MEABHRÁN MÍNIÚCHÁIN

1.           COMHTHÉACS AN TOGRA

Ar an 17 Iúil 2014 tugadh na hidirbheartaíochtaí i gcrích le hEacuadór maidir lena aontachas leis an gComhaontú Trádála a tugadh i gcrích idir an tAontas Eorpach agus an Cholóim/Peiriú. Mar thoradh ar na hidirbheartaíochtaí sin, inisilíodh Prótacal Aontachais Eacuadór leis an gComhaontú (dá ngairtear "An Prótacal Aontachais" anseo feasta) ar an […].

Chun suaitheadh trádála gan ghá a sheachaint fad agus atá na nósanna imeachta chun an Prótacal Aontachais á bhformheas agus á gcur i bhfeidhm, is gá a áirithiú nach méadófar na dleachtanna custaim is infheidhme ar dháta inisilithe an Phrótacail Aontachais agus nach gcuirfear dleachtanna custaim nua i bhfeidhm ar tháirgí de thionscnamh Eacuadór. Chuige sin, déantar foráil sa Rialachán atá beartaithe maidir le leibhéil na rátaí dleachta a choinneáil ag na leibhéil a bhí infheidhme maidir le hEacuadór ar dháta inisilithe an Phrótacail Aontachais.

Beidh feidhm ag an Rialachán seo amhail ón 1 Eanáir 2015 agus go dtí sé mhí tar éis don Phrótacal Aontachais teacht i bhfeidhm (nó, más iomchuí, go dtí go gcuirtear i bhfeidhm go sealadach é), nó go dtí an 31 Nollaig 2016, cibé acu is túisce a tharlóidh. Tá an fad ama seo riachtanach le go mbeidh a ndóthain ama ann na nósanna imeachta inmheánacha ar fad is gá a dhéanamh san Aontas Eorpach, ach in Eacuadór freisin, chun an Prótacal Aontachais a chur i bhfeidhm. D'fhéadfaí tuilleadh moilleanna a bheith ann i ngeall ar an ngá dul i gcomhairle leis an gColóim agus Peiriú maidir leis an bPrótacal Aontachais, agus an gá go ndéanfaidís formheas air, sula ndéanfaidh an Coimisiún Cinneadh faoin togra le haghaidh Treoracha ón gComhairle maidir leis an síniú agus cur i bhfeidhm sealadach agus maidir leis an bPrótacal Aontachais a chur i gcrích. Meastar go bhfuil gá leis an bhforluí féideartha sé mhí idir an Rialachán seo agus cur i bhfeidhm an Phrótacail Aontachais le go mbeidh oibreoirí eacnamaíocha in ann dul i dtaithí ar na nósanna imeachta custaim nua.

2.           TORTHAÍ AN CHOMHAIRLIÚCHÁIN LEIS NA PÁIRTITHE LEASMHARA AGUS NA MEASÚNUITHE TIONCHAIR

Neamhbhainteach.

3.           EILIMINTÍ DLÍ AN TOGRA

Is é Airteagal 207(2) den Chonradh ar Fheidhmiú an Aontais Eorpaigh bunús dlí an togra.

4.           IMPLEACHT BHUISÉADACH

Coinnítear na socruithe reatha maidir le rochtain ar an margadh faoin Rialachán atá beartaithe agus sa mhéid sin níl aon impleacht airgeadais bhreise aige ar bhuiséad an Aontais Eorpaigh. Mura gcuirfí i bhfeidhm é, áfach, d'fhéadfadh méadú teacht ar na fáltais chustaim a bhaileofaí.

Tá sé deacair méid na bhfáltas custaim seo a bhaileofaí a thuar, ach i gcás ar bith bheadh siad cuibheasach beag. Is thart faoi €215 milliún (bunaithe ar fhigiúirí trádála 2013) an méid a shábháltar ar dhleachtanna de thoradh ar an gcóras rochtana ar an margadh atá ag Eacuadór faoi láthair, córas a rachaidh in éag an 1 Eanáir 2015. Tá onnmhairí Eacuadór chuig AE thar a bheith comhchruinnithe agus baineann 95% den mhéid sin a shábháltar le honnmhairí 5 ghrúpa táirgí, go bunúsach, ar a ngearrtar meándleacht chustaim 16%. Dá bhrí sin, dá gcuirfí dleachtanna erga omnes na dtáirgí sin i bhfeidhm, laghdófaí onnmhairiú na dtáirgí sin chuig AE go mór, rud a laghdódh an tionchar iarbhír ar bhuiséad AE tuilleadh.

