AN COIMISIÚN EORPACH
An Bhruiséil,26.5.2025
COM(2025) 256 final
TUARASCÁIL ÓN gCOIMISIÚN CHUIG PARLAIMINT NA hEORPA, CHUIG AN gCOMHAIRLE AGUS CHUIG COISTE EACNAMAÍOCH AGUS SÓISIALTA NA hEORPA
Meastóireacht ar an Údarás Eorpach Saothair (ÚES)
{SEC(2025) 157 final} - {SWD(2025) 128 final}
I. CÚLRA AGUS COMHTHÉACS
Bunaíodh an tÚdarás Eorpach Saothair (ÚES nó ‘an tÚdarás’) le Rialachán (AE) 2019/1149 1 an 20 Meitheamh 2019 (‘an Rialachán Bunaidh’).
I bhfianaise shoghluaisteacht an lucht saothair atá ag dul i méid, dúshláin leanúnacha maidir le forfheidhmiú agus comhar, chomh maith le fadhbanna leanúnacha d’oibrithe i gcásanna trasteorann 2 , bunaíodh ÚES mar ghníomhaireacht dhíláraithe chun cuidiú le cothroime agus muinín sa mhargadh inmheánach a neartú, chun rannchuidiú le soghluaisteacht chothrom an lucht saothair a áirithiú ar fud an Aontais Eorpaigh agus chun cúnamh a thabhairt do na Ballstáit agus don Choimisiún Eorpach creat dlíthiúil an Aontais a bhaineann le soghluaisteacht an lucht saothair agus comhordú na gcóras slándála sóisialta a chur i bhfeidhm agus a fhorfheidhmiú go héifeachtach. Dá bhrí sin, tá sé d’aidhm ag ÚES freisin rannchuidiú le geilleagar sóisialta margaidh, ina bhfuil iomaíocht ghéar, i gcomhréir le hAirteagal 3 den Chonradh ar an Aontas Eorpach (CAE). Áirítear ar chúraimí ÚES tacaíocht a chur ar fáil maidir le faisnéis agus seirbhísí do shaoránaigh agus d’fhostóirí, an comhar a fheabhsú, cigireachtaí comhpháirteacha a dhéanamh, anailís agus measúnuithe riosca a dhéanamh, malartú faisnéise a éascú, agus acmhainneacht a fhothú i measc na mBallstát.
I gcomhréir le ceanglais an Rialacháin Bunaidh agus leis na treoirlínte maidir le rialáil níos fearr, rinne an Coimisiún meastóireacht ar obair ÚES lena gcumhdaítear an tréimhse ó mhí Iúil 2019 go dtí deireadh an chéad seimeastair 2023. Leis an meastóireacht, cuirtear ar fáil anailís ar éifeachtacht, éifeachtúlacht, ábharthacht, comhleanúnachas agus breisluach an Údaráis, a mhéid is féidir agus céim luathfhorbartha ÚES le linn na tréimhse meastóireachta á cur san áireamh. Tá dúshláin mhóra ag baint le paindéim COVID-19 chomh maith le cogadh foghach na Rúise in aghaidh na hÚcráine do chéim thosaigh obair an Údaráis.
Leis an meastóireacht sin, déantar na chéad chéimeanna chun measúnú a dhéanamh ar fheidhmíocht na gníomhaireachta i ndáil lena cuspóirí agus gníomhaíochtaí sonracha agus déantar measúnú ar cé acu atá nó nach bhfuil gá lena sainordú a mhodhnú, mar a leagtar amach in Airteagal 40 den Rialachán Bunaidh. Cé go bhféadfadh cineál na tuarascála ar dhul chun cinn a bheith ag baint leis an meastóireacht ar bhealaí éagsúla, is é is aidhm di rannchuidiú le bonn fianaise níos fearr don chéad mheastóireacht eile, i gcomhréir leis na hoibleagáidí tuairiscithe atá ann cheana, agus don mhodhnú a d’fhéadfaí a dhéanamh ar shainordú an Údaráis.
