Aontais. Agus na tograí sin á ndréachtú aige, ba cheart don Choimisiún a áirithiú go mbeidh siad chomh neodrach agus is féidir ó thaobh iomaíochta de agus go mbeidh siad cothrom ó thaobh cúrsaí sóisialta de agus inbhuanaithe.

(8)

Is codanna sonracha den lorg foriomlán carbóin atá mar thoradh ar iompair de bhóthar faoi láthair astaíochtaí gás ceaptha teasa a bhaineann le soláthar fuinnimh agus déantús feithiclí agus is dócha go mbainfidh tábhacht mhéadaithe shonrach leo amach anseo. Ba cheart, dá bhrí sin, go ndéanfaí gníomh beartais chun cuidiú le monaróirí na réitigh is fearr is féidir a bhaint amach lena gcuirfí san áireamh, go háirithe, astaíochtaí gás ceaptha teasa a bhaineann le gineadh fuinneamh a sholáthraítear d’fheithiclí, amhail leictreachas agus breoslaí malartacha, agus ba cheart a áirithiú nach ndéanfaidh na hastaíochtaí réamhtheachtacha sin dochar do na tairbhí a bhainfeadh leis an úsáid fheabhsaithe d’fhuinneamh oibríochtúil ag feithiclí, rud is aidhm do Rialachán (AE) Uimh. 510/2011.

(9)

De bhun Airteagal 13(3) de Rialachán (AE) Uimh. 510/2011, tá sé de dhualgas ar an gCoimisiún tuarascáil a fhoilsiú maidir leis an teacht atá ar shonraí maidir leis an lorg agus an bpálasta agus maidir le húsáid a bhaint astu mar pharaiméadair áirgiúlachta maidir le spriocanna astaíochtaí CO2 i Rialachán 510/2011 mar atá curtha in iúl sna foirmlí atá leagtha amach in Iarscríbhinn I a ghabhann le Rialachán (AE) Uimh. 510/2011. Cé go bhfuil na sonraí sin ar fáil agus go bhfuil measúnú déanta sa mheasúnú tionchair ar an úsáid ab fhéidir a bhaint astu, táthar den tuairim go bhfuil sé níos éifeachtúla ó thaobh costais de mais in ord reatha a choinneáil mar pharaiméadar áirgiúlachta don sprioc 2020 le haghaidh feithiclí tráchtála éadroma.

(10)

Is iomchuí an cur chuige maidir leis an sprioc a shocrú bunaithe ar gaol líneach idir áirgiúlacht na feithicle tráchtála éadroime agus a sprioc maidir le hastaíochtaí CO2 mar a léirítear é sna foirmlí atá leagtha amach in Iarscríbhinn I a ghabhann le Rialachán (AE) Uimh. 510/2011 a choinneáil, i ngeall is go bhfágann sé seo go mbeifear in ann éagsúlacht a choinneáil i margadh na bhfeithiclí tráchtála éadroma agus go mbeidh ar chumas na monaróirí dul i ngleic le riachtanais dhifriúla na gcustaiméirí, nach mbeidh saobhadh iomaíochta nach bhfuil call leis ann dá bharr. Is iomchuí áfach an cur chuige sin a nuashonrú chun léiriú a thabhairt ar na sonraí is déanaí atá ar fáil maidir le líon na bhfeithiclí tráchtála éadroma nua a cláraíodh.

(11)

Ina mheasúnú tionchair, tá measúnú déanta ag an gCoimisiún ar an teacht atá ar shonraí loirg agus ar úsáid an loirg mar pharaiméadair fhóntais i bhfoirmlí atá leagtha amach in Iarscríbhinn I a ghabhann le Rialachán (AE) Uimh. 510/2011. Ar bhonn an mheasúnaithe sin tá an Coimisiún den tuairim gurb é an mhais an paraiméadar fóntais is ceart a úsáid san fhoirmle 2020.

(12)

Faoi Rialachán (AE) Uimh. 43/2009 ó Pharlaimint na hEorpa agus ón gComhairle (5) tá sé ina cheangal ar an gCoimisiún tabhairt faoi mheasúnú tionchair ar mhaithe le hathbhreithniú a dhéanamh ar na nósanna imeachta tástála d’fhonn léiriú leordhóthanach a thabhairt ar na hastaíochtaí CO2 a thugann gluaisteáin uathu i ndáiríre. Le Rialachán (AE) Uimh. 510/2011 leathnaítear an athbhreithniú a dhéantar ar nósanna imeachta tástálacha chun feithiclí tráchtála éadroma a áirithiú. Is gá leasú a dhéanamh ar an “Sraith Nua Eorpach Tiomána” (NEDC) atá in úsáid faoi láthair, chun cur in iúl na ndálaí tiomána iarbhír a áirithiú léi agus chun measúnú astaíochtaí CO2 agus ídiú breosla faoina gcumas a sheachaint. Ba cheart nós imeachta nua a bheidh níos réadúla agus níos iontaofa a chomhaontú a luaithe is féidir. Tá an obair chuige sin idir lámha leis an bhforbairt atá á déanamh ar nós imeachta tástála feithiclí éadroim domhanda comhchuibhithe (WLTP) faoi chuimsiú Choimisiún Eacnamaíochta na Náisiún Aontaithe don Eoraip ach tá clabhsúr le cur uirthi fós. D’fhonn a áirithiú go gcuirfear astaíochtaí sonracha CO2 a shanntar do ghluaisteáin nua phaisinéirí agus feithiclí tráchtála éadroma nua níos fearr i gcomhréir leis na hastaíochtaí iarbhír a ghintear faoi dhálaí gnáthúsáide ba cheart WLTP a chur i bhfeidhm a luaithe is féidir. I bhfianaise an méid sin, bunaítear le hIarscríbhinn I a ghabhann le Rialachán (AE) Uimh. 510/2011 uasteorainneacha astaíochtaí le haghaidh 2020 mar a thomhaistear iad i gcomhréir le Rialachán (CE) Uimh. 715/2007 agus le hIarscríbhinn XII a ghabhann le Rialachán (CE) Uimh. 692/2008 ón gCoimisiún (6). Nuair a leasófar na nósanna imeachta tástála, ba cheart na teorainneacha a leagtar amach in Iarscríbhinn I a ghabhann le Rialachán (AE) Uimh. 510/2011 a choigeartú lena áirithiú go mbeidh an ghéire chéanna i bhfeidhm ar mhonaróirí agus ar aicmí feithiclí. Dá réir sin, ba cheart don Choimisiún staidéar láidir comhghaoil a dhéanamh ar NEDC agus ar na sraitheanna nua tástála WLTP chun go n-áiritheofaí go gcuirtear in iúl léi sin na dálaí tiomána iarbhír.

