1)

Maidir le hAirteagal 15 de Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (an Rialachán Ginearálta maidir le Cosaint Sonraí), arna léamh i bhfianaise Airteagal 99(2) den Rialachán sin,

ní mór léiriú a dhéanamh air mar seo a leanas:

tá feidhm aige maidir le hiarraidh ar rochtain ar an bhfaisnéis dá dtagraítear san fhoráil sin i gcás ina ndearnadh na hoibríochtaí próiseála a mbaineann an iarraidh sin leo roimh dháta chur i bhfeidhm an Rialacháin sin, ach go ndearnadh an iarraidh tar éis an dáta sin.

2)

Maidir le hAirteagal 15(1) de Rialachán 2016/679,

ní mór léiriú a dhéanamh air mar seo a leanas:

is éard atá i bhfaisnéis a bhaineann le hoibríochtaí chun breathnú ar shonraí pearsanta duine, a bhaineann le dátaí agus críocha na n-oibríochtaí sin, ná faisnéis a bhfuil sé de cheart ag an duine sin í a fháil ón rialaitheoir faoin bhforáil sin. Mar sin féin, leis an bhforáil sin, ní fhoráiltear dá leithéid de cheart i ndáil le faisnéis a bhaineann le féiniúlacht fhostaithe de chuid an rialaitheora sin a rinne na hoibríochtaí sin faoi údarás an rialaitheora agus i gcomhréir lena threoracha, murab ea go bhfuil an fhaisnéis sin bunriachtanach ionas go bhféadfaidh an duine is ábhar do na sonraí na cearta a thugtar dó leis an Rialachán sin a fheidhmiú go héifeachtach agus ar choinníoll go gcuirtear cearta agus saoirsí na bhfostaithe sin san áireamh.

3)

Maidir le hAirteagal 15(1) de Rialachán 2016/679,

ní mór léiriú a dhéanamh air mar seo a leanas:

más rud é go saothraíonn an rialaitheoir gníomhaíocht bhaincéireachta i gcomhthéacs cúram rialaithe agus go raibh an duine a ndearnadh a shonraí pearsanta a phróiseáil ina cháil mar chustaiméir an rialaitheora fostaithe ag an rialaitheoir sin freisin, ní dhéantar aon difríocht, i bprionsabal, do raon feidhme an chirt a bhí ag an duine sin faoin bhforáil sin.