22.11.2016   

GA

Iris Oifigiúil an Aontais Eorpaigh

3

1.

Ar an 30 Eanáir 2013, chuir an Coimisiún togra faoi bhráid na Comhairle le haghaidh Rialachán ó Pharlaimint na hEorpa agus ón gComhairle lena n-aisghairtear Rialachán (CEE) Uimh. 1192/69 ón gComhairle maidir le comhrialacha chun cuntais na ngnóthas iarnróid a normalú (1).

2.

Cuireadh an togra seo i láthair mar chuid den Cheathrú Pacáiste Iarnróid, mar a thugtar air, in éineacht le cúig thogra eile. Cuireadh na tograí in dhá ghrúpa le haghaidh na n-idirbheartaíochtaí, colún teicniúil agus colún margaidh. Tá an togra seo mar chuid den cholún margaidh.

3.

Ghlac Coiste Eacnamaíoch agus Sóisialta na hEorpa a thuairim maidir leis an togra ar an 10 Iúil 2013. Ghlac Coiste na Réigiún a thuairim ar an 8 Deireadh Fómhair 2013.

4.

Ar an 26 Feabhra 2014, ghlac Parlaimint na hEorpa a tuairim ar an gcéad léamh.

5.

Ar an 3 Nollaig 2014, tháinig an Chomhairle (Iompar, Teileachumarsáid agus Fuinneamh) ar chomhaontú (an “cur chuige ginearálta”) (2) maidir leis an togra lena n-aisghairtear Rialachán 1192/69.

6.

Ar an 19 Aibreán 2016, thángthas ar chomhaontú le Parlaimint na hEorpa maidir le téacs comhréitigh.

7.

Ar an 20 Meán Fómhair 2016, tháinig an Chomhairle ar chomhaontú polaitiúil (3) maidir leis an téacs comhréitigh.

8.

Agus na comhaontuithe thuas á gcur san áireamh aici agus tar éis an athbhreithnithe ó thaobh dlí agus teanga, ghlac an Chomhairle a seasamh ar an gcéad léamh ar an 17 Deireadh Fómhair 2016, i gcomhréir leis an ngnáthnós imeachta reachtach a leagtar síos in Airteagal 294 den Chonradh ar Fheidhmiú an Aontais Eorpaigh.

9.

Is é is cuspóir aonair don togra rialachán atá as dáta a aisghairm, ar rialachán é a glacadh nuair a chomhlíon eagraíochtaí a chuireann seirbhísí iarnróid ar fáil cúraimí áirithe atá ar an earnáil phoiblí. Cuireadh creat ar fáil leis an rialachán do chúiteamh ar na costais agus ar na tairbhí a eascraíonn as freagrachtaí den chineál sin.

10.

Measann an Chomhairle nach bhfuil Rialachán (CEE) 1192/69 comhoiriúnach le heagraíocht nua-aimseartha na hearnála iarnróid níos mó. Mar sin féin, is eol don Chomhairle go bhfuil an Rialachán fós á úsáid, go háirithe i gcás cúiteamh ar chostais a bhaineann le saoráidí crosairí comhréidh. Is ceart mar sin idirthréimhse a bheith ann chun go dtabharfar cúiteamh ar na costais a bhaineann le crosaire comhréidh le go bhféadfaí aistriú go réidh chuig an gcóras nua.

11.

Léirítear leis an seasamh ón gComhairle ar an gcéad léamh an comhréiteach ar thángthas air idir an Chomhairle agus Parlaimint na hEorpa, agus tacaíocht á fáil acu ón gCoimisiún.

12.

Deimhnítear an comhréiteach sin le litir ó Chathaoirleach an Choiste um Iompar agus um Thurasóireacht de chuid Pharlaimint na hEorpa, ar litir í a seoladh chuig Cathaoirleach Choiste na mBuanionadaithe (Cuid 1) ar an 13 Iúil 2016.

13.

Cuirtear an togra ón gCoimisiún agus na leasuithe a mhol Parlaimint na hEorpa ar an gcéad léamh san áireamh ina n-iomláine leis an seasamh ón gComhairle. Creideann an Chomhairle gur pacáiste cothrom é an seasamh seo aici ar an gcéad léamh.