Bileog Achoimre Feidhmiúcháin

Measúnú tionchair maidir le Togra do THREOIR Ó PHARLAIMINT NA hEORPA AGUS ÓN gCOMHAIRLE lena leasaítear Treoir 2011/65/AE maidir le srian ar shubstaintí áirithe guaiseacha a úsáid i dtrealamh leictreach agus leictreonach.

A. An gá atá le beart

Cén fáth? Cén fhadhb a bhfuiltear ag díriú uirthi?

Tugtar measúnú sa tuarascáil seo ar an modh is fearr chun díriú ar cheithre cinn d'fhadhbanna a shonraítear maidir le raon feidhme Threoir 2011/65/AE (RoHS 2): 1) an stop iomlán ar oibríochtaí tánaisteacha margaidh maidir le trealamh leictreach agus leictreonach a thagann faoi scáth RoHS 2 agus nach dtagann faoi scáth RoHS 1 (Treoir 2002/95/CE); 2) tionchar RoHS 2 maidir le páirteanna spártha do threalamh leictreach agus leictreonach áirithe nach dtagann faoi raon feidhme RoHS 1; 3) tionchar RoHS 2 maidir le stopadh píoporgáin a chur ar an margadh; 4) tionchar RoHS 2 maidir le saobhadh margaidh i ndáil le hinnealra soghluaiste neamhbhóthair cordacheangailte (ISNB).

Cad leis a bhfuiltear ag súil ón tionscnamh seo?

Táthar ag súil le tairbhe ó thaobh tionscail, tomhaltóirí agus sláinte: leanfaidh oibríochtaí ar an dara margadh agus oibríochtaí deisiúcháin tar éis an 22/07/2019 i ndáil leis an trealamh leictreach agus leictreonach ar fad atá ag teacht faoi scáth an raon feidhme den chéad uair, leanfar de phíoporgáin agus d'innealra soghluaiste neamhbhóthair cordacheangailte a chur ar mhargadh an Aontais gan saobhadh a tharraingt.

Cad é an breisluach atá le beart a dhéanamh ar leibhéal an Aontais?

Seiftiú ar fud an Aontais Eorpaigh amháin a réiteoidh na fadhbanna a bhfuil tionchar díreach acu ar mhargadh inmheánach an Aontais Eorpaigh.

B. Réitigh

Cad iad na roghanna beartais reachtacha agus neamhreachtacha a breithníodh? An bhfuil rogha thosaíochta ann nó nach bhfuil? Cén fáth?

Chomh maith leis an gcás bonnlíne, RoHS 2 a fhágáil gan athrú, rinneadh na roghanna a leanas a bhreithniú, i ndáil le:

1) oibríochtaí tánaisteacha margaidh a chur ar bun an athuair: Rogha 2 – i ndáil le feistí leighis agus le hionstraimí monatóireachta agus rialúcháin amháin; Rogha 3 (rogha tosaíochta) – maidir le trealamh leictreach agus leictreonach a thagann faoin raon feidhme den chéad uair.

2) páirteanna spártha: Rogha 2 (rogha tosaíochta) – soláthar pháirteanna spártha ionas gur féidir trealamh leictreach agus leictreonach réamh-RoHS 2 a dheisiú.

3) píoporgáin: Rogha 2 (rogha tosaíochta) – as an áireamh maidir leis an raon feidhme; Rogha 3 – treoir léirmhíniúcháin; Rogha 4 – díolúintí sealadacha ó RoHS 2.

4) ISNB cordacheangailte: Rogha 2 (rogha tosaíochta) –ISNB cordacheangailte a choinneáil as an áireamh freisin

Na páirtithe leasmhara éagsúla agus na bearta is rogha leo

Bhí na geallsealbhóirí (cumainn lucht tionscail agus Ballstáit) i bhfabhar na roghanna tosaíochta maidir leis na ceithre cinn d'fhadhbanna.

C. Tionchar na rogha tosaíochta

Cad iad na buntáistí a ghabhann leis an rogha tosaíochta?

Beidh buntáiste ó thaobh cúrsaí eacnamaíochta (deiseanna margaidh breise), sóisialta (teacht níos mó ar feistí leighis ag ospidéil de chuid an Aontais mar shampla, sábháil níos mó ná EUR 170 milliún, ré feidhme níos faide ag trealamh leictreach agus leictreonach) agus comhshaoil (cosc dramhaíola) ag na forálacha maidir leis an margadh tánaisteach agus páirteanna spártha. Seachnófar cailleadh postanna agus costais breise gan chúis mhaith leo trí phíoporgáin agus ISNB cordacheangailte a eisiamh ó RoHS. Maolófar an tualach riaracháin trí na roghanna tosaíochta.

Cad iad na costais a ghabhann leis an rogha tosaíochta?

Ní bheidh aon tionchar diúltach ó thaobh cúrsaí eacnamaíochta, sóisialta nó comhshaoil ag an bhforáil maidir leis an margadh tánaisteach agus soláthar páirteanna spártha a chur ar bun in athuair nó is tionchar neamhbhríoch é má bhíonn. Meastar nach mbeidh aon tionchar diúltach ó thaobh cúrsaí eacnamaíochta, sóisialta nó comhshaoil agus sláinte ag píoporgáin agus ISNB cordacheangailte a choinneáil as an áireamh maidir le raon feidhme RoHS nó gur tionchar neamhbhríoch é má bhíonn.

Cén difear a dhéanfar do ghnólachtaí, do FBManna agus do mhicrifhiontair?

Tarlóidh tionchar dearfach d'oibritheoirí margaidh sna hearnálacha ábhartha, FBManna san áireamh.

An imreofar tionchar suntasach ar bhuiséid náisiúnta agus ar údaráis riaracháin náisiúnta?

Ní gá do na Ballstáit aon ní a dhéanamh seachas an téacs dlí a thrasuí. Meastar go dtarlóidh simpliú maidir le faireachas an mhargaidh mar gheall ar an tionscnamh.

An mbeidh aon tionchar suntasach eile i gceist?

Ní bheidh

D. Iarobair

Cathain a dhéanfar athbhreithniú ar an mbeartas?

Déanfaidh an Coimisiún athbhreithniú ginearálta ar RoHS 2 faoin 22/07/2021.