AN COIMISIÚN EORPACH
An Bhruiséil,27.9.2023
COM(2023) 558 final
TEACHTAIREACHT ÓN gCOIMISIÚN CHUIG PARLAIMINT NA HEORPA, CHUIG AN GCOMHAIRLE EORPACH, CHUIG AN GCOMHAIRLE, CHUIG COISTE EACNAMAÍOCH AGUS SÓISIALTA NA HEORPA AGUS CHUIG COISTE NA RÉIGIÚN
I dtreo Eoraip níos athléimní, níos iomaíche agus níos inbhuanaithe
1.Réamhrá
Tá cogadh foghach na Rúise i gcoinne na hÚcráine tar éis an t-ord riailbhunaithe a chroitheadh agus dlús breise a chur le hathruithe ollmhóra i dtimpeallacht gheopholaitiúil agus eacnamaíoch atá ag forbairt, rud a éilíonn freagairt bheartais phráinneach, chomhordaithe agus mharthanach ar fud na réimsí uile. Leis an gcomhrac práinneach i gcoinne an athraithe aeráide, tá iomaíocht athnuaite ann le haghaidh acmhainní agus tá rás teicneolaíoch agus tionsclaíoch ann sa teicneolaíocht ghlan, agus bhí paindéim COVID-19 tar éis leochaileacht na slabhraí soláthair agus an gá le tuilleadh athléimneachta a nochtadh cheana féin.
D’fhreagair an tAontas go pras. Agus é ag dul i ngleic le héagobhsaíocht, iomaíocht straitéiseach agus bagairtí slándála atá ag dul i méid, le Dearbhú Versailles an 11 Márta 2022 1 , gheall an tAontas níos mó freagrachta a ghlacadh as a shlándáil agus céimeanna cinntitheacha breise a dhéanamh chun ár gceannasacht Eorpach a fhorbairt, ár spleáchas a laghdú agus samhail nua fáis agus infheistíochta a cheapadh le haghaidh 2030. Leagadh amach ann clár oibre comhchoiteann fadréimseach chun feabhas a chur ar chumas na hEorpa cur leis an tslándáil réigiúnach agus leis an tslándáil dhomhanda araon. Tá an tAontas tar éis a chuid beartas a choigeartú agus dlús a chur lena gcur chun feidhme, ach tá sé fós tiomanta a thosaíochtaí fadtéarmacha a bhaint amach. Áirítear orthu sin an Comhaontú Glas don Eoraip mar straitéis fáis inbhuanaithe an Aontais, aistriú digiteach i gcomhréir lenár luachanna, chomh maith leis an ngá atá le hathléimneacht eacnamaíoch agus shóisialta an Aontais agus ullmhacht le haghaidh suaití amach anseo a fheabhsú.
Tá an tAontas fós ag seasamh leis an Úcráin chomh fada agus is gá. Tá cúnamh míleata, daonnúil agus airgeadais dar luach EUR 81 bhilliún san iomlán curtha ar fáil aige don Úcráin agus tá fáilte curtha aige roimh na daoine atá ag teitheadh ó chogadh foghach na Rúise. Ó thús an chogaidh, tá aon phacáiste smachtbhannaí déag glactha ag an Aontas, lena ndírítear ar earnálacha criticiúla a mhaoiníonn meaisín cogaidh na Rúise agus tá sócmhainní thart ar 1800 duine aonair agus cuideachta calctha aige. Tá rún daingean ag an Aontas a chinntiú go mbeidh an Rúis cuntasach as a cuid coireanna, lena n-áirítear coir an fhogha i gcoinne stát ceannasach. D’fhonn tacú le téarnamh agus atógáil na hÚcráine, tá go leor á dhéanamh ag an Aontas chun cur le hathléimneacht na tíre.
I bhfianaise an teannais gheopholaitiúil atá ag dul i méid agus an chlaochlaithe teicneolaíochta, tá an tAontas ag tabhairt faoi chur chuige nua chun a leasanna eacnamaíocha, slándála agus straitéiseacha a chosaint ar bhealach níos fearr. I ndlúthchomhar leis an earnáil phríobháideach, agus ag tógáil ar a chumas taighde, tá bearta á ndéanamh ag an Aontas chun an riosca a mhaolú agus aghaidh a thabhairt ar leochaileachtaí i ngeilleagar an Aontais i roinnt príomhearnálacha, trí athléimneacht a thionscail a chur chun cinn, trí chomhpháirtíochtaí le tríú tíortha a éagsúlú agus a fhorbairt. 2
Chun tosaíochtaí straitéiseacha na hEorpa a bhaint amach agus chun aghaidh a thabhairt ar dhúshláin a bheidh ann amach anseo, beidh gá le hinfheistíocht mhór bhreise. Cé go gcaithfidh an chuid is mó den mhaoiniú teacht ón earnáil phríobháideach, tá ról tábhachtach ag an infheistíocht phoiblí. Léirigh buiséad an Aontais a luach ó thaobh aghaidh a thabhairt ar na dúshláin sin nach bhfacthas a leithéid riamh roimhe seo trí ath-imlonnú suntasach tapa. Tá raon feidhme na solúbthachta sin ídithe, áfach. Cé gur mó i bhfad na riachtanais infheistíochta poiblí agus príobháidí a bheidh ann amach, is iad na coigeartuithe spriocdhírithe a moladh i mí an Mheithimh 2023 an t-íosmhéid is gá chun cumas bhuiséad an Aontais beart a dhéanamh amach anseo a chosaint.
18 mí tar éis Dhearbhú Versailles, tá sé in am machnamh a dhéanamh agus breathnú ar an todhchaí. Agus na Conclúidí ón gComhairle Eorpach ó mhí an Mhárta 2023 á gcur san áireamh 3 , déantar achoimre sa Teachtaireacht seo ar an méid a baineadh amach chun geilleagar níos athléimní, níos iomaíche agus níos inbhuanaithe a chur chun cinn agus a thógáil, saoránaigh an Aontais a chosaint agus a bhfolláine a ráthú. Cuireann an Teachtaireacht le díospóireacht na gceannairí atá le teacht in Granada maidir leis an gcur chuige atá dírithe ar an todhchaí chun neamhspleáchas straitéiseach oscailte an Aontais a threisiú agus maidir le cuspóirí beartais tosaíochta an Aontais sna blianta amach romhainn.
2.Cur chuige comhbheartaithe chun borradh a chur faoi athléimneacht agus iomaíochas inbhuanaithe an Aontais
Tá an tAontas Eorpach tar éis freagairt ar bhealach cinntitheach, tráthúil agus aontaithe don iliomad géarchéimeanna ó rinne an Rúis ionradh iomlán ar an Úcráin. Tá leas á bhaint aige as a neart comhchoiteann agus a dhiongbháilteacht ar bhealach nach bhfacthas a leithéid riamh roimhe seo, agus na teorainneacha a measadh a bheith ann ar an méid a d’fhéadfadh sé a dhéanamh leathnaithe aige. Mar sin féin, tá dúshláin thábhachtacha fós ann.
2.1. Ár gcumais chosanta a neartú agus síocháin bhuan a chothú san Eoraip
Ó bhí Cruinniú Mullaigh Versailles ann, tá céimeanna misniúla glactha ag an Aontas chun a ghné cosanta a fhorbairt a thuilleadh agus chun cumais chosanta na hEorpa a threisiú. Ar an gcaoi sin, d’fhreagair an tAontas go cinntitheach do na riachtanais phráinneacha chosanta a bhí ann de bharr chogadh foghach na Rúise i gcoinne na hÚcráine. Leis an gCompás Straitéiseach um Shlándáil agus Cosaint 4 , tá beart déanta ag an Aontas chun a acmhainneacht mar sholáthraí slándála a neartú, agus comhlántacht le ECAT á cinntiú ag an am céanna. Rinneadh dul chun cinn maidir le gach gné den Chompás – gníomh, slándáil, infheistíocht agus comhpháirtíocht. Sa chreat sin, tá ról tábhachtach ag an gCoimisiún agus ag an Ardionadaí trí thionscnaimh lena gcuimsítear ábhair, teicneolaíochtaí, bonneagar agus tacaíocht thionsclaíoch, chomh maith le dúshláin atá ag teacht chun cinn go tapa i réimsí na talún, an spáis, na mara agus na cibearshlándála.
Lean an tAontas air ag tógáil príomh-chomhpháirtíochtaí slándála agus á leathnú. Go háirithe, treisíodh go mór an chomhpháirtíocht straitéiseach idir an tAontas agus ECAT nuair a síníodh an tríú Dearbhú Comhpháirteach i mí Eanáir 2023. Áirítear le réimsí nua comhair teicneolaíochtaí suaiteacha atá ag teacht chun cinn, an aeráid agus an chosaint, chomh maith leis an spás. Ina theannta sin, sheol an tAontas agus ECAT Tascfhórsa idir an tAontas agus ECAT um Athléimneacht an Bhonneagair Chriticiúil, Tascfhórsa a thug moltaí uaidh i mí an Mheithimh 2023 5 .
Tá bearta tábhachtacha déanta maidir le cabhair mhíleata a sholáthar, soláthar cosanta comhpháirteach agus tacú le táirgeadh armlóin le buiséad an Aontais. An tacaíocht leanúnach atá á tabhairt ag an Aontas don Úcráin, ní fhacthas a leithéid riamh roimhe seo ar scála chomh mór sin. Is tacaíocht mhíleata dar luach thart ar EUR 25 bhilliún a chuireann an tSaoráid Eorpach Síochána agus na Ballstáit ar fáil go díreach anois. Ar ndóigh, tá bearnaí criticiúla ann i stoc-chairn cosanta na mBallstát mar thoradh ar thabhartais ollmhóra leanúnacha. Ag tógáil ar an anailís ar bhearnaí infheistíochta i réimse na cosanta i mí na Bealtaine 2022 6 , glacadh tionscnaimh reachtacha agus chomhordúcháin chun soláthar comhpháirteach trealaimh mhíleata a bhfuil géarghá leis a chur chun cinn 7 . Tháinig an Chomhairle ar chomhaontú i mí an Mhárta 2023 maidir le cur chuige trí rian chun dlús a chur le táirgeadh, soláthar comhpháirteach agus seachadadh armlón airtléire agus diúracán chuig an Úcráin 8 . Chun dlús a chur leis an acmhainneacht táirgeachta atá ann cheana, tháinig ionstraim dlí nua i bhfeidhm i mí Iúil 2023, an Gníomh chun Tacú le Táirgeadh Armlóin (ASAP), a bhfuil buiséad EUR 500 milliún aige.
