25.4.2013   

GA

Iris Oifigiúill an Aontais Eorpaigh

C NaN/1

FÓGRA COMÓRTAS OSCAILTE

EPSO/AD/252/13 (AD 9) agus EPSO/AD/253/13 (AD 12)

(2013/C 118 A/01)

Tá an Oifig Eorpach um Roghnú Foirne (EPSO) ag eagrú comórtais oscailte ar bhonn trialacha chun painéal a thiomsú óna n-earcófar

CINN AONAID (1)

A BHFUIL SAORÁNACHT NA CRÓITE ACU (HR)

sna réimsí seo a leanas:

1.

Dlí

2.

Eacnamaíocht

3.

Riarachán poiblí Eorpach

Is é is aidhm do na comórtais seo painéil a thiomsú chun poist fholmha sna institiúidí Eorpacha a líonadh, sa Choimisiún Eorpach go háirithe.

Roimh duit iarratas a chur isteach, ní mór an treoir a foilsíodh in Iris Oifigiúil C 270 A an 7 Meán Fómhair 2012 agus ar shuíomh gréasáin EPSO a léamh go grinn, seachas pointí 4, 5.3, 5.4, 6.2 agus 6.3. Cuirtear an téacs atá san iarscríbhinn a ghabhann leis seo in ionad phointí 5.3, 5.4 agus 6.2.

Is cuid dhílis den fhógra comórtais an treoir sin agus cuideoidh sí leat rialacha na nósanna imeachta agus na bealaí ar a gcuirtear iarratas isteach a thuiscint.

AN CLÁR ÁBHAR

I.

CÚLRA

II.

DUALGAIS

III.

INCHÁILITHEACHT

IV.

TRIALACHA IONTRÁLA

V.

CEAD ISTEACH SA CHOMÓRTAS

VI.

IONAD MEASÚNAITHE AGUS TRIALACHA

VII.

PAINÉIL

VIII.

CONAS IARRATAS A CHUR ISTEACH

IARSCRÍBHINN

I.   CÚLRA

1.

 Líon na n-iarrthóirí a n-éireoidh leo i ngach comórtas agus i ngach réimse

EPSO/AD/252/13 (AD 9)

EPSO/AD/253/13 (AD 12)

1.

 Dlí

5

1.

 Dlí

4

2.

 Eacnamaíocht

8

2.

 Eacnamaíocht

6

3.

 Riarachán poiblí Eorpach

7

3.

 Riarachán poiblí Eorpach

5

2.

 Nótaí

Ní féidir clárú ach d'aon chomórtas amháin agus d'aon réimse amháin. Ní mór an rogha sin a dhéanamh tráth an chlárúcháin ar líne agus ní féidir é a athrú tar éis duit d'iarratas a dhearbhú agus a bhailíochtú ar líne.

Mar sin féin, mura gcomhlíonann tú coinníollacha iontrála chomórtas AD 12 ach go gcomhlíonann tú coinníollacha chomórtas AD 9, is féidir leis an mbord roghnúcháin, má thoilíonn tú chuige, d'iarratas a aistriú chuig an comórtas sin. Déanfar an t-aistriú sin ag céim na hiontrála.

Iarrtar ar iarrthóirí a thabhairt dá n-aire go bhfuil an comórtas seo á eagrú go príomha lena áirithiú go ndéanfar íosmhéid daoine a chomhtháthú i seirbhís shibhialta an Aontais Eorpaigh mar ullmhú d'aontachas na Cróite. Is gá sin a áirithiú chun prionsabal an leanúnachais riaracháin, a aithníonn cúirteanna an Aontais, a chomhlíonadh agus ar mhaithe le dea-fheidhmiú na seirbhíse sibhialta. Ciallaíonn sin go bunúsach nach mór bearta ullmhúcháin a dhéanamh gan dochar don nós imeachta a bhaineann le daingniú an Chonartha Aontachais ná do na rialacha is gá chun an Conradh sin a chur chun feidhme go héifeachtach. Mar sin de, ní bheidh an painéal bailí mura ndaingneoidh na Ballstáit go léir an Conradh Aontachais. Bíodh a fhios ag na hiarrthóirí, dá mba rud é nach ndaingneofaí an Conradh Aontachais nó nach dtiocfadh na rialacha thuasluaite i bhfeidhm, go bhféadfaí deireadh a chur leis an nós imeachta roghnúcháin tráth ar bith agus, dá mbeadh an nós imeachta roghnúcháin sin curtha i gcrích, nach bhféadfadh na hiarrthóirí ar an bpainéal aon cheart a agairt ar an mbonn sin.

