AN COIMISIÚN EORPACH

An Bhruiséil,28.5.2020

COM(2020) 446 final

2020/0109(APP)

Togra le haghaidh

RIALACHÁN ÓN gCOMHAIRLE

lena leasaítear Rialachán ón gComhairle (AE, EURATOM) Uimh. 1311/2013 lena leagtar síos an creat airgeadais ilbhliantúil do na blianta 2014 go 2020

MEABHRÁN MÍNIÚCHÁIN

1.COMHTHÉACS AN TOGRA

Na riachtanais maoinithe le haghaidh infheistíochtaí práinneacha atá ag teacht chun cinn de dheasca na géarchéime, is riachtanais iad nach bhfacthas a leithéid riamh. Is gá, mar sin, freagairt chinntitheach urghnách ag leibhéal an Aontais. Caithfear tús áite a thabhairt do thacaíocht airgeadais i mblianta tosaigh an téarnaimh, blianta atá ríthábhachtach, lena n‑áirítear 2020. Cuideoidh sé sin an bearna a líonadh idir na bearta freagartha tosaigh agus an téarnamh ar bhonn fadtéarmach. Ní mór ollmhéid agus práinn na ndúshlán atá roimh an Aontas a chur san áireamh i bhfairsinge agus i ndearadh an idirghabhála. Tá an Coimisiún ag beartú leas a bhaint as acmhainneacht iomlán bhuiséad an Aontais chun an infheistíocht a shlógadh agus chun tús áite a thabhairt do thacaíocht airgeadais i míonna agus i mblianta tosaigh an téarnaimh, míonna agus blianta atá ríthábhachtach.

Le roinnt seachtainí, bhain an Coimisiún leas as solúbthacht iarmhair bhuiséad reatha an Aontais chun gach uile euro a bhí ar fáil a dhíriú ar shaolta a shábháil agus ar shlite beatha a chosaint. Léirigh na bearta sin cumhacht bhuiséad an Aontais chun tacaíocht thráthúil shubstaintiúil a sholáthar do na Ballstáit le linn géarchéime. Rinne na bearta sin solúbthacht bhuiséad an Aontais a ídiú freisin, áfach, rud a chuireann i dtábhacht go bhfuil géarghá le bearta nua a chur i bhfeidhm chun na chéad chéimeanna ríthábhachtacha eile den téarnamh a spreagadh.

Is gá, mar sin, athbhreithniú a dhéanamh ar Rialachán ón gComhairle (AE, Euratom) Uimh. 1311/2013 an 2 Nollaig 2013 1 lena leagtar síos an creat airgeadais ilbhliantúil do na blianta 2014 go 2020, chun tús‑ualú tacaíochta airgeadais a cheadú cheana in 2020 a luaithe agus is féidir. Baineann sé sin go háirithe le haon luathriachtanas chun soláthar na hIonstraime um Thacaíocht Sócmhainneachta faoin gCiste Eorpach le haghaidh Infheistíochtaí Straitéiseacha agus an ranníocaíocht ón Aontas le méadú caipitil an Chiste Eorpaigh Infheistíochta  2 a mhaoiniú, tús‑ualú caiteachais breise ar chomhtháthú faoi REACT‑EU 3 , agus acmhainní méadaithe airgeadais le haghaidh an Chiste Eorpaigh um Fhorbairt Inbhuanaithe 4 .

2.EILIMINTÍ DLÍ AN TOGRA

–an uasteorainn le leithreasaí faoi chomhair oibleagáidí i bhfo‑cheannteideal 1a ‘Iomaíochas don fhás agus do phoist’, méadaítear an uasteorainn sin go leibhéal EUR 25 681 mhilliún (i bpraghsanna 2011);

–an uasteorainn le leithreasaí faoi chomhair oibleagáidí i bhfo‑cheannteideal 1b ‘Comhtháthú eacnamaíoch, sóisialta agus críochach’, méadaítear an uasteorainn sin go leibhéal EUR 53 109 milliún (i bpraghsanna 2011);

–an uasteorainn le leithreasaí faoi chomhair oibleagáidí i gceannteideal 4 ‘An Eoraip Dhomhanda’, méadaítear an uasteorainn sin go EUR 9 665 mhilliún (i bpraghsanna 2011).

2020/0109 (APP)

Togra le haghaidh

RIALACHÁN ÓN gCOMHAIRLE

lena leasaítear Rialachán ón gComhairle (AE, EURATOM) Uimh. 1311/2013 lena leagtar síos an creat airgeadais ilbhliantúil do na blianta 2014 go 2020

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 312 de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na parlaimintí náisiúnta,

Ag féachaint don toiliú ó Pharlaimint na hEorpa 7 ,

Ag gníomhú dóibh i gcomhréir le nós imeachta reachtach speisialta,

De bharr an mhéid seo a leanas:

(1)Teastaíonn bearta urghnácha de dheasca ráig COVID‑19 agus de dheasca na géarchéime sláinte poiblí agus eacnamaíche a bhaineann leis an ráig. Na riachtanais maoinithe le haghaidh infheistíochtaí práinneacha atá ag teacht chun cinn de dheasca na géarchéime, is riachtanais iad nach bhfacthas a leithéid riamh. Is gá, mar sin, freagairt chinntitheach urghnách ag leibhéal an Aontais, agus caithfear tús áite a thabhairt do thacaíocht airgeadais i mblianta tosaigh an téarnaimh, blianta atá ríthábhachtach, lena n‑áirítear 2020.