II. PRÍOMHTHORTHAÍ
Ar an iomlán, bhí ról ríthábhachtach ag ÚES maidir leis an gcomhar idir na húdaráis náisiúnta a fheabhsú. Go háirithe, d’éascaigh sé agus thacaigh sé le cigireachtaí comhbheartaithe agus comhpháirteacha ar oibrithe ar postú agus oibrithe taistil eile in earnálacha éagsúla, ar sainaithníodh cuid acu leis na comhpháirtithe sóisialta mar na daoine is leochailí ó thaobh calaois leasa shóisialta agus mí-úsáide de. Ina theannta sin, tá feabhas curtha ag ÚES ar an rochtain atá ag oibrithe, fostóirí agus comhpháirtithe sóisialta ar fhaisnéis maidir le soghluaisteacht an lucht saothair. D’eagraigh sé imeachtaí leis na Ballstáit chun feasacht a mhéadú maidir leis an gcineál tacaíochta a chuireann ÚES ar fáil agus chun a réimsí gníomhaíochta a léiriú.
Tá sineirgí cruthaithe agus neartaithe ag ÚES in éineacht le réimse comhlachtaí Eorpacha eile trí Mheabhráin Tuisceana/Comhaontuithe Comhair amhail leis an gCoimisiún Riaracháin um Chomhordú na gCóras Slándála Sóisialta nó le gníomhaireachtaí eile de chuid an Aontais. Chuir sé sin ar a chumas don Údarás cur chuige cuimsitheach a fhorbairt maidir lena chúraimí éagsúla.
Cuirtear i dtábhacht sa mheastóireacht deiseanna chun feabhas a chur ar ghníomhaíochtaí sonracha a chur i gcrích a thuilleadh agus chun feabhas a chur ar shineirgí idir na gníomhaíochtaí sin. Luaitear sa mheastóireacht freisin dúshláin nua nach féidir aghaidh a thabhairt orthu ach go páirteach leis an Rialachán Bunaidh (e.g. náisiúnaigh tríú tír atá ag obair laistigh den Aontas). Ar deireadh, luaitear ann dúshláin a bhaineann le soláthar foirne, bainistiú buiséid, agus buiséad a chur chun feidhme.
II.1 Éifeachtacht
Tá dul chun cinn déanta ag ÚES maidir lena cheithre chuspóir shonracha, ach bhí na torthaí éagsúil toisc go príomha go raibh an tÚdarás sa chéim thosaigh agus gur ghá dó tosaíocht a thabhairt do ghníomhaíochtaí arna bhformheas ag an mBord Bainistíochta. Rinneadh an buiséad a ailíniú leis na tosaíochtaí sin. Go ginearálta, bhí cáilíocht aschur ÚES sách ard.
Ar an iomlán, rannchuidigh ÚES le hinfhaighteacht agus inrochtaineacht na faisnéise i dtaca le cearta agus oibleagáidí maidir le soghluaisteacht an lucht saothair san Aontas Eorpach a chur chun cinn. D’fhorbair sé uirlisí freisin lena bhfeabhsaítear an comhar idir na húdaráis náisiúnta agus thacaigh sé leis na Ballstáit trí chomhar a éascú agus a neartú, lena n‑áirítear cigireachtaí comhbheartaithe agus comhpháirteacha, fothú acmhainneachta (e.g. oiliúint) agus idirghabháil.
Is féidir achoimre a dhéanamh ar dhul chun cinn ÚES maidir lena cheithre chuspóir shonracha mar a leanas:
1) Rochtain a éascú ar fhaisnéis faoi chearta agus oibleagáidí maidir le soghluaisteacht an lucht saothair ar fud an Aontais, chomh maith le rochtain ábhartha ar sheirbhísí.