II.   DUALGAIS

I ngach réimse, baineann an phríomhghníomhaíocht le cúraimí bainistíochta ar leibhéal an chinn aonaid, cúraimí a dhéantar, de ghnáth, faoi réir údaráis Ard-Stiúrthóra nó Stiúrthóra. Tá na cúraimí sin roinnte ina dtrí chatagóir, mar seo a leanas:

Ar leibhéal oibríochta

—

Cuspóirí straitéiseacha an aonaid a shainiú agus clár oibre feidhmíochta an aonaid a fhormheas, i gcomhréir le cuspóirí na Stiúrthóireachta/na hArdstiúrthóireachta.

—

Féachaint chuige go n-eagrófar agus go roinnfear obair an aonaid go héifeachtach chun a chuid cuspóirí a bhaint amach.

—

An méid a baineadh na cuspóirí amach a mheas le táscairí cuí agus trí thuarascálacha bainistíochta a ullmhú ar na torthaí a fuarthas.

—

Comhréireacht cinntí agus oibríochtaí leis na rialacha agus na nósanna imeachta oifigiúla a sheiceáil.

Bainistiú acmhainní

—

Bainistiú éifeachtach foirne a áirithiú, i gcomhréir le beartas na hinstitiúide maidir le hacmhainní daonna, féachaint aonad éifeachtach a fhorbairt a bhfuil an comhar go diongbháilte ann. Ciallaíonn sin, go háirithe, é a bheith ar chumas an Chinn Aonaid inniúlachtaí gach baill foirne a fhorbairt agus a úsáid chomh maith agus is féidir é, agus aon choinbhleachtaí san fhoireann a thuar agus a láimhseáil.

—

Riachtanais airgeadais a chinneadh agus na hacmhainní buiséadacha bliantúla a thugtar don aonad a bhainistiú.

Cúrsaí cumarsáide agus ionadaíochta

—

Caidreamh idirghníomhach a chur ar bun agus a choinneáil ar bun san aonad, chun go mbeidh an fhoireann ar an eolas faoi chúrsaí tábhachtacha polaitiúla agus straitéiseacha agus go bhfaighidh siad aiseolas cuí faoina gcuid oibre.

—

Dul i mbun comhairle, comhordú agus/nó idirbheartaíochta le seirbhísí nó institiúidí eile faoi cheisteanna a bhaineann le hobair an aonaid.

—

Ionadaíocht a dhéanamh thar ceann an aonaid, na roinne nó na seirbhíse ar choistí, ar mheithle nó ar chomhlachtaí eile, laistigh den institiúid agus lasmuigh di.

Chun na cúraimí sin uile a dhéanamh teastaíonn iarrthóirí a bhfuil meon na seirbhíse agus ciall don eagar acu agus nach bhfuil doicheall orthu roimh theicneolaíochtaí nua.

I dteannta na príomhghníomhaíochta bainistíochta, iarrtar ort aird a thabhairt ar na cúraimí sonracha a bhaineann le gach réimse ar leith den chomórtas seo, mar atá:

Réimse 1: Dlí

—

Reachtaíocht de chuid an Aontais Eorpaigh a cheapadh, a dhréachtú agus anailís a dhéanamh uirthi, chomh maith le monatóireacht a dhéanamh ar a cur i bhfeidhm (teagmháil le lucht riaracháin na mBallstát; ceisteanna ó shaoránaigh den Aontas Eorpach; nuair is gá, imscrúdú a dhéanamh ar shainchomhaid réamhdhlíthíochta maidir le sáruithe ar dhlí an Aontais Eorpaigh).

