AN COIMISIÚN EORPACH
An Bhruiséil,5.6.2025
JOIN(2025) 140 final
TEACHTAIREACHT CHOMHPHÁIRTEACH CHUIG PARLAIMINT NA hEORPA AGUS CHUIG AN gCOMHAIRLE
Straitéis Dhigiteach Idirnáisiúnta don Aontas Eorpach
AN COIMISIÚN EORPACH
An Bhruiséil,5.6.2025
JOIN(2025) 140 final
TEACHTAIREACHT CHOMHPHÁIRTEACH CHUIG PARLAIMINT NA hEORPA AGUS CHUIG AN gCOMHAIRLE
Straitéis Dhigiteach Idirnáisiúnta don Aontas Eorpach
Straitéis Dhigiteach Idirnáisiúnta don Aontas Eorpach
Tá geilleagair agus sochaithe san Eoraip agus ar fud an domhain á n‑athmhúnlú ag an réabhlóid dhigiteach agus Intleacht Shaorga (IS). Ní hamháin go bhfaigheann gníomhaithe eacnamaíocha agus tíortha atá in ann máistreacht a fháil orthu buntáiste eacnamaíoch cinntitheach ó thaobh iomaíochais agus éifeachtúlachta de ach is féidir leo na teicneolaíochtaí sin a úsáid freisin chun a gcosaint agus a slándáil náisiúnta a neartú, agus chun a áirithiú go bhfuil siad ailínithe le bunluachanna a sochaí. Os a choinne sin, tá an baol ann go dtitfidh siad siúd atá déanach ag glacadh leo chun deiridh go heacnamaíoch agus go mbainfear an bonn dá gceannasacht.
Sa chomhthéacs sin, tá rún daingean ag an Aontas borradh a chur faoina iomaíochas teicneolaíochta agus faoina chumas nuálaíochta agus é ag obair le comhpháirtithe agus le comhghuaillithe chun tacú lena n‑aistriú digiteach féin. Ní féidir le haon tír ná réigiún dul i ngleic leis an réabhlóid dhigiteach agus IS ina n‑aonar. Tá an tAontas tiomanta i gcónaí don ord domhanda riailbhunaithe agus do chosaint a bhunluachanna.
Maidir le hiomaíochas, slándáil eacnamaíoch agus acmhainneacht chosanta an Aontais, tá sé ríthábhachtach comhoibriú go dlúth lenár gcomhpháirtithe agus lenár gcomhghuaillithe teicneolaíochta chun feabhas a chur ar chumas chuideachtaí teicneolaíochta na hEorpa nuáil agus fás ar fud an domhain. Tá gá le hiarrachtaí comhbheartaithe ón Aontas chun a áirithiú go dtacóidh an rialachas digiteach domhanda le leasanna agus luachanna bunúsacha an Aontais.
Leagtar amach sa straitéis sin an bonn ar a dtabharfaidh an tAontas aghaidh ar na cuspóirí sin, agus é ag obair ar bhealach comhleanúnach.
1.An earnáil dhigiteach mar ghné lárnach de ghníomhaíocht sheachtrach an Aontais
Ag an bpointe geopholaitiúil atá ann faoi láthair, tá an tAontas fós ina chomhpháirtí iontaofa intuartha, atá tiomanta don chaidreamh atá aige cheana le comhghuaillithe ar fud an domhain a neartú, agus comhpháirtíochtaí nua comhthairbheacha a chruthú leo siúd atá toilteanach oibriú i dtreo cuspóirí comhroinnte. Tá tacaíocht an Aontais don ord domhanda riailbhunaithe, atá ailínithe le luachanna an daonlathais, an smachta reachta agus na gceart bunúsach, diongbháilte.
Le líonra méadaitheach an Aontais de chomhpháirtíochtaí déthaobhacha agus réigiúnacha, is féidir leis an Aontas a bheith níos láidre ar an leibhéal domhanda, agus comhghuaillíochtaí á dtógáil chun cuspóirí comhroinnte a bhaint amach i bpríomhfhóraim agus eagraíochtaí idirnáisiúnta.Idir noirm a mhúnlú i bhfóraim iltaobhacha agus comhpháirtíochtaí déthaobhacha a dhoimhniú, tá sé d’aidhm ag an Aontas dul chun cinn a dhéanamh maidir le tosaíochtaí nithiúla láithreacha, agus leasanna straitéiseacha an Aontais a chosaint agus a chur chun cinn 1 .
Mar a cuireadh i dtábhacht i dtuarascáil Draghi 2 , is é is cúis den chuid is mó leis an mbearna táirgiúlachta atá ag dul i méid idir an tAontas agus na Stáit Aontaithe ó lár na 1990idí cumas níos fearr na Stát Aontaithe dul i mbun nuálaíochta, uas-scálú a dhéanamh ar fud an domhain agus rath a bheith orthu in earnáil na teicneolaíochta. Tá an baol ann freisin n‑go ndéanfar uirlis troda de spleáchais theicneolaíocha agus eacnamaíocha an Aontais chomh maith le baol go mbeidh sceitheadh teicneolaíochta criticiúil ann. Mar a leagtar amach sa Straitéis ProtectEU 3 , tá an difear idir bagairtí as líne agus bagairtí ar líne ag éirí níos doiléire agus ní mór don Aontas comhoibriú níos fearr lena chomhpháirtithe chun mí-úsáid teicneolaíochtaí a chomhrac.
Agus borradh á chur faoina iomaíochas teicneolaíochta agus faoina chumas nuálaíochta, mar a leagtar amach i gCompás Iomaíochais an Aontais 4 , is féidir leis an Aontas cur le roinnt láidreachtaí. Tá margadh aonair digiteach mór, comhtháite ag an Aontas agus is é an ceannaire domhanda é maidir le hallmhairiú agus onnmhairiú seirbhísí a sholáthraítear go digiteach 5 . Tá cuideachtaí teicneolaíochta a léiríonn ceannródaíocht ar fud an domhain lonnaithe ann agus tá méadú ag teacht ar líon na ngnólachtaí nuathionscanta teicneolaíochta atá ann 6 . Is féidir leis leas a bhaint as taighde agus nuálaíocht den chéad scoth agus tá sé d’acmhainn aige réitigh chomhtháite teicneolaíochta a sholáthar do thíortha comhpháirtíochta atá ag iarraidh seasamh lena gceannasacht dhigiteach agus claochlú digiteach duinelárnach a chur chun feidhme.
Mar chuid dá Chlár Beartais 2030 don Deacáid Dhigiteach 7 , tá sé d’aidhm ag an Aontas borradh a chur faoin infheistíocht i mbonneagar nascachta, i scileanna agus i dtaighde 8 , agus dálaí níos fabhraí a chruthú do ghnólachtaí nuathionscanta bunathraitheacha an Aontais chun teacht chun cinn agus méadú. Ós rud é go bhfuil teicneolaíochtaí amhail an intleacht shaorga, leathsheoltóirí, an néalríomhaireacht agus an ríomhaireacht chandamach ag athrú an tírdhreacha thionsclaíoch, cosanta agus slándála ó bhonn, tá tionscal de dhíth ar an Eoraip atá in ann na teicneolaíochtaí agus na táirgí sin a dhearadh, a fhorbairt, a mhonarú agus a sheachadadh níos tapúla agus ar scála.
Tá Cibearthaidhleoireacht atá ag éirí níos gníomhaí bunaithe ar na bunchlocha láidre intíre sin chun ár dtosaíochtaí idirnáisiúnta a chur chun cinn agus chun comhpháirtíochtaí a thógáil 9 . Léiríonn infheistíochtaí agus tionscnaimh a seoladh faoin Global Gateway, lena n‑áirítear i dtíortha is iarrthóirí agus i dtíortha comharsanachta, go háirithe Pleananna Fáis an Aontais, tábhacht straitéiseach na hearnála digití ó thaobh na geopholaitíochta, na slándála agus na heacnamaíochta de.
Ag tógáil ar láidreachtaí agus ar bheartais agus ar ghníomhaíochtaí inmheánacha an Aontais, díreoidh an Straitéis Dhigiteach Idirnáisiúnta don Aontas Eorpach, dá bhrí sin, ar na cuspóirí seo a leanas:
a)Borradh a chur faoi iomaíochas teicneolaíochta an Aontais trí chomhar eacnamaíoch agus gnó. Leanfaidh an tAontas de bheith ag comhoibriú le comhpháirtithe iontaofa chun ceannaireacht an Aontais sa teicneolaíocht atá ag teacht chun cinn a dhaingniú, lena n‑áirítear trí thaighde agus nuálaíocht agus trí infheistíochtaí agus tallanna eachtracha a mhealladh; a uirlisí idirnáisiúnta a úsáid chun réitigh teicneolaíochta an Aontais a fhorbairt agus a chur chun cinn ar fud an domhain; agus a líonra méadaitheach comhaontuithe trádála digití a leathnú
b)Ardleibhéal slándála a chur chun cinn don Aontas agus dá chomhpháirtithe. I gcomhréir leis na gealltanais atá ann cheana 10 , leanfaidh an tAontas dá chibearshlándáil agus dá chibearchosaint a neartú, go háirithe maidir le príomhbhonneagair chriticiúla; slándáil taighde a fheabhsú agus taighde i réimsí a bhaineann leis an tslándáil a fheabhsú ag an am céanna; dul i ngleic le bagairtí hibrideacha agus le hionramháil agus cur isteach eachtrach ar fhaisnéis; athléimneacht, slándáil agus cobhsaíocht shlabhraí soláthair TFC a fheabhsú, lena n‑áirítear thar a theorainneacha; dul i ngleic leis an gcibearchoireacht trí oibríochtaí comhpháirteacha 11 , lena n‑áirítear trí chomhar déthaobhach agus iltaobhach; agus soláthróirí iontaofa teicneolaíochtaí digiteacha a chur chun cinn, lena n‑áirítear i dteicneolaíochtaí dé-úsáide amhail IS agus candam.
c)Rialachas digiteach domhanda agus caighdeáin dhigiteacha dhomhanda a mhúnlú le líonra comhpháirtithe. Leanfaidh an tAontas dá chur chuige luachbhunaithe maidir le rialachas digiteach agus caighdeáin dhigiteacha a chur chun cinn chun claochlú digiteach domhanda atá duine-lárnach, iontaofa a mhúnlú lena n‑urramaítear cearta an duine agus saoirsí bunúsacha. Trí ghníomhú go cinntitheach, is féidir leis an Aontas a bheith ina cheann feadhna ar an dul chun cinn teicneolaíoch a threoraítear go freagrach ar an leibhéal domhanda.
2.Líonra domhanda comhpháirtithe an Aontais a mhéadú
Tá comhar digiteach láidir réigiúnach agus déthaobhach forbartha ag an Aontas le comhpháirtithe trí Chomhairlí Trádála agus Teicneolaíochta ar leibhéal na nAirí 12 agus Comhpháirtíochtaí Digiteacha 13 , chomh maith le hIdirphlé Digiteach 14 . Coinníonn sé Idirphlé maidir le Cibearspás le raon leathan comhpháirtithe ar bun 15 , agus is gné de na Comhpháirtíochtaí Cuimsitheacha agus Straitéiseacha saincheaptha iad saincheisteanna digiteacha atá ag éirí níos tábhachtaí 16 .
Ina theannta sin, cuireann an comhar digiteach le comhlachas na dtíortha comhpháirtíochta le príomhchláir an Aontais, go háirithe Fís Eorpach 17 agus an Clár don Eoraip Dhigiteach 18 le haghaidh ardchomhar taighde agus nuálaíochta agus cur in úsáid teicneolaíochtaí digiteacha.
Tá cur chun cinn chomhchuibhiú phríomhbheartais an chlaochlaithe dhigitigh, infheistíocht i nascacht dhigiteach shlán agus borradh a chur faoin nuálaíocht i gcroílár chomhar an Aontais le tíortha is iarrthóirí agus tíortha comharsanachta, trí ionstraimí amhail Comhaontuithe Doimhne Cuimsitheacha Saorthrádála nó Comhaontuithe Cobhsaíochta agus Comhlachais. Leis na comhaontuithe trádála sin agus ionstraimí gaolmhara eile amhail na Pleananna Fáis do na Balcáin Thiar 19 , an tSaoráid Athchóirithe agus Fáis le haghaidh Phoblacht na Moldóive 20 agus an tSaoráid don Úcráin 21 , leagtar síos bonn straitéiseach chun tíortha is iarrthóirí a chomhtháthú de réir a chéile sa Mhargadh Aonair Digiteach 22 .
Tá Comhshocrú Nua don Mheánmhuir á fhorbairt ag an Aontas le comhpháirtithe Chomharsanacht an Deiscirt, ag tógáil ar Chlár Oibre 2021 don Mheánmhuir, chun ár rannpháirtíocht pholaitiúil a dhoimhniú agus chun comhar a neartú i réimsí leasa fhrithpháirtigh, go háirithe sa réimse digiteach.
Tá an tAontas ag cur go leanúnach lena líonra comhaontuithe saorthrádála 23 agus comhaontuithe trádála digití 24 . I measc nithe eile, leagtar síos leo sin rialacha trádála digití ardchaighdeáin lena n‑áirithítear timpeallacht shlán shábháilte ar líne do thomhaltóirí, lena dtugtar trédhearcacht, intuarthacht agus deimhneacht dhlíthiúil do chuideachtaí, agus lena ndéantar bacainní gan údar ar thrádáil dhigiteach, lena n‑áirítear maidir le sreafaí sonraí trasteorann, a chosc nó a bhaint. Ina theannta sin, déanann an Coimisiún idirchaidreamh le príomhrialtóirí agus le príomhfhorfheidhmitheoirí eile, agus líonraí nua maidir le seirbhísí digiteacha agus IS á dtógáil aige.