Tugadh aird nach beag ar fheachtais ÚES agus bhain siad for-rochtain mhór amach. Cé nárbh fhéidir measúnú cinntitheach a dhéanamh ar an éifeachtacht mar gheall ar easpa táscairí a bhaineann le torthaí, bhí dearcadh dearfach go ginearálta ar na feachtais faisnéise ag na páirtithe leasmhara, lena n‑áirítear ionadaithe riaracháin phoiblí agus comhpháirtithe sóisialta ar leibhéal an Aontais. Cuireadh bac ar éifeachtacht na cumarsáide den chuid is mó mar gheall ar easnaimh maidir le huainiú agus spriocdhíriú, rud a chruthaigh deacrachtaí freisin do chomhpháirtithe tacú leis na hiarrachtaí sin. Mar sin féin, rinne ÚES réimse gníomhaíochtaí faisnéise eile freisin ag a raibh leibhéil éagsúla oibre leantaí agus glactha ar an leibhéal náisiúnta. Ós rud é go bhfuil faisnéis maidir le cearta agus oibleagáidí fós ilroinnte, shainaithin páirtithe leasmhara - go háirithe comhpháirtithe sóisialta go bhfuil gá breise le faisnéis atá inrochtana go héasca agus atá praiticiúil maidir le cearta agus oibleagáidí oibrithe soghluaiste agus fostóirí. Mhol páirtithe leasmhara éagsúla saoráid aistriúcháin ÚES as cuidiú leis na húdaráis náisiúnta costais a shábháil. D’éirigh le haistriú Oifig Eorpach Comhordúcháin EURES ón gCoimisiún go ÚES go rianúil in ainneoin folúntais foirne a bhí oscailte go seasta agus taithí theoranta an phearsanra a earcaíodh. Tháinig dúshláin chun cinn fós mar gheall ar thosaíochtaí éagsúla agus easpa soiléireacht maidir le freagrachtaí a chomhroinnt idir ÚES agus an Coimisiún i ndáil le líonra EURES, an Tairseach agus seirbhísí TF gaolmhara.
2.) Comhar idir na Ballstáit a éascú agus feabhas a chur air i bhforfheidhmiú dhlí ábhartha an Aontais ar fud an Aontais, lena n‑áirítear cigireachtaí comhbheartaithe agus cigireachtaí comhpháirteacha a éascú.
Bhí cigireachtaí comhbheartaithe agus cigireachtaí comhpháirteacha a éascú ar cheann de na gníomhaíochtaí ab éifeachtaí a bhí ag ÚES, trínarbh fhéidir comhroinnt eolais agus foghlaim fhrithpháirteach a dhéanamh maidir le cleachtais chigireachta idir cigirí Ballstát éagsúil. D’ainneoin raon geografach na gcigireachtaí comhbheartaithe agus na gcigireachtaí comhpháirteacha ar fud an Aontais agus an úsáideacht aitheanta a bhaineann leo, níor baineadh leas as a n‑acmhainneacht iomlán go fóill. Bhí éifeachtacht na gcigireachtaí comhbheartaithe agus na gcigireachtaí comhpháirteacha ceangailte go bunúsach le rannpháirtíocht ghníomhach na mBallstát roimh na cigireachtaí, lena linn agus ina ndiaidh.
Níor measadh ar dtús gur tosaíocht laistigh de ÚES iad anailís agus measúnuithe riosca, a raibh a n‑iarrachtaí teoranta go príomha do ghníomhaíochtaí mapála. Tá gníomhaíocht ÚES ina leith sin faoi cheangal freisin ag an Rialachán Bunaidh nach dtugann seasamh mionsonraithe don Údarás maidir le próiseáil sonraí pearsanta agus tá drogall ar údaráis náisiúnta a gcuid faisnéise a roinnt, rud a chuir bac ar chumas ÚES seirbhísí anailíseacha a chur ar fáil ar leibhéal cuideachta nó chun cásanna amhrasta a shainaithint go réamhghníomhach agus a tharchur chuig na Ballstáit.