—

Comhairle agus tuairimí dlí a thabhairt do na hinstitiúidí agus do chomhlachtaí na n-institiúidí ar shaincheisteanna agus ar bheartais an Aontais Eorpaigh.

—

Dualgais éagsúla a dhéanamh i réimse na dlíthíochta, seasaimh a dhréachtú agus ionadaíocht a dhéanamh do na hinstitiúidí i gcúrsaí dlíthíochta, go príomha os comhair na Cúirte Breithiúnais, na Cúirte Ginearálta nó an Bhinse um Sheirbhís Shibhialta an Aontais Eorpaigh.

—

Taighde a dhéanamh ar cheisteanna dlíthiúla a bhaineann leis an Aontas Eorpach, de chineál náisiúnta nó idirnáisiúnta.

—

Páirt a ghlacadh san idirbheartaíocht maidir le comhaontuithe idirnáisiúnta.

Réimse 2: Eacnamaíocht

—

Anailís agus measúnú leanúnach a dhéanamh ar gheilleagair na mBallstát agus ar a mbeartais eacnamaíocha, buiséadacha, airgeadaíochta agus airgeadais agus réamhaisnéisí eacnamaíocha a ullmhú.

—

Anailís a dhéanamh ar gheilleagair tríú tíortha.

—

Anailís eacnamaíoch a dhéanamh agus comhairle a thabhairt maidir le réimsí ábhartha de bheartais an Aontais Eorpaigh (beartas réigiúnach, an iomaíocht, trádáil, gnóthaí rialála agus fioscacha gnólachtaí, tionscal, taighde, fostaíocht, etc.).

—

Ionstraimí airgeadais agus cúnamh teicniúil an Aontais Eorpaigh a fhorbairt agus a chur chun feidhme, bainistiú clár go háirithe.

—

Anailísiú airgeadais a dhéanamh ar thionscadail de chuid an Aontais Eorpaigh.

—

Obair staidrimh a dhéanamh agus comhairle staidrimh a thabhairt (modheolaíocht, tiomsú, próiseáil, anailísiú, mar aon le ceapadh tionscadal agus bainistiú córas oibríochtúil).

Réimse 3: Riarachán poiblí Eorpach

—

Maoirsiú a dhéanamh ar chúraimí riaracháin, comhairleacha nó monatóireachta i gceann amháin nó níos mó de réimsí gníomhaíochta na hinstitiúide; réimsí a bhaineann le gnóthaí inmheánacha (teileachumarsáid, iompar, fuinneamh, an comhshaol, tomhaltas, gnóthaí sóisialta, etc.) nó réimsí a bhaineann le gnóthaí seachtracha (cúnamh forbraíochta, trádáil, etc.) a d'fhéadfadh a bheith iontu.

—

Cineálacha cur chuige nó gníomhaíochtaí nua a cheapadh trí anailísiú agus staidéir speisialaithe a dhéanamh.

—

Obair grúpaí éagsúla oibre a chomhordú ag gach leibhéal, agus obair iardain ina leith a dhéanamh.

—

Cur i bhfeidhm rialacha agus nósanna imeachta a chomhordú ar leibhéal inmheánach, idirinstitiúideach agus idirnáisiúnta, go háirithe i seirbhísí cothrománacha na hinstitiúide.

III.   INCHÁILITHEACHT

Ar an dáta deiridh atá leagtha síos don chlárúchán ar líne, ní mór duit na coinníollacha ginearálta agus sonracha seo a leanas a chomhlíonadh:

1.

 Coinníollacha ginearálta

(a)

Bheith i do shaoránach den Chróit.

(b)

Do chearta mar shaoránach a theachtadh.

(c)

Aon oibleagáid dlí atá ort i dtaca le seirbhís mhíleata a bheith comhlíonta agat.

(d)

Na riachtanais charachtair a chomhlíonadh a theastaíonn chun na dualgais i gceist a dhéanamh.