2014/0287 (COD)

Togra le haghaidh

RIALACHÁN Ó PHARLAIMINT NA hEORPA AGUS ÓN gCOMHAIRLE

maidir le cóir tharaife d'earraí de thionscnamh Eacuadór

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 207(2) de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na parlaimintí náisiúnta,

Ag gníomhú dóibh i gcomhréir leis an ngnáthnós imeachta reachtach,

De bharr an méid seo a leanas:

(1)       Sa Chomhaontú Trádála idir an tAontas agus a mBallstáit, ar thaobh amháin, agus an Cholóim agus Peiriú, ar an taobh eile (dá ngairtear "an Comhaontú" anseo feasta) a síníodh an 26 Meitheamh 2012, tá foráil in Airteagal 329 de maidir le haontachas féideartha Balltíortha eile Chomhphobal na nAindéas leis an gComhaontú.

(2)       Ag leanúint ó iarratas Eacuadór na hidirbheartaíochtaí leis an Aontas le bheith ina Pháirtí sa Chomhaontú a atosú, rinneadh idirbheartaíochtaí idir an tAontas agus Eacuadór in 2014. Mar thoradh ar na hidirbheartaíochtaí sin, inisilíodh Prótacal Aontachais Eacuadór leis an gComhaontú (dá ngairtear "an Prótacal Aontachais" anseo feasta) an […].

(3)       Tar éis an Prótacal Aontachais a inisiliú, tá comhaontú idirthréimhseach cómhalartach riachtanach chun limistéar saorthrádála le hEacuadór a bhunú sa chaoi nach gcuirfear isteach ar thrádáil gan ghá. Dá bhrí sin, amhail ón 1 Eanáir 2015, ní mhéadófar na dleachtanna custaim a bhí i bhfeidhm ar dháta inisilithe an Phrótacail Aontachais agus ní chuirfear dleachtanna custaim nua i bhfeidhm ar tháirgí de thionscnamh Eacuadór.

(4)       Dá bhrí sin, déantar foráil sa Rialachán seo maidir le leibhéal na rátaí dleachta is infheidhme maidir le hEacuadór ar an [dáta inisilithe an Phrótacail Aontachais] a choinneáil ag an leibhéal sin amhail ón 1 Eanáir 2015.

(5)       Tá an beart seo gan dochar do bhearta arna ndéanamh faoi Rialachán (CE) Uimh. 597/2009[1], Uimh. 1225/2009[2] nó Uimh. 260/2009[3] ón gComhairle.

(6)       Mar choinníoll chun an chóir tharaife arna deonú faoin Rialachán seo a chur i bhfeidhm, ba cheart d'Eacuadór staonadh ó aon dleachtanna nua nó muirir nua a mbeadh éifeacht choibhéiseach leo a thabhairt isteach nó ó aon srianta cainníochtúla nua nó ó bhearta nua a mbeadh éifeacht choibhéiseach leo maidir le hallmhairí de thionscnamh an Aontais a thabhairt isteach, nó ó na leibhéil ag a bhfuil na dleachtanna nó na muirir faoi láthair a ardú nó ó aon srianta eile a thabhairt isteach ón [dáta inisilithe an Phrótacail Aontachais].

(7)       Lena áirithiú go leanfaidh Eacuadór lena thiomantas do phríomhchoinbhinsiúin idirnáisiúnta maidir le cearta an duine agus cearta saothair, cosaint an chomhshaoil agus dea-rialachas, ba cheart cur i bhfeidhm an bhirt seo a bheith faoi réir chur chun feidhme leanúnach éifeachtach na gcoinbhinsiún sin.

