1)

Ní mór Airteagal 16(1) de Threoir 2008/115/CE ó Pharlaimint na hEorpa agus ón gComhairle an 16 Nollaig 2008 maidir le caighdeáin choiteanna agus nósanna imeachta coiteanna is infheidhme sna Ballstáit i ndáil le náisiúnaigh tríú tír atá ag fanacht go neamhdhleathach a chur ar ais, a léirmhíniú ar bhealach a chiallaíonn gur féidir cuid ar leith de phríosún, ar thaobh amháin, a bhfuil a stiúrthóir féin aici, ach atá faoi réir bhainistíocht an phríosúin sin agus faoi réir údarás an Aire a bhfuil údarás aige ar phríosúin agus ina bhfuil, ar an taobh eile, náisiúnaigh tríú tíortha á gcoinneáil, chun críoch aistrithe, i bhfoirgnimh shonracha, lena n-áiseanna féin agus scoite amach ó na foirgnimh eile sa chuid sin ina gcuirtear príosúnacht ar dhaoine faoi phianbhreith choiriúil, a mheas mar “ionad coinneála speisialaithe”, de réir bhrí na forála sin, ar choinníoll go seachnaítear, a mhéid is féidir, leis na coinníollacha coinneála is infheidhme maidir leis na náisiúnaigh sin, go mbeidh an choinneáil sin cosúil le coinneáil i dtimpeallacht príosúin agus go bhfuil siad ceaptha sa bhealach is go n-urramaítear na cearta a ráthaítear leis an gCairt um Chearta Bunúsacha an Aontais Eorpaigh chomh maith leis na cearta a chumhdaítear in Airteagal 16(2) go (5), agus Airteagal 17 den Treoir sin.

2)

Ní mór Airteagal 18 de Threoir 2008/115, arna léamh i gcomhréir le hAirteagal 47 den Chairt um Chearta Bunúsacha, a léirmhíniú ar bhealach a chiallaíonn go gcaithfidh an chúirt náisiúnta a n-iarrtar uirthi, faoi chuimsiú a dlínse, coinneáil náisiúnach tríú tír a ordú nó a shíneadh, i bpríosún, chun críoch aistrithe, a bheith in ann a fhíorú go gcomhlíontar na coinníollacha a bhforchuirtear le hAirteagal 18 maidir leis an bhféidearthacht go bhféadfaidh Ballstát foráil a dhéanamh chun an náisiúnach sin a choinneáil i bpríosún.

3)

Ní mór Airteagal 16(1) de Threoir 2008/115, arna léamh i dteannta le prionsabal thosaíocht dhlí an Aontais, a léirmhíniú ar bhealach a chiallaíonn nach mór do chúirt náisiúnta gan feidhm a thabhairt do reachtaíocht Ballstáit lena gceadaítear, ar bhonn sealadach, náisiúnaigh tríú tíortha atá ag fanacht go neamhdhleathach a choinneáil chun críocha a n-aistriú, i bpríosún, scartha ó ghnáthphríosúnaigh, i gcás nach gcomhlíontar nó nach gcomhlíontar a thuilleadh na coinníollacha faoi Airteagal 18(1) agus faoin dara habairt d’Airteagal 16(1) den Treoir sin chun go mbeidh an reachtaíocht sin i gcomhréir le dlí an Aontais.