2.

 Coinníollacha sonracha

2.1

Cáilíochtaí

Réimse 1:

Dlí

(i)

oideachas is comhionann le cúrsa iomlán ollscoile agus céim sa dlí bainte amach ag a dheireadh, nuair is ceithre bliana nó níos mó atá i ngnáthfhad an chúrsa ollscoile sin

nó

(ii)

oideachas is comhionann le cúrsa iomlán ollscoile agus céim sa dlí bainte amach ag a dheireadh, mar aon le taithí oibre chuí ina dhiaidh sin (tar éis na céime) d'aon bhliain ar a laghad, nuair is trí bliana ar a laghad atá i ngnáthfhad an chúrsa ollscoile sin

nó

(iii)

oideachas is comhionann le cúrsa iomlán ollscoile agus céim bainte amach ag a dheireadh mar aon le cúrsa iarchéime sa dlí agus céim bainte amach ag a dheireadh.

Réimse 2:

Eacnamaíocht

(i)

oideachas is comhionann le cúrsa iomlán ollscoile agus céim bainte amach ag a dheireadh sa mhicreacnamaíocht/sa mhaicreacnamaíocht/sa staitistic agus/nó sa trádáil, nuair is ceithre bliana nó níos mó atá i ngnáthfhad an chúrsa ollscoile sin

nó

(ii)

oideachas is comhionann le cúrsa iomlán ollscoile agus céim bainte amach ag a dheireadh sa mhicreacnamaíocht/sa mhaicreacnamaíocht/sa staitistic agus/nó sa trádáil, mar aon le taithí oibre ábhartha ina dhiaidh sin (i ndiaidh na céime) d'aon bhliain ar a laghad nuair is trí bliana ar a laghad atá i ngnáthfhad an chúrsa ollscoile sin

nó

(iii)

oideachas is comhionann le cúrsa iomlán ollscoile agus céim bainte amach ag a dheireadh mar aon le cúrsa iarchéime sa mhicreacnamaíocht/sa mhaicreacnamaíocht/sa staitistic agus/nó sa trádáil agus céim nó Máistreacht sa Riarachán Gnó bainte amach ag a dheireadh.

Réimse 3:

Riarachán poiblí Eorpach

(i)

oideachas is comhionann le cúrsa ollscoile agus céim bainte amach ag a dheireadh, nuair is ceithre bliana nó níos mó atá i ngnáthfhad an chúrsa ollscoile sin

nó

(ii)

oideachas is comhionann le cúrsa iomlán ollscoile agus céim bainte amach ag a dheireadh, mar aon le taithí oibre ábhartha ina dhiaidh sin (i ndiaidh na céime) d'aon bhliain ar a laghad, nuair is trí bliana ar a laghad atá i ngnáthfhad an chúrsa ollscoile sin.

2.2

Taithí oibre

 

—

tar éis an cháilíocht a éilítear faoi phointe (i) nó faoi phointe (ii) a bhaint amach

NÓ

—

i ndiaidh bhaint amach na céime agus na taithí oibre a éilítear faoi phointe (ii),

Grád AD 9

taithí oibre deich mbliana ar a laghad i réimse a bhaineann le dualgais an phoist, agus trí bliana díobh sin caite i mbun dualgas bainistíochta agus/nó i mbun cúraimí comhordaithe foirne lenar bhain fíorfhreagrachtaí riaracháin foirne amhail na freagrachtaí a bhfuil cur síos orthu san fhógra seo (féach Roinn II).

Chun taithí ar dhualgais bhainistíochta a mheas, cuirfidh an bord roghnúcháin san áireamh blúirí eolais ábhartha arna soláthar ag na hiarrthóirí, amhail:

(1)

teideal agus na ndualgas a bhí agat agus cur síos beacht orthu,

(2)

líon na mball foirne a rabhthas i gceannas orthu le linn na ndualgas sin,

(3)

líon na leibhéal bainistíochta lastuas agus laistíos agus an líon piaraí.