Bhí an comhar idir na Ballstáit rianúil, rud a d’fhág gur tháinig méadú ar chomhthuiscint na n‑údarás forfheidhmithe náisiúnta ar rialacha an Aontais agus gur tháinig méadú ar an saineolas. Sna chéad bhlianta d’oibríocht ÚES, eagraíodh gníomhaíochtaí gníomhaíochta forbartha acmhainní ar bhonn sách ad hoc. Mar sin féin, ba mhór ag na páirtithe leasmhara iad agus bhí ról tábhachtach acu i bhforbairt an Údaráis.
3) Idirghabháil a dhéanamh agus réiteach a éascú i gcás díospóidí trasteorann idir na Ballstáit.
Bunaíodh an fheidhm idirghabhála, lena n‑áirítear nósanna imeachta agus treoirlínte mionsonraithe, i ndlúthchomhar leis na Ballstáit. Mar sin féin, baineadh tearcúsáid as an bhfeidhm go dtí seo, agus níor déileáladh ach le ceithre chás faoi dheireadh 2023, agus dúnadh trí cinn acu roimh am, agus bhí siad teoranta go príomha do chomhordú na slándála sóisialta. Mar thoradh air sin, ní féidir teacht ar chonclúidí maidir lena éifeachtacht. Tá sé sin amhlaidh freisin mar gheall ar chinneadh Bhord Bainistíochta ÚES don Údarás tosaíocht a thabhairt do réimsí amhail cigireachtaí agus feachtais faisnéise sna chéad bhlianta gníomhaíochta. Ní raibh an fheidhm idirghabhála ag feidhmiú go hiomlán ach i dtreo dheireadh 2022.
4.) Tacú leis an gcomhar idir Ballstáit agus iad ag dul i ngleic le hobair neamhdhearbhaithe.
Aistríodh an tArdán Eorpach chun Dul i nGleic le hObair Neamhdhearbhaithe go rianúil ón gCoimisiún chuig ÚES. Maidir leis an gcinneadh an tArdán a áireamh faoin Aonad um Fhorfheidhmiú agus Anailís mar gheall ar a naisc shoiléire leis na straitéisí agus na gníomhaíochtaí náisiúnta i réimse na hoibre neamhdhearbhaithe, measadh gur cinneadh dearfach a bhí ann ach go bhféadfaí forbairt a dhéanamh air a thuilleadh. Níor tháinig sineirgí le gníomhaíochtaí eile ÚES chun cinn go substaintiúil. Bunaíodh an tArdán chun cuidiú leis na Ballstáit obair neamhdhearbhaithe a chomhrac, ach chun cur chuige níos leithne a ghlacadh freisin, lena n‑áirítear iniúchadh a dhéanamh ar chúiseanna le fadhbanna agus – más féidir – obair choisctheach.
II.2 Éifeachtúlacht
Tá sé dúshlánach measúnú a dhéanamh ar éifeachtúlacht eagraíochta nua amhail ÚES le linn dó a bhealach a dhéanamh trína chéim bhunaithe, baill foirne a earcú, nósanna imeachta a fhorbairt, agus iniúchadh a dhéanamh ar na bealaí is fearr chun a shainordú a chomhlíonadh. Baineann an tréimhse thurgnaimh sin le réimsí le haghaidh feabhsuithe, agus le haghaidh foghlaim eagraíochtúil, agus na dúshláin a bhaineann leis an bpaindéim á gcur san áireamh freisin.
Le linn na tréimhse meastóireachta, in éagmais córas faireacháin leormhaith, cuireadh cosc ar mheasúnú láidir a dhéanamh ar chostéifeachtacht oibríochtaí ÚES. Mar sin féin, d’aontaigh formhór na bpáirtithe leasmhara a ndeachthas i gcomhairle leo gur léirigh ÚES leibhéal leordhóthanach costéifeachtúlachta, agus gur mhó tairbhe a ghníomhaíochtaí ná na costais go ginearálta.
Measadh go raibh struchtúir rialachais ÚES éifeachtúil go ginearálta, rud a chothaigh torthaí dearfacha i dtéarmaí shoghluaisteacht an lucht saothair agus comhar idir na Ballstáit, amhail trí eagraíocht aistriúcháin, cigireachtaí comhbheartaithe agus cigireachtaí comhpháirteacha agus cruinnithe.
