MEABHRÁN MÍNIÚCHÁIN

1.           COMHTHÉACS AN TOGRA

Forais agus cuspóirí an togra

Baineann an togra seo leis an sásra frith-imchéimniúcháin dá bhforáiltear sa Chomhaontú Comhlachais AE-an tSeoirsia a ionchorprú i ndlí an Aontais Eorpaigh.

Comhthéacs ginearálta

Tá sásra frith-imchéimniúcháin, mar a thugtar air, sa Chomhaontú Comhlachais leis an tSeoirsia áirítear lena bhforáiltear gur féidir an ráta dleachta custaim MFN a thabhairt isteach arís i gcás ina sáraíonn earraí talmhaíochta áirithe ón tSeoirsia tairseach áirithe gan údar maith leis an áit tionscnaimh atá acu go díreach.

Is gá rialachán cur chun feidhme ó Pharlaimint na hEorpa agus ón gComhairle chun an ionstraim riachtanach a chur i ndlíchóras inmheánach an Aontais Eorpaigh le bheith in ann an sásra frith-imchéimniúcháin a chur i bhfeidhm.

2.           TORTHAÍ COMHAIRLIÚCHÁN LE PÁIRTITHE LEASMHARA AGUS MEASÚNUITHE TIONCHAIR

Tá an togra le haghaidh Rialachán cur chun feidhme díorthaithe go díreach ó théacs an Chomhaontaithe a caibidlíodh leis an tSeoirsia. Dá bharr sin, níl gá le comhairliúchán ar leith le páirtithe leasmhara ná le haon mheasúnú tionchair.

3.           EILIMINTÍ DLÍ AN TOGRA

Achoimre ar an ngníomhaíocht atá beartaithe

Is é atá sa togra le haghaidh Rialachán ó Pharlaimint na hEorpa agus ón gComhairle a ghabhann leis seo ionstraim dlí chun sásra frith-imchéimniúcháin an Chomhaontaithe, a tugadh chun críche leis an tSeoirsia, a chur chun feidhme.

Bunús dlí

Airteagal 207(2) den Chonradh ar Fheidhmiú an Aontais Eorpaigh.

2015/0080 (COD)

Togra le haghaidh

RIALACHÁN Ó PHARLAIMINT NA hEORPA AGUS ÓN gCOMHAIRLE

lena gcuirtear chun feidhme an sásra frith-imchéimniúcháin lena ndéantar foráil maidir le fabhair taraife an Chomhaontaithe Comhlachais idir an tAontas Eorpach agus an Comhphobal Eorpach do Fhuinneamh Adamhach agus a gcuid Ballstát, de pháirt amháin, agus an tSeoirsia, den pháirt eile, a chur ar fionraí go sealadach.

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 207(2) de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na parlaimintí náisiúnta,

Ag gníomhú i gcomhréir leis an ngnáthnós imeachta reachtach[1],

De bharr an méid seo a leanas:

(1)       Ar an 10 Bealtaine 2010, thug an Chomhairle údarás don Choimisiún caibidlíochtaí a thosú leis an tSeoirsia chun comhaontú nua idir an tAontas agus an tSeoirsia a thabhairt chun críche.

(2)       Tugadh na caibidlíochtaí sin chun críche agus síníodh an Comhaontú Comhlachais idir an tAontas Eorpach agus an Comhphobal Eorpach do Fhuinneamh Adamhach, de pháirt amháin, agus an tSeoirsia, den pháirt eile[2], ('an Comhaontú') an 27 Meitheamh 2014 agus cuireadh i bhfeidhm é go sealadach ón 1 Meán Fómhair 2014 i leith.

(3)       Is gá na nósanna imeachta a leagan amach le go ráthófar cur i bhfeidhm éifeachtach an tsásra frith-imchéimniúcháin chun fabhair taraife atá sa Chomhaontú a chur ar fionraí go sealadach.

(4)       Ba cheart go bhféadfaí na dleachtanna custaim fabhracha a chur ar fionraí ar feadh uastréimhse sé mhí nuair a shroicheann allmhairiú táirgí talmhaíochta áirithe agus táirgí talmhaíochta próiseáilte áirithe na méideanna atá sainithe do na hallmhairí bliantúla. 