Tá tionscnaimh chosanta an Aontais ríthábhachtach i gcónaí chun an comhar cosanta idir na Ballstáit a neartú. Le cur chun feidhme leanúnach an Chiste Eorpaigh Cosanta (EDF) tá borradh á chur faoin nuálaíocht agus faoin gcur chuige comhoibritheach i dtionscal cosanta an Aontais. Go dtí seo, rinneadh breis agus EUR 3 bhilliún a infheistiú i dteicneolaíochtaí agus i gcórais chosanta an lae amárach. In 2023, cuirfear EUR 1.2 billiún eile ón gCiste Eorpach Forbraíochta isteach i dtionscadail i réimsí ríthábhachtacha cosanta, cuir i gcás feasacht staide an spáis, diúracáin hipearsonacha a chomhrac agus forbairt fréamhshamhlacha an choirbhéid patróil Eorpaigh. Le Scéim Nuálaíochta Cosanta an Aontais, tacaíonn an tAontas freisin le fiontair bheaga agus mheánmhéide, lena n-áirítear gnólachtaí nuathionscanta agus gníomhaithe neamhthraidisiúnta eile, in éiceachóras an tionscail cosanta.
Mar sin féin, ní mór tuilleadh a dhéanamh chun bonn tionsclaíoch agus teicneolaíoch na cosanta Eorpaí a neartú, le tuilleadh infheistíochtaí san áireamh. Foráiltear sa togra ón gCoimisiún le haghaidh athbhreithniú meántéarma ar an gCreat Airgeadais Ilbhliantúil go mbeidh EUR 1.5 billiún sa bhreis ann don CEF mar chuid den Ardán um Theicneolaíochtaí Straitéiseacha don Eoraip (STEP). An tráth céanna, cuirfidh an Coimisiún Straitéis Thionsclaíoch um an gCosanit Eorpach i láthair chun an creat a bheidh ann amach anseo don chomhar cosanta a ullmhú, ag tarraingt ar an taithí a fuarthas ó EDIRPA agus ASAP agus ina sainaithneofar rialáil, clársceidealú, comhordú beartais agus luamháin eile chun ár n-ullmhacht don chosaint a mhéadú.
Ní mór leanúint de na hiarrachtaí chun borradh a chur faoin tsoghluaisteacht mhíleata ar fud an Aontais agus aghaidh a thabhairt ar chibearbhagairtí agus bagairtí hibrideacha. Leis an bPlean Gníomhaíochta nua maidir le Soghluaisteacht Mhíleata 2.0 9 , leathnaítear raon feidhme na hoibre sa réimse ríthábhachtach sin. Leithdháileadh EUR 790 milliún ar thionscadail bhonneagair dé-úsáide in 2023. Mar thoradh air sin, beidh leas iomlán bainte as buiséad tiomnaithe EUR 1.69 billiún ó imchlúdach soghluaisteachta míleata na Saoráide um Chónascadh na hEorpa 10 . Beidh gá le haird leanúnach a thabhairt ar an tsoghluaisteacht mhíleata ar fud an Aontais. An tráth céanna, tá sé d’aidhm ag an togra comhpháirteach 11 le haghaidh Bheartas Cibearchosanta an Aontais cabhrú leis an Aontas agus leis na Ballstáit cibirionsaithe a chosaint, iad a bhrath, a dhíspreagadh agus cosaint ina gcoinne ar bhealach níos fearr. Chomh maith leis sin, rinne an tAontas athbhreithniú le déanaí ar a Bhosca Uirlisí Cibearthaidhleoireachta 12 . I bhfianaise rannchuidiú ríthábhachtach smachtbhannaí AE chun síocháin chóir a chinntiú, cuireann an Coimisiún le cur chun feidhme aonfhoirmeach agus éifeachtach ar fud an Aontais, trí threoir fhorleathan agus trí fhor-rochtain; malartú faisnéise agus tacaíocht shaincheaptha d’údaráis forfheidhmithe; agus comhordú le tríú tíortha chun dul i ngleic le himchéimniú.
Is cuid lárnach de bhagairtí hibrideacha i gcoinne an Aontais iad an bhréagaisnéis agus an cur isteach eachtrach, go háirithe ós rud é go rachaidh muintir na hEorpa i mbun vótála i mí an Mheithimh 2024. Beidh gá le gníomhaíochtaí ar gach leibhéal chun freagairt go tapa agus go nithiúil d’ionramháil faisnéise, mar aon le tacaíocht ó na meáin shaora agus litearthacht dhigiteach a fheabhsú. Ina theannta sin, d’oibrigh an Coimisiún agus an tArdionadaí leis na Ballstáit ar an mBosca Uirlisí chun Cur i gcoinne Ionramháil agus Cur Isteach Eachtrach ar Fhaisnéis, agus tá siad ag obair faoi láthair ar na Foirne Mearfhreagartha Hibrideacha a bheidh ann amach anseo. 13
Seoladh tionscnaimh thábhachtacha i gcás an spáis, rud atá ríthábhachtach ní hamháin dár sochaithe agus dár ngeilleagair, ach dár slándáil agus dár gcosaint freisin. Tá sé d’aidhm ag Straitéis Spáis na hEorpa 2023 don tSlándáil agus don Chosaint 14 feabhas a chur ar athléimneacht bhonneagar spáis agus chumais spáis an Aontais, ar fhreagairt an Aontais ar bhagairtí spáis agus ar úsáid an spáis le haghaidh na slándála agus na cosanta, agus comhpháirtíochtaí le haghaidh iompraíocht fhreagrach sa chianspás á gcur chun cinn an tráth céanna. Cinntítear le cur chun feidhme leanúnach Chlár Nascachta Slán an Aontais 2023-2027 15 go mbeidh rochtain gan bhriseadh ar sheirbhísí cumarsáide satailíte slána cost-éifeachtacha ar fáil go fadtéarmach ar fud an domhain. Ina theannta sin, cuidíonn Cur Chuige an Aontais maidir le Bainistiú Tráchta Spáis 16 sábháilteacht agus athléimneacht shócmhainní spáis an Aontais agus na mBallstát a chinntiú. Roimh dheireadh an tsainordaithe, cuirfidh an Coimisiún togra ar aghaidh le haghaidh Dlí Spáis an Aontais.
Le cogadh foghach na Rúise i gcoinne na hÚcráine, leagtar béim freisin ar a thábhachtaí atá méadú an Aontais, rud a léiríonn go dtugann an tionscadal Eorpach dóchas do go leor daoine gur féidir leo saol síochánta agus saor a bheith acu. I mí an Mheithimh 2022, d’aithin an Chomhairle Eorpach gné Eorpach na hÚcráine, na Moldóive agus na Seoirsia. Bronnadh stádas iarrthóra ar aontachas ar an Úcráin, ar an Moldóiv agus ar an mBoisnia agus Heirseagaivéin, agus cuireadh tús le caibidlíocht aontachais i gcás na hAlbáine agus na Macadóine Thuaidh. Leanann an tAontas air ag cur cúnamh ar fáil do gach tír is iarrthóir agus iad ag iarraidh ballraíocht iomlán a bhaint amach agus déanfaidh sé measúnú ar an dul chun cinn atá déanta go dtí seo sa Phacáiste bliantúil um Méadú atá ar na bacáin. Tá tuilleadh gníomhaíochtaí déanta aici chun rochtain na hÚcráine ar an Margadh Aonair a éascú, bunaithe ar an bPlean Gníomhaíochta Tosaíochta athbhreithnithe chun an Limistéar Domhain Cuimsitheach Saorthrádála idir an tAontas Eorpach agus an Úcráin a chur chun feidhme ar bhealach níos fearr, cuir i gcás tríd an Úcráin a thabhairt isteach i limistéar fánaíochta móibíleach saor in aisce san Aontas Eorpach agus isteach sa Chomhchoinbhinsiún Idirthurais agus trí naisc fhisiciúla ríthábhachtacha a sholáthar le margaí domhanda trí na Lánaí Dlúthpháirtíochta. Rinneadh an Úcráin a chomhtháthú go tapa i líonraí iompair ilchríochach na hEorpa agus a shioncronú lena chóras leictreachais. Ní mór dúinn a chinntiú freisin go mbeidh an tAontas, a bheartais agus a institiúidí san áireamh, sásta fáilte a chur roimh chomhaltaí nua.
2.2. Slándáil fuinnimh na hEorpa a fheabhsú agus dul i ngleic leis an ngéarchéim aeráide
Ó thosaigh an cogadh, tá an tAontas tar éis an greim a bhí ag an Rúis ar ár ngeilleagar agus ar ár soláthar fuinnimh a lagú go mór trí ghníomhaíocht aontaithe dhiongbháilte 17 . I bhfianaise úsáid fuinnimh na Rúise mar arm polaitiúil agus eacnamaíoch, d’fheidhmíomar mar Aontas chun ár spleáchas ar bhreoslaí iontaise na Rúise a laghdú agus chun ár slándáil fuinnimh a neartú agus an tráth céanna chun aghaidh a thabhairt ar an ngéarchéim aeráide. De bharr na mbeart éigeandála a glacadh in 2022, bhíothas in ann teacht slán as an stoirm tríd an éileamh a laghdú agus trí aghaidh a thabhairt ar inacmhainneacht agus soláthar 18 . Rinneamar beart freisin chun feabhas a chur ar athléimneacht bhonneagar criticiúil agus eintiteas criticiúil an Aontais, seirbhísí ríthábhachtacha in earnáil an fhuinnimh san áireamh, cuir i gcás táirgeadh leictreachais agus stóráil fuinnimh. Ní mór dúinn a aithint go forleathan go bhfuil an t-aistriú fuinnimh ríthábhachtach agus práinneach dár gceannasacht agus dár n-iomaíochas agus chun aghaidh a thabhairt ar an éigeandáil aeráide.