(8)       Chun aon bhaol calaoise a chosc, chun a bheith i dteideal leas a bhaint as an gcóir tharaife arna deonú faoin Rialachán seo, ba cheart go mbeadh sé mar choinníoll go gcomhlíonfadh Eacuadór na rialacha ábhartha maidir le tionscnamh táirgí agus na nósanna imeachta a bhaineann leis sin.

(9)       Is gá foráil a dhéanamh go gcuirfear dleachtanna Comhtharaife Custaim i bhfeidhm i gcás aon táirgí de thionscnamh Eacuadór is cúis nó is baol a bheith ina gcúis le deacrachtaí móra do tháirgeoirí an Aontais a tháirgeann táirgí comhchosúla nó táirgí atá in iomaíocht dhíreach leo, faoi réir imscrúdaithe ag an gCoimisiún.

(10)     I gcás ina sáraítear aon cheann de na coinníollacha a leagtar síos sa Rialachán seo, ba cheart cumhachtaí cur chun feidhme a thabhairt don Choimisiún chun an chóir tharaife dá bhforáiltear ann a chur ar fionraí go hiomlán nó go páirteach go ceann tréimhse shealadach. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle[4].

(11)     Tá an Rialachán seo le cur i bhfeidhm go dtí sé mhí tar éis theacht i bhfeidhm nó dháta cur i bhfeidhm sealadach fhorálacha ábhartha an Phrótacail Aontachais, agus go dtí an 31 Nollaig 2016 ar a dhéanaí,

TAR ÉIS AN RIALACHÁN SEO A GHLACADH:

Airteagal 1

Sainmhínithe

Chun críocha an Rialacháin seo:

(a)          ciallaíonn 'cóir tharaife' an ráta agus cóir dhleachta a chuirtear i bhfeidhm ar earraí de thionscnamh Eacuadór dá bhforáiltear in Airteagal 2;

(b)          ciallaíonn 'dleachtanna Comhtharaife Custaim' na dleachtanna atá sonraithe i gCuid a Dó d'Iarscríbhinn I a ghabhann le Rialachán (CEE) Uimh. 2658/87[5] arna leasú, seachas na dleachtanna sin arna mbunú mar chuid de chuótaí taraife;

(c)          ciallaíonn 'táirge/táirgí de thionscnamh Eacuadór' táirge/táirgí a chomhlíonann na ceanglais maidir le tionscnamh faoi Theideal II, Caibidil 2 de Rialachán (CEE) Uimh. 2913/92 ón gComhairle[6] agus, ag brath ar an gcóir tharaife arna lorg, de bhun fhorálacha Airteagal 2, Teideal IV, Caibidil 1 nó Roinn 1 de Chaibidil 2 de Rialachán (CEE) Uimh. 2454/93 ón gCoimisiún[7].

Airteagal 2

Cóir tharaife

1.           Dleachtanna custaim a chuirtear i bhfeidhm ar tháirgí de thionscnamh Eacuadór ar an [dáta inisilithe an Phrótacail], ní mhéadófar iad agus ní chuirfear aon dleacht chustaim nua a thabharfar isteach tar éis an dáta sin i bhfeidhm ar na táirgí sin.

2.           Cuirfear an cóir tharaife dá bhforáiltear i mír 1 i bhfeidhm gan dochar d'aon bheart arna dhéanamh faoi Rialacháin (CE) Uimh. 597/2009, Uimh. 1225/2009 nó Uimh. 260/2009.

Airteagal 3

Coinníollacha chun bheith i dteideal na córa taraife

Beidh teidlíocht chun leas a bhaint as an gcóir tharaife atá sainmhínithe in Airteagal 2 faoi réir an méid seo a leanas:

(a)          comhlíonadh na rialacha maidir le tionscnamh dá tagraítear in Airteagal 1(c) agus na nósanna imeachta a mbaineann leo, lena n‑áirítear, de réir mar is iomchuí, forálacha maidir le comhar riaracháin éifeachtach is infheidhme ar an [dáta inisilithe an Phrótacail Aontachais];

(b)          staonadh Eacuadór ó aon dleachtanna nua nó muirir nua a mbeadh an éifeacht choibhéiseach acu a thabhairt isteach agus aon srianta cainníochtúla nua nó bearta nua a thabhairt isteach a mbeadh an éifeacht choibhéiseach leo ar allmhairí ón Aontas nó ó na leibhéil ag a bhfuil na dleachtanna nó na muirir faoi láthair a ardú nó ó aon srianta eile a thabhairt isteach ón [dáta inisilithe an Phrótacail Aontachais];