(5)       Ar chúiseanna trédhearcachta, ba cheart don Choimisiún tuarascáil bhliantúil a chur faoi bhráid Pharlaimint na hEorpa agus na Comhairle maidir le cur chun feidhme an Chomhaontaithe agus maidir le cur i bhfeidhm an tsásra frith-imchéimniúcháin.

(6)       Maidir le cur chun feidhme an tsásra frith-imchéimniúcháin chun fabhair taraife a chur ar fionraí go sealadach, dá bhforáiltear sa Chomhaontú, ní mór coinníollacha aonfhoirmeacha a bheith ag gabháil leis. Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle[3].

(7)       Ba cheart an nós imeachta comhairleach a úsáid chun gníomhartha cur chun feidhme a ghlacadh i bhfianaise gur gá na gníomhartha sin a cur chun feidhme go tapa a luaithe is a shroichtear an tairseach ábhartha do na catagóirí táirgí atá liostaithe in Iarscríbhinn II-C a ghabhann leis an gComhaontú toisc nach bhfuil ach tréimhse cur i bhfeidhm an-teoranta acu.

(8)       Chun tionchar diúltach ar mhargadh an Aontais mar thoradh ar mhéadú ar allmhairí a chosc, ba cheart don Choimisiún gníomhartha cur chun feidhme atá infheidhme láithreach a ghlacadh i gcásanna a bhfuil údar cuí leo a bhaineann leis na taraifí fabhracha faoin sásra frith-imchéimniúcháin dá bhforáiltear sa Chomhaontú a chur ar fionraí go sealadach, más gá ar mhórchúiseanna práinne.

TAR ÉIS AN RIALACHÁN SEO A GHLACADH:

Airteagal 1

Ábhar agus raon feidhme

1.           Sa Rialachán seo leagtar síos forálacha maidir le chur chun feidhme an tsásra frith-imchéimniúcháin lena bhforáiltear do fhabhair taraife atá sa Chomhaontú Comhlachais idir an tAontas Eorpach agus an Comhphobal Eorpach do Fhuinneamh Adamhach agus a mBallstáit, de pháirt amháin, agus an tSeoirsia, den pháirt eile, a chur ar fionraí go sealadach.

2.           Tá feidhm ag an Rialachán seo maidir le táirgí de thionscnamh na Seoirsia.

Airteagal 2

Sásra frith-imchéimniúcháin do tháirgí talmhaíochta áirithe agus táirgí talmhaíochta próiseáilte áirithe

1.           Tá méid bliantúil áirithe allmhairí socraithe d'allmhairí táirgí atá liostaithe in Iarscríbhinn II-C a ghabhann leis an gComhaontú, atá faoi réir an tsásra frith-imchéimniúcháin atá leagtha amach in Airteagal 27 den Chomhaontú. Ar mhórfhorais práinne a bhfuil údar cuí leo a bhaineann le méid allmhairí de chatagóir amháin táirgí nó níos mó a shroicheann an méid atá sonraithe in Iarscríbhinn II-C a ghabhann leis an gComhaontú, in aon bhliain ar leith a thosaíonn ar an 1 Eanáir, agus mura bhfuil údar maith tugtha ina leith ag an tSeoirsia, glacfaidh an Coimisiún gníomh cur chun feidhme is infheidhme láithreach i gcomhréir leis an nós imeachta dá dtagraítear in Airteagal 4(2) den Rialachán seo. Féadfaidh an Coimisiún a chinneadh an dleacht fhabhrach is infheidhme ar an táirge/na táirgí lena mbaineann a chur ar fionraí go sealadach nó a chinneadh nach bhfuil an fionraí sin iomchuí.

2.           Beidh an fionraí sealadach ar an dleacht fhabhrach infheidhme ar feadh uastréimhse sé mhí ón dáta a fhoilsítear an cinneadh maidir leis an dleacht fhabhrach a chur ar fionraí. Sula dtéann an tréimhse sé mhí sin in éag agus ar mhórfhorais phráinne a bhfuil údar cuí leo a bhaineann le dleachtanna fabhracha a chur ar fionraí, féadfaidh an Coimisiún gníomh cur chun feidhme is infheidhme láithreach a ghlacadh i gcomhréir leis an nós imeachta dá dtagraítear in Airteagal 4(2) den Rialachán seo chun deireadh a chur leis an bhfionraí sealadach, má tá sé sásta gur de thoradh athrú i leibhéal táirgeachta agus acmhainn onnmhairiúcháin na Seoirsia do na táirgí lena mbaineann an méid den chatagóir ábhartha táirgí a allmhairítear sa bhreis ar an méid dá dtagraítear in Iarscríbhinn II-C a ghabhann leis an gComhaontú.