Grád AD 12

taithí oibre 10 mbliana ar a laghad i réimse a bhaineann le dualgais an phoist, agus cúig bliana díobh sin caite i mbun dualgas bainistíochta agus/nó i mbun cúraimí comhordaithe foirne lenar bhain fíorfhreagrachtaí riaracháin foirne amhail na freagrachtaí a bhfuil cur síos orthu san fhógra seo (féach Roinn II).

Chun taithí ar dhualgais bhainistíochta a mheas, cuirfidh an bord roghnúcháin san áireamh blúirí eolais ábhartha arna soláthar ag na hiarrthóirí, amhail:

(1)

teideal na ndualgas a bhí agat, cur síos beacht orthu agus an fad a mhair siad,

(2)

líon na mball foirne a rabhthas i gceannas orthu le linn na ndualgas sin,

(3)

líon na leibhéal bainistíochta lastuas agus laistíos agus an líon piaraí.

2.3

Eolas ar theangacha

I gcomhréir leis an mbreithiúnas a thug Cúirt Bhreithiúnais an Aontais Eorpaigh (an Mór-Dhlísheomra) uaithi i gCás C-566/10 P, Poblacht na hIodáile v an Coimisiún, tá sé de cheanglas ar institiúidí an Aontais a shonrú cé hiad na fáthanna a bhfuil rogha an dara teanga teoranta acu sa chomórtas seo do líon srianta de theangacha oifigiúla an AE.

Dá bhrí sin, cuirtear in iúl do na hiarrthóirí gur roghnaíodh dara teangacha an chomórtais seo de réir leas na seirbhíse, leas a éilíonn go mbeidh na hearcaigh nua in ann dul i mbun oibre láithreach agus go mbeidh sé ar a gcumas cumarsáid éifeachtach a dhéanamh le linn a n-oibre laethúla. Ina éagmais sin, bheadh baol ann go gcuirfí bac mór le hobair na n-institiúidí.

Ar bhonn an chleachtais sheanbhunaithe atá ag institiúidí an Aontais maidir leis na teangacha cumarsáide inmheánacha, agus riachtanais na seirbhísí maidir le cumarsáid sheachtrach agus próiseáil comhad á gcur san áireamh, is iad an Béarla, an Fhraincis agus an Ghearmáinis na teangacha is mó a úsáidtear. Ina theannta sin, is iad an Béarla, an Fhraincis agus an Ghearmáinis na dara teangacha is mó i bhfad amach a roghnaíonn na hiarrthóirí sna comórtais, nuair is fúthu a bhíonn roghnú an dara teanga. Is léiriú é sin ar an leibhéal oideachais agus ar na hinniúlachtaí gairme ar féidir bheith ag súil leo ó na hiarrthóirí ar na poist laistigh d'institiúidí an Aontais, mar atá, sáreolas ar cheann de na teangacha sin ar a laghad. Dá bhrí sin, agus leas na seirbhíse agus riachtanais agus inniúlachtaí na n-iarrthóirí á gcur sa mheá, agus sainréimse an chomórtais seo á chur san áireamh, tá ábhar maith ann trialacha a eagrú sna trí theanga sin chun a chinntiú go mbeidh sáreolas ag na hiarrthóirí uile, is cuma cén phríomhtheanga atá acu, ar cheann de na trí theanga oifigiúla sin ar leibhéal teanga oibre.

Ina theannta sin, chun go mbeidh cothrom iomaíochta ann, ní mór do gach iarrthóir, fiú má tá ceann de na trí theanga sin ina phríomhtheanga oifigiúil aige, an triail sin a dhéanamh sa dara teanga, teanga a bheidh le roghnú as na trí theanga sin. Mar sin, tugann an measúnú ar na hinniúlachtaí sonracha deis d'institiúidí an Aontais a mheas cé chomh hábalta is atá na hiarrthóirí dul i mbun oibre láithreach i dtimpeallacht atá cosúil leis an timpeallacht ina n-iarrfar orthu bheith ag obair. Tá na bearta seo gan dochar d'fhoghlaim tríú teanga ina dhiaidh sin i gcomhréir le hAirteagal 45, mír 2 de na Rialacháin Foirne.

