1)

Maidir le hAirteagal 101(1) CFAE,

ní mór léiriú a dhéanamh mar a leanas:

ní fhéadfaidh a chinneadh go bhfuil ‘srianadh iomaíochta de réir cuspóra’ i gceist le comhaontú ingearach lena socraítear praghsanna athdhíola íosta ach amháin tar éis a chinneadh go ndéantar leis an gcomhaontú sin leibhéal leordhóthanach díobhála don iomaíocht, ag cur san áireamh ábhar a fhorálacha, na cuspóirí arb é is aidhm dó a bhaint amach agus na heilimintí go léir a léiríonn an comhthéacs eacnamaíoch agus dlíthiúil ar cuid de é.

2)

Maidir le hAirteagal 101(1) CFAE,

ní mór léiriú a dhéanamh mar a leanas:

tá ‘comhaontú’ ann, de réir bhrí an airteagal sin, nuair a fhorchuireann soláthróir praghsanna athdhíola íosta ar a dháileoirí ar na táirgí a dhíolann sé, a mhéid a léirítear le forchur na bpraghsanna sin ag an soláthraí agus urramú na bpraghsanna sin ag na dáileoirí comhréireacht tola na bpáirtithe sin. Féadfaidh an chomhréireacht tola sin teacht ó théarmaí an chonartha dáileacháin atá i gceist, i gcás ina bhfuil cuireadh sainráite ann praghsanna athdhíola íosta a urramú nó, ar a laghad, ina n-údaraítear don soláthróir praghsanna den sórt sin a fhorchur, agus ó iompar na bpáirtithe agus, go háirithe, mar thoradh ar thoiliú a d'fhéadfadh a bheith ann, follasach nó intuigthe, ar thaobh dáileoirí do chuireadh praghsanna athdhíola íosta a urramú.

3)

Maidir le hAirteagal 101(1) CFAE, arna léamh i gcomhar le prionsabal na héifeachtachta,

ní mór léiriú a dhéanamh mar a leanas:

féadfaidh ‘comhaontú’ a bheith ann, de réir bhrí an airteagail sin, idir soláthróir agus a dháileoirí, ní hamháin trí bhíthin cruthúnas díreach, ach freisin trí bhíthin innéacsanna oibiachtúla agus comhsheasmhacha óna bhféadfar tátal a bhaint as go bhfuil comhaontú den sórt sin ann.

4)

Maidir le hAirteagal 101(1) CFAE,

ní mór léiriú a dhéanamh mar a leanas:

ós rud é go gcumhdaíonn comhaontú ingearach lena socraítear praghsanna athdhíola íosta beagnach, ach ní ar fad, gach críoch de chuid Ballstáit, ní chuirtear cosc leis sin ar an gcomhaontú sin dochar a dhéanamh do thrádáil idir na Ballstáit.