Maidir lena éifeachtúlacht oibríochtúil, bhí deacrachtaí móra ag ÚES maidir le hacmhainní tiomanta a chur chun feidhme, mar is léir ón sciar ard de chaiteachas oibríochtúil a tugadh anonn. Níor bhain ÚES neamhspleáchas airgeadais amach go dtí mí na Bealtaine 2021, agus bhí leibhéal íseal cur chun feidhme buiséid aige ar an iomlán, go príomha mar gheall ar an gcéim thionscnaimh, lena n‑áirítear an gá le baill foirne a earcú.
Mar gheall ar dhúshláin an phróisis bhunaithe, mar aon le struchtúr agus athrú foirne, bhí sé deacair an t‑ualach oibre a bhainistiú agus an buiséad a chur chun feidhme. Cé go raibh feabhsuithe móra ann le linn na tréimhse meastóireachta, tá acmhainneacht ann fós go gcuirfeadh ÚES feabhas ar a oibríochtaí gan gá le hacmhainní breise.
II.3 Comhleanúnachas
Le linn na tréimhse meastóireachta, rinne ÚES comhtháthú maith i struchtúr rialachais beartais níos leithne an Aontais, rud a tharraing aird pholaitiúil mhór ar gach leibhéal.
Baineadh é sin amach trí go leor imeachtaí agus cuairteanna ó na Ballstáit ón Stiúrthóir Feidhmiúcháin agus ó bhaill foirne eile de chuid ÚES, agus trí chomhar láidir le comhpháirtithe sóisialta ar leibhéal an Aontais. Bhí sainordú agus gníomhaíochtaí ÚES comhleanúnach le beartais an Aontais, i bhfianaise a bhunaithe le déanaí agus timpeallacht bheartais chobhsaí ó glacadh an Rialachán Bunaidh. D’oibrigh sé i gcomhar le ranna éagsúla de chuid an Choimisiúin agus d’oibrigh sé go dlúth leis na húdaráis náisiúnta chun rialacha an Aontais a tugadh cothrom le dáta a chur i bhfeidhm, amhail an Treoir athbhreithnithe maidir le hOibrithe a Phostú 3 , Pacáiste Soghluaisteachta I don iompar de bhóthar 4 , agus an Rialachán maidir le Tairseach Aonair Dhigiteach 5 .
Bhí gníomhaíochtaí ÚES comhsheasmhach le gníomhaíochtaí gníomhaireachtaí agus comhlachtaí eile. Bunaíodh trína bhíthin comhaontuithe foirmiúla leis an gCoimisiún Eorpach, Eurofound, Cedefop, EU-OSHA, an Coimisiún Riaracháin um Chomhordú na gCóras Slándála Sóisialta, agus SOLVIT. Cé go bhféadfaí an comhar le roinnt eagraíochtaí, amhail Europol agus EIS, a neartú, níor shainaithin na páirtithe leasmhara aon fhorluí ná neamhréireacht mhór idir na heagraíochtaí ar leith. Tá tús curtha leis an gcomhar le gníomhaireachtaí eile amhail Gníomhaireacht an Aontais Eorpaigh um Chearta Bunúsacha, cé go bhfuil sé róluath breathnú ar thorthaí an chomhair sin.
A mhéid a bhaineann le ról ÚES i leith náisiúnaigh tríú tír, ní chumhdaítear leis an Rialachán Bunaidh gníomhaíochtaí chun tacú le náisiúnaigh ó lasmuigh den Aontas a earcú nó a chomhoiriúnú i margadh an tsaothair le cuideachtaí laistigh den Aontas. Mar sin féin, nuair atá náisiúnaigh tríú tír neamhchosanta ar rioscaí a bhaineann le soghluaisteacht laistigh den Aontas nó postú, is féidir le ÚES idirghabháil a dhéanamh, mar shampla trí chur chuige earnáilbhunaithe i leith cásanna achrannacha ina bhfuil rioscaí comhchosúla maidir le dálaí oibre dúshaothraithe roimh oibrithe soghluaiste de chuid an Aontais agus oibrithe imirceacha.