Teanga 1

—

an phríomhtheanga:

sáreolas ar an gCróitis

agus

Teanga 2

—

dara teanga

eolas sásúil ar an nGearmáinis (DE), ar an mBéarla (EN) nó ar an bhFraincis (FR).

IV.   TRIALACHA IONTRÁLA

Déanfar na trialacha iontrála ar ríomhaire, agus is é EPSO a eagróidh iad. Is é an bord roghnúcháin a chinnfidh leibhéal deacrachta na dtrialacha agus a fhaomhfaidh a mbeidh iontu i bhfianaise moltaí ó EPSO.

1.

 Cuireadh

Tabharfar cuireadh duit na trialacha a dhéanamh má bhailíochtaigh tú d’iarratas agus má chuir tú do chomhad iarratais iomlán isteach in am (féach Roinn VIII).

Tabhair faoi deara:

1.

is ionann d'iarratas a bhailíochtú agus a dhearbhú go gcomhlíonann tú coinníollacha ginearálta agus sonracha Roinn III;

2.

chun na trialacha a dhéanamh, ní mór duit dáta a chur in áirithe; ní mór sin a dhéanamh roimh an spriocam a chuirfear in iúl duit trí do chuntas EPSO.

2.

 Cineál agus marcáil na dtrialacha

Sraith de thrialacha bunaithe ar cheisteanna ilroghnacha chun do chumas agus d'inniúlacht ghinearálta a mheasúnú maidir leis na nithe seo a leanas:

Triail (a)

réasúnaíocht bhriathartha

marcáil: 0 — 50 pointe

Triail (b)

réasúnaíocht uimhriúil

marcáil: 0 — 50 pointe

 

Is é 50 pointe an pasmharc foriomlán do thrialacha (a) agus (b).

3.

 Teanga na dtrialacha

Teanga 2 (Gearmáinis, Béarla nó Fraincis)

V.   CEAD ISTEACH SA CHOMÓRTAS

Tar éis na dtrialacha iontrála, scrúdófar, in ord íslitheach tuillteanais, doiciméid tacaíochta na n-iarrthóirí a ghnóthaigh pasmharc na dtrialacha sin, lena dheimhniú go gcomhlíonann siad na coinníollacha ginearálta agus na coinníollacha sonracha a éilítear san fhógra comórtais. Déanfar an scrúdú sin go dtí go mbainfear amach an líon iarrthóirí ar féidir cead isteach sa chomórtas a thabhairt dóibh agus ar iarrthóirí iad a chomhlíonann na coinníollacha iontrála go léir. Ní scrúdófar doiciméid tacaíochta na n-iarrthóirí atá faoi bhun na tairsí sin.

Beidh líon na n-iarrthóirí a gceadófar isteach sa chomórtas, i gcás gach comórtais agus gach réimse, cothrom le 3 oiread, ar a mhéad, líon na n-iarrthóirí a n-éireoidh leo atá luaite san fhógra comórtais seo agus foilseofar an líon sin ar shuíomh gréasáin EPSO (http://blogs.ec.europa.eu/eu-careers.info/). Tabharfar cuireadh do na hiarrthóirí sin (2) teacht chuig an gcéad chéim eile.

VI.   IONAD MEASÚNAITHE AGUS TRIALACHA

Is éard atá sna trialacha:

—

trialacha in ionad measúnaithe

—

triail labhartha

Ar chúiseanna eagrúcháin, is sa Bhruiséil a bheidh na trialacha san ionad measúnaithe agus an triail labhartha, ar laethanta leantacha más féidir é.

1.

 An tIonad measúnaithe

Roimh an agallamh leis an mbord roghnúcháin, tabharfar cuireadh duit trialacha a dhéanamh san ionad measúnaithe. Is sa dara teanga a bheidh na trialacha sin (Béarla, Gearmáinis nó Fraincis).