Tá leas bainte ag an Aontas as a neart comhchoiteann chun naisc le comhpháirtithe idirnáisiúnta a threisiú agus chun soláthairtí fuinnimh a éagsúlú. Chuir sé leis an gcaidreamh atá ann cheana agus bhunaigh sé naisc nua le comhpháirtithe iontaofa ar fud an domhain, rud a chuir ar a chumas don Aontas a allmhairí gáis ó na comhpháirtithe sin a mhéadú go mór, agus a spleáchas ar bhreoslaí iontaise na Rúise á laghdú an tráth céanna. Sa lá atá inniu ann, is í an Iorua príomhsholáthraí gáis an Aontais agus is iad na Stáit Aontaithe a phríomhsholáthraí gáis nádúrtha leachtaithe. Ó 2022 i leith, tá comhaontuithe déanta ag an Aontas le tíortha eile freisin, ina measc an Éigipt, Iosrael, an tSeapáin, an Chasacstáin, an Namaib, an Airgintín, Uragua agus an Úcráin, lena neartaítear comhpháirtíochtaí fuinnimh chun dul in oiriúint don réaltacht gheopholaitiúil nua. Le hArdán Fuinnimh nua an Aontais, tá an t-éileamh ar ghás ar mhargaí domhanda á chomhordú ag an Aontas ionas nach mbeidh na Ballstáit ag sárú a chéile. Trí leas a bhaint as a mheáchan polaitiúil agus margaidh, tá feabhas á chur ag an Aontas ar shlándáil an tsoláthair le haghaidh tomhaltóirí agus leibhéal ard iomaíochta á chinntiú le haghaidh an tsoláthair. An tráth céanna, agus go háirithe tríd an Tairseach Dhomhanda, tá an tAontas ag tacú le tíortha ísealioncaim agus meánioncaim sa dá aistriú agus sa rochtain ar fhuinneamh. Tá an tAontas rannpháirteach freisin i gComhpháirtíochtaí um Aistriú Fuinnimh Cóir trí G7.
D’fhonn a bheith aeráidneodrach faoi 2050, tá an tAontas tiomanta a spleáchas ar bhreoslaí iontaise a laghdú agus dlús ollmhór a chur le húsáid fuinnimh in-athnuaite. A bhuí le Plean REPowerEU an Choimisiúin 19 , rinne an tAontas cuid mhór dá sholáthar fuinnimh a éagsúlú cheana féin sa chaoi nach mbeadh sé spleách ar an Rúis, rud a laghdaigh an gás a fhaightear ó phíblíne na Rúise ó 50 % d’iomlán na n-allmhairí gáis in 2021 go dtí níos lú ná 10 % in 2023 go dtí seo. Thit allmhairí ola ón Rúis ó 27 % d’iomlán na n-allmhairí ola go 6 % agus tá allmhairí guail ag nialas anois, laghdú ó 46 % d’iomlán na n-allmhairí guail in 2021. I bhfianaise an EUR 210 billiún d’infheistíochtaí breise a bhfuil gá leo idir 2022 agus 2027 chun REPowerEU a bhaint amach, tá an Coimisiún ag cabhrú leis na Ballstáit an leas is fearr is féidir a bhaint as an tSaoráid Téarnaimh agus Athléimneachta (RRF) 20 . Chuir an Banc Eorpach Infheistíochta breisiú ar REPowerEU le hiasachtaí agus le maoiniú cothromais dar luach EUR 45 bhilliún breise, rud a d’fhág go bhféadfaí infheistíochtaí dar luach EUR 150 billiún a dhéanamh go dtí 2027. In 2022, chuir na Ballstáit creat sealadach i bhfeidhm chun dlús a chur leis na próisis cheadaithe le haghaidh tionscadail fuinnimh in-athnuaite. Leis an Treoir athbhreithnithe maidir le Fuinneamh In-athnuaite 21 , tugtar isteach rialacha lena gcuirtear ar a gcumas do na Ballstáit rialacha ceadaithe níos tapúla agus níos simplí a chur ar fáil ar bhonn buan agus sciar an fhuinnimh in-athnuaite i dtomhaltas fuinnimh foriomlán an Aontais a mhéadú go 42.5 % faoi 2030, agus deimhneacht dhlíthiúil á tabhairt don tionscal ar an mbealach i dtreo nialasach.
Rinne an tAontas gníomhaíocht chomhordaithe chun cur leis an ullmhacht don gheimhreadh agus chun tomhaltóirí a chosaint ar phraghsanna arda fuinnimh, ach tá baol ann fós go dtiocfaidh méadú ar phraghsanna. A bhuí leis an gcomhaontú tapa ar an Rialachán maidir le Stóráil Gáis 22 , bhain na Ballstáit leibhéal líonta stórála gáis de os cionn 95 % amach roimh gheimhreadh 2022/2023, rud a sháraigh an sprioc chomhaontaithe 80 %. Agus an geimhreadh beagnach ann san Eoraip, tá na stórais gháis líonta os cionn 90 % níos mó ná dhá mhí roimh sprioc mhí na Samhna agus tá trádálaithe na hEorpa tosaithe ar ghás a stóráil san Úcráin, rud a neartaíonn ár n-ullmhacht a thuilleadh. Sa bhliain ó mhí Lúnasa 2022, rinne na Ballstáit laghdú 17 % ar an éileamh ar ghás, rud a théann thar na ceanglais faoin Rialachán maidir le Laghdú Éileamh. I gcomhthéacs praghsanna arda fuinnimh, tá bearta déanta ag an gCoimisiún chun cur ar a gcumas do na Ballstáit úsáid a bhaint as an tsolúbthacht dá bhforáiltear faoi na rialacha maidir le Státchabhair chun tacú le tionscal na hEorpa ar bhonn spriocdhírithe agus sealadach, agus chun idirghabháil shealadach a dhéanamh, faoi Airteagal 122 CFAE, i rialáil praghsanna miondíola agus chun brabúis amhantair ó chuideachtaí fuinnimh a athdháileadh. Tá sé d’aidhm ag an sásra ceartúcháin margaidh a glacadh mar bheart éigeandála cuideachtaí agus tomhaltóirí a chosaint ar aon eachtra fhéideartha de phraghsanna iomarcacha gáis. De réir mar a tháinig maolú ar bhrúnna praghsanna, aistríodh an fócas chun go ndíreodh sé ar dheireadh a chur de réir a chéile leis na bearta fioscacha náisiúnta a tugadh isteach chun teaghlaigh agus gnólachtaí a chosaint ar shuaitheadh praghsanna fuinnimh 23 . In 2023 agus ina dhiaidh sin, ba cheart do na gníomhaithe uile faireachán a dhéanamh ar mhargaí fuinnimh agus - ag tarraingt ar an taithí, ar na huirlisí agus ar an treoir atá curtha i bhfeidhm ag an Aontas - ba cheart dóibh a bheith ullamh i gcónaí le haghaidh iarrachtaí athnuaite chun soláthar fuinnimh a chinntiú agus na daoine is leochailí sa tsochaí a chosaint más gá. Sa chomhthéacs sin, beidh an laghdú ar an éileamh struchtúrach ar gach foinse fuinnimh trí éifeachtúlacht fuinnimh ina sprioc ag an Aontas i gcónaí 24 . Táimid i bhfad níos ullmhaithe anois agus muid ag tabhairt aghaidh ar shéasúr nua geimhridh, ach ní féidir linn a bheith réchúiseach, go háirithe mar gheall ar an ráta boilscithe foriomlán fós a bheith níos airde ná an ráta boilscithe foriomlán spriocdhírithe.
Ba cheart aghaidh a thabhairt ar na baic atá fós ann mar ábhar tosaíochta. Leis an athchóiriú ar dhearadh an mhargaidh leictreachais, éascófar comhtháthú an fhuinnimh in-athnuaite a thuilleadh agus cinnteofar rochtain ar leictreachas inacmhainne in-athnuaite agus neamh-iontaise. Ba cheart do na comhreachtóirí an chaibidlíocht idirinstitiúideach a thabhairt chun críche a luaithe is féidir. Ní mór don Aontas feabhas a chur ar idirnaisc fuinnimh sa Mhargadh Aonair agus a eangacha a uasghrádú. Chuige sin, tá an Coimisiún ag obair ar shraith gníomhaíochtaí chun cabhrú leis na Ballstáit líonraí a leathnú agus a uasghrádú, rud a fhágfaidh go mbeidh siad oiriúnach don sciar méadaitheach d’fhoinsí in-athnuaite sa mheascán leictreachais. Ba cheart do na Ballstáit na rialacha simplithe a chur chun feidhme go pras lena gceadaítear dlús a chur le leathadh amach na heangaí. Tá na chéad torthaí ag teacht as an éagsúlú a fhágfaidh nach mbeifear spleách ar bhreosla núicléach na Rúise.
Leanann an tAontas air ag tabhairt tacaíocht d’iomaíochas fadtéarmach a thionscail fuinnimh in-athnuaite sa rás domhanda i dtreo tionscal glan-nialasachta. Faoin bpacáiste ‘Oiriúnach do 55’, neartaíodh an Ciste Nuálaíochta chun tacú le giniúint nuálach fuinnimh in-athnuaite in éineacht le teicneolaíochtaí agus próisis ísealcharbóin eile. Tá an Banc Hidrigine á thabhairt chun críche agus seolfaidh an Coimisiún an chéad cheant píolótach le haghaidh táirgeadh hidrigine inathnuaite san Eoraip i mí na Samhna. Is cloch mhíle nua a bheidh sna hiarrachtaí atá á ndéanamh againn chun dul i ngleic leis an ngéarchéim dhomhanda aeráide nuair a sheolfar an chéad sásra coigeartaithe carbóin ar theorainneacha ar domhan.