(13)

D’fhonn a áirithiú go léireofar fíorastaíochtaí go leordhóthanach agus gurb inchomparáide go hiomlán na luachanna tomhaiste CO2, ba cheart don Choimisiún a áirithiú, ionas nach mbeidh na monaróirí in ann leas a bhaint as solúbthacht i dtimthriall na tástála, go ndéanfar sainmhíniú beacht ar na gnéithe sin den nós imeachta tástála a mbíonn tionchar sonrach acu ar astaíochtaí CO2 tomhaiste. Ba cheart aghaidh a thabhairt ar na diallais idir luachanna astaíochta cineálcheadaithe CO2 agus na hastaíochtaí a thig as feithiclí a chuirtear ar díol, lena n-áirítear trí mhachnamh a dhéanamh ar nós imeachta comhlíonta a thabhairt isteach d’fheithiclí atá i seirbhís, lenar féidir a áirithiú go ndéanfar tástáil neamhspleách ar shampla ionadaíoch feithiclí, agus trí mhachnamh a dhéanamh freisin ar na bealaí chun aghaidh a thabhairt ar chásanna lena léirítear difríochtaí sonracha idir astaíocht CO2 suirbhé agus astaíochtaí chéad cineálcheadaithe CO2.

(14)

Ós rud é nach féidir leis na Ballstáit cuspóir an Rialacháin seo, eadhon sainmhíniú a dhéanamh ar na rialacha mionsonraithe i dtaca le sprioc 2020 maidir le hastaíochtaí CO2 ó fheithiclí tráchtála éadroma nua, a bhaint amach go leordhóthanach ach gur fearr, de bharr a fhairsinge agus a iarmhairtí, is féidir é a bhaint amach ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta, mar a leagtar amach é in Airteagal 5 den Chonradh ar an Aontas Eorpach. I gcomhréir le prionsabal na comhréireachta, mar a leagtar amach é san Airteagal sin, ní théann an Rialachán seo níos faide ná mar is gá chun an cuspóir sin a bhaint amach.

(15)

Ba cheart, dá bhrí sin, Rialachán (AE) Uimh. 510/2011 a leasú dá réir,

(1)

in Airteagal 1, cuirtear an méid seo a leanas in ionad mhír 2:

‘2.   Ó 2020 ar aghaidh, socraítear sprioc de 147 g CO2/km sa Rialachán seo do mheánastaíochtaí na bhfeithiclí tráchtála éadroma nua a chláraítear san Aontas arna dtomhas i gcomhréir le Rialachán (CE) Uimh. 715/2007 agus a bhearta cur chun feidhme, agus i gcomhréir lena theicneolaíochtaí nuálacha.’.

(2)

in Airteagal 2, cuirtear mír 4 seo a leanas isteach:

‘4.   Ní bheidh feidhm ag Airteagal 4, Airteagal 8(4)(b) agus (c), Airteagal 9 ná Airteagal 10(1)(a) agus (c) i leith monaróra atá, in éineacht leis na gnóthais uile atá nasctha leis, freagrach as níos lú ná 1 000 feithicil tráchtála éadrom nua a cláraíodh san Aontas sa bhliain féilire roimhe sin.’.

(3)

in Airteagal 11(3), scriostar an abairt dheireanach.

(4)

Leasaítear Airteagal 12 mar a leanas:

(5)

Leasaítear Airteagal 13 mar seo a leanas:

(6)

In Airteagal 14, cuirtear an mhír seo a leanas isteach:

‘2a.   I gcás nach dtugann an coiste dá dtagraítear i mír 1 aon tuairim, ní dhéanfaidh an Coimisiún an dréachtghníomh cur chun feidhme a ghlacadh agus beidh feidhm ag an tríú fomhír d’Airteagal 5(4) de Rialachán (AE) Uimh. 182/2011.’.

(7)

I bpointe 1 d’Iarscríbhinn I, cuirtear an pointe seo isteach:

‘(c)	ó 2020: más rud é: M = mais na feithicle i gcileagraim (kg) M0 = an luach arna ghlacadh de bhun Airteagal 13(5) a = 0,096.’