II.4 Breisluach Eorpach
Tá breisluach ag ÚES mar gheall ar a inniúlacht comhordú a dhéanamh ar cheisteanna agus ar shaincheisteanna a bhaineann le soghluaisteacht an lucht saothair laistigh den Aontas agus comhordú na slándála sóisialta.
Thacaigh ÚES le gníomhaíochtaí comhordúcháin agus comhair an Aontais maidir le soghluaisteacht laistigh den Aontas, agus chuir sé ‘mol’ lárnach ar fáil lena gcuirtear feabhas ar fhorfheidhmiú córasach, solúbtha, trédhearcach agus nach bhfuil chomh casta céanna i gcomparáid le hiarrachtaí déthaobhacha nó teoranta iltaobhacha na mBallstát aonair.
Neartaigh ÚES líonrú, comhroinnt eolais, muinín agus comhordú i measc riaracháin náisiúnta, agus glacadh go maith go háirithe lena ghníomhaíochtaí oiliúna agus forbartha acmhainní. Ós rud é go gcinneann na Ballstáit saineolaithe náisiúnta ar iasacht (SNInna) a sheoladh chuig ÚES, cuirtear i dtábhacht a luach aitheanta agus a fhiúntas infheistíochta.
D’ainneoin dul chun cinn mór, tá dúshláin roimh ÚES maidir lena acmhainneacht a bhaint amach go hiomlán mar gheall ar theorainneacha áirithe ar a shainordú. Tá gá le comhordú ar leibhéal an Aontais chun faisnéis chomhsheasmhach ardcháilíochta a chur ar fáil maidir le soghluaisteacht an lucht saothair, ach tá an fhaisnéis maidir le cearta agus oibleagáidí fós ilroinnte, mar gheall ar éagsúlacht na gcóras náisiúnta den chuid is mó. Mar gheall ar oibriú i dtimpeallacht chasta ina bhfuil inniúlachtaí cothroma náisiúnta agus inniúlachtaí cothroma an Aontais, is deacair teacht ar réitigh, agus tógfaidh sé am an breisluach Eorpach is mó is féidir a bhaint amach.
II.5 Ábharthacht
Tá sainordú agus cuspóirí ÚES fós an-ábhartha i bhfianaise treochtaí leanúnacha amhail soghluaisteacht mhéadaithe an lucht saothair san Aontas Eorpach, rud a dhéanann difear freisin do náisiúnaigh tríú tír, ganntanais lucht saothair agus na haistrithe glasa, digiteacha agus déimeagrafacha.
Tá ról tábhachtach ag ÚES maidir le tacú leis na Ballstáit lena n‑iarrachtaí soghluaisteacht chothrom an lucht saothair a áirithiú. Luaitear sa mheastóireacht go bhfuil gá le ÚES a neartú agus feabhas a chur ar éifeachtacht agus éifeachtúlacht a gníomhaíochtaí, agus cuirtear i dtábhacht inti go bhféadfadh gá a bheith le hathbhreithniú a dhéanamh ar an sainordú.
Roinnt réimsí féideartha le haghaidh feabhsú a d’fhéadfadh gá a bheith leo athbhreithniú a dhéanamh ar an Rialachán Bunaidh, áirítear inniúlachtaí chun sonraí pearsanta a láimhseáil, cumas neartaithe comhar a iarraidh ar na Ballstáit maidir le cigireachtaí comhbheartaithe agus cigireachtaí comhpháirteacha, agus i réimse an tsoláthair faisnéise, an fhéidearthacht aghaidh níos fearr a thabhairt ar chás na náisiúnach tríú tír, agus tionchar níos mó a imirt ar cheapadh Oifigeach Náisiúnta Idirchaidrimh, comhar oibríochtúil níos struchtúrtha leis na Ballstáit a chumasú, agus soláthar foirne an Údaráis a chobhsú i bhfianaise sciar ard na SNInna. Thairis sin, dá neartófaí inniúlachtaí na mBallstát dul i gcomhar le ÚES, d’fhéadfaí cuidiú leis an Údarás a shainordú a chomhlíonadh ar bhealach níos fearr.