2.3. Bonn eacnamaíoch níos láidre agus níos inbhuanaithe a thógáil
Lean an tAontas air ag tógáil bonn eacnamaíoch níos iomaíche, níos ciorclaí agus níos athléimní atá oiriúnach don aistriú cóir glas agus don aistriú digiteach, agus leas á bhaint an tráth céanna as na deiseanna a bhaineann le trádáil agus infheistíocht oscailte agus atá fós cuimsitheach go sóisialta. Sa chomhthéacs sin, ní mór don Mhargadh Aonair tuilleadh a dhoimhniú agus ní mór dó leanúint á oiriúnú féin don timpeallacht atá ag athrú agus borradh a chur faoi iomaíochas agus táirgiúlacht inbhuanaithe fhadtéarmach an Aontais, agus comhtháthú agus cothrom na Féinne á gcaomhnú an tráth céanna. Sa Teachtaireacht ‘An Margadh Aonair ag 30’ 25 , rinne an Coimisiún athnuachan ar a thiomantas an Margadh Aonair a chur i gcrích i gcomhar le gach leibhéal rialachais agus leis na geallsealbhóirí uile, agus é ag díriú go sonrach ar rialacha an Mhargaidh Aonair atá ann cheana a fhorfheidhmiú agus ar bhacainní ar leibhéal na mBallstát a bhaint a d’fhéadfadh bac a chur ar infheistíocht, go háirithe i gcás seirbhísí. Chuige sin, tá Tuarascáil Ardleibhéil maidir le todhchaí an Mhargaidh Aonair á hullmhú ag Iar-Cheann rialtais na hIodáile, Enrico Letta, i gcomhar le hUachtaránachtaí na Comhairle agus leis an gCoimisiún, agus tá sí le cur faoi bhráid na Comhairle Eorpaí i mí an Mhárta 2024. Idir an dá linn, tá Clár an Mhargaidh Aonair agus comhghuaillíochtaí 26 tionsclaíocha ag cuidiú le naisc níos láidre agus níos éagsúla a thógáil idir gníomhaithe ábhartha i slabhraí luacha laistigh den Aontas agus lasmuigh de. I gcás éigeandálaí amach anseo, cuideoidh an Ionstraim Éigeandála don Mhargadh Aonair 27 le saorghluaiseacht earraí, seirbhísí agus daoine agus infhaighteacht earraí agus seirbhísí riachtanacha a chaomhnú, rud a rachaidh chun tairbhe do shaoránaigh agus do ghnólachtaí ar fud an Aontais.
Mar obair leantach ar an straitéis fhadtéarmach iomaíochais 28 , tá bearta breise á ndéanamh ag an gCoimisiún chun spreagthaí iomaíochas an Aontais a threisiú. Tógfaidh sé ar scéalta ratha, ar nós Fís Eorpach, chun nuálaíocht san Eoraip a fheabhsú. Tuairisceoidh an Coimisiún go bliantúil maidir le héabhlóid na bpríomhtháscairí feidhmíochta a leagtar amach sa straitéis seo, ar nós 3 % den OTI a infheistiú i dtaighde agus i bhforbairt, agus d’iarr sé ar iarCheann rialtais na hIodáile agus ar Uachtarán an Bhainc Ceannais Eorpaigh, Mario Draghi, tuarascáil a ullmhú maidir le todhchaí iomaíochas na hEorpa. Sna míonna amach romhainn, cuirfidh an Coimisiún tograí i láthair chun na ceanglais tuairiscithe le haghaidh cuideachtaí agus lucht riaracháin a chuíchóiriú agus a laghdú i réimsí téamacha glasa, digiteacha agus eacnamaíocha, agus é d’aidhm dheiridh aige ualaí tuairiscithe den sórt sin a laghdú 25 %, gan an bonn a bhaint de na cuspóirí beartais gaolmhara. Leis an bPacáiste Fóirithinte FBM a glacadh le déanaí, lena ndírítear ar an timpeallacht ghnó a fheabhsú ó thaobh íocaíochtaí, comhlíonadh cánach agus ualach rialála de, beidh sé níos éasca do FBManna a ngnó a bhunú agus a leathnú. I dteannta an phacáiste faoisimh do FBManna, ghlac an Coimisiún togra le haghaidh ‘Gnó san Eoraip: Creat le haghaidh Cánachas Ioncaim’ chun rialacha cánach a shimpliú agus chun costais chomhlíonta cánach a laghdú do ghrúpaí cuideachtaí san Aontas. Tá athchóirithe forleathana ar Aontas Custaim an Aontais Eorpaigh molta ag an gCoimisiún freisin chun aghaidh a thabhairt ar iomaíocht éagórach agus chun a chinntiú go gcomhlíonfar ardchaighdeáin sláinte, sábháilteachta agus chomhshaoil.
Tá an cogadh tar éis cur leis na rioscaí a bhí ann cheana dár slándáil eacnamaíoch. Tá sé d’aidhm ag Straitéis Slándála Eacnamaíoch na hEorpa 29 íoslaghdú a dhéanamh ar na rioscaí atá ann le haghaidh athléimneacht slabhraí soláthair agus bonneagar criticiúil chomh maith leis na rioscaí a bhaineann le slándáil teicneolaíochta nó sceitheadh teicneolaíochta, agus armú spleáchais i gcomhthéacs teannas geopholaitiúil méadaithe agus athruithe teicneolaíochta luathaithe. Díríonn an Straitéis ar an laghdú riosca, agus an tráth céanna a chinntiú go leanfaidh an tAontas air ag baint tairbhe as an oscailteacht eacnamaíoch, agus é ag obair i gcomhar le comhpháirtithe ar fud an domhain.
Leanann an tAontas air ag saothrú beartas trádála uaillmhianach agus láidir agus an tráth céanna á oiriúnú féin don éagobhsaíocht agus don ilroinnt gheopholaitiúil mhéadaithe agus don éigeandáil aeráide. Féachann an tAontas le cobhsaíocht sa trádáil idirnáisiúnta a bhaint amach trí thacú leis an gcóras riailbhunaithe agus trí iarrachtaí a stiúradh chun EDT a athchóiriú. Cothaíonn sé athléimneacht agus cruthaíonn sé deiseanna nua trína líonra comhaontuithe trádála a fhorbairt agus trí chomhpháirtíochtaí a dhoimhniú trí fhoirmeacha 30 solúbtha rannpháirtíochta le tríú tíortha, mar shampla na Comhairlí Trádála agus Teicneolaíochta leis an India agus leis na Stáit Aontaithe, tríd an gClub Amhábhar Criticiúil a fhorbairt freisin. Tá na huirlisí is gá chun déileáil níos fearr le rioscaí geopholaitiúla agus le hilroinnt curtha i bhfeidhm ag an Aontas agus leanann sé de na huirlisí sin a fhorbairt, agus chun rioscaí a d’fhéadfadh a bheith ann don tslándáil nó don ord poiblí a shainaithint, a mheasúnú agus a mhaolú ar bhealach níos fearr, agus oscailteacht an Aontais d’infheistíocht choigríche á cinntiú an tráth céanna. Áirítear orthu sin an Ionstraim Frithchomhéigin 31 , an Rialachán maidir le Rialú Dé-úsáide ar Onnmhairiú 32 , an Rialachán maidir le hInfheistíocht Dhíreach Eachtrach 33 ina measc an t-athbhreithniú a dhéanfar air amach anseo, agus an tionscnamh atá le teacht maidir le hinfheistíochtaí amach anseo.
Chun múnla sóisialta uathúil an Aontais a chaomhnú agus a chur chun cinn i gcomhthéacs an dá aistriú agus na geopholaitíochta suaití, lean an Coimisiún air ag baint amach phlean gníomhaíochta Cholún Eorpach na gCeart Sóisialta. Chun spriocanna fostaíochta, scileanna agus bochtaineachta 2030 a bhaint amach agus iomaíochas an Aontais a choinneáil, tá gá le hiarrachtaí breise chun aghaidh a thabhairt ar shaincheist na nganntanas saothair agus scileanna atá ag éirí níos práinní agus chun a chinntiú an tráth céanna go mbeidh an dá aistriú cothrom agus nach bhfágfar aon duine ar lár. Agus iad ag tógáil ar an gClár Oibre Scileanna don Eoraip, cothaíonn Plean Tionsclaíoch an Chomhaontaithe Ghlais agus an Gníomh um an Tionscal Glan-nialasachta cur chuige a thugann tús áite do scileanna. Seoladh gníomhaíochtaí nua chun borradh a chur faoin athsciliú agus faoin uas-sciliú, ar nós comhpháirtíochtaí nua scileanna le haghaidh foinsí in-athnuaite fuinnimh, teaschaidéil agus tionscail dianfhuinnimh. Tá Bliain Eorpach na Scileanna 34 ag cur dlús breise leis na hiarrachtaí sin. Cuirfidh an Coimisiún Bosca Uirlisí Déimeagrafaíochta i láthair sna seachtainí amach romhainn chun measúnú a dhéanamh ar an gcaoi ar féidir leis an Aontas a bhuntáiste iomaíoch a choinneáil. Is gá freisin an Eoraip a dhéanamh níos tarraingtí do dhaoine tréitheacha ó thríú tíortha: chuige sin, tá gá le céimeanna réamhghníomhacha chun cabhrú le fostóirí agus fostaithe teacht le chéile, agus le cur chuige comhpháirtíochta le príomhthíortha mar a leagtar amach sa Chomhaontú Nua maidir le hImirce agus Tearmann. Chun dul i ngleic leis na dúshláin i margadh an tsaothair a eascraíonn as ganntanas saothair agus scileanna nó as tionchar na hintleachta saorga, tá sé beartaithe ag an gCoimisiún agus ag Uachtaránacht na Beilge Cruinniú Mullaigh nua Comhpháirtíochta Sóisialta a thionól ag Val Duchesse sa chéad leath de 2024.