Leis an straitéis Global Gateway, tugtar an deis comhpháirtíochtaí, idirphlé beartais, agus infheistíochtaí a chur chun cinn le tíortha ar fud an domhain, lena n‑áirítear tríd an gComhghuaillíocht Dhigiteach idir an tAontas agus Meiriceá Laidineach agus Muir Chairib 25 , tríd an socrú riaracháin leis an Afraic Chliste 26 , tríd Thionscnamh Fhoireann na hEorpa don Áise Láir’ 27 , agus trí Phacáistí Geilleagair Dhigitigh le comhpháirtithe san Afraic, san Áise agus i Meiriceá Laidineach 28 , lena n‑áirítear leis na Tíortha is Lú Forbairt. Cuireann na Comhpháirtíochtaí um Thrádáil agus Infheistíocht Ghlan 29 ar chumas an Aontais aghaidh a thabhairt ar na naisc idir saincheisteanna digiteacha, trádáil agus teicneolaíocht ghlan.
Tá fonn méadaitheach ann ar fud an domhain maidir le comhar digiteach leis an Aontas, agus mar gheall ar an tírdhreach domhanda atá ann faoi láthair, tá cineálacha comhair nua, níos doimhne agus níos solúbtha ag teastáil chun comhpháirtíochtaí comhthairbheacha a chothú, lena n‑aithnítear an dul chun cinn atá déanta ag go leor dár gcomhpháirtithe ar fud an réimse dhigitigh, ó sheirbhísí rialtais a dhigitiú go híocaíochtaí leictreonacha a éascú, ó thacú le cearta saoránach go hathléimneacht áitiúil a fhorbairt. Leanfaidh an tAontas de bheith ag lorg comhair – ní hamháin le comhpháirtithe atá ar aon intinn le fada an lá, ach le haon tír a bhfuil cuspóirí coiteanna againn léi.
Ós rud é gur gá dlús a chur lena chlaochlú digiteach i gcomhthéacs geopholaitiúil níos dúshlánaí, déanfaidh an tAontas, dá bhrí sin, a líonra domhanda comhpháirtithe a mhéadú i gceithre threo:
1)Na Comhpháirtíochtaí Digiteacha agus an tIdirphlé Digiteach atá ann cheana a dhoimhniú, chun comhar a chur chun cinn i bpríomhréimsí, amhail taighde agus nuálaíocht, comhar tionsclaíoch agus beartais maidir le teicneolaíocht atá ag teacht chun cinn, trédhearcacht agus athléimneacht slabhraí soláthair domhanda, slándáil agus inbhuanaitheacht an bhonneagair dhigitigh, cur chun feidhme agus nuálaíocht IS, agus béim á leagan ar thairbhí eacnamaíocha frithpháirteacha agus ar shlándáil eacnamaíoch a fheabhsú. Molfaidh an tAontas tosaíochtaí breise a chomhtháthú ar bhealach nach beag sna comhpháirtíochtaí sin, amhail an chibearshlándáil, slándáil taighde, cosaint íogair teicneolaíochta, agus gnéithe a bhaineann le teicneolaíochtaí dé-úsáide. Leanfaidh sé de bheith ag gabháil d’ardchomhar rialála. Le doimhniú na gComhpháirtíochtaí Digiteacha agus an Idirphlé Dhigitigh, cuirfear ról feabhsaithe ar fáil do ghnólachtaí ón Aontas agus ó thíortha comhpháirtíochta, spreagfar comhar gnólacht le gnólacht agus gnólacht le rialtas agus díreofar ar dheiseanna infheistíochta.
2)An líonra comhair atá ann cheana a leathnú, trí Chomhpháirtíochtaí Digiteacha agus Idirphlé nua a bhunú agus líonra na gcomhaontuithe trádála digití a leathnú. Cinnfear comhpháirtithe tosaíochta ag tógáil ar thosaíochtaí an Aontais agus ar an gcomhar déthaobhach agus réigiúnach atá ann cheana ar leibhéal an Aontais agus ar leibhéal na mBallstát. Faoin Global Gateway, oibreoidh an tAontas chun infheistíochtaí Eorpacha i dtíortha comhpháirtíochta a mhéadú, rud a nascfaidh an tAontas le lárionaid fáis dhigitigh agus a rannchuideoidh le slándáil eacnamaíoch an Aontais.
3)Na comhpháirtíochtaí sin a nascadh chun feidhmiú mar líonra. De réir mar a mhéadaíonn líonra na gcomhpháirtíochtaí, is amhlaidh a bhíonn an deis ann oibriú le chéile chun leasanna comhroinnte a shaothrú. Ar an gcaoi chéanna, tá gá níos mó ná riamh le comhar agus muid ag tabhairt aghaidh ar dhúshláin choiteanna. D’fhéadfadh an comhar a bheith i bhfoirm malartuithe teicniúla rialta maidir le saincheisteanna coiteanna (e.g. teicneolaíocht atá ag teacht chun cinn, nascacht shlán iontaofa, comhar caighdeánaithe nó rialála), tionscadail chomhpháirteacha a ullmhú (e.g. comhar taighde agus nuálaíochta, treoirthionscadail idir-inoibritheachta, tionscadail chomhpháirteacha i dtríú tíortha), agus líonra a eagrú ina mbeadh ionadaithe ardleibhéil ó chomhpháirtithe an Aontais, ón Aontas agus ó Bhallstáit an Aontais rannpháirteach.
4)Comhpháirtíochtaí Slándála agus Cosanta a neartú 30 a mhéid a bhaineann le saincheisteanna digiteacha, i bhfianaise thábhacht mhéadaitheach an bhonneagair dhigitigh agus na dteicneolaíochtaí digiteacha ardfhorbartha. I measc na dtosaíochtaí sa réimse sin tá infheistíocht i gcumais theicneolaíocha dhé-úsáide a ghiaráil agus tionscal teicneolaíochta slándála agus cosanta an Aontais a chur chun cinn mar chomhpháirtí lárnach agus mar spreagadh nuálaíochta san IS, i dteicneolaíochtaí candamacha agus i dteicneolaíochtaí eile atá ag teacht chun cinn.
Measann an tAontas go bhfuil forbairt na hintleachta saorga bunriachtanach do thodhchaí an chine dhaonna. Ní féidir gur ar mhaithe le hardchumhachtaí IS ardcheannas a bhaint amach a bheidh sí ann. Mar fhreagairt air sin, leanfaidh an tAontas dá shamhail oscailte chomhoibríoch a chur chun cinn maidir le IS iontaofa a fhorbairt, atá bunaithe ar rannpháirtíocht taighdeoirí agus na hearnála príobháidí i ‘Monarchana IS’. I ndáil leis an méid sin, beidh comhar le comhpháirtithe agus comhghuaillithe atá ar aon intinn linn agus a bhfuil an urraim chéanna acu don smacht reachta agus do luachanna bunúsacha agus daonlathacha ríthábhachtach.
Samplaí de ghníomhaíochtaí atá le teacht:
·Comhpháirtíochtaí agus Idirphlé Digiteach nua a d’fhéadfadh a bheith ann a ullmhú, i gcur chuige Fhoireann na hEorpa, lena n‑áiritheofar dlúthchomhar leis na Ballstáit, leis an tionscal, le páirtithe leasmhara agus le tíortha comhpháirtíochta, lena n‑áirítear i gcomhthéacs chomhar an Aontais le tíortha comharsanachta.
·Líonra Comhpháirtíochta Digití a bhunú, ina mbeidh comhpháirtithe an Aontais, an tAontas agus a Bhallstáit rannpháirteach.
·Dlúthchomhar chun sineirgí a chur chun cinn idir Comhpháirtíochtaí Digiteacha agus na saincheisteanna a bhaineann le teicneolaíocht Chomhpháirtíochtaí Slándála agus Cosanta an Aontais.
·Líonra na gComhaontuithe Trádála Digití a leathnú agus leanúint den chaibidlíocht maidir le Comhaontuithe Saorthrádála, lena n‑áirítear iad siúd a bhaineann le trádáil dhigiteach.
3.Tairiscint Ghnó Teicneolaíochta an Aontais
Chun dul i dteagmháil le tacar níos leithne comhpháirtithe iontaofa, forbróidh an tAontas Tairiscint Ghnó Teicneolaíochta chomhtháite. Tacóidh Tairiscint chuimsitheach den sórt sin le nascacht shlán iontaofa, Bonneagar Poiblí Digiteach, IS agus réitigh bogearraí, agus níos mó ná sin, a chur in úsáid. Is é an cuspóir a bheidh ann comhpháirteanna teicneolaíochta a chur in oiriúint agus a chomhcheangal i gcur chuige modúlach – leasanna na dtíortha comhpháirtíochta agus an Aontais a chothromú, chun pacáiste sochar frithpháirteach a chruthú. Comhlánófar é sin le fothú acmhainneachta agus le bearta chun an bhearna tallainne dhomhanda a dhúnadh, lena gcomhordófar iarrachtaí oiliúna i dtaca le scileanna digiteacha le comhpháirtithe idirnáisiúnta. Cuirfidh an tAontas réitigh dhigiteacha chun cinn go gníomhach lena gcumasófar monaraíocht, seirbhísí agus feidhmeanna eile atá níos tíosaí ar fhuinneamh agus ar acmhainní.
Bainisteoidh an tAontas agus na Ballstáit an Tairiscint Ghnó Teicneolaíochta go comhpháirteach i gcur chuige ‘Foireann Teicneolaíochta na hEorpa’, ina mbeidh dlúthbhaint ag cuideachtaí an Aontais 31 , Institiúidí Maoinithe Forbraíochta an Aontais agus Gníomhaireachtaí Creidmheasa Onnmhairiúcháin leis, agus ról láidir éascaitheora ag an Mol D4D 32 agus ag brat-thionscnamh EU4Digital 33 ann. Cuirfidh an Tairiscint leis na huirlisí maoinithe seachtracha atá ann cheana agus leis na hinfheistíochtaí ón earnáil phríobháideach. Beidh sé ríthábhachtach infheistíochtaí a chomhordú trí na cláir éagsúla, idir an earnáil phoiblí agus an earnáil phríobháideach agus leanúint d’fheabhas a chur ar an timpeallacht ghnó. Déanfar é sin i ndlúthchomhar le Toscaireachtaí an Aontais agus le hAmbasáidí náisiúnta, mar shampla trí na Moil Dhigiteacha Neamhfhoirmiúla, atá bunaithe ag an Aontas i roinnt tíortha comhpháirtíochta 34 chun comhar Fhoireann na hEorpa a chur chun cinn. I dtíortha lena bhfuil comhpháirtíochtaí straitéiseacha tugtha i gcrích nó á gcaibidliú, déanfar an Tairiscint a chomhtháthú sa chreat comhpháirtíochta atá ann cheana nó atá caibidlithe.
4.Réimsí tosaíochta comhair le tíortha comhpháirtíochta
Cumhdófar leis an gcomhar le tíortha comhpháirtíochta na réimsí seo a leanas:
Bonneagar digiteach slán iontaofa
Tá slándáil agus athléimneacht líonraí agus bonneagar digiteach fíor-riachtanach chun forbairtí a chumasú in earnálacha ríthábhachtacha amhail fuinneamh, iompar, airgeadas agus sláinte. Cé go bhfuil ceannaireacht léirithe ag an Aontas sa réimse sin cheana féin, leanfar den obair, trí leas a bhaint as ionstraimí amhail Bosca Uirlisí 5G 35 , chun cabhrú le tíortha comhpháirtíochta a bhfuil an imní chéanna orthu faoin ngá atá lena ngeilleagar digiteach a thógáil ar bhonn slán. I gcomhréir leis an Teachtaireacht le déanaí chun slándáil agus athléimneacht cáblaí fomhuirí a neartú 36 , d’fhéadfaí an cur chuige sin a leathnú chuig cáblaí fomhuirí agus chuig bonneagar digiteach criticiúil eile. D’fhéadfadh sé sin a bheith faoi réir comhdháil bhliantúil chun teagmhálacha teicniúla agus tuiscint a dhoimhniú maidir le deiseanna agus ceanglais slándála le haghaidh bealaí, comhpháirtíochtaí agus maoiniú amach anseo, rud a chuirfeadh le próiseas Global Gateway.