Tabharfar tuairisc ar na trialacha sin don bhord roghnúcháin agus beidh sí ina cuidiú sainiúil agus teicniúil sa phróiseas cinnteoireachta.

Beidh an méid seo a leanas sna trialacha sin:

—

ceacht scríofa ina n-iarrfar ort roinnt doiciméid a phlé;

—

cleachtadh chun do chumas bainistíochta a mheas;

—

agallamh le saineolaí acmhainní daonna chun do phróifíl scileanna a mheas.

Ó nach dtagann sí faoi réir rúndacht obair an bhord roghnúcháin, tabharfar tuairisc an ionaid mheasúnaithe duit ag deireadh na trialach labhartha.

2.

 Triail labhartha

An lá tar éis do choinne san ionad measúnaithe, iarrfar ort agallamh a bheith agat leis an mbord roghnúcháin (i do dhara teanga) ionas go bhféadfaidh an bord sin an méid seo a leanas a mheas:

—

an saineolas atá agat ar an réimse a roghnaigh tú;

—

an taithí oibre atá agat agus do chumas obair aonaid riaracháin a eagrú agus a chomhordú, do chumas chun oiriúnaithe, chun idirbheartaíochta, cinntí a dhéanamh, agus i gcoitinne, do chumas na cúraimí a dhéanamh a bhíonn ar cheann aonaid;

—

an t-eolas ginearálta atá agat ar an Aontas Eorpach, ar a institiúidí agus ar a bheartais;

—

do chumas sa phríomhtheanga (teanga 1).

Marcálfar an triail seo as 100 pointe (60 pointe an pasmharc).

VII.   PAINÉIL

1.

 Iarrthóirí a chur ar na painéil

Cuirfidh an bord roghnúcháin d'ainm ar an bpainéal (3) (féach líon na n-iarrthóirí a n-éireoidh leo, Roinn I, pointe 1) má tá tú ar dhuine de na hiarrthóirí a ghnóthaigh an pasmharc agus ceann de na marcanna is fearr don triail labhartha.

2.

 Aicmiú

Tiomsófar na liostaí de réir réimse agus in ord aibítre.

VIII.   CONAS IARRATAS A CHUR ISTEACH

1.

 Clárú ar líne

Ní mór duit clárú ar líne sa tslí a léirítear ar shuíomh gréasáin EPSO.

Spriocdháta: 28 Bealtaine 2013 ag 12 a chlog (meán lae), am na Bruiséile

2.

 An comhad iarratais a sheoladh

Agus tú ag clárú ar líne, ní mór duit cóip den iarratas leictreonach a bhailíochtaigh tú a phriontáil, a shíniú agus a sheoladh, mar aon leis na doiciméid tacaíochta ábhartha, chuig an seoladh seo a leanas:

An Oifig Eorpach um Roghnú Foirne (EPSO)

C-25

Comórtas oscailte EPSO/AD/252/13 nó EPSO/AD/253/13

1049 Bruxelles/Brussel

BELGIQUE/BELGIË

Spriocdháta: 28 Bealtaine 2013, (dáta an phostmhairc ina fhianaise air sin)

Sonraí praiticiúla: féach pointe 6.1 den treoir do chomórtais oscailte.

(1)  Gach áit anseo a bhfuil tagairt don fhirinscne, glactar leis gur ag tagairt don fhirinscne agus don bhaininscne atáthar.

(2)  Maidir leis an áit dheireanach, i gcás ina ngnóthóidh roinnt iarrthóirí an marc céanna, tabharfar cuireadh dóibh ar fad teacht chuig an ionad measúnaithe.

(3)  Maidir leis an áit dheireanach, i gcás ina ngnóthóidh roinnt iarrthóirí an marc céanna, cuirfear iad ar fad ar an bpainéal.