Ghníomhaigh an tAontas go cinntitheach chun aghaidh a thabhairt ar rioscaí eacnamaíocha agus ar spleáchais straitéiseacha trí chéimeanna a ghlacadh chun an riosca a mhaolú i bpríomhréimsí, ina measc na réimsí seo a leanas:
a)Amhábhair chriticiúla
Tá na hamhábhair fíor-riachtanach do shraith leathan earnálacha straitéiseacha, ina measc an tionscal aeráidneodrach, an tionscal digiteach, an sláinte, an earnáil aeraspáis agus an earnáil cosanta. Leis an Acht um Amhábhair Chriticiúla atá beartaithe 35 , beidh sraith chuimsitheach gníomhaíochtaí ag an Aontas chun feabhas a chur ar an rochtain atá aige ar sholáthar slán, éagsúlaithe, inacmhainne agus inbhuanaithe d’amhábhair chriticiúla. Sa réimse sin, oibreoidh na húdaráis phoiblí go dlúth leis an earnáil tionsclaíochta, mar shampla trí chomhpháirtíocht scileanna ar mhórscála maidir le hamhábhair chriticiúla agus trí fheabhas a chur ar acmhainní téarnaimh agus athchúrsála chun teorainn a chur leis an spleáchas ar allmhairí. Cuideoidh STEP freisin le maoiniú na n-amhábhar criticiúil is gá chun teicneolaíochtaí criticiúla a fhorbairt agus a mhonarú san Aontas. Thairis sin, tá an tAontas ag neartú a rannpháirtíochta domhanda le comhpháirtithe iontaofa, agus comhpháirtíochtaí comhthairbheacha á lorg aige le tíortha atá saibhir ó thaobh acmhainní agus le geilleagair atá i mbéal forbartha, cuir i gcás trí Chlub Amhábhar Criticiúil a bhunú chun slabhraí soláthair domhanda a neartú.
b)Leathsheoltóirí
Cuideoidh gníomhaíochtaí uaillmhianacha gasta maidir le leathsheoltóirí le ceannaireacht theicneolaíoch an Aontais a choinneáil agus acmhainneacht táirgeachta intíre a fhorbairt a thuilleadh. Leis an nGníomh Eorpach um Shliseanna 36 , cuirfidh infheistíocht atá dírithe ar bheartais, ar leibhéal an Aontais agus ar an leibhéal náisiúnta, le hacmhainneachtaí taighde, forbartha agus táirgthe leathsheoltóirí ar fud na hEorpa, rud a spreagfaidh infheistíocht phríobháideach fhadtéarmach. Tá státchabhair dar luach beagnach EUR 3.2 billiún formheasta ag an gCoimisiún cheana féin le haghaidh dhá thionscadal san Iodáil agus sa Fhrainc, rud a scaoil infheistíochtaí dar luach níos mó ná EUR 8 mbilliún. Leis an Tionscadal Tábhachtach ar mhaithe le Leas na hEorpa i gCoitinne i dteicneolaíochtaí na micrileictreonaice agus na cumarsáide a d’fhormheas an Coimisiún i mí an Mheithimh 2023, tugtar tacaíocht phoiblí dar luach EUR 8.1 billiún ó na Ballstáit, rud a bhfuil coinne leis go gcuirfidh sé EUR 13.7 billiún breise ar fáil d’infheistíochtaí príobháideacha. Ón uair a chuir an Coimisiún an togra le haghaidh Gníomh um Shliseanna i láthair i mí Feabhra 2022, tá fógartha ag roinnt cuideachtaí go ndéanfaidh siad infheistíochtaí i saoráidí monaraíochta a bhaineann le leathsheoltóirí dar luach thart ar EUR 100 billiún san iomlán. Cuideoidh sé sin le ceannasacht dhigiteach na hEorpa a chinntiú agus slabhraí soláthair domhanda a athchothromú. Tá an tAontas ag dul i gcomhpháirtíocht freisin le tíortha atá ar aon intinn leo maidir le leathsheoltóirí.
c)Teicneolaíochtaí glan-nialasacha
Chun dlús a chur le monarú teicneolaíochtaí glana san Aontas, mhol an Coimisiún 37 an Gníomh um an Tionscal Glan-nialasachta tar éis Plean Tionsclaíoch an Chomhaontaithe Ghlais. 38 . Tá sé d’aidhm aige dálaí níos fearr a chruthú chun tionscadail thionsclaíocha glan-nialasacha a chur ar bun san Eoraip ar bhealach níos tapúla agus infheistíochtaí a mhealladh. Tá sé d’aidhm ag an nGníomh feabhas a chur ar chumas monaraíochta glan-nialasach straitéiseach an Aontais chun gur féidir leis 40 % ar a laghad dá riachtanais imscartha a chomhlíonadh faoi 2030. Cumhdaítear leis an nGníomh saincheisteanna, ina measc ceadú, dearadh agus soláthar ceantála, nuálaíocht agus scileanna agus tugtar aghaidh go háirithe ar theicneolaíochtaí a chuirfidh go mór leis an dícharbónú. Agus Straitéis 2022 maidir le Fuinneamh Gréine á chomhlánú aige, beidh an Pacáiste Eorpach um Chumhacht Gaoithe a fógraíodh ag gabháil le cur chun feidhme an Ghnímh um an Tionscal Glan-nialasachta agus á réamh-mheas trí thacú le cuideachtaí san earnáil, mar shampla trí dhlús a chur leis an gceadú, trí fheabhas a chur ar na córais cheantála ar fud an Aontais, trí scileanna, trí rochtain ar mhaoiniú agus trí shlabhraí soláthair cobhsaí. Ar bhonn níos leithne, tá sraith tionscnamh curtha i láthair ag an gCoimisiún chun éifeachtúlacht acmhainní agus an geilleagar ciorclach a chur chun cinn i bpríomhshlabhraí luacha, ceallraí agus feithiclí san áireamh. Déanann an Coimisiún dlúthfhaireachán ar an tionchar atá ag cláir thacaíochta atá ann cheana agus a d’fhéadfadh a bheith ann amach anseo a chuireann tíortha eile i bhfeidhm ar mhargaí na hEorpa agus ar an iomaíochas. Gníomhaíonn sé go tapa chun aghaidh a thabhairt ar aon idirdhealú a d’fhéadfadh a bheith ann. Mar a d’iarr an Chomhairle Eorpach, tuairisceoidh an Coimisiún sna seachtainí amach romhainn ar thionchar Ghníomh um Laghdú Boilscithe na Stát Aontaithe ar infheistíocht san Eoraip agus ar éifeachtacht na mbeart a rinneadh mar fhreagairt air sin.
d)Sláinte
Agus leas á bhaint as na ceachtanna a foghlaimíodh ón bpaindéim, tá feabhas á chur ag an Aontas ar shlándáil an tsoláthair cógas agus ag cinntiú go mbeidh siad ar fáil d’othair beag beann ar an áit ina bhfuil cónaí orthu san Aontas. Leis an athchóiriú a moladh le déanaí 39 ar reachtaíocht Chógaisíochta an Aontais, tá sé beartaithe tacú le rochtain ar chógais leighis agus lena n-infhaighteacht agus borradh a chur faoi chumas nuálaíochta na hEorpa agus faoi tháirgeadh inbhuanaithe táirgí leighis inacmhainne san Eoraip. Téann tacaíocht airgeadais ón Aontas chun tairbhe don taighde agus don fhorbairt in earnálacha na sláinte agus na cógaisíochta agus do na frithbhearta leighis, go háirithe faoin gclár Fís Eorpach, ach freisin faoi chistí an Bheartais Chomhtháthaithe, RRF agus EU4Health. Tá bearta sonracha glactha ag Údarás an Choimisiúin um Ullmhacht agus Freagairt i dtaca le hÉigeandáil Sláinte (HERA) chun tacú le forbairt agus infhaighteacht na bhfrithbheart leighis is gá le haghaidh paindéimí agus géarchéimeanna sláinte eile atá ag teacht chun cinn, agus tá beagnach EUR 2 bhilliún leithdháilte. Ina theannta sin, tá an comhar méadaithe ag an Aontas le comhpháirtithe ar fud an domhain chun cosc agus ullmhacht paindéime a chothú, agus chun tacú le hathléimneacht na gcóras sláinte ar an leibhéal domhanda.
Cuirfidh STEP, in éineacht le Tionscnamh Biotech agus Biomanufacturing an Aontais atá beartaithe do 2024, tacaíocht bhreise ar fáil do tháirgeadh biteicneolaíochta, don tsláinte agus ar fud an gheilleagair. Ar deireadh, i mí Dheireadh Fómhair 2023, cuirfidh an Coimisiún gníomhaíochtaí breise i láthair chun a chuideoidh le cinnte a dhéanamh go mbeidh cógais leighis ar fáil i gcónaí agus chun ganntanais chriticiúla a chosc.
e)Digital transformation
Tá céimeanna suntasacha déanta ag an Aontas i dtreo geilleagar digiteach a thógáil ina gcuirtear chun cinn cearta agus prionsabail le haghaidh ré dhigiteach dhaonlárnach agus gné dhigiteach an Mhargaidh Aonair a thógáil freisin. Le Clár Beartais 2030 don Deacáid Dhigiteach 40 , tá creat láidir ag an Eoraip dá claochlú digiteach. Tá céimeanna cinntitheacha glactha aici chun a creat normatach a neartú. Le glacadh tapa an Gnímh um Shonraí 41 , an Gnímh um Margaí Digiteacha 42 agus an Gnímh um Sheirbhísí Digiteacha 43 , leag an Coimisiún síos na caighdeáin maidir le spás digiteach níos sábháilte agus níos oscailte d’úsáideoirí agus cothrom iomaíochta do chuideachtaí a bhíonn ag feidhmiú sa Mhargadh Aonair. A luaithe a ghlacfar é, bheadh an Gníomh um an Intleacht Shaorga (IS) 44 ina chéad chreat dlíthiúil cuimsitheach ar domhan maidir leis an intleacht shaorga lena gcuirfí ráillí cosanta rioscabhunaithe atá fabhrach don nuálaíocht agus córas rialachais ar fáil chun IS iontaofa a chur chun cinn. Tá rún daingean ag an Aontas leanúint dá rannpháirtíocht ghníomhach i bhfóraim idirnáisiúnta éagsúla agus dlús a chur léi, go háirithe Próiseas Hiroshima G7, agus forbairt agus glacadh IS iontaofa a chur chun cinn ar fud an domhain ar bhealach déthaobhach.