Cuirfidh an tAontas chun cinn cur in úsáid nascachta digití sláine agus bonneagair inbhuanaithe ar fud an domhain – go háirithe líonraí 5G atá slán agus iontaofa, cáblaí fomhuirí agus talún, nascacht satailíte, bonneagar Idirlín, sár-ríomhairí agus lárionaid sonraí.Oibreoidh an tAontas freisin chun tacú le hathléimneacht a chomhpháirtithe trí líonraí a éagsúlú agus a chomhtháthú, lena n‑áirítear trí nascacht satailíte agus cineálacha eile líonraí nach líonraí talún iad. Féachfaidh an tAontas le líonra 37 cáblaí cumarsáide fomhuirí agus talún slána a fhorbairt lena nascfar an tAontas le tíortha comhpháirtíochta, chomh maith le nascacht spáis cheannasach athléimneach. Ba cheart dó sin tacú le ról an Aontais mar mhol idirnáisiúnta atá in ann sonraí agus acmhainneachtaí ríomhaireachta a óstáil i spás athléimneach iontaofa, leas a bhaint as deiseanna an gheilleagair sonraí, agus infheistíochtaí a mhealladh i lárionaid sonraí inbhuanaithe, sa ríomhaireacht agus in acmhainneachtaí IS. I gcomhar le tíortha comhpháirtíochta, féachfaidh an tAontas go gníomhach le tacú le réitigh dhigiteacha lena gcumasófar monaraíocht, seirbhísí agus feidhmeanna eile atá níos tíosaí ar fhuinneamh agus ar acmhainní, lena laghdófar an lorg carbóin chomh maith le hoiriúnú don athrú aeráide agus athléimneacht in aghaidh an athraithe aeráide a éascú.
|
Samplaí de ghníomhaíochtaí atá le teacht i réimse na nascachta sláine: ·Is tosaíocht straitéiseach de chuid an Aontais í an nascacht Artach. Oibreoidh an tAontas le comhpháirtithe chun borradh a chur faoin tacaíocht do thionscadail a chuireann bealaí cáblaí fomhuirí nua chun cinn sa réigiún, trí úsáid a bhaint as an tSaoráid um Chónascadh na hEorpa chun infheistíochtaí poiblí agus príobháideacha a spreagadh. ·Príomhghné d’infheistíocht Global Gateway san earnáil dhigiteach is ea líonra de thionscadail straitéiseacha bonneagair cáblaí cumarsáide fomhuirí chun naisc shlána athléimneacha a sholáthar idir an tAontas agus tíortha comhpháirtíochta. Áirítear ar na hinfheistíochtaí: 1)Le BELLA, an chéad chábla snáthoptaice trasatlantach idir an tAontas agus Meiriceá Laidineach agus Muir Chairib, a nascann institiúidí taighde Mheiriceá Laidinigh, soláthraítear rochtain thapa ar shonraí um Fhaire na Cruinne ó chomhpháirt Copernicus de Chlár Spáis an Aontais. Leathnófar é a thuilleadh ar fud Mheiriceá Láir agus Mhuir Chairib agus tacóidh sé le fás na Ríomhaireachta Ardfheidhmíochta sa réigiún. 2)Cuirfidh cábla fomhuirí MEDUSA, le tacaíocht ón gCoimisiún Eorpach agus ó BEI Domhanda, nascacht ardluais ar fáil idir bhruach thuaidh agus theas na Meánmhara agus leathnófar é chun an Afraic Thiar a chumhdach. 3)Is éard atá i nGorm-Raman córas cáblaí fomhuirí slána 11,700 km atá beartaithe lena nasctar an Eoraip leis an India, le gabhálacha sa Mheánoirthear agus san Afraic Thoir, feadh Chonair Eacnamaíoch idir an India, an Meánoirthear, agus an Eoraip. Leis an ngné láidir nascachta lena nasctar an Eoraip agus an India trí réigiún na Murascaille, éascóidh sé malartú sonraí agus méadóidh sé an comhar le tíortha comhpháirtíochta. ·Aithnítear i straitéis an Aontais maidir leis an Muir Dhubh gur príomhthairseach í an Mhuir Dhubh a nascann an Eoraip le Cugas Theas, leis an Áise Láir, agus níos faide i gcéin. Chun nascacht agus trádáil le réigiún Chomhpháirtíocht an Oirthir a mhéadú, tacóidh an tAontas le hinfheistíochtaí spriocdhírithe sa bhonneagar digiteach, trí naisc dhigiteacha na Mara Duibhe a fhorbairt arb é is aidhm dóibh nasc idirlín slán ardacmhainneachta a chruthú, nuair is féidir sin. ·Le Tionscnamh Fhoireann na hEorpa don Áise Láir, cuirfear nascacht shlán fheabhsaithe ar fáil, go príomha do limistéir san Áise Láir nach ndéantar freastal ceart orthu, trí shatailít arna soláthar ag earnáil phríobháideach an Aontais. ·Le IRIS², an chomhpháirt nua i nascacht shlán satailítbhunaithe de chlár spáis an Aontais, soláthrófar cumhdach domhanda nuair a bheidh an buíon iomlán imscartha. Ag céim luath, cuirfidh sé tionscadail phíolótacha ar bun san Afraic Fho-Shahárach. ·Áirítear le Tionscnamh Fhoireann na hEorpa um Nascacht Inbhuanaithe AE-ASEAN faoi Global Gateway comhpháirt dhigiteach lena gcuirtear chun cinn leathnú scathánsuíomh Copernicus sna hOileáin Fhilipíneacha chuig tíortha eile in ASEAN, lena n‑áirítear an Indinéis agus an Téalainn. |
Teicneolaíochtaí atá ag teacht chun cinn
·An Intleacht Shaorga: Mar a leagtar amach sa Phlean Gníomhaíochta um Mór Roinn na hIntleachta Saorga 38 , leanfaidh an tAontas de bheith i dteagmháil go déthaobhach, go réigiúnach agus go hiltaobhach le comhpháirtithe iontaofa chun infheistíochtaí a mhealladh san Aontas, chun tacú le cothrom iomaíochta domhanda a bhunú le haghaidh IS iontaofa, agus chun dea-rialachas IS a chur chun cinn ar fud an domhain. Gníomhóidh an tAontas go cinntitheach freisin chun é féin a bhunú mar cheannródaí maidir le IS a chur i bhfeidhm san eolaíocht ar mhaithe lena hiomaíochas féin agus chun na heolaithe is fearr a mhealladh chuig ‘Roghnaigh an Eoraip’ 39 . Lorgóidh an tAontas comhar le comhpháirtithe iontaofa a thuilleadh, go háirithe maidir le gnéithe den intleacht shaorga a bhaineann leis an nuálaíocht, amhail Monarchana IS a imscaradh lasmuigh den Aontas agus a nascadh le líonra Mhonarchana IS an Aontais. Áireofar ar an gcomhar sin freisin rochtain a sholáthar ar shamhlacha agus algartaim IS, go háirithe maidir le tionscadail a bhaineann leis an IS chun Leas an Phobail (e.g. dul i ngleic leis an athrú aeráide agus tacú leis an aistriú glan, cúram sláinte nó talmhaíocht a fheabhsú). Leis an gcomhar sin, déanfar sonraí agus seirbhísí satailíte poiblí agus tráchtála an Aontais a ghiaráil freisin chun feabhas a chur ar réitigh atá faoi thiomáint IS ar dhúshláin dhomhanda, amhail faireachán comhshaoil agus freagairt ar thubaistí. I bhfianaise chineál dé-úsáide roinnt feidhmchlár intleachta saorga, leanfaidh an tAontas de bheith ag obair ar ról na hIntleachta Saorga sa Chomhbheartas Eachtrach agus Slándála (CBES) agus sa Chomhbheartas Slándála agus Cosanta (CBSC), ag obair leis na Ballstáit chun a áirithiú go mbeidh CBES agus CBSC an Aontais in ann tairbhe a bhaint as dul chun cinn teicneolaíoch na hintleachta saorga.
·5G/6G: Is é an tAontas an ceannaire nuálaíochta domhanda maidir le hardnascacht, amhail 5G agus réitigh líonra fhosaithe. Chun an cuspóir comhchaighdeáin a bhaint amach don chéad ghlúin eile atá inbhuanaithe trí dhearadh (6G), tá gá le comhar le tíortha atá ar aon intinn leo, ag tosú le comhar agus caighdeánú taighde agus nuálaíochta. Is é an príomhdhúshlán atá ann teicneolaíochtaí 6G a fhorbairt agus a roghnú, go háirithe teicneolaíochtaí Líonra Rochtana Raidió, lena n‑áirítear líonraí trastíre agus neamh-thrastíre a chomhtháthú. Is féidir le tionscal an Aontais forbairt 6G a stiúradh i gcomhréir le caighdeáin an Aontais, go háirithe maidir le cibearshlándáil, idir-inoibritheacht agus comhlíonadh caighdeán maidir le rochtain dhlíthiúil agus bainfidh sé tairbhe as comhar le tíortha a bhfuil láidreachtaí comhlántacha acu sa slabhra luacha, lena n‑áirítear micrileictreonaic, gairis, néalríomhaireacht nó IS.
·Leathsheoltóirí: Mar gheall ar an éiginnteacht gheopholaitiúil agus ar chastacht mhéadaitheach na slabhraí soláthair leathsheoltóirí, tá gá le cur chuige saincheaptha tírshonrach, lena n‑áiritheofar go rachaidh an tAontas i gcomhpháirtíocht le ceannairí domhanda an éiceachórais leathsheoltóirí, agus a leasanna teicneolaíochta, eacnamaíocha agus slándála féin á gcoimirciú ag an am céanna. Leanfaidh an tAontas de bheith i dteagmháil le tíortha ina rachaidh an comhar i réimsí amhail taighde agus forbairt réamhiomaíoch agus athléimneacht an tslabhra soláthair chun tairbhe don dá thaobh. I gcomhréir leis an tStraitéis Slándála Eacnamaíche 40 , déanfaidh an tAontas a leasanna slándála eacnamaíche a chosaint freisin, lena n‑áirítear trí rannpháirtíocht dhéthaobhach, réigiúnach agus iltaobhach, comhroinnt faisnéise a spreagadh chun cur isteach ar an slabhra soláthair a chosc, rioscaí a mhaolú, agus tallanna domhanda a mhealladh chun aghaidh a thabhairt ar an mbearna scileanna in éiceachóras leathsheoltóirí na hEorpa.
·Teicneolaíochtaí candamacha: Chun caighdeáin choiteanna agus feidhmchláir choiteanna i dteicneolaíochtaí candamacha a chur chun cinn, tá gá le comhar láidir idirnáisiúnta, go háirithe sa taighde agus sa nuálaíocht. Neartóidh an tAontas naisc le tíortha a chuireann láidreachtaí comhlántacha ar fáil i slabhra luacha na teicneolaíochta candamaí, lena n‑áirítear ríomhaireacht, brath, cumarsáid, criptiú sábháilte iar-chandamach, agus réimsí gaolmhara ar bhonn cómhalartach. Tá an tAontas fós airdeallach ar ról na dteicneolaíochtaí candamacha sa tírdhreach slándála a bheidh ann amach anseo agus bíonn sé i dteagmháil rialta le ECAT agus le comhpháirtithe ábhartha eile sa réimse. Rachaidh an tAontas i gcomhar le tíortha comhpháirtíochta maidir le feidhmeanna nithiúla na dteicneolaíochtaí candamacha i mbeartais earnála, mar shampla chun ábhair nua a fhorbairt.
Samplaí de ghníomhaíochtaí atá le teacht i réimse na dteicneolaíochtaí atá ag teacht chun cinn:
·Cuirfidh an tAontas tionscadail chomhpháirteacha taighde agus nuálaíochta i dteicneolaíochtaí Candamacha chun feidhme leis an tSeapáin, le Poblacht na Cóiré agus le Ceanada.
·Mar chuid den Chomhairle Trádála agus Teicneolaíochta idir an tAontas agus an India, tá an tAontas agus an India ag obair ar chlár tiomnaithe a fhorbairt lena n‑éascófar malartuithe tallainne agus lena gcothófar scileanna leathsheoltóra i measc mac léinn agus gairmithe óga.
·I gcomhthéacs na Comhghuaillíochta Digití AE-MLC, bunóidh an tAontas comhpháirtíocht láidir chun acmhainní Ríomhaireachta Ardfheidhmíochta a chónascadh i Meiriceá Laidineach agus i Muir Chairib agus chun a n‑idir-inoibritheacht agus a gcomhtháthú le héiceachóras RA na hEorpa a fheabhsú.
·Déanfaidh an tAontas obair leantach ar ghealltanais an Chruinnithe Aireachta idir an tAontas Eorpach agus an tAontas Afracach (Bealtaine 2025), oibriú le chéile chun éiceachórais nuálaíochta réigiúnacha a fhorbairt, straitéisí IS agus creataí rialachais dhigitigh a bhunú.
·Tacóidh an tAontas le Monarchana IS a chur in úsáid i dtíortha comhpháirtíochta iontaofa, tacóidh sé leo a mbonneagar ríomhaireachta a fhorbairt agus, ag an am céanna, iad a nascadh go slán leis an Aontas agus lena éiceachóras Monarchana IS.
·Oibreoidh an tAontas leis na Ballstáit chun réimsí a leagan amach inar féidir leis an Intleacht Shaorga tacú le cur chun feidhme an Chomhbheartais Eachtraigh agus Slándála agus an Chomhbheartais Slándála agus Cosanta.
·Leanfaidh an tAontas de thacaíocht a thabhairt don nuálaíocht i réimse na cosanta trí Scéim Nuálaíochta Cosanta an Aontais agus féachfaidh sé ar bhealaí chun feabhas a chur ar an gcomhar leis an Úcráin sa réimse sin.
·Féachfaidh an tAontas, i ndlúthchomhar le comhpháirtithe iontaofa amhail an Iorua agus an Úcráin, ar bhealaí nua chun tacú le sineirgí leis an Mol Nuálaíochta Cosanta na hEorpa.