III. CEACHTANNA A FOGHLAIMÍODH AGUS AN BEALACH CHUN CINN
Sa mheastóireacht ar oibríochtaí tosaigh ÚES tá roinnt ceachtanna tábhachtacha lenar féidir treoraíocht a thabhairt maidir lena treoir straitéiseach amach anseo agus feabhas a chur ar a fheidhmíocht. Iarrann an Coimisiún ar ÚES plean gníomhaíochta a ghlacadh ina mbeidh garspriocanna lena dtabharfar aghaidh ar gach ceann de na torthaí. Tá na pointí seo a leanas le cur san áireamh:
1.Feabhas a chur ar an gcóras faireacháin: cuirtear i dtábhacht sa mheastóireacht gur gá do ÚES feabhas a chur ar a chóras faireacháin bunaithe ar chuspóirí sonracha, intomhaiste, indéanta, réalaíocha agus faoi cheangal ama agus bunaithe ar phríomhtháscairí feidhmíochta. Leis an gcóras faireacháin ba cheart díriú ar thionchair agus ar thorthaí, agus ar spriocanna tiomnaithe a shocrú agus a thomhas, ar spriocanna iad is féidir a bhaint amach i bhfianaise chuspóirí agus shainordú ÚES. Cé is moite den ionchur is gá a sholáthar don chéad mheastóireacht eile ar ÚES, d’fhéadfadh córas faireacháin den sórt sin cuidiú le feabhas a chur ar bhainistíocht straitéiseach faoi cheannaireacht an Údaráis, treoir a thabhairt don eagraíocht agus a feidhmíocht fhoriomlán a mhéadú.
2.Comhtháthú straitéiseach agus comhleanúnachas: D’fhéadfadh gníomhaíochtaí ÚES a bheith níos comhtháite agus níos comhordaithe go hinmheánach agus laistigh d’eintitis eile de chuid an Aontais araon. Trí chur chuige straitéiseach cuimsitheach a chur chun feidhme lena gcuimsítear na gníomhaíochtaí uile, d’fhéadfaí feabhas a chur ar an gcomhleanúnachas agus ar an gcomhsheasmhacht. A mhéid a bhaineann leis an eagrú inmheánach, is éard a bheadh i gceist leis sin gníomhaíochtaí éagsúla a ailíniú, sineirgí a chruthú agus an fheidhmíocht fhoriomlán a fheabhsú.
3.Faisnéis: D’fhéadfadh ÚES tionchar agus úsáideacht na bhfeachtas faisnéise a mhéadú trí tháscairí agus straitéisí ábhartha a fhorbairt chun a rath a thomhas. D’fhéadfaí cur a thuilleadh le rannpháirtíocht na bpáirtithe leasmhara, go háirithe na comhpháirtithe sóisialta chomh maith leis na Ballstáit san obair leantach ar ghníomhaíochtaí faisnéise ÚES.
4.EURES a chomhdhlúthú: Ba cheart do ÚES dlús a chur leis na hiarrachtaí EURES a fhorbairt agus é a nascadh lena ghníomhaíochtaí. Ba cheart dó cur le hanailís ar shoghluaisteacht an lucht saothair a thuilleadh, agus feabhas á chur ar sheirbhísí do líonra EURES chun an tacaíocht is fearr is féidir a thabhairt do chuardaitheoirí poist agus d’fhostóirí trí uirlisí digiteacha. Ba cheart do ÚES iniúchadh a dhéanamh ar bhealaí chun feabhas a chur ar éifeachtacht agus éifeachtúlacht EURES trí bhainistiú ghrúpa comhordúcháin EURES agus trí roinnt an tsaothair agus freagracht a chomhroinnt idir ranna an Choimisiúin agus ÚES a shoiléiriú, go háirithe maidir le huirlisí TF thairseach EURES agus léirmhínithe dlí ar Rialachán EURES.