Chun cur lena cheannaireacht dhigiteach, ní mór don Aontas dlús a chur lena chuid infheistíochta i bpríomhtheicneolaíochtaí dhigiteacha. Measann an Coimisiún go bhfuil gá le hinfheistíochtaí suntasacha poiblí agus príobháideacha chun na spriocanna sa réimse sin a bhaint amach. Go háirithe, tá gá le hinfheistíochtaí san intleacht shaorga, sa chandam, sa néal agus in 5G, agus tá gá leo chun ceannaireacht an Aontais a chothú agus caighdeáin á bhforbairt do 6G agus níos faide i gcéin. Mar shampla, faoin bPlean Comhordaithe um an Intleacht Shaorga, is é is cuspóir dó infheistíocht phoiblí agus phríobháideach san inleacht shaorga a mhéadú de réir a chéile go EUR 20 billiún san iomlán in aghaidh na bliana go dtí 2030 (suas ó mheastachán de EUR 12.7 - 16 billiún in 2020) 45 . Ina theannta sin, beidh gá le EUR 174 billiún ar a laghad de chistiú carnach príobháideach agus poiblí don bhearna infheistíochta sa ghigighiotán agus sa nascacht 5G go dtí 2030 46 . Mar a cuireadh i dtábhacht sa chéad tuarascáil ón gCoimisiún maidir le Staid na Deacáide Digití, ní mór don Aontas teicneolaíochtaí digiteacha níos ceannasaí a fhorbairt tuilleadh, agus forbairt agus uas-scálú na n-éiceachóras nuathionscanta nuálach a chothú sna príomhréimsí 47 . Tá cur chuige níos straitéisí á ghlacadh ag an Aontas freisin maidir le geopholaitíocht na teicneolaíochta trína thaidhleoireacht dhigiteach agus trína chomhpháirtíochtaí le comhpháirtithe atá ar aon intinn leis, go háirithe trína chomhpháirtíochtaí digiteacha agus trí na Comhairlí Trádála agus Teicneolaíochta 48 . Le rialacha trádála digití, lena n-áirítear rialacha maidir le sreafaí sonraí, cuirfear borradh faoin bhfás eacnamaíoch trí oscailteacht a chothromú le cosaint ár luachanna agus ár rialála, agus cuirfear cur chuige an Aontais in iúl go hidirnáisiúnta chun rialacha domhanda a mhúnlú.
f)Bia
Tá bearta breise déanta ag an Aontas chun slándáil, inbhuanaitheacht agus athléimneacht an bhia a áirithiú ar fud an domhain sa ghearrthéarma agus sa mheántéarma araon. Tá méadú tagtha ar chostais táirgthe bia agus tá margaí talmhaíochta díchobhsaithe mar thoradh ar iarmhairtí an chogaidh, rud atá ag cur leis an mbrú ar tháirgiúlacht feirmeacha agus ar iascach de dheasca dhíghrádú an chomhshaoil agus an athraithe aeráide. Mar fhreagairt air sin, chuir an Coimisiún pacáiste 49 de thacaíocht airgeadais agus de bhearta géarchéime chun cinn chun tacú le feirmeoirí an Aontais agus chun athléimneacht chórais bia an Aontais a fheabhsú, lena n-áirítear gníomhachtú an tSásra Eorpaigh um Ullmhacht agus Freagairt i gcás Géarchéim Slándála Bia 50 . Beidh réitigh nádúr-bhunaithe agus dhúlra-bhunaithe ríthábhachtach don chomhrac i gcoinne an athraithe aeráide agus d’inbhuanaitheacht agus d’athléimneacht fhadtéarmach na hearnála talmhaíochta. Is é is aidhm don Straitéis ‘Ón bhFeirm go dtí an Forc’ agus na tionscnaimh éagsúla lena mbaineann dlús a chur leis an aistriú chuig córas bia inbhuanaithe, rud atá ina réamhriachtanas chun slándáil agus athléimneacht don bhia a áirithiú amach anseo. Mar shampla, leis an Rialachán atá beartaithe maidir le plandaí a fhaightear trí Theicnící Géanómaíocha Nua 51 áirithe, cuirfear le hinfhaighteacht cineálacha plandaí atá oiriúnaithe do dhálaí aeráide atá ag athrú agus a thugann torthaí cobhsaí, agus leis an Dlí maidir le Faireachán Ithreach atá beartaithe spreagfar feirmeoirí chun feabhas a chur ar cháilíocht na n-ithreacha agus ar cháilíocht an bhia a tháirgtear iontu. Seolfaidh an Coimisiún idirphlé straitéiseach freisin maidir le todhchaí thalmhaíocht an Aontais.
Rinne an Coimisiún a sheacht ndícheall onnmhairí talmhaíochta na hÚcráine a éascú, rud a chuireann leis an tslándáil bia ar fud an domhain. Idir mí na Bealtaine 2022 agus mí Lúnasa 2023 chuidigh na Lánaí Dlúthpháirtíochta idir an tAontas agus an Úcráin leis an Úcráin earraí talmhaíochta a onnmhairiú a chuimsíonn níos mó ná 53 milliún tona agus beagnach 42 milliún tona de tháirgí neamhthalmhaíochta, agus an tráth céanna bhíothas in ann earraí a bhí de dhíth ar an tír a allmhairiú. Tar éis don Rúis tarraingt siar go haontaobhach ó Thionscnamh Gráin na Mara Duibhe, is iad na Lánaí Dlúthpháirtíochta an líne tharrthála is tábhachtaí le haghaidh onnmhairí talmhaíochta na hÚcráine go fóill. Ina theannta sin, trí Fhreagairt Fhoireann na hEorpa ar Neamhshlándáil Dhomhanda an tSoláthair Bhia, déanann an tAontas infheistíocht sa dlúthpháirtíocht, sa táirgeadh inbhuanaithe agus sa trádáil agus é ag obair le chéile ar fhóraim iltaobhacha 52 .
g)Teicneolaíochtaí criticiúla
Mar chuid de Straitéis Eorpach um an tSlándáil Eacnamaíoch, tá liosta á bhunú de theicneolaíochtaí a bhféadfadh feidhmeanna dé-úsáide a bheith acu, ar teicneolaíochtaí iad atá ríthábhachtach don tslándáil eacnamaíoch. Déanfar measúnú ar na rioscaí a bhaineann le slándáil agus sceitheadh na dteicneolaíochtaí sin d’fhonn bearta maolaitheacha iomchuí a cheapadh. Bunaithe ar thionscnaimh amhail STEP, is iad an liosta agus na measúnuithe riosca coiteanna na chéad chéimeanna eile sa chur chuige nua maidir le slándáil eacnamaíoch an Aontais a chuireann ár n-iomaíochas chun cinn, a chosnaíonn ar rioscaí slándála eacnamaíche agus a oibríonn le tíortha a roinneann ár n-ábhair imní agus ár leasanna. Ina theannta sin, tá Faireachlann an Aontais Eorpaigh um Theicneolaíochtaí Criticiúla curtha ar bun ag an gCoimisiún chun faireachán agus anailís rialta a sholáthar ar theicneolaíochtaí criticiúla dé-úsáide, ar na bealaí a bhféadfaí iad a chur i bhfeidhm, ar na slabhraí luacha agus ar na bearnaí agus na spleáchais atá ann cheana don tionscal cosanta, don tionscal spáis agus do thionscail shibhialta ghaolmhara.
2.4. Infheistíocht phoiblí agus phríobháideach a chothú
Tá infheistíocht á héascú ag an Aontas i bpríomhréimsí chun clistí margaidh a shárú, infheistíocht phríobháideach a ghiaráil agus borradh a chur faoin nuálaíocht de réir mar a thagann luas ar an rás domhanda i dtreo astaíochtaí glan‑nialasacha. Leis an tSaoráid Téarnaimh agus Athléimneachta cuireadh borradh faoin téarnamh, rud a raibh géarghá leis, agus tá sí ag cuidiú leis an Aontas a chur ar bhealach an fháis inbhuanaithe trí athchóirithe agus infheistíochtaí uaillmhianacha a dhreasú. Sa bhreis ar an EUR 338 billiún de thacaíocht airgeadais neamh-inaisíoctha a chuirtear ar fáil leis an ionstraim, bhí os cionn EUR 292 billiún d’iasachtaí iarrtha ag na Ballstáit faoin 31 Lúnasa 2023 53 . Rannchuidíonn cláir de chuid an bheartais chomhtháthaithe le tosaíochtaí straitéiseacha, mar shampla, EUR 92 bhilliún atá ag dul do chuspóirí an aistrithe ghlais. Le Fís Eorpach, díreofar EUR 20.2 billiún ar thaighde agus ar fhorbairt na teicneolaíochta glaine; EUR 11.5 billiún don bhith-theicneolaíocht agus do chógais leighis; agus EUR 19.3 billiún do theicneolaíochtaí digiteacha. Ina theannta sin, cuidíonn InvestEU le hinfheistíochtaí príobháideacha a shlógadh le haghaidh phríomhthosaíochtaí beartais an Aontais, amhail an t-aistriú glas agus digiteach, an nuálaíocht, infheistíochtaí sóisialta agus scileanna mar aon le tacaíocht do FBManna. Mar gheall ar ghlacadh láidir InvestEU 54 , agus ós rud é gur mó an t-éileamh ná an soláthar, tá gá le treisiú buiséadach chun leanúint de thacaíocht a chur ar fáil sna blianta amach romhainn, mar a moladh faoi STEP. Leis an gCreat Sealadach Géarchéime agus Aistrithe maidir le Státchabhair, cuirtear ar a gcumas do na Ballstáit tacú leis an ngeilleagar trí thacaíocht agus infheistíochtaí ríthábhachtacha a bhfuil gá leo a cheadú chun an ghéarchéim a sheasamh agus teacht slán uaithi, chun imeacht ó bhreoslaí iontaise agus chun geilleagar glan-nialasach a fhorbairt. Go dtí an 20 Meán Fómhair 2023 tá cabhair dar luach thart ar EUR 743 bhilliún formheasta ag an gCoimisiún faoin gCreat Sealadach Géarchéime agus faoin gCreat Sealadach Géarchéime agus Aistrithe. Comhlánaítear iarrachtaí sin an Aontais leis an tacaíocht infheistíochta a thugtar do chomhpháirtithe an Aontais tríd an tionscnamh Global Gateway, chomh maith le hobair chomhpháirteach le comhpháirtithe G7 faoin gComhpháirtíocht um Bonneagar agus Infheistíocht Dhomhanda.