Cibearshlándáil
I ndomhan hipearnasctha an lae inniu agus sa tírdhreach geopholaitiúil atá ag athrú, ní stopann cibearbhagairtí ó ghníomhaithe stáit ná ó ghníomhaithe neamhstáit ag na teorainneacha. Is féidir le cibirionsaí nó teagmhas i dtír amháin cur as go mór do ghnólachtaí agus do bhonneagar ar fud an domhain, agus bíonn ár saoránaigh agus ár ngnólachtaí ag brath ar tháirgí digiteacha agus ar réitigh dhigiteacha ó thríú tíortha. Is infheistíocht dhíreach i slándáil an Aontais féin é an chibearshlándáil agus an chibearchosaint a neartú, lena n‑áirítear an acmhainneacht bagairtí agus teagmhais chibearshlándála a bhrath, ullmhú dóibh agus freagairt dóibh, agus feabhas a chur ar chomhroinnt faisnéise maidir le cibearbhagairtí le comhpháirtithe idirnáisiúnta chun aga freagartha agus athléimneacht a fheabhsú. Is amhlaidh go deimhin an cás i gomharsanacht an Aontais, áit a bhfuil an tAontas tiomanta go hiomlán do thacaíocht a thabhairt do thíortha is iarrthóirí chun dlús a chur lena gcumais chibearshlándála agus chibearchosanta.
Tá na huirlisí ag an Aontas freisin chun ceannaireacht a thabhairt maidir leis an gcibearshlándáil ar scála domhanda. Leis an nGníomh um Chibear-Athléimneacht 41 , tá caighdeán nua á leagan síos ag an Aontas le haghaidh táirgí atá slán trí dhearadh. Agus tíortha ar fud an domhain ag iarraidh a slabhraí soláthair a dhaingniú, cuireann saineolas an Aontais ar shlándáil táirgí bunús cumhachtach le haghaidh comhpháirtíochtaí idirnáisiúnta. Ar an gcaoi chéanna, ós rud é go bhfuil comhpháirtithe domhanda an Aontais ag infheistiú chun a mbonneagair chriticiúla a dhaingniú, tagann deiseanna margaidh chun cinn i réimsí ina bhfuil ceannaireacht thionsclaíoch láidir Eorpach ag an Aontas amhail cripteagrafaíocht agus táirgí digiteacha an-slán.
Mar gheall ar an tionchar mór atá acu ar ghnólachtaí agus ar ospidéil, is sciúirse domhanda fós iad bogearraí éirice, sciúirse nach féidir le haon tír amháin dul i ngleic leis ina aonar. I gcomhréir le Straitéis ProtectEU, iarrfaidh an tAontas go mbeadh comhar idirnáisiúnta níos láidre ann chun an bonneagar ar a bhfuil grúpaí fuascailte ag brath a bhaint, a bhfoinsí airgeadais riachtanacha a bhriseadh, smachtbhannaí níos éifeachtúla i gcoinne déantóirí coire agus éascaitheoirí a áirithiú, agus na cibearchoirpigh a thabhairt os comhair na cúirte.
Mar chuid de na hiarrachtaí sin, cuirfidh an tAontas cibear-athléimneacht fheabhsaithe chun cinn freisin in earnálacha atá ag brath níos mó agus níos mó ar theicneolaíochtaí digiteacha, amhail iompar agus soghluaisteacht chliste, ina bhfuil bonneagar, sonraí agus seirbhísí slána ríthábhachtach chun leanúnachas oibríochtúil agus muinín an phobail a áirithiú.
Leis na hiarrachtaí a rinneadh le déanaí, áirithíodh go mbeadh tíortha is iarrthóirí atá comhlachaithe leis an gClár don Eoraip Dhigiteach in ann rochtain a fháil ar an gCúltaca Cibearshlándála ar leibhéal an Aontais a bunaíodh leis an nGníomh um Chibear-Dhlúthpháirtíocht 42 . Ina theannta sin, leanfaidh Gníomhaireacht an Aontais Eorpaigh um Chibearshlándáil den chomhar cibearshlándála le tríú tíortha ábhartha, lena n‑áirítear fothú acmhainneachta i dtíortha is iarrthóirí agus i dtíortha Comharsanachta.
Samplaí de ghníomhaíochtaí atá le teacht i réimse na cibearshlándála:
·Oibreoidh an tAontas le comhpháirtithe ábhartha chun féachaint an bhféadfaí comhaontuithe um aitheantas frithpháirteach a dhéanamh maidir leis an nGníomh um Chibear-Athléimneacht agus creataí faoi seach na gcomhpháirtithe chun comhlíonadh na gceanglas maidir le cibearshlándáil táirgí a éascú.
·Leanfaidh an tAontas den chomhar le tíortha comhpháirtíochta chun feabhas a chur ar an gcibear-athléimneacht dhomhanda agus chun rannchuidiú le cibearspás saor, oscailte, sábháilte agus slán. Agus í fréamhaithe go daingean sa straitéis Global Gateway, díreoidh tacaíocht maidir le cibearshlándáil agus fothú cibear-acmhainneachta ar bhonneagair chriticiúla a dhaingniú, agus ar chibearéiceachórais a neartú, lena n‑áirítear trí chreataí rialála agus beartais ábhartha a fhorbairt agus a chur chun feidhme, chomh maith le cibearshláinteachas agus cibearlitearthacht.
·Ag na Náisiúin Aontaithe agus laistigh de chomhlachtaí réigiúnacha slándála, leanfaidh an tAontas de stát-iompar freagrach a chur chun cinn sa chibearspás, bunaithe ar chreat a dtacaíonn Comhthionól Ginearálta na Náisiún Aontaithe leis. Áirítear leis sin seasamh leis an dlí idirnáisiúnta, cloí le noirm iompair stáit a nglactar leo ar fud an domhain in aimsir na síochána, bearta forbartha muiníne a fhorbairt, agus tacú le stáit acmhainneacht a fhorbairt chun na gnéithe creata sin a chur chun feidhme.
·Treiseoidh an tAontas a shannadh cibirionsaithe do ghníomhaithe mailíseacha, lena n‑áirítear gníomhaithe státbhunaithe, agus leanfaidh sé de na sásraí smachtbhannaí gaolmhara a fhorbairt.
Ionramháil agus Cur Isteach Eachtrach ar Fhaisnéis
In éineacht lena chomhpháirtithe, tabharfaidh an tAontas cosaint níos fearr do shaoránaigh ar fheachtais Ionramhála agus Cur Isteach Eachtrach ar Fhaisnéis nó ar rioscaí sochaíocha eile a eascraíonn as ardáin ar líne. Chun é sin a dhéanamh, tá sé ríthábhachtach trédhearcacht algartamach a áirithiú maidir leis an gcaoi a moltar agus a modhnaítear ábhar chun freagracht agus muinín an phobail a fheabhsú.
Tá sé sin ábhartha freisin do thíortha is iarrthóirí, do thíortha is iarrthóirí ionchasacha agus do thíortha comharsanachta, i bhfianaise a gcuid leochaileachtaí sonracha i dtaca le bréagaisnéis agus cur isteach eachtrach agus, dá réir sin, beifear in ann ár n‑athléimneacht fhrithpháirteach a neartú, lena n‑áirítear athléimneacht dhaonlathach.
Samplaí de ghníomhaíochtaí atá le teacht i réimse Ionramhála agus Cur Isteach Eachtrach ar Fhaisnéis:
·Tar éis leathnú ar a chuid oibre maidir le cibirionsaithe a shannadh do ghníomhaithe sainithe, leathnóidh an tAontas sannadh teagmhas maidir le hIonramháil agus Cur Isteach Eachtrach ar Fhaisnéis.
Céannachtaí Digiteacha agus Bonneagar Poiblí Digiteach
Le taithí an Aontais ar thiachóga céannachta digití foinse oscailte agus ar Bhonneagar Poiblí Digiteach atá slán agus comhlíontach le cosaint sonraí a fhorbairt, cuirtear luach nach beag ar fáil lasmuigh de theorainneacha an Aontais. Is féidir le comhar idirnáisiúnta agus socruithe aitheantais fhrithpháirtigh le príomh-chomhpháirtithe gnó trasteorann a shimpliú do chuideachtaí agus soghluaisteacht saoránach a éascú. Leanfaidh an tAontas go háirithe den chomhar le tríú tíortha (amhail an Úcráin, an Mholdóiv, na Balcáin Thiar, an tSeapáin, an India, an Éigipt) a shaothrú chun úsáid trasteorann gan uaim i dtaca le seirbhísí iontaoibhe a bhaint amach. Cuirfidh sé an Creat Eorpach Idir-inoibritheachta chun cinn freisin 43 chun cabhrú le tíortha comhpháirtíochta nuachóiriú riaracháin agus comhtháthú digiteach trasteorann a chothú, lena n‑áirítear ailíniú le caighdeáin agus cleachtais an Aontais. Leanfaidh an tAontas d’úsáid sonraíochtaí coiteanna agus caighdeán oscailte a chur chun cinn chun idir-inoibritheacht, trédhearcacht agus athúsáid a áirithiú 44 .
Samplaí de ghníomhaíochtaí atá le teacht i réimse an Bhonneagair Phoiblí Dhigitigh shláin:
·Tacóidh an tAontas le forbairt seirbhísí iontaoibhe agus réiteach céannachta digití (bunaithe ar shonraíochtaí Thiachóg Eorpach Céannachta Digití), rud a chuirfidh i gcroílár sraith bloc tógála agus réiteach digiteach idir-inoibritheach agus inscálaithe iad, lena n‑áirítear bloic agus réitigh foinse oscailte, chun tacú le claochlú digiteach riarachán poiblí agus gnólachtaí tíortha comhpháirtíochta.Leanfaidh an tAontas dá chuid oibre leis an Úcráin, leis an Moldóiv agus leis na Balcáin Thiar, chun ullmhú dá gcomhtháthú de réir a chéile leis an Tiachóg Eorpach Céannachta Digití.
·Beidh an tAontas ag comhoibriú le tíortha amhail an India, an Éigipt, Uragua agus an Bhrasaíl i réimse na ríomhshínithe agus na hidir-inoibritheachta i dtaca le bonneagar poiblí digiteach, d’fhonn tairbhí a chruthú do ghnólachtaí agus do shaoránaigh san Aontas agus i dtíortha comhpháirtíochta araon.
·Tacóidh an tAontas le cur chuige ina mbeidh idir-inoibritheacht mar réamhshocrú, bunaithe ar an gCreat Eorpach Idir-inoibritheachta, chun malartú sonraí gan uaim thar theorainneacha a éascú.
·Leanfaidh an tAontas de bheith ag obair le príomh-chomhpháirtithe idirnáisiúnta (an tSeapáin, an India, Singeapór, an Astráil, an Nua-Shéalainn, an Mhalaeisia) chun samhail an Aontais maidir le ríomhshonrascadh a chur chun cinn, bunaithe ar an gcaighdeán Eorpach i ndáil le ríomhshonrascadh agus sonraíochtaí teicniúla idir-inoibritheacha.
Ardáin ar líne
Le Gníomh um Sheirbhísí Digiteacha an Aontais 45 , cosnaítear an daonlathas, an tsaoirse cainte, an príobháideachas, sábháilteacht agus slándáil leanaí ar líne, agus soláthraítear creat slán chun earraí atá comhlíontach ó thaobh an dlí de a dhíol. Leis an Gníomh um Margaí Digiteacha 46 agus beartas iomaíochta an Aontais, cuirtear chun cinn inchoimhlinteacht na margaí digiteacha, cothrom iomaíochta agus iomaíocht chóir idir gníomhaithe digiteacha. Comhlánaíonn na gníomhartha sin an chosaint a thugtar sa timpeallacht dhigiteach le RGCS 47 agus le dlíthe cosanta tomhaltóirí.
Is tosaíocht dhomhanda é mionaoisigh a chosaint agus a chumhachtú ar líne. Faoin nGníomh um Sheirbhísí Digiteacha, ní mór do gach ardán ar líne ardleibhéal príobháideachais, sábháilteachta agus slándála mionaoiseach a áirithiú ar a seirbhís. Ina theannta sin, ní mór do na hardáin ar líne is mó measúnú agus maolú bliantúil a dhéanamh ar aon rioscaí sistéamacha a bhaineann lena seirbhísí – lena n‑áirítear cearta an linbh a urramú agus mionaoisigh a chosaint ar bhonn níos ginearálta. Tacaítear leis an nGníomh um Sheirbhísí Digiteacha agus comhlánaítear é leis an Straitéis i ndáil le hIdirlíon Níos Fearr do Leanaí. Go háirithe, déanann an tAontas cómhaoiniú ar an líonra beolínte sna Ballstáit chun dul i ngleic le scaipeadh ábhair mí-úsáide gnéasaí leanaí ar líne. Áirithítear comhar domhanda trí líonra INHOPE le 55 bheolíne atá ag feidhmiú ar fud an domhain.
Is tosaíocht eile í cosaint láidir chomhsheasmhach tomhaltóirí ar fud margaí ar líne a roinneann an tAontas le go leor dá chomhpháirtithe idirnáisiúnta agus is príomh-shaincheist í a dtugtar aghaidh uirthi leis an nGníomh um Sheirbhísí Digiteacha, chomh maith le creataí cosanta tomhaltóirí agus sábháilteachta táirgí. Faoin nGníomh um Sheirbhísí Digiteacha, ceanglaítear ar gach margadh ar líne caighdeáin láidre sábháilteachta, trédhearcachta agus cuntasachta a chomhlíonadh chun a áirithiú nach féidir táirgí neamhdhleathacha neamhshábháilte a dhíol le tomhaltóirí an Aontais trína gcuid seirbhísí. Comhlánaíonn Teachtaireacht 2025 maidir le ríomhthráchtáil 48 é sin trí ghníomhaíochtaí nua a leagan amach chun aghaidh a thabhairt ar dhúshláin a bhaineann leis an mborradh ar tháirgí neamhshábháilte, góchumtha agus aindleathacha ar bhealach eile a dhíoltar trí ardáin ar líne. Tabharfaidh an tAontas tús áite don chomhar le tíortha comhpháirtíochta agus i bhfóraim iltaobhacha chun teacht ar réitigh chomhpháirteacha ar rioscaí coiteanna i dtaca le sábháilteacht tomhaltóirí a eascraíonn as margaí ar líne.