5.Feidhm idirghabhála: D’fhéadfadh ÚES na cúiseanna le tearcúsáid a fheidhme idirghabhála a shainaithint agus iniúchadh a dhéanamh ar conas a chostéifeachtacht agus rannpháirtíocht na mBallstát sa phróiseas idirghabhála a mhéadú.
6.Forbairt acmhainní: D’fhéadfadh cuspóirí atá níos dírithe ar thorthaí dul chun tairbhe d’fhorbairt acmhainní ÚES, lenarbh fhéidir é a shainiú agus a leathnú ar bhealach níos fearr más gá agus raon níos leithne clár agus cuspóirí a chumhdach. Is éard a bheadh i gceist leis sin tacaíocht a mhéadú do líonra EURES chun a áirithiú gur cuid lán-chomhtháite de ghníomhaíochtaí ÚES é.
7.Uirlisí digiteacha agus nuálaíochtaí a chomhtháthú: De réir mar a leanann an digitiú de mhargaí saothair a mhúnlú, ba cheart do ÚES díriú ar uirlisí digiteacha agus nuálaíochtaí a chomhtháthú a thuilleadh laistigh dá oibríochtaí. Áirítear leis sin tairseach EURES a bharrfheabhsú (trí shineirgí le Europass a mhéadú, i measc nithe eile) agus aghaidh a thabhairt ar dhúshláin ghaolmhara amhail díláithriú post agus i bpróisis earcaíochta, chomh maith le huirlisí a fhorbairt chun tacaíochta a thabhairt d’úsáid agus d’fhorbairt uirlisí digiteacha ag na Ballstáit a thuilleadh.
8.Éifeachtúlacht oibríochtúil: D’fhéadfadh ÚES bealaí a shainaithint chun éifeachtúlacht cruinnithe agus feabhas a chur ar úsáid acmhainní, i dtéarmaí acmhainní airgeadais agus daonna araon. Dá mbainfí cothromaíocht mhaith amach idir saineolas inmheánach agus spleáchas ar chonraitheoirí seachtracha, d’fhéadfaí feabhas a chur ar éifeachtúlacht oibríochtúil gan gá le hacmhainní breise. Ba cheart cobhsú breise ar fhoireann ÚES a áirithiú i bhfianaise sciar ard na SNInna. D’fhéadfadh an fhéidearthacht baill foirne reachtúla a dhéanamh de SNInna cuidiú le haghaidh a thabhairt ar an dúshlán sin.
Sainordú ÚES a choigeartú: Tugtar le fios sa mheastóireacht go bhféadfaí feabhas a chur ar fheidhmíocht ÚES bunaithe ar a shainordú agus ar a chuspóirí reatha. An tráth céanna, luaitear teorainneacha áirithe sa sainordú a d’fhéadfadh difear a dhéanamh d’acmhainneacht ÚES. Má chuirtear athruithe ar shainordú nó ar raon feidhme ÚES san áireamh, tá gá le hanailís chuimsitheach ar a riachtanais, a chostais, a thairbhí agus a fho-iarmhairtí féideartha, ag cur leis an meastóireacht sin chomh maith leis an tuarascáil ó Pharlaimint na hEorpa agus ionchur ó pháirtithe leasmhara ábhartha eile. D’fhéadfadh modhnuithe spriocdhírithe ÚES a neartú, lena n‑áirítear a éifeachtúlacht agus a éifeachtacht, amhail inniúlachtaí feabhsaithe maidir le láimhseáil sonraí, comhar feabhsaithe leis na Ballstáit, lena n‑áirítear i dtéarmaí soláthar faisnéise, ról ÚES i leith náisiúnaigh tríú tír, freagrachtaí ÚES maidir le forbairt EURES, agus baill foirne reachtúla a dhéanamh de roinnt SNInna.