Léiríodh gur ionstraim sholúbtha é buiséad fadtéarmach an Aontais le haghaidh 2021-2027 le linn géarchéimeanna iomadúla. B’éigean úsáid fhorleathan a bhaint as ath-imscaradh agus athchlárú, sa bhreis ar na solúbthachtaí buiséadacha a bhí ann cheana, chun aghaidh a thabhairt ar dhúshláin nach raibh coinne leo. Leis na leasuithe tapa ar na Rialacháin maidir leis an mBeartas Comhtháthaithe (CARE, FAST-CARE, SAFE), cuireadh ar a gcumas do na Ballstáit infheistíochtaí a shlógadh le haghaidh tithíochta, cúram sláinte, seirbhísí aistriúcháin nó oiliúint do dhaoine a easáitíodh mar thoradh ar chogadh foghach na Rúise, agus aghaidh a thabhairt ar na hiarmhairtí atá aige sin ar dhaoine leochaileacha agus ar ghnólachtaí san Aontas. I measc na gcásanna eile inar úsáideadh ath-imlonnú chun freagairt do dhúshláin atá ag teacht chun cinn tá REPowerEU, an Clár um Nascacht Shlán agus an Gníomh Eorpach um Shliseanna.
Ós rud é gur baineadh amach an oiread agus is féidir maidir leis an gCreat Airgeadais Ilbhliantúil reatha tríd an ngníomhaíocht chuimsitheach ghasta a leagtar amach thuas, tá athbhreithniú meántéarmach spriocdhírithe molta ag an gCoimisiún atá teoranta don íosmhéid atá ríthábhachtach do thosaíochtaí beartais agus infheistíochta láithreacha an Aontais. Ar na príomhréimsí atá le hathneartú faoin athbhreithniú tá an tacaíocht fhadtéarmach don Úcráin, an imirce, comhpháirtíochtaí a neartú, chomh maith le hiomaíochas fadtéarmach an Aontais a chur chun cinn. 55 Mhol an Coimisiún an tionscnamh STEP 56 , rud a threiseodh ionstraimí an Aontais atá ann cheana (amhail InvestEU, an Ciste don Nuálaíocht, an Chomhairle Nuálaíochta Eorpach agus an Ciste Eorpach Cosanta) agus dhéanfadh ionstraimí eile (amhail na Cistí Comhtháthaithe) chun infheistíochtaí sa teicneolaíocht dhomhain, i dteicneolaíochtaí digiteacha agus glana agus sa bhith-theicneolaíocht a mhaoiniú san Aontas agus infheistíocht i ndaoine ar féidir leo na teicneolaíochtaí sin a fhorbairt agus a imlonnú. Is é an tionscnamh seo an chéad chéim i dtreo aghaidh a thabhairt ar an ngá méadaithe atá le hinfheistíochtaí poiblí san Aontas i dteicneolaíochtaí criticiúla den sórt sin, chun infheistíochtaí príobháideacha i bhfad níos mó a ghiaráil. Leis an méadú ar mhinicíocht teagmhas adhaimsire, amhail na dóiteáin, an triomach agus na tuilte a tharla san Eoraip i rith an tsamhraidh, cuirtear i dtábhacht freisin an gá atá le huirlisí coiscthe, ullmhachta, freagartha agus dlúthpháirtíochta an Aontais a threisiú, go háirithe Ciste Dlúthpháirtíochta an Aontais Eorpaigh.
Is tosaíocht phráinneach ag an bpointe cinniúnach seo do gheilleagar an Aontais Eorpaigh teacht ar chomhaontú maidir leis an athchóiriú ar an gcreat rialachais eacnamaíoch, le rátaí úis níos airde, rioscaí fioscacha méadaithe a bhaineann leis an aeráid, cogadh na Rúise i gcoinne na hÚcráine atá fós ar siúl agus an éagobhsaíocht gheopholaitiúil. Dá bhrí sin, tá sé ríthábhachtach cóimheasa fiachais a laghdú ar bhealach inbhuanaithe trí phleananna struchtúracha fioscacha atá indéanta agus inchreidte a úsáideann comhdhlúthú de réir a chéile agus athchóirithe agus infheistíochtaí lena gcothaítear an fás. Go deimhin, beidh gá le méadú suntasach marthanach ar an infheistíocht chun an t-aistriú glas agus an t-aistriú digiteach a dhéanamh. Cé go ndéanfaidh an earnáil phríobháideach an chuid is mé de, tá ról ríthábhachtach ag an infheistíocht phoiblí sa laghdú riosca le haghaidh fiontair nuálacha agus sa cheartú clistí margaidh. Is é is aidhm do na tograí ón gCoimisiún maidir le hathchóiriú ar chreat rialachais eacnamaíoch an Aontais Eorpaigh inbhuanaitheacht an fhiachais phoiblí a neartú agus fás inbhuanaithe agus cuimsitheach a chur chun cinn sna Ballstáit uile i gcomhréir le tosaíochtaí coiteanna. I bhfianaise dhul in éag an chlásail éalaithe ghinearálta ag deireadh na bliana seo, tá sé ríthábhachtach teacht ar chomhaontú go pras maidir leis an athchóiriú atá beartaithe chun freagairt go leordhóthanach do na dúshláin atá romhainn agus chun soiléireacht agus intuarthacht a chruthú don bheartas fioscach amach anseo.
Ós rud é nach mór go dtiocfaidh an chuid is mó den mhaoiniú le haghaidh phríomhthosaíochtaí an Aontais ón earnáil phríobháideach, tá sé ríthábhachtach timpeallacht ghnó atá fabhrach don infheistíocht a chruthú. Ní mór don timpeallacht rialála san Aontas cuidiú go héifeachtach le maoiniú príobháideach a bhailiú agus a dhíriú i dtreo gníomhaíochtaí eacnamaíocha a rannchuidíonn le dícharbónú, digitiú agus athléimneacht fheabhsaithe ár ngeilleagar. Chun an cistiú is gá don dá aistriú a shlógadh, is réamhchoinníollacha margaí caipitil doimhne agus comhtháthaithe, dul chun cinn maidir leis an Aontas Baincéireachta a chur i gcrích agus creat airgeadais inbhuanaithe éifeachtach. Mar obair leantach ar Phlean Gníomhaíochta Aontas na Margaí Caipitil 2020, tá na tograí reachtacha uile atá beartaithe curtha síos ag an gCoimisiún. Dá nglacfadh na comhreachtóirí gan mhoill an Gníomh um Liostú nár glacadh go fóill agus na tograí chun gnéithe áirithe den dlí dócmhainneachta corparáidí a chomhchuibhiú, chun nósanna imeachta coinneála cánach trasteorann a éascú agus chun éifeachtúlacht agus athléimneacht mhargaí imréitigh an Aontais a fheabhsú, chuideofaí le rochtain ar mhaoiniú a fheabhsú, foinsí cistiúcháin do chuideachtaí a éagsúlú, dul i ngleic le bacainní struchtúracha i seirbhísí airgeadais trasteorann agus aghaidh a thabhairt ar rioscaí do chobhsaíocht airgeadais an Aontais. Agus an creat airgeadais inbhuanaithe á fhorbairt aige, tá an Coimisiún fós freagrúil do riachtanais na n-úsáideoirí agus ghlac sé sraith beart agus tionscnamh chun an chastacht a laghdú, chun inúsáidteacht na rialacha a fheabhsú agus chun tacú le páirtithe leasmhara lena gcur chun feidhme. Rinne sé bearta freisin chun oibleagáidí tuairiscithe a chuíchóiriú chun an t-ualach riaracháin ar chuideachtaí a laghdú.
3.Conclúid
De dheasca chogadh foghach na Rúise i gcoinne na hÚcráine, nochtadh spleáchais agus leochaileachtaí straitéiseacha, lena n-áirítear trí chur isteach ar an slabhra soláthair. Tá céimeanna tábhachtacha glactha ag an Aontas chun aghaidh a thabhairt orthu sin i roinnt réimsí, lena n-áirítear cosaint, fuinneamh, bia, amhábhair chriticiúla, teicneolaíochtaí digiteacha agus sláinte. Tá dul chun cinn déanta ag an Aontas maidir lena iomaíochas a chur chun cinn, ag tógáil ar a shócmhainní, lena n-áirítear lucht saothair oilte, bonneagar maith, an nuálaíocht, teicneolaíocht, agus bonn láidir tionsclaíoch agus monaraíochta. Is iad an fás glas agus uirlisí digiteacha iontaofa neart an Aontais.