Samplaí de ghníomhaíochtaí atá le teacht i réimse na n‑ardán ar líne:
·Leanfaidh an tAontas dá chur chuige rialála agus dá bhunphrionsabail a chur chun cinn go déthaobhach agus go hiltaobhach agus roinnfidh sé a thaithí maidir lena gcur chun feidhme.
·Eagróidh an tAontas imeachtaí réigiúnacha le heagraíochtaí idirnáisiúnta, reachtóirí tríú tíortha, rialtóirí agus an tsochaí shibhialta chun an tsaoirse chun tuairimí a nochtadh agus sábháilteacht ar líne a chur chun cinn.
5.Rialachas digiteach domhanda
Chun a spriocanna sa réimse digiteach a chur chun cinn, leanfaidh an tAontas de chur chuige iltaobhach agus ilpháirtithe leasmhara a shaothrú agus de rannpháirtíocht fhóinteach na bpáirtithe leasmhara ábhartha a áirithiú, lena n‑áirítear an tsochaí shibhialta, an saol acadúil agus an earnáil phríobháideach, ag tógáil ar na naisc láidre atá ann cheana le tíortha comhpháirtíochta.
Le Comhpháirtíochtaí Digiteacha agus Idirphlé Digiteach an Aontais, is féidir comhordú a dhéanamh roimh an bplé i bhfóraim iltaobhacha agus réigiúnacha, lena bhforbraítear comhghuaillíochtaí láidre chun cuspóirí comhroinnte a shaothrú i bpríomhfhóraim agus eagraíochtaí idirnáisiúnta, amhail na Náisiúin Aontaithe, G7, G20, ECFE agus Comhairle na hEorpa, chomh maith le hinstitiúidí domhanda um Rialachas Idirlín. Go háirithe, le comhpháirtithe G7, leanfaidh an tAontas d’fhorbairt agus de ghlacadh na gCaighdeán Slándála Eacnamaíoch a chur chun cinn – lena n‑áirítear nuair is ábhartha do theicneolaíochtaí digiteacha – agus critéir éagsúla á gcur san áireamh amhail trédhearcacht, éagsúlú an tsoláthair, slándáil, inbhuanaitheacht, iontaofacht agus buanseasmhacht.
Glacadh Comhshocrú Digiteach Domhanda na Náisiún Aontaithe de chomhdhearcadh mar an chéad chreat cuimsitheach le haghaidh rialachas digiteach domhanda. Leagtar amach ann na cuspóirí, na prionsabail, na gealltanais agus na gníomhaíochtaí chun todhchaí dhigiteach oscailte, shaor agus shlán a fhorbairt do chách. Leanfaidh an tAontas de bheith rannpháirteach go gníomhach san obair chun an Comhshocrú Digiteach Domhanda a chur chun feidhme chun a bhfuil bainte amach aige a chosaint, agus ag an am céanna neamhdhúbláil iarrachtaí a áirithiú agus an leas is fearr is féidir a bhaint as sineirgí leis an ailtireacht dhigiteach dhomhanda atá ann cheana, lena n‑áirítear an creat Rialachais Idirlín.
Sa bhreis ar na próisis sin, díreoidh an tAontas ar chaighdeánú mar phríomhuirlis chun a spriocanna a chur chun cinn. Tá láidreachtaí ag an Aontas chun brath orthu, lena n‑áirítear bonn láidir taighde agus nuálaíochta, cuideachtaí teicneolaíochta atá ar thús cadhnaíochta domhanda agus go leor FBManna nuálacha agus gnólachtaí nuathionscanta ar gá iad a spreagadh chun páirt a ghlacadh i leagan síos caighdeán idirnáisiúnta. Trí ghiaráil a dhéanamh ar chóras caighdeánaithe an Aontais chun a thionchar a mhéadú maidir le caighdeáin idirnáisiúnta a leagan síos le haghaidh príomhtheicneolaíochtaí digiteacha, tá sé d’aidhm ag an Aontas iomaíochas a thionscail a neartú, ceannasacht dhigiteach agus teicneolaíochta a chothú, agus a bhunluachanna agus a leasanna bunúsacha a chosaint agus a chur chun cinn, agus comhar idirnáisiúnta á shaothrú ag an am céanna i socrú caighdeán. Aithníonn an tAontas ról tábhachtach an Aontais Idirnáisiúnta Teileachumarsáide i gcomhthéacs an chaighdeánaithe dhomhanda.
Leanfaidh an tAontas de leithdháileadh radaimhinicíochtaí cothromasach atá riailbhunaithe a chosaint faoi chreat domhanda an Aontais Idirnáisiúnta Teileachumarsáide, agus é á aithint aige gur acmhainn nádúrtha gann é an speictream raidió atá mar bhonn ag gach feidhmchlár digiteach gan sreang.
Tá comhar iltaobhach ríthábhachtach freisin chun aghaidh a thabhairt ar ghnéithe digiteacha earnálacha eile, lena n‑áirítear earnáil an fhuinnimh mar gheall ar éileamh fuinnimh IS atá ag dul i méid go tapa. Tá an tAontas rannpháirteach i dtionscnaimh idirnáisiúnta fuinnimh, amhail an Chomhdháil Aireachta maidir le Fuinneamh Glan, lena bhforbraítear cuir chuige chomhoibríocha chun aghaidh a thabhairt ar na dúshláin sin.
De réir mar a leanann teicneolaíochtaí digiteacha de bheith ag forbairt go tapa, ní mór Rialachas Idirlín domhanda a chur in oiriúint do dhúshláin gheopholaitiúla nua, amhail rioscaí ilroinnte, mí-úsáid mhéadaithe uirlisí digiteacha le haghaidh cleachtas amhail múchadh idirlín agus cinsireacht agus bearnaí digiteacha a leathnú. Thairis sin, leis an aistriú i dtreo cheathrú glúin an ghréasáin – arna spreagadh ag croítheicneolaíochtaí amhail an intleacht shaorga, réaltacht leathnaithe agus fhíorúil, an blocshlabhra agus ríomhaireacht chandamach – tugtar isteach castachtaí nua rialachais lena n‑éilítear creataí ilpháirtithe leasmhara atá cothrom le dáta, éifeachtach agus cuimsitheach. Leanfaidh an tAontas de chur chuige cuimsitheach ilpháirtithe leasmhara maidir le Rialachas Idirlín a mhúnlú agus tá sé tiomanta i gcónaí d’fheabhas a chur ar a éifeachtacht, cuir i gcoinne tionscnaimh le haghaidh ailtireachtaí idirlín stát-rialaithe a d’fhéadfadh an oscailteacht agus an tslándáil, ar saintréithe iad den Idirlíon ó Chlár Oibre Thúinis, a scoilt agus agus an bonn a bhaint díobh 49 .
Leanfaidh an tAontas d’infhaighteacht agus sláine ghinearálta an Idirlín a chosaint go réamhghníomhach mar líonra domhanda idir-inoibritheach líonraí, lena léirítear a thábhachtaí atá samhail ilpháirtithe leasmhara an rialachais idirlín, mar shampla sna heagráin atá ar na bacáin den Fhóram um Rialachas Idirlín agus an t‑athbhreithniú 20 bliain ar an gCruinniú Mullaigh Domhanda faoin tSochaí Faisnéise. Aithníonn an tAontas an ról lárnach atá ag Comhdháil Idirnáisiúnta um Líonraí Saorga Néaracha maidir le bunchloch na hailtireachta Idirlín a bhainistiú.
Samplaí de ghníomhaíochtaí atá le teacht i réimse an rialachais dhigitigh dhomhanda:
·Oibreoidh an tAontas chun a áirithiú go ndéanfar obair leantach agus athbhreithniú cuí ar chur chun feidhme ghealltanais an Chomhshocraithe Dhigitigh Dhomhanda.
·Oibreoidh an tAontas mar Fhoireann na hEorpa chun a áirithiú go mbeidh toradh oiriúnach ar an gcaibidlíocht athbhreithnithe ar an gCruinniú Mullaigh Domhanda faoin tSochaí Faisnéise.
·Tacóidh an tAontas le fairsingiú agus leathnú idirnáisiúnta an Cruach Idirlín Oscailte, ag tagairt do bhunstruchtúr na bprótacal lena gcumasaítear cumarsáid agus comhroinnt faisnéise ar an Idirlíon, chun aghaidh a thabhairt ar riachtanais na dtíortha comhpháirtíochta, lena n‑áirítear iontaoibh agus slándáil a fheabhsú.
6.Eoraip iomaíoch shlán, oscailte le haghaidh gnó, nasctha leis an domhan
I ndomhan luaineach, is comhpháirtí comhsheasmhach intuartha iontaofa é an tAontas. I gcomhthéacs slabhraí luacha teicneolaíochta casta, ní féidir le haon tír ná réigiún dul chun cinn a dhéanamh maidir leis an réabhlóid dhigiteach agus IS ina aonar. Tá iarrachtaí inmheánacha agus seachtracha an Aontais maidir leis an mbeartas digiteach fite fuaite ina chéile agus neartaíonn siad a chéile. Sin é an fáth nach amháin go bhfuil borradh á chur ag an Aontas faoina earnáil dhigiteach féin, ó Mhonarchana IS go teicneolaíocht chosanta, ach go bhfuil comhpháirtíochtaí substaintiúla á dtabhairt i gcrích aige freisin a bhfuil tairbhí infheicthe ag baint leo do shaoránaigh agus do ghnólachtaí an Aontais agus dár gcomhpháirtithe.
Mar chrann taca do réitigh iltaobhacha ar dhúshláin dhomhanda, tacaíonn an tAontas go diongbháilte leis na Náisiúin Aontaithe, G7, G20, ECFE agus comhlachtaí eile a chuireann ar ár gcumas dul i ngleic le dúshláin shainiúla ár linne le chéile.
Tá an tAontas réidh chun dul i gcomhar le chéile ar mhaithe le cineálacha nua comhair atá níos doimhne agus níos solúbtha lena gcothófar comhpháirtíochtaí comhthairbheacha, chun iomaíochas agus slándáil na hEorpa a threisiú. Leanfaidh an tAontas de bheith rannpháirteach ar bhealach cuiditheach bunaithe ar urraim don ord idirnáisiúnta riailbhunaithe.
Féach na Conclúidí ón gComhairle Eorpach, an 17 Aibreán 2024: ‘Cuireann an Chomhairle Eorpach i dtábhacht freisin gur gá ceannaireacht an Aontais i ngnóthaí digiteacha domhanda a neartú agus iarrann sí ar an gCoimisiún agus ar an Ardionadaí teachtaireacht chomhpháirteach a ullmhú maidir leis an ábhar’ (lch. 10)
A bhfuil i ndán d’iomaíochas na hEorpa: Tuarascáil ó Mario Draghi (2024)
Teachtaireacht maidir le ProtectEU: Straitéis Eorpach um an tSlándáil Inmheánach , COM(2025) 148
Teachtaireacht maidir le Compás Iomaíochais don Aontas Eorpach, COM(2025) 30 final
Féach foinse EDT
COM(2025) 217 an 28/05/2025 – ‘Straitéis an Aontais maidir le gnólachtaí nuathionscanta agus gnólachtaí atá ag méadú’
Féach Clár Beartais don Deacáid Dhigiteach iomlán
Mar a leagtar amach sa Teachtaireacht maidir le hAontas na Scileanna COM(2025) 90 final
Mar a leagtar amach sna Conclúidí ón gComhairle Gnóthaí Eachtracha maidir le Cibearthaidhleoireacht i mí an Mheithimh 2023
An Straitéis ProtectEU ((COM)2025 148), Páipéar Bán Comhpháirteach maidir le Todhchaí Chosaint na hEorpa 2030 , Straitéis um Aontas na hUllmhachta (JOIN(2025) 130), Compás Straitéiseach (7371/22)
Mar shampla: Europol
Leis na Stáit Aontaithe agus leis an India
Leis an tSeapáin, Poblacht na Cóiré, Singeapór agus Ceanada
Leis an mBrasaíl, Meicsiceo, an Airgintín, an Astráil agus na Balcáin Thiar
An India, an tSeapáin, Poblacht na Cóiré, an Bhrasaíl, na Stáit Aontaithe, an Úcráin agus an Ríocht Aontaithe
Le comhpháirtithe amhail an Túinéis, an Éigipt nó an Iordáin
Tá naoi dtír déag comhlachaithe le Fís Eorpach faoi láthair – liostaithe anseo .Ina theannta sin, meastar go mbeidh an Eilvéis, Poblacht na Cóiré agus an Éigipt comhlachaithe in 2025, cé go bhfuil dul chun cinn á dhéanamh maidir le caibidlíocht chomhlachais leis an tSeapáin
Tá na tíortha atá comhlachaithe leis an gClár don Eoraip Dhigiteach liostaithe anseo
Teachtaireacht maidir le Plean Fáis nua do na Balcáin Thiar, COM(2023) 691
Féach tuilleadh eolais faoin tSaoráid Fáis don Mholdóiv
Mar shampla, tar éis acquis ábhartha an Aontais a thrasuí, tá an Úcráin agus an Mholdóiv ar a mbealach chun go dtabharfar cóir fhrithpháirteach sa mhargadh inmheánach dóibh le haghaidh fánaíochta
Tugadh Comhaontuithe Saorthrádála ina bhfuil caibidlí cuimsitheacha maidir leis an trádáil dhigiteach i gcrích leis an Ríocht Aontaithe, leis an Nua-Shéalainn agus leis an tSile, agus tá siad fós ar siúl leis an India, leis an Indinéis, leis an Téalainn, leis na hOileáin Fhilipíneacha agus leis an Malaeisia
Síníodh an Comhaontú Trádála Digití idir an tAontas agus Singeapór an 7 Bealtaine 2025. Tugadh an chaibidlíocht maidir leis an gComhaontú Trádála Digití leis an gCóiré i gcrích i mí an Mhárta 2025. Tháinig rialacha maidir le sreafaí sonraí trasteorann leis an tSeapáin, lena gcomhlánaítear an Comhaontú Saorthrádála idir an tAontas agus an tSeapáin, i bhfeidhm i mí Iúil 2024.
https://ec.europa.eu/commission/presscorner/detail/ga/ip_22_6963
Ó 2022 i leith, tá Pacáistí Geilleagair Dhigitigh seolta ag an Aontas sa Nigéir, sa Cholóim, i bPoblacht Dhaonlathach an Chongó, sa Chéinia agus sna hOileáin Fhilipíneacha.
https://commission.europa.eu/topics/eu-competitiveness/clean-industrial-deal_ga
Tá comhpháirtíochtaí den sórt sin faighte ag an Aontas leis an Ríocht Aontaithe, leis an Iorua, leis an Moldóiv, leis an gCóiré Theas, leis an tSeapáin, leis an Albáin agus leis an Macadóin Thuaidh.