IARSCRÍBHINN

Maidir leis an gcomórtas seo, tabhair faoi deara nach infheidhme na pointí seo a leanas den treoir do chomórtais oscailte, a foilsíodh in Iris Oifigiúil C 270 A an 7 Meán Fómhair 2012:

—

5.3

—

5.4, agus

—

6.2

—

CUIRTEAR AN TÉACS SEO A LEANAS IN IONAD PHOINTE 5.3 (“IONAD MEASÚNAITHE”):

“5.3   Ionad measúnaithe agus triail labhartha

Má fhoráiltear san fhógra comórtais go mbeidh trialacha in ionad measúnaithe ar siúl roimh an triail labhartha, is mar chuidiú ag an bpróiseas cinnteoireachta amháin a chuirfear torthaí na trialach sin ar aghaidh chuig an mbord roghnúcháin. Ní mharcálfar na scrúduithe sin agus tabharfar ar ais duit iad ag deireadh na trialach labhartha.

I gcás force majeure, is féidir dáta na trialach labhartha a athrú ar bhonn eisceachtúil má iarrann tú sin ar chúiseanna a bhfuil údar tugtha leo, agus déanfaidh an bord roghnúcháin cinneadh dá réir. Mar sin féin, aon chinneadh maidir le triail a chur ar athló, déanfar é ar dhóigh nach ndéanfaidh dochar d'aonfhoirmeacht an mheasúnaithe ar fheidhmíocht na n-iarrthóirí sna trialacha labhartha agus nach gcuirfidh isteach ar dhea-fheidhmiú an chomórtais ná ar leas na seirbhíse.

—

CUIRTEAR AN TÉACS SEO A LEANAS IN IONAD PHOINTE 5.4 (‘PAINÉAL’):

Ag deireadh an nós imeachta comórtais, tiomsóidh an bord roghnúcháin painéal ar a mbeidh ainmneacha na ndaoine ar éirigh leo sa chomórtas. Cuirfear an liosta sin ar aghaidh ansin chuig na hinstitiúidí agus is iad siúd amháin a bheidh freagrach as an earcaíocht.

Foilseofar ainmneacha na n-iarrthóirí ar an bpainéal, mar aon le dáta éaga an phainéil (1), in Iris Oifigiúil an Aontais Eorpaigh agus ar shuíomh gréasáin EPSO. I gcásanna áirithe féadfar síneadh a chur le tréimhse bailíochta an phainéil. Is ar shuíomh gréasáin EPSO amháin a fhoilseofar an cinneadh maidir leis an síneadh sin.

—

CUIRTEAR AN TÉACS SEO A LEANAS IN IONAD PHOINTE 6.2 (‘ROCHTAIN AR FHAISNÉIS’):

I ndiaidh don bhord roghnúcháin an painéal a thiomsú:

—

Má tá tú ar an bpainéal, cuirfear in iúl duit gur duine thú ar éirigh leis sa chomórtas agus féadfaidh tú, ach é a iarraidh, na pointí a ghnóthaigh tú sa triail labhartha a fháil amach.

—

Mura bhfuil tú ar an bpainéal, cuirfear na pointí a ghnóthaigh tú sa triail labhartha chugat go huathoibríoch. Chomh maith leis sin, féadfaidh tú, ach é a iarraidh, cóip a fháil den fhoirm mheasúnaithe aonair a d'ullmhaigh an bord roghnúcháin do do thriail labhartha.

Ní mór d'iarrthóirí aon iarratas ar fhaisnéis a chur isteach, tríd an leathanach teagmhála ar shuíomh gréasáin EPSO, faoi cheann 10 lá féilire i ndiaidh na torthaí a ghnóthaigh siad sa chomórtas a bheith curtha in iúl dóibh.

Próiseálfar na hiarratais agus rúndacht obair na mbord roghnúcháin dá bhforáiltear sna Rialacháin Foirne (Iarscríbhinn III, Airteagal 6) á cur san áireamh, agus i gcomhréir leis na rialacha maidir le cosaint daoine aonair i ndáil le próiseáil sonraí pearsanta.”

(1)  Má iarrann duine ar éirigh leis sa chomórtas é, ní fhoilseofar a ainm. Ní foláir an t-iarratas sin a bheith ag EPSO dhá sheachtain ar a dhéanaí i ndiaidh sheoladh na dtorthaí.