—

an cinneadh maidir le cás a thabhairt chun breithiúnais a neamhniú agus an cás sin a dhíbhe go páirteach, arna eisiúint ag Buan-Dhlísheomra Oifig an Ionchúisitheora Phoiblí Eorpaigh an 8 Nollaig 2022, i gcáschomhad OIPE Uimh. I.130/2021, lenar chinn Oifig an Ionchúisitheora Phoiblí Eorpaigh an cás ina bhfuil an t-iarratasóir cúisithe a thabhairt chun breithiúnais, ós rud é nach raibh an Buan-Dhlísheomra comhdhéanta den líon íosta Ionchúisitheoirí Eorpacha a cheanglaítear faoi reachtaíocht Aontais Eorpaigh, lena sáraítear, ar an gcaoi sin, na rialacha maidir le comhdhéanamh na mBuan-Dhlísheomraí, arna rialú le hAirteagal 10(1) de Rialachán (AE) 2017/1939 ón gComhairle an 12 Deireadh Fómhair 2017;

—

seasamh leis an tsaincheist neamhdhleathachta maidir le rialacha nós imeachta inmheánacha Oifig an Ionchúisitheora Phoiblí Eorpaigh ós rud é go bhfuil siad contrártha le hAirteagal 10 de Rialachán OIPE, agus leis an tsaincheist neamhdhleathachta a bhaineann le forálacha Rialachán 2017/1939 atá contrártha le CFAE agus le Cairt um Chearta Bunúsacha an Aontais Eorpaigh.

1.

An chéad saincheist dlí lena n-éilítear go ndearnadh sárú ar Airteagal 10(1) de Rialachán OIPE, tríd an gcinneadh atá á chonspóid a eisiúint.

Go bunúsach, eisíodh an cinneadh atá faoi chonspóid ó Bhuan-Dhlísheomra Uimh. 10 de shárú ar Airteagal 10(1) de Rialachán (AE) 2017/1939 ón gComhairle an 12 Deireadh Fómhair 2017 lena gcuirtear chun feidhme comhar feabhsaithe maidir le bunú Oifig an Ionchúisitheora Phoiblí Eorpaigh (‘OIPE’), lena gceanglaítear ar na Buan-Dhlísheomraí a bheith comhdhéanta de bheirt Fheisirí bhuana sa bhreis ar an gCathaoirleach.

2.

An dara saincheist dlí lena n-éilítear pléadáil neamhdhleathachta i ndáil le rialacha nós imeachta inmheánacha Oifig an Ionchúisitheora Phoiblí Eorpaigh.

Ós rud é go measann an OIPE gur leor gur comhlíonadh forálacha Airteagal 23(5) de rialacha nós imeachta inmheánacha Oifig an Ionchúisitheora Phoiblí Eorpaigh le linn dó cinneadh ón mBuan-Dhlísheomra a ghlacadh, chuir an t-iarratasóir ar aghaidh, ar bhonn Airteagal 277 CFAE, pléadáil neamhdhleathachta maidir leis an bhforáil thuasluaite ar an bhforas go bhfuil sí contrártha d’Airteagal 10(1) de Rialachán OIPE, nach féidir maolú air.