Lena n‑áirítear trí Ghrúpa Comhairleach Gnó Global Gateway
Is ardán é an Mol um Dhigitiú don Fhorbairt arb é is aidhm dó comhar agus comhordú digiteach a neartú idir an tAontas Eorpach agus a Bhallstáit agus a chomhpháirtithe san Afraic, san Áise agus san Aigéan Ciúin, i Meiriceá Laidineach agus i Muir Chairib, agus i dtíortha comharsanachta an Aontais.
Leis an scáththionscnamh EU4Digital, comhthiomsaítear cláir arna gcistiú ag an Aontas arb é is aidhm dóibh tairbhí an Mhargaidh Aonair Dhigitigh a leathnú chuig tíortha Chomhpháirtíocht an Oirthir agus chuig na Balcáin Thiar.
An Chéinia, an Tansáin, an Nigéir, an Cholóim, an Bhrasaíl.
Cibearshlándáil líonraí 5G - Bosca Uirlisí AE ina bhfuil bearta maolaithe riosca
Teachtaireacht Chomhpháirteach i dtaca le Plean Gníomhaíochta an Aontais maidir le Slándáil Cáblaí , JOIN(2025) 9 final
I gcomhréir leis an Moladh ón gCoimisiún maidir le Bonneagair Cháblaí Fomhuirí Shlána agus Athléimneacha , C (2024) 1181, agus leis an Teachtaireacht Chomhpháirteach chun slándáil agus athléimneacht cáblaí fomhuirí a neartú , JOIN(2025) 9.
Teachtaireacht maidir le Plean Gníomhaíochta um an Intleacht Shaorga , COM(2025)165
Roghnaigh an Eoraip: do ghairmréim sa taighde a chur chun cinn san Aontas Eorpach
Teachtaireacht maidir le Straitéis Slándála Eacnamaíche an Aontais, COM(2023) 20 final
Rialachán (AE)2024 2847
Rialachán (AE)2021 694
Cuid den Teachtaireacht maidir le Creat Eorpach Idir-inoibritheachta – Straitéis Cur Chun Feidhme , COM(2017) 134
Sampla ábhartha is ea Próifíl Feidhmchláir maidir le Gluais Chatalóige Sonraí , atá anois ina chaighdeán de facto, lena n‑éascaítear tuairiscí comhchuibhithe ar mheiteashonraí agus comhroinnt sonraí gan uaim thar theorainneacha.
Rialachán (AE)2022 2065 agus lena leasaítear Treoir (2000) 31 CE (an Gníomh um Sheirbhísí Digiteacha) (IO L 277, 27.10.2022).
Rialachán (AE)2020 1828
Rialachán (AE) 2016/679
Bosca uirlisí cuimsitheach de chuid an Aontais le haghaidh ríomhthráchtáil shábháilte inbhuanaithe, COM(2025) 37 final
Clár Oibre Thúinis don tSochaí Faisnéise , 18 Samhain 2005
AN COIMISIÚN EORPACH
An Bhruiséil,5.6.2025
JOIN(2025) 140 final
IARSCRÍBHINN
a ghabhann leis an
Teachtaireacht Chomhpháirteach chuig Parlaimint na hEorpa agus chuig an gComhairle
Straitéis Dhigiteach Idirnáisiúnta don Aontas Eorpach
Iarscríbhinn
Gníomhaíochtaí Leanúnacha agus Beartaithe
|
Cuspóir |
tuairisc |
Tír chomhpháirtíochta / réigiún comhpháirtíochta / iltaobhach |
Amlíne tháscach |
|
1.Nascacht shlán |
|||
|
Tacaíocht don nascacht Artach |
Tá tábhacht straitéiseach ag baint leis an nascacht Artach don Aontas. Cuideoidh sé le haga folaigh sonraí a laghdú agus le sreafaí sonraí iontaofa a éascú idir an tAontas, an Ghraonlainn, Ceanada, na Stáit Aontaithe agus an tSeapáin, lena gcuirfear bealach cábla malartach ar fáil agus lena bhfeabhsófar slándáil agus athléimneacht cáblaí idir an tAontas agus a chomhpháirtithe. Oibreoidh an tAontas lena chomhpháirtithe chun borradh a chur faoin tacaíocht do thionscadail a chuireann bealaí cáblaí fomhuirí nua chun cinn sa réigiún, trí úsáid a bhaint as an tSaoráid um Chónascadh na hEorpa chun infheistíochtaí poiblí agus príobháideacha a spreagadh. |
An tSeapáin, SAM, Ceanada, an Ghraonlainn |
2025-2030 |
|
Nascacht shlán a chur chun cinn i dtíortha is iarrthóirí |
An t‑ailíniú le Bosca Uirlisí Cibearshlándála 5G an Aontais a chur chun cinn agus tacú le creat reachtach a ghlacadh lena bhféadfaí eisiaimh agus/nó srianta a fhorchur ar sholáthróirí ardriosca agus as a dtiocfadh forchur na n‑eisiamh agus na srianta sin. |
Tíortha is iarrthóirí |
Leanúnach |
|
Nascacht shlán a chur chun cinn i dtíortha comhpháirtíochta Global Gateway |
Nascacht shlán iontaofa a chur chun cinn, lena n‑áirítear 5G, cábla fomhuirí agus nascacht spáis, i gcomhréir le Bosca Uirlisí Cibearshlándála 5G an Aontais agus Plean Gníomhaíochta 2025 an Aontais maidir le Slándáil Cáblaí, trí fhor-rochtain taidhleoireachta, cúnamh teicniúil agus tacaíocht airgeadais faoin Global Gateway. |
Domhanda |
Leanúnach |
|
Treoirlínte náisiúnta agus réigiúnacha maidir le cur chun feidhme 5G agus forbairt Bhosca Uirlisí um Nascacht MLC |
Leis na treoirlínte sin, tabharfar aghaidh ar dhúshláin slándála, ar dhúshláin bhonneagair, agus ar chásanna úsáide tosaíochta i gcomhthéacsanna náisiúnta éagsúla i Meiriceá Laidineach agus i Muir Chairib. Príomhfhócas eile a bheidh ann Bosca Uirlisí um Nascacht MLC a fhorbairt, lena soláthrófar uirlisí praiticiúla, dea-chleachtais agus treoir chun aghaidh a thabhairt ar nascacht trasteorann, bonneagar slán athléimneach, agus dúshláin nascachta fhiúntacha. Áirítear leis sin moltaí inghníomhaithe a chomhfhorbairt, tacaíocht theicniúil a sholáthar, agus comhordú dé-réigiúnach a chothú le haghaidh imscaradh 5G. |
Tíortha Mheiriceá Laidinigh agus Mhuir Chairib |
Ar siúl faoin gComhghuaillíocht Dhigiteach AE-MLC – go dtí R4 2027 |
|
Comhdháil bhliantúil maidir le nascacht shlán |
D’fhéadfaí comhdháil bhliantúil a bhunú maidir le nascacht shlán, arna hóstáil sa Bhruiséil, chun teagmhálacha teicniúla agus tuiscint a dhoimhniú maidir le deiseanna agus ceanglais slándála le haghaidh bealaí, comhpháirtíochtaí agus maoiniú amach anseo, rud a chuirfidh le próiseas Global Gateway. |
Domhanda |
Bliantúil |
|
2.Teicneolaíochtaí atá ag teacht chun cinn |
|||
|
An Intleacht Shaorga |
|||
|
Comhar maidir le sábháilteacht IS |
Shínigh Oifig IS an Aontais socrú riaracháin maidir le comhar i ndáil le sábháilteacht IS le Singeapór, agus tá tús curtha le malartuithe déthaobhacha le hInstitiúidí Sábháilteachta IS eile – an tSeapáin, an Chóiré, an Ríocht Aontaithe agus an Astráil. Socruithe comhair le tíortha comhpháirtíochta, atá le saothrú tuilleadh e.g. lena n‑áirítear ábhair amhail borradh a chur faoin nuálaíocht agus faoi ghlacadh IS, agus comhar maidir leis an intleacht shaorga ar mhaithe le leas an phobail (an tSeapáin), sábháilteacht IS (an India agus Ceanada) agus gnéithe rialachais agus rialála (an Astráil). Leanfaidh Oifig Eorpach um Intleacht Shaorga den chomhar maidir le sábháilteacht IS a dhoimhniú i Líonra na nInstitiúidí Sábháilteachta IS, go háirithe, aghaidh a thabhairt ar shábháilteacht samhlacha intleachta saorga ilchuspóireacha trí mhalartuithe faisnéise agus dea-chleachtais, tástáil agus meastóireachtaí comhpháirteacha, forbairt uirlisí agus tagarmharcanna, chomh maith le taighde ar shábháilteacht IS. |
An tSeapáin, Poblacht na Cóiré, an India, an Astráil, Ceanada, na Stáit Aontaithe, an Ríocht Aontaithe, an Úcráin, an Mholdóiv Na Balcáin Thiar, an Afraic, Meiriceá Laidineach agus Muir Chairib |
Leanúnach |
|
Comhpháirtíocht Dhomhanda maidir leis an Intleacht Shaorga agus ECFE |
Is comhalta bunaidh den Chomhpháirtíocht Dhomhanda maidir leis an Intleacht Shaorga é an tAontas agus leanann sé de bheith rannpháirteach sa tionscnamh sin tar éis dó comhpháirtíocht chomhtháite a bhunú le Meitheal ECFE um Rialachas na hIntleachta Saorga. Tá ceann de na poist Leas-Chathaoirligh ar Mheitheal ECFE um Rialachas na hIntleachta Saorga ag an Oifig um Intleacht Shaorga. Ina theannta sin, tá an Oifig um Intleacht Shaorga rannpháirteach i meithleacha uile ECFE a bhaineann leis an intleacht shaorga agus rannchuidíonn sí go gníomhach leis an obair sin. |
Iltaobhacha |
Leanúnach |
|
G7 agus G20 |
Leanfaidh an tAontas de pháirt ghníomhach a ghlacadh sa phlé maidir leis an intleacht shaorga in G7 agus in G20. Áirítear leis sin Próiseas IS Hiroshima agus a chreat tuairiscithe chomh maith le Hiroshima Friends Group, creat deonach de chuid tíortha a thacaíonn le spiorad Phróiseas IS Hiroshima i dtreo intleacht shaorga shábháilte, shlán agus iontaofa a bhaint amach. Thairis sin, leanfaidh an tAontas de bheith ag féachaint an bhféadfaí treoirlínte G7 maidir leis an intleacht shaorga san Eolaíocht a chur i bhfeidhm. Ceann de thosaíochtaí Uachtaránacht G20 na hAfraice Theas is ea an Intleacht Shaorga agus an Nuálaíocht don Fhorbairt Inbhuanaithe, ar tosaíocht é i dtíortha san Afraic, san Áise agus i dtíortha MLC. |
Iltaobhacha |
Leanúnach |
|
Comhdháil Airí maidir le Fuinneamh Glan |
Bhí ‘IS & Fuinneamh’ ar cheann dá théamaí tosaíochta ag 16ú cruinniú Aireachta maidir le Fuinneamh Glan 2025 arb í Poblacht na Cóiré an t‑óstach. Rachaidh an Coimisiún i dteagmháil go gníomhach leis an gclár aireachta agus fiosróidh sé comhar idirnáisiúnta i réimse an digitithe agus na hintleachta saorga in earnáil an fhuinnimh. |
Iltaobhacha |
Leanúnach |
|
Comhar taighde faoin gclár Fís Eorpach |
Tacóidh comhlachas roinnt tíortha comhpháirtíochta nach bhfuil san Aontas le Fís Eorpach i dtaca le taighde san intleacht shaorga agus le taighde feidhmeach atá bunaithe ar an intleacht shaorga. |
Tíortha atá comhlachaithe le Fís Eorpach |
Leanúnach |
|
IS chun Leas an Phobail |
Mar chuid den tionscnamh IS chun Leas an Phobail, tacaíonn an tAontas le cur in úsáid réitigh intleachta saorga ar mhaithe le leas an phobail, lena n‑áirítear IS Giniúnach, aistriú teicneolaíochta agus fothú acmhainneachta, le tíortha comhpháirtíochta san Afraic agus i Meiriceá Laidineach agus i Muir Chairib (ag tógáil ar an gComhghuaillíocht AE-MLC). Tacaíonn an tAontas freisin le comhar eolaíoch agus forbairt Leathchúplaí Digiteacha Áitiúla atá bunaithe ar IS agus atá mar bhonn taca faoin atógáil uirbeach san Úcráin. |
An Afraic, Meiriceá Laidineach agus Muir Chairib, an Áise-an tAigéan Ciúin An Úcráin |
Leanúnach |
|
Mol IS um Fhorbairt Inbhuanaithe agus comhar IS leis an Afraic Chliste |
Tá Mol IS um Fhorbairt Inbhuanaithe á chomhdhearadh ag an Aireacht Fiontar agus Déanta san Iodáil agus ag Clár Forbartha na Náisiún Aontaithe, arb é is aidhm dó éiceachórais áitiúla IS a neartú i gcomhpháirtíocht le tíortha na hAfraice. Sheol an Afraic Chliste Comhairle IS na hAfraice agus tá a comhar leis an Afraic Chliste á struchtúrú ag an Aontas faoin straitéis Global Gateway, ag tógáil ar an socrú riaracháin idir an Coimisiún Eorpach agus an Afraic Chliste agus ag leanúint cur chuige Fhoireann na hEorpa. |