Airteagal 3

Tuarascáil

1.           Déanfaidh an Coimisiún tuarascáil bhliantúil ar chur i bhfeidhm, cur chun feidhme agus comhlíonadh oibleagáidí atá leagtha síos i dTeideal IV den Chomhaontú agus an Rialacháin, a chur faoi bhráid Pharlaimint na hEorpa agus na Comhairle.

2.           Déanfar achoimre ar an staidreamh agus ar na hathruithe ar an trádáil leis an tSeoirsia a leagan amach sa tuarascáil freisin.

3.           Féadfaidh Parlaimint na hEorpa, laistigh de mhí amháin ó thaisceadh thuarascáil an Choimisiúin, a iarraidh ar an gCoimisiún teacht chuig cruinniú ad hoc de choiste freagrach na Parlaiminte chun aon saincheisteanna a bhaineann le cur chun feidhme an Rialacháin seo a chur i láthair agus a mhíniú.

4.           Tráth nach déanaí ná trí mhí tar éis a thuarascáil a chur faoi bhráid Pharlaimint na hEorpa agus na Comhairle, déanfaidh an Coimisiún í a phoibliú.

Airteagal 4

An nós imeachta coiste

1.           Déanfaidh an Coiste um Chomheagrú na Margaí Talmhaíochta, a bunaíodh le hAirteagal 229(1) de Rialachán (AE) Uimh. 1308/2013 cúnamh a thabhairt don Choimisiún, agus, i dtaca le táirgí talmhaíochta próiseáilte, déanfaidh an Coiste maidir le ceisteanna cothrománacha a bhaineann le trádáil i dtáirgí talmhaíochta próiseáilte nach bhfuil liostaithe in Iarscríbhinn I a bunaíodh le hAirteagal 44(1) de Rialachán (AE) Uimh. 510/2014[4], cúnamh a thabhairt don Choimisiún. Coistí de réir bhrí Rialachán (AE) Uimh. 182/2011 a bheidh sna coistí sin.

2.           I gcás ina ndéantar tagairt don mhír seo, beidh feidhm ag Airteagal 8 de Rialachán (AE) Uimh. 182/2011, i dteannta Airteagal 4 de.

Airteagal 5

Teacht i bhfeidhm

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh sé i bhfeidhm maidir le hallmhairí ón tSeoirsia ó dháta chur i bhfeidhm an Chomhaontaithe.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil,

Thar ceann Pharlaimint na hEorpa               Thar ceann na Comhairle

An tUachtarán                                               An tUachtarán

[1]              

[2]               Cinneadh 2014/494/AE ón gComhairle an 16 Meitheamh 2014 maidir le síniú, thar ceann an Aontais Eorpaigh, agus cur i bhfeidhm sealadach an Chomhaontaithe Chomhlachais idir an tAontas Eorpach agus an Comhphobal Eorpach do Fhuinneamh Adamhach agus a mBallstáit, de pháirt amháin, agus an tSeoirsia, den pháirt eile (IO L 261, 30.8.2014, lch. 4).

[3]               Rialachán (AE) Uimh. 182/2011 ó Pharlaimint na hEorpa agus ón gComhairle an 16 Feabhra 2011 lena leagtar síos na rialacha agus na prionsabail ghinearálta a bhaineann leis na sásraí maidir le rialú ag na Ballstáit ar fheidhmiú cumhachtaí cur chun feidhme ag an gCoimisiún (IO L 55, 28.2.2011, lch. 13).

[4]               Rialachán (AE) Uimh. 510/2014 ó Pharlaimint na hEorpa agus ón gComhairle an 16 Aibreán 2014 lena leagtar síos na socruithe trádála is infheidhme maidir le hearraí áirithe ar toradh ar phróiseáil táirgí talmhaíochta iad agus lena n-aisghairtear Rialachán (CE) Uimh. 1216/2009 ón gComhairle agus Rialachán (CE) Uimh. 614/2009 ón gComhairle (IO L 150, 20.5.2014, lch. 1).