(2)Is gá riachtanais airgeadais a chumhdach in 2020 trí bhíthin tionscnaimh nua a thugann aghaidh ar an téarnamh. Baineann sé sin leis an Ionstraim um Thacaíocht Sócmhainneachta agus an ranníocaíocht ón Aontas le méadú caipitil an Chiste Eorpaigh Infheistíochta 8 , atreisiú sprioc na hInfheistíochta le haghaidh fáis agus post faoi Chistí Struchtúracha agus Infheistíochta na hEorpa (REACT‑EU) 9 , agus an Ciste Eorpach um Fhorbairt Inbhuanaithe 10 .

(3)Is gá, mar sin, le haghaidh na bliana 2020, na huasteorainneacha le leithreasaí faoi chomhair oibleagáidí atá faoi fho‑cheannteideal 1a, faoi fho‑cheannteideal 1b agus faoi cheannteideal 4 a mhéadú. Ba cheart, dá bhrí sin, an Iarscríbhinn a ghabhann le Rialachán (AE, Euratom) Uimh. 1311/2013 a leasú dá réir.

(4)De bhun Airteagal 135(2) den Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach 11 , níor cheart feidhm a bheith ag an Rialachán seo maidir leis an Ríocht Aontaithe a mhéid a bhfuil tionchar aige ar oibleagáidí airgeadais na Ríochta Aontaithe i gcomparáid leis na hoibleagáidí sin ón dáta a tharraing an Ríocht Aontaithe siar as an Aontas.

TAR ÉIS AN RIALACHÁN SEO A GHLACADH:

Airteagal 1

Cuirtear an téacs a leagtar amach san Iarscríbhinn a ghabhann leis an Rialachán seo in ionad na hIarscríbhinne a ghabhann le Rialachán (AE, Euratom) Uimh. 1311/2013.

Airteagal 2

Tiocfaidh an Rialachán seo i bhfeidhm ar dháta a fhoilsithe in Iris Oifigiúil an Aontais Eorpaigh.

Ní mhéadóidh an Rialachán seo oibleagáidí airgeadais na Ríochta Aontaithe i gcomparáid leis na hoibleagáidí a bhí uirthi ar an dáta a tharraing sí siar as an Aontas.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil,

(1)    IO L347, 20.12.2013, lch. 884.

(2)    COM(2020)404

(3)    COM(2020)451

(4)    COM(2020)407

(5)    COM(2019)310 final an 15.05.2019

(6)    IO L 29, 31.1.2020, lch. 7.

(7)    IO C , , lch. .

(8)    COM(2020)404, IO C , , lch. .

(9)    COM(2020)451, IO C , , lch. .

(10)    COM(2020)407, IO C , , lch. .

(11)    IO L 29, 31.1.2020, lch. 7.

AN COIMISIÚN EORPACH

An Bhruiséil,28.5.2020

COM(2020) 446 final

IARSCRÍBHINN

a ghabhann leis an

Togra le haghaidh Rialachán ón gComhairle

lena leasaítear Rialachán ón gComhairle (AE, EURATOM) Uimh. 1311/2013 lena leagtar síos an creat airgeadais ilbhliantúil do na blianta 2014 go 2020






















TÁBLA - AN CREAT AIRGEADAIS ILBHLIANTÚIL 2014-2020

IARSCRÍBHINN

AN CREAT AIRGEADAIS ILBHLIANTÚIL (2014-2020)

(EUR milliún - i bpraghsanna 2011)
LEITHREASAÍ FAOI CHOMHAIR OIBLEAGÁIDÍ	2014	2015	2016	2017	2018	2019	2020	Iomlán  2014-2020
1. Fás Cliste agus Cuimsitheach	49 713	72 047	62 771	65 277	66 528	68 214	78 790	463 340
1a: Iomaíochas don fhás agus do phoist	15 605	16 321	16 726	17 693	18 490	19 700	25 681	130 216
1b: Comhtháthú eacnamaíoch, sóisialta agus críochach	34 108	55 726	46 045	47 584	48 038	48 514	53 109	333 124
2. Fás Inbhuanaithe: Acmhainní Nádúrtha	46 981	59 765	58 204	53 448	52 466	51 503	50 558	372 925
ar a bhfuil: Caiteachas a bhaineann leis an margadh agus íocaíochtaí díreacha	41 254	40 825	39 808	39 201	38 446	37 452	36 723	273 709
3. Slándáil agus saoránacht	1 637	2 269	2 306	2 289	2 312	2 391	2 469	15 673
4. An Eoraip Dhomhanda	7 854	8 083	8 281	8 375	8 553	8 764	9 665	59 575
5. Riarachán	8 218	8 385	8 589	8 807	9 007	9 206	9 417	61 629
ar a bhfuil: Caiteachas riaracháin na n-institiúidí	6 649	6 791	6 955	7 110	7 278	7 425	7 590	49.798
6. Cúiteamh	27	0	0	0	0	0	0	27
IOMLÁN NA LEITHREASAÍ FAOI CHOMHAIR OIBLEAGÁIDÍ	114 430	150 549	140 151	138 196	138 866	140 078	150 899	973 169
IOMLÁN NA LEITHREASAÍ FAOI CHOMHAIR ÍOCAÍOCHTA	127 932	130 003	118 374	112 322	134 376	142 285	144 274	909 566