An Afraic |
Leanúnach |
|
GovTech4all |
Réitigh IS a fhorbairt agus a phíolótú san earnáil phoiblí chun cinnteoireacht, seachadadh seirbhísí agus cúraimí riaracháin inmheánacha a fheabhsú. Is é an sprioc tacú le spriocanna an Ghnímh um Eoraip Idir-inoibritheach agus iad a thionlacan, chomh maith le spriocanna beartais níos leithne maidir le nuálaíocht san earnáil phoiblí agus fás gnólachtaí nuathionscanta san Eoraip. |
An tAontas, tíortha is iarrthóirí agus tíortha is iarrthóirí ionchasacha |
R4 2025/2026 |
|
5G/6G |
|||
|
Glao 2026 ailínithe le taighde agus nuálaíocht 6G |
Comhar taighde agus nuálaíochta maidir le líonra rochtana raidió arna chumhachtú le IS 6G. Tionscadal amháin ón gComhghnóthas um Líonraí agus Seirbhísí Cliste atá ar aon dul le tionscadal amháin ón tSeapáin agus ó Phoblacht na Cóiré. |
An tSeapáin agus Poblacht na Cóiré |
Tionscadal atá ar siúl idir 2027-2030 |
|
Glao ailínithe le taighde agus nuálaíocht 6G |
Comhar taighde agus nuálaíochta 6G dírithe ar shraitheanna fisiciúla, ar ard-aeróga agus ar líonra rochtana raidió IS. |
An Téaváin |
Glao ailínithe féideartha in 2026 nó comhar idir tionscadail atá ann cheana |
|
Binse tástála 5G |
Chun tacú le forbairt cásanna úsáide 5G, tá an tAontas i gcomhpháirtíocht le Cósta Ríce ar bhinse tástála 5G, agus meastar go gcuirfidh Nokia agus Ericsson an trealamh ar fáil. |
Cósta Ríce |
Leanúnach |
|
Leathsheoltóirí |
|||
|
Tionscadail chomhpháirteacha taighde agus nuálaíochta i réimse na leathsheoltóirí |
Tionscadail taighde agus nuálaíochta maidir le leathsheoltóirí, arna gcomhchistiú ag an gCoimisiún Eorpach agus ag an tSeapáin agus ag Poblacht na Cóiré. Le Poblacht na Cóiré, is é is aidhm do thionscadail comhtháthú ilchineálach sliseanna chomh maith le teicneolaíochtaí ríomhaireachta néaramorfacha a chur chun cinn. Leis an tSeapáin, tá glaonna beartaithe le haghaidh 2026 maidir le substaintí sárfhluarailcile agus polafluarailcile a ionadú, comhtháthú ilchineálach agus cisiléid, agus gairis agus próisis níos mó ná 2 nanaiméadar. |
An tSeapáin, Poblacht na Cóiré |
Leanúnach |
|
Sásra luathrabhaidh maidir leis an slabhra soláthair agus fóirdheontais phoiblí |
Sásra comhpháirteach luathrabhaidh idir an Coimisiún Eorpach agus na Stáit Aontaithe agus an tSeapáin faoi seach, arb é is aidhm dó bristeacha sa slabhra soláthair a shainaithint, agus sásra trédhearcachta maidir le fóirdheontais phoiblí a chuirtear ar fáil d’earnáil na leathsheoltóirí. |
SAM, an tSeapáin |
Leanúnach |
|
Tallann agus lucht saothair oilte a mhealladh |
Mar chuid den Chomhairle Trádála agus Teicneolaíochta idir an tAontas agus an India, gheall an tAontas agus an India clár tiomnaithe a fhorbairt lena n‑éascófar malartuithe tallainne agus lena gcothófar scileanna leathsheoltóra i measc mac léinn agus gairmithe óga. |
An India |
Leanúnach |
|
Grúpa Phointe Teagmhála leathsheoltaigh G7 |
Tá grúpa Pointe Teagmhála G7 maidir le leathsheoltóirí tiomanta do mhalartú faisnéise a éascú agus dea-chleachtais a chomhroinnt i measc chomhaltaí G7 i dtaca le saincheisteanna a bhfuil tionchar acu ar thionscal na leathsheoltóirí, lena n‑áirítear tosaíochtaí taighde agus forbartha tionsclaíocha réamhiomaíocha, monaraíocht inbhuanaithe, éifeacht beartas agus cleachtas neamh-mhargaidh, agus bealaí comhordaithe géarchéime. |
Iltaobhacha |
Leanúnach |
|
An Chomhairle Dhomhanda um Leathsheoltóirí – Cruinniú Rialtais / Údaráis maidir le Leathsheoltóirí |
Tá suíomh uathúil ag Cruinniú an Rialtais/na nÚdarás maidir le Leathsheoltóirí ina dtagann Rialtais agus Comhlachais Tionscail a dhéanann 95 % de tháirgeadh leathsheoltóirí an domhain (an tAontas, na Stáit Aontaithe, an Chóiré Theas, an tSeapáin, an Téaváin agus an tSín) le chéile chun freagairt do dhúshláin choiteanna atá os comhair an tionscail. Tá ionadaíocht á déanamh ag an gCoimisiún Eorpach don Aontas. |
Iltaobhacha |
Leanúnach |
|
Ríomhaireacht Chandamach agus Ardfheidhmíochta |
|||
|
Comhar Ríomhaireachta Candamaí idir an tAontas agus an tSeapáin |
Tionscadail chomhpháirteacha taighde agus nuálaíochta lena ndírítear ar algartaim hibrideacha Chandam-Ríomhaireacht Ardfheidhmíochta agus feidhmeanna a bharrfheabhsú i réimsí leasa fhrithpháirtigh amhail eolaíochtaí bithleighis agus comhshaoil. Tá sé ag teacht le cuspóirí an Chomhghnóthais Ríomhaireachta Ardfheidhmíochta Eorpaigh chun tacú leis an gComhpháirtíocht Dhigiteach idir an tAontas agus an tSeapáin. |
An tSeapáin |
Leanúnach (2026-2029) |
|
Tionscnaimh Taighde Candamaigh AE-Cheanada |
Tionscadail chomhoibríocha a bhunú sa ríomhaireacht chandamach, sa bhrath agus sa chumarsáid, agus leas á bhaint as Straitéis Náisiúnta Chandamach Cheanada agus as na moil taighde atá ann cheana. |
Ceanada |
Leanúnach (2023-2026) |
|
Glaonna ar Theicneolaíocht Chandamach idir an tAontas Eorpach agus Poblacht na Cóiré |
Glaonna ar thionscadail chomhpháirteacha a chomhordú maidir le ríomhaireacht chandamach, brath candamach agus cumarsáid chandamach, comhar taighde agus nuálaíochta a fheabhsú agus ailíniú a dhéanamh le tosaíochtaí straitéiseacha Phoblacht na Cóiré maidir le teicneolaíocht chandamach a fhorbairt. |
Poblacht na Cóiré |
2027-2030 |
|
Grúpa Oibre G7 um Theicneolaíocht Chandamach |
Faoi Uachtaránacht Cheanada ar G7, bunófar meitheal chun feabhas a chur ar chomhroinnt faisnéise maidir le forbairtí candamacha agus chun caighdeáin choiteanna a chur chun cinn. |
Iltaobhacha |
Leanúnach |
|
Líonra Sár-ríomhaireachta AE-MLC |
Comhpháirtíocht láidir a bhunú chun acmhainní Ríomhaireachta Ardfheidhmíochta a chónascadh i Meiriceá Laidineach agus i Muir Chairib agus chun a n‑idir-inoibritheacht agus a gcomhtháthú le héiceachóras RA na hEorpa a fheabhsú. |
Meiriceá Laidineach agus Muir Chairib |
D’fhéadfaí tús a chur leis ag an gCruinniú Mullaigh 2025 idir Comhphobal Stáit Mhuir Chairib agus Mheiriceá Laidinigh agus an tAontas |
|
3.Cibearshlándáil |
|||
|
Idirphlé maidir le cibearspás le tíortha comhpháirtíochta a chur chun cinn |
Bíonn Idirphlé maidir le Cibearspás ag an Aontas leis na Stáit Aontaithe, leis an Úcráin, leis an Ríocht Aontaithe, leis an tSeapáin, leis an India, le Poblacht na Cóiré agus leis an mBrasaíl. Pléitear an chibearshlándáil freisin sna Comhpháirtíochtaí Digiteacha leis an tSeapáin, le Poblacht na Cóiré, le Singeapór agus le Ceanada agus san Idirphlé Digiteach leis an mBrasaíl, le Meicsiceo, leis an Airgintín, leis an Astráil agus leis na Balcáin Thiar. |
Na Stáit Aontaithe, an Úcráin, an Ríocht Aontaithe, an tSeapáin, an India, Poblacht na Cóiré, an Bhrasaíl, Singeapór, Ceanada, Meicsiceo, an Airgintín, an Astráil, an Mholdóiv, na Balcáin Thiar |
Leanúnach |
|
Comhaontuithe maidir le hAitheantas Frithpháirteach (CAFP) i dtaca le cibearshlándáil táirgí |
Leagtar amach sa Ghníomh um Chibear-Athléimneacht ceanglais maidir le cibearshlándáil táirgí ag a bhfuil eilimintí digiteacha sa mhargadh inmheánach. Oibreoidh an tAontas i gcomhar leis na comhpháirtithe ábhartha chun féachaint an bhféadfaí comhaontuithe maidir le haitheantas frithpháirteach a dhéanamh i ndáil leis an nGníomh um Chibear-Athléimneacht agus le creataí na gcomhpháirtithe faoi seach chun comhlíonadh na gceanglas maidir le cibearshlándáil táirgí a éascú. |
Pléití déthaobhacha |
Faoin tráth a chuirfear an Gníomh um Chibear-Athléimneacht i bhfeidhm (deireadh 2027) |
|
Síneadh a chur le Cibearchúlchiste an Aontais chun an Úcráin agus Poblacht na Moldóive a chumhdach |
Le leasuithe ar na Comhaontuithe Comhlachais i dtaca le rannpháirtíocht na hÚcráine agus Phoblacht na Moldóive sa chlár don Eoraip Dhigiteach, réiteofar an bealach chun Cibearchúlchiste an Aontais a leathnú chuig an dá thír. |
Tíortha is iarrthóirí |
Leanúnach |
|
Rannpháirtíocht i Meitheal G7 um Chibearshlándáil |
Déanann an Coimisiún ionadaíocht don Aontas i Meitheal G7 um Chibearshlándáil. I measc ábhair eile, saothróidh an Coimisiún comhar maidir le cibearshlándáil cúraim sláinte, i gcomhréir leis an bplean gníomhaíochta Eorpach maidir le cibearshlándáil ospidéal agus soláthraithe cúraim sláinte (COM(2025) 10 final). |
Iltaobhacha |
Leanúnach |
|
Creat na Náisiún Aontaithe maidir le Stát-Iompar Freagrach sa Chibearspás a chur chun cinn |
Ag na Náisiúin Aontaithe agus laistigh de chomhlachtaí réigiúnacha slándála, leanfaidh an tAontas d’iompar freagrach stáit a chur chun cinn sa chibearspás, bunaithe ar chreat a dtacaíonn Comhthionól Ginearálta na Náisiún Aontaithe leis. Áirítear leis sin seasamh leis an dlí idirnáisiúnta, cloí le noirm iompair stáit a nglactar leo ar fud an domhain in aimsir na síochána, bearta forbartha muiníne a fhorbairt, agus tacú le stáit acmhainneacht a fhorbairt chun na gnéithe creata sin a chur chun feidhme. |
Iltaobhacha |
Leanúnach |
|
Rannpháirtíocht sa Tionscnamh chun Bogearraí Éirice a Chomhrac |
Déanann an Coimisiún ionadaíocht thar ceann an Aontais sa Tionscnamh Idirnáisiúnta chun Bogearraí Éirice a Chomhrac. Leanfaidh an tAontas de bheith rannpháirteach go gníomhach sa Tionscnamh Idirnáisiúnta chun Bogearraí Éirice a Chomhrac. Thairis sin, gealltar faoin bplean gníomhaíochta Eorpach um chibearshlándáil ospidéal agus soláthraithe cúraim sláinte go gcuirfear an comhar i dtaca le Tionscnamh Idirnáisiúnta chun Bogearraí Éirice a Chomhrac chun cinn. |
Iltaobhacha |
Leanúnach |
|
Fothú cibear-acmhainneachta |
Tá tionscadail fothaithe cibear-acmhainneachta sheachtracha ar bun ag an Aontas le tíortha comhpháirtíochta ar fud an domhain. Leanfaidh an tAontas de na tionscnaimh sin, trí thosaíocht a thabhairt do ghníomhaíochtaí lena dtugtar aghaidh ar an gcibearchoireacht agus trí chibear-athléimneacht a fhorbairt, lena n‑áirítear tacaíocht chun creataí straitéiseacha a fhorbairt, cumais bainistithe teagmhas a fhorbairt agus saineolas a fheabhsú trí oiliúint. |