Mar sin féin, i bhfianaise aimhleasa, ní mór don Aontas an cúrsa a sheasamh agus geilleagar níos athléimní, níos iomaíche agus níos inbhuanaithe lena gcothaítear folláine na saoránach a dhéanamh de 57 . Tá gá le tuilleadh iarrachtaí chun Margadh Aonair níos nuálaí agus níos idirnasctha a thógáil, chun comhtháthú inmheánach a chaomhnú, agus chun comhghuaillíochtaí a chothú le raon leathan comhpháirtithe idirnáisiúnta. Ní mór dúinn leanúint den obair chun bonn eacnamaíoch agus tionsclaíoch na hEorpa a threisiú agus laghdú riosca a dhéanamh ina leith, agus a slándáil eacnamaíoch a chosaint an tráth céanna. Ní mór dúinn aghaidh a thabhairt ar spleáchais straitéiseacha agus rioscaí criticiúla le fuinneamh athnuaite, agus cothrom iomaíochta domhanda a chur chun cinn agus a fhorfheidhmiú go teanntásach, i bhfianaise mórshaobhadh eacnamaíoch. Ní mór dúinn a bheith ullamh d’iarrachtaí díreacha agus indíreacha araon an bonn a bhaint dár bpróisis dhaonlathacha. Braitheann an chobhsaíocht agus an athléimneacht freisin ar réitigh fhadtéarmacha a chur ar fáil maidir leis na dúshláin choiteanna atá os comhair shochaí na hEorpa sa lá atá inniu ann: tá an Comhshocrú Nua maidir le hImirce agus Tearmann – atá tacaithe le céimeanna oibríochtúla láithreacha atá le déanamh – ina bhunchloch chun freagraí marthanacha inchreidte a chur ar fáil nuair is gá dúinn gníomhú mar aon ní amháin.
Chun na céimeanna tábhachtacha sin a bhaint amach, tá solúbthacht léirithe ag buiséad an Aontais maidir le dul in oiriúint don timpeallacht atá ag athrú. Mar sin féin, tá pointe sroichte againn ina bhfuil géarghá le coigeartuithe spriocdhírithe má tá an creat airgeadais ilbhliantúil le leanúint de na cuspóirí is riachtanaí a bhaint amach, mar shampla, maidir leis an tacaíocht leanúnach airgeadais don Úcráin, don iomaíochas, maidir leis an imirce agus comhpháirtíochtaí lenár gcomharsana is gaire dúinn. Dá bhrí sin, iarrann an Coimisiún ar Pharlaimint na hEorpa agus ar an gComhairle teacht ar chomhaontú go pras maidir leis na tograí ábhartha.
Leis na dúshláin nua slándála, an méadú ar an mboilsciú agus na hinfheistíochtaí is gá chun an t-aistriú glas agus an t-aistriú digiteach a bhaint amach, cuirtear brú breise ar bhuiséid náisiúnta freisin. Cuireann sé sin i dtábhacht an gá atá le teacht ar chomhaontú go pras maidir leis an athchóiriú ar chreat rialachais eacnamaíoch an Aontais. Neartóidh sé sin inbhuanaitheacht an fhiachais phoiblí, agus cuirfidh sé fás inbhuanaithe agus cuimsitheach chun cinn, trí infheistíocht agus athchóirithe, agus tacóidh sé le leas agus le folláine na saoránach, go háirithe na saoránaigh is leochailí.
Mar gheall ar an réaltacht gheopholaitiúil nua, ní mór don Aontas a acmhainneacht a neartú chun leasanna straitéiseacha an Aontais a chosaint agus gníomhú mar sholáthraí slándála inchreidte dár saoránaigh agus dár gcomhpháirtithe, agus ar an gcaoi sin, rannchuideoidh sé leis an tslándáil dhomhanda. Ní mór don Aontas seasamh le chéile agus aghaidh á tabhairt aige ar dhúshláin nua slándála, agus an tráth céanna na naisc le tíortha comhpháirtíochta a dhoimhniú tuilleadh, chomh maith leis na tíortha sin a bhfuil na hábhair imní agus leasanna céanna acu maidir le saincheisteanna sonracha. Leis an méadú a dhéanfar ar an Aontas amach anseo, beidh deiseanna tábhachtacha ann dúinn agus cuirfear bonn ar fáil chun síocháin mharthanach a chothú san Eoraip.
JOIN (2023) 20 final.
EUCO 4/23.
EEAS (2022), Compás Straitéiseach maidir le Slándáil agus Cosaint.
Tascfhórsa idir an tAontas agus ECAT (2023), Tuarascáil Mheasúnaithe Deiridh.
JOIN (2022) 24 final.
Tascfhórsa um Sholáthar Comhpháirteach Cosanta agus an Gníomh um Thionscal Cosanta na hEorpa a Atreisiú trí Sholáthar comhoibríoch (EDIRPA), ar cheart dó teacht i bhfeidhm i mbliana le buiséad EUR 300 milliún.
Sa chomhthéacs sin, tá tionscadal curtha ar bun ag an nGníomhaireacht Eorpach um Chosaint le haghaidh soláthar comhoibríoch armlóin.
JOIN (2022) 48 final.
PE/52/2021/INIT.
JOIN(2022) 49 final.
10289/23
I dtuarascáil chomhpháirteach ón gCoimisiún agus ón Ionad Barr Feabhais um Chur i gCoinne Bagairtí Hibrideacha, déantar foráil den chéad uair maidir le creat cuimsitheach chun athléimneacht a mhéadú i gcoinne bagairtí hibrideacha: Bagairtí hibrideacha: Éiceachóras Cuimsitheach Athléimneachta, EUR 31104 EN, Oifig Foilseachán an Aontais Eorpaigh, Lucsamburg, 2023, ISBN 978-92-76-53292-7. Áirítear ar shruthanna oibre eile gníomhaíochtaí chun aghaidh a thabhairt ar an nasc idir an aeráid agus an tslándáil (JOIN (2023) 19 final) agus i réimse na slándála muirí (JOIN (2023) 8 final).
JOIN/2023/9 final.
PE/65/2022/REV/1.
JOIN/2022/4 final.
I dTuarascáil 2023 ar Staid an Aontais Fuinnimh, déanfar tuilleadh mionsaothraithe ar conas a d’fhreagair an tAontas don ghéarchéim fuinnimh nach bhfacthas a leithéid riamh roimhe seo agus déanfar machnamh ar na dúshláin atá fós ann.
Áiríodh orthu sin an Rialachán maidir le hÉileamh Gáis a Laghdú, an Rialachán chun aghaidh a thabhairt ar phraghsanna arda fuinnimh, an Rialachán Dlúthpháirtíochta, an Sásra Ceartúcháin Margaidh agus an Rialachán maidir le Ceadú.
COM/2022/230 final.
Tráth an fhoilsithe, tá 21 Bhallstát tar éis caibidlí REPowerEU a chur faoi bhráid an Choimisiúin go foirmiúil, caibidlí ar glacadh 4 díobh.
PE/48/2018/REV/1.
PE/24/2022/INIT.
Teachtaireacht ón gCoimisiún chuig an gComhairle, Treoir maidir le beartas fioscach do 2024, COM(2023) 141 final.
Cf. an comhaontú uaillmhianach maidir leis an Treoir athmhúnlaithe maidir le hÉifeachtúlacht Fuinnimh agus an Treoir athmhúnlaithe maidir le Feidhmíocht Fuinnimh Foirgneamh atá ar na bacáin.
COM(2023) 162 final.
https://single-market-economy.ec.europa.eu/industry/strategy/industrial-alliances_en
COM/2022/459 final.
COM/2023/168 final.
JOIN/2023/20 final.
San áireamh orthu sin freisin tá: bailchríoch a chur ar an gcaibidlíocht leis an tSile, leis an Nua-Shéalainn agus leis an gCéinia, agus caibidlíocht leis an Astráil, le Meicsiceo agus le Mercosur, chomh maith leis an India agus leis an Indinéis, a chur chun cinn.
COM/2021/775 final.
PE/54/2020/REV/2.
PE/72/2018/REV/1.
COM/2022/526 final.
COM/2023/160 final and COM(2023) 165 final.
COM/2022/46 final.
COM(2023) 161 final.
COM(2023) 62 final.
COM/2023/190 final.
PE/50/2022/REV/1.
COM/2022/68 final.
PE/30/2022/REV/1.
PE/17/2022/REV/1.
COM/2021/206 final.
Tatjana Evas, Maikki Sipinen, Martin Ulbrich, Alessandro Dalla Benetta, Maciej Sobolewski agus Daniel Nepelski, AI Watch: Estimating AI investments in the European Union, Oifig Foilseachán an Aontais Eorpaigh, Lucsamburg, 2022.
An Coimisiún Eorpach (2023), Riachtanais infheistíochta agus chistiúcháin le haghaidh spriocanna nascachta na Deacáide Digití.
COM(2023) 570.
I measc na gcéad spriocanna insoláthartha den Chomhairle Trádála agus Teicneolaíochta idir an tAontas agus na Stáit Aontaithe tá an Treochlár Comhpháirteach maidir le hIntleacht Shaorga Iontaofa agus bainistiú riosca.
COM/2022/133 final.
COM/2021/689 final.
COM/2023/411 final.
Tá EUR 18 billiún caite ag Foireann na hEorpa ar shlándáil bia go dtí 2024.
Go dtí seo, tá iarratais íocaíochta curtha isteach ag 20 Ballstát arb ionann iad agus EUR 188.22 billiún san iomlán.
Tá an t-ath-imlonnú ar an mbóthar ceart le 87 % nó EUR 22.75 billiún den ráthaíocht tosaigh atá ar conradh cheana féin le comhpháirtithe cur chun feidhme, rud a fhágann gurbh fhéidir breis agus EUR 320 billiún d’infheistíochtaí breise a shlógadh go dtí seo.
COM/2023/336 final.
COM/2023/335 final.
COM(2023) 376 final, Tuarascáil 2023 maidir leis an bhFadbhreathnaitheacht Straitéiseach: An inbhuanaitheacht agus an fholláine i gcroílár Uathriail Straitéiseach Oscailte na hEorpa.