Domhanda |
Leanúnach |
|
LAC4 |
Is é LAC4 an mol réigiúnach le haghaidh oideachas agus oiliúint cibearshlándála i Meiriceá Laidineach agus i Muir Chairib. Is é cuspóir LAC4 saineolas cibearshlándála agus cibearchoireachta a sholáthar chun tacú leis an gclaochlú digiteach agus leis an gcomhar i Meiriceá Laidineach agus i Muir Chairib chun cibearbhagairtí a chomhrac. |
Meiriceá Laidineach agus Muir Chairib |
Leanúnach |
|
Pobal Cleachtais Cibearshlándála AE-MLC |
Faoin gComhghuaillíocht Dhigiteach idir an tAontas agus Meiriceá Laidineach agus Muir Chairib, bunófar Pobal Cleachtais de shaineolaithe agus cleachtóirí cibearshlándála chun malartú dea-chleachtas maidir leis an gcibearshlándáil idir an dá réigiún a spreagadh. Féadfar a áireamh ar na gníomhaíochtaí a dhéanfar amach anseo sásraí institiúidithe chun saineolaithe cibearshlándála a shlógadh go tapa i gcás cibirionsaithe agus éigeandálaí agus fothú acmhainneachta. |
Meiriceá Laidineach agus Muir Chairib |
Leanúnach (go dtí R4 2027) |
|
4.Céannachtaí Digiteacha agus Bonneagar Poiblí Digiteach |
|||
|
Aitheantas frithpháirteach i dtaca le ríomhshínithe agus seirbhísí iontaoibhe eile |
Dul chun cinn a dhéanamh i dtreo aitheantas frithpháirteach maidir le ríomhshínithe agus seirbhísí iontaoibhe eile le tríú tíortha chun creat iontaoibhe domhanda a chruthú. Áirítear leis sin sraith uirlisí agus seirbhísí a fhorbairt lena gcuirtear ancairí iontaoibhe chun feidhme chun aitheantas domhanda a thabhairt do sheirbhísí iontaoibhe agus d’fhéiniúlachtaí digiteacha, agus deireadh a chur le bacainní digiteacha trí bhonneagar Sheirbhísí Iontaoibhe na hEorpa a athúsáid agus a mhacasamhlú ina gcríoch. |
An Úcráin, an Mholdóiv, na Balcáin Thiar, an Éigipt, an India, an Bhrasaíl, an tSeapáin, Uragua, comhaltaí de Chóras Lánpháirtithe Mheiriceá Láir (Cósta Ríce, an tSalvadóir, Guatamala, Hondúras, Nicearagua agus Panama) |
Leanúnach (2025-2027) |
|
Comhar maidir le Bonneagair Phoiblí Dhigiteacha a chur chun cinn ar bhonn thiachóg ríomh-shainaitheantais an Aontais |
Comhar maidir le Bonneagair Phoiblí Dhigiteacha a chur chun cinn trí thacú le sraith inscálaithe de bhloic thógála dhigiteacha foinse oscailte agus de réitigh maidir le tiachóga an Aontais a chruthú. Ina theannta sin, idir-inoibritheacht idir Tiachóg ríomh-shainaitheantais an Aontais agus tionscnaimh chomhchosúla i dtríú tíortha a léiriú ar bhonn cásanna úsáide praiticiúla. |
An tSeapáin, an India, Singeapór Iltaobhacha |
Leanúnach (2025-2027) |
|
Ionduchtú seirbhísí poiblí digiteacha a ullmhú faoi raon feidhme na Tairsí Aonair Digití |
Oibriú i gcomhar le tíortha aontachais an Aontais chun réitigh idir-inoibritheacha a ullmhú agus a fhorbairt le haghaidh nósanna imeachta riaracháin ar líne agus an Chórais Theicniúil Aonuaire faoi raon feidhme na Tairsí Aonair Digití. Éascaíonn na seirbhísí sin rochtain do ghnólachtaí agus do shaoránaigh chun gnó a dhéanamh, obair a dhéanamh agus cónaí i dtíortha an Aontais. |
Na Balcáin Thiar, an Mholdóiv, an Úcráin |
Leanúnach (2025-2030) |
|
Caighdeánú na réiteach maidir le céannacht dhigiteach |
Is é is aidhm don Chreat Ailtireachta agus Tagartha do Thiachóga Eorpach Céannachta Digití sampla domhanda a leagan síos le haghaidh sainaithint iontaofa shlán ar ardleibhéal dearbhaithe. Saothrófar comhar idir an tAontas agus tíortha atá ar aon intinn leo maidir le comhchaighdeáin chéannachta a fhorbairt ar bhonn shamhail an Aontais, lena n‑áirítear in eagraíochtaí idirnáisiúnta. |
An tSeapáin, an India, Ceanada Iltaobhacha |
Leanúnach (2025-2030) |
|
An Líonra Domhanda Deimhniúcháin Sláinte Digití |
Is tionscnamh é an Líonra Domhanda Deimhniúcháin Sláinte Digití arb é is aidhm dó creat caighdeánaithe idir-inoibritheach a chruthú le haghaidh dintiúir agus deimhnithe sláinte digiteacha. Tá sé beartaithe leis an líonra sin, a chruthaigh an Coimisiún Eorpach chun COVID-19 a chomhrac agus a ghlac EDS ina dhiaidh sin, malartú slán agus éifeachtúil faisnéise a bhaineann leis an tsláinte a éascú thar theorainneacha (e.g. deimhnithe COVID-19, Deimhniú Digiteach Idirnáisiúnta Vacsaínithe nó Próifiolacsais/Leabhrán Buí, Cárta Vacsaínithe, Achoimre Idirnáisiúnta ar an Othar), slándáil sláinte dhomhanda a chur chun cinn agus soláthar cúraim sláinte a fheabhsú. |
Domhanda |
Leanúnach (2025-2028) |
|
5.Ardáin ar líne agus sláine éiceachóras na faisnéise |
|||
|
Tacaíocht ailínithe GSD/GMD do thíortha aontachais an Aontais |
Tacú le tíortha aontachais an Aontais a ailíniú le GSD agus GMD an Aontais. |
An Mholdóiv, an Úcráin, na Balcáin Thiar |
Leanúnach (2025-2027) |
|
Margaí agus ríomhthráchtáil |
Príomhábhair imní an Aontais a chur in iúl (margadh dúnta le haghaidh seirbhísí digiteacha, earraí neamhdhleathacha ar mhargaí na Síne) agus réimsí féideartha comhair níos dlúithe (comhroinnt sonraí maidir le díoltóirí neamhdhleathacha Síneacha), i gcomhréir leis an Socrú Riaracháin idir an tAontas agus an tSín maidir le comhar i dtaca le sábháilteacht táirgí agus le Plean Gníomhaíochta maidir le Sábháilteacht Táirgí a Díoltar ar Líne. |
An tSín |
Leanúnach (2025-2027) |
|
Dlíthe ardáin ar líne atá bunaithe ar chearta an duine a chur chun feidhme ar fud an domhain |
Prionsabail uilíocha atá mar bhonn taca leis an nGníomh um Sheirbhísí Digiteacha agus leis an nGníomh um Margaí Digiteacha a chur chun cinn in ionstraimí domhanda (lena n‑áirítear treoir OHCHR i dtaca le Coinbhinsiún na Náisiún Aontaithe maidir le Cibearchoireacht). |
NA, OHCHR, UNESCO, ECFE |
Leanúnach (2025-2027) |
|
Dlíthe ardáin ar líne atá bunaithe ar chearta an duine a chur chun feidhme ar bhonn réigiúnach |
Tús áite a thabhairt don rannpháirtíocht réigiúnach maidir le dlíthe ardáin ar líne atá bunaithe ar chearta an duine a chur chun feidhme, arna n‑eagrú i gcomhar leis na Náisiúin Aontaithe (i gcás inar féidir), chun lucht ceaptha beartas, rialtóirí agus an tsochaí shibhialta a thabhairt le chéile. |
Comhlachas Náisiúin na hÁise Thoir Theas, MLC, tíortha faoi Chomhaontú Saorthrádála Lár na hEorpa |
Leanúnach (2025-2027) |
|
Misin breathnóireachta AE um thoghcháin ar na meáin shóisialta |
Déanann misin breathnóireachta AE breathnóireacht agus iompar na meán sóisialta le linn próisis toghcháin a chomhtháthú ina measúnú foriomlán ar shláine toghcháin. |
Domhanda |
Leanúnach |
|
Comhpháirtíochtaí a chur chun cinn chun athléimneacht i gcoinne ionramháil agus cur isteach eachtrach ar fhaisnéis a neartú |
Athléimneacht agus feasacht theicneolaíoch a chur chun cinn maidir le hionsaithe ionramhála agus cur isteach eachtrach ar fhaisnéis; costais a nochtadh do dhéantóirí coire agus iad a mhéadú. |
Domhanda |
Leanúnach |
|
6.Rialachas an idirlín |
|||
|
Samhail rialachais ilpháirtithe leasmhara chuimsitheach a chur chun cinn le haghaidh Idirlíon na Todhchaí
|
Sa chaibidlíocht don Chruinniú Mullaigh Domhanda maidir leis an Athbhreithniú ar an tSochaí Faisnéise, tá sé d’aidhm ag an Aontas cuimsitheacht a fheabhsú, go háirithe ó thíortha comhpháirtíochta agus ó phobail óige. Áirítear leis sin seasamh le hIdirlíon oscailte, duinelárnach atá bunaithe ar chearta an duine, feabhas a chur ar Rialachas ilpháirtithe leasmhara, agus na bearnaí digiteacha nua a dhúnadh trí nasc oibríochtúil a bhunú leis na Spriocanna Forbartha Inbhuanaithe agus leis an gComhshocrú Digiteach Domhanda. Tabharfaidh an tAontas páirt don óige freisin chun todhchaí an Rialachais Idirlín a mhúnlú trína ndearcadh a chomhtháthú san Idirphlé Beartais bliantúil leis an Aos Óg atá ar na bacáin maidir le cúrsaí digiteacha, trí rannpháirtíocht eolasach a chothú, tríd an bhfreagracht shibhialta dhigiteach a neartú, agus trí na huirlisí a thabhairt do cheannairí óga chun seasamh le hIdirlíon oscailte, slán agus cuimsitheach. |
Iltaobhacha |
R4 2025 |
|
Oibriú i dtreo Idirlíon Oscailte, Saor agus Inbhuanaithe |
Tacóidh an tAontas le cuntasacht, faireachán cuimsitheach agus cur chun cinn shaoirse idirlín ar fud an domhain agus, ag an am céanna, neartóidh sé oscailteacht agus inbhuanaitheacht an bhonneagair idirlín agus tabharfaidh sé de chumhacht d’eagraíochtaí na sochaí sibhialta a rialtais féin a thabhairt chun cuntais. Áirítear leis sin aghaidh a thabhairt ar mhúchadh idirlín trí chainéil taidhleoireachta agus beartais a chur chun cinn lena gcoinnítear idirlíon oscailte idirnasctha. |
Domhanda |
Leanúnach |
|
Slándáil, athléimneacht agus oscailteacht an Idirlín a fheabhsú |
Straitéis ilpháirtithe leasmhara a chur chun feidhme chun caighdeáin Idirlín a chur in úsáid go cuimsitheach ar fud bhonneagar Idirlín an Aontais. Tionchar an Aontais ar cheathrú glúin an ghréasáin a leagan amach: Mapáil chuimsitheach a dhéanamh ar rannchuidiú féideartha an Aontais le prótacail agus réitigh líonraithe fheabhsaithe nó nua a theastaíonn agus a chumasaítear le tionchair na gcroítheicneolaíochtaí amhail an intleacht shaorga, réaltacht leathnaithe/an réaltacht fhíorúil, an blocshlabhra, agus ríomhaireacht chandamach atá ag múnlú ceathrú glúin an ghréasáin faoi láthair. |
Domhanda |
2026-2030 |
|
An Chruach Oscailte Idirlín a chur chun cinn |
Tacóidh an tAontas le fairsingiú agus leathnú idirnáisiúnta na Cruaiche Oscailte Idirlín, ag tagairt do bhunstruchtúr na bprótacal lena gcumasaítear cumarsáid agus comhroinnt faisnéise ar an idirlíon, chun aghaidh a thabhairt ar riachtanais na dtíortha comhpháirtíochta, lena n‑áirítear muinín a fheabhsú, costais a laghdú, gaibhniú díoltóirí a sheachaint, tacú le sainoiriúnacht agus comhtháthú, agus seasamh le luachanna amhail príobháideachas, slándáil agus cosaint sonraí. |
Domhanda |
Leanúnach |