(c)          daingniú agus cur chun feidhme éifeachtach a choinneáil ar thaobh Eacuadór ar na cúnaint, coinbhinsiúin agus prótacail atá liostaithe san Iarscríbhinn a ghabhainn leis an Rialachán seo, agus glacadh gan forchoimeádas leis na ceanglais maidir le tuairisciú, faireachán agus athbhreithniú rialta ar a theist cur chun feidhme i gcomhréir le forálacha na gcúnant, na gcoinbhinsiún agus na bprótacal atá daingnithe aige;

(d)          comhoibriú leis an gCoimisiún Eorpach agus gach eolas is gá a sholáthar chun measúnú a dhéanamh go bhfuil ceanglais mhír (c) á n‑urramú ag Eacuadór;

(e)          go ndéanfaidh Eacuadór iarrachtaí leanúnacha chun an Prótacal Aontachais leis an gComhaontú Trádála idir an tAontas Eorpach agus a mBallstáit, ar thaobh amháin, agus an Cholóim agus Peiriú, ar an taobh eile, a shíniú agus a dhaingniú.

Airteagal 4

Fionraí shealadach

Má chinneann sé go bhfuil dóthain fianaise ann nár comhlíonadh na coinníollacha a leagtar amach in Airteagal 3, féadfaidh an Coimisiún gníomhartha cur chun feidhme a ghlacadh chun an chóir tharaife a chur ar fionraí go ceann tréimhse shealadach, i ndáil le gach táirge nó le táirgí áirithe de thionscnamh Eacuadór. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 6(2).

Airteagal 5

Clásal cosanta

I gcás ina ndéantar táirge de thionscnamh Eacuadór a allmhairiú i méideanna agus/nó ar phraghsanna is cúis nó is baol a bheith ina gcúis le deacrachtaí móra do tháirgeoirí an Aontais a tháirgeann táirgí cosúla nó táirgí atá in iomaíocht dhíreach leis an táirge sin, féadfar na dleachtanna Comhtharaife Custaim ar an táirge sin a thabhairt isteach athuair ag leanúint na rialacha nós imeachta atá leagtha síos i Rialachán (AE) Uimh. 19/2013 ó Pharlaimint na hEorpa agus ón gComhairle[8], mutatis mutandis.

Airteagal 6

Nós imeachta coiste

1.           Chun críocha chur chun feidhme Airteagal 4 den Rialachán seo, déanfaidh an Coiste um an gCód Custaim arna bhunú le hAirteagal 248a de Rialachán (CEE) Uimh. 2913/92 ón gComhairle cúnamh a thabhairt don Choimisiún. Beidh an coiste sin ina choiste de réir bhrí Rialachán (AE) Uimh. 182/2011.

2.           I gcás ina ndéantar tagairt don mhír seo, beidh feidhm ag Airteagal 5 de Rialachán (AE) Uimh. 182/2011.

Airteagal 7

Teacht i bhfeidhm, cur i bhfeidhm agus dul in éag

1.           Tiocfaidh an Rialachán seo i bhfeidhm lá a fhoilsithe in Iris Oifigiúil an Aontais Eorpaigh.

2.           Beidh an Rialachán seo infheidhme amhail ón 1 Eanáir 2015.

3.           Rachaidh an Rialachán seo in éag sé mhí tar éis don Phrótacal Aontachais theacht i bhfeidhm nó, de réir mar is iomchuí, a chur i bhfeidhm go sealadach, nó ar an 31 Nollaig 2016, cibé acu is túisce a tharlóidh. Foilseoidh an Coimisiún fógra in Iris Oifigiúil an Aontais Eorpaigh má scoireann an Rialachán seo d'fheidhm a bheith aige roimh an 31 Nollaig 2016.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil,

Thar ceann Pharlaimint na hEorpa               Thar ceann na Comhairle

An tUachtarán                                               An tUachtarán

[1]               Rialachán (CE) Uimh. 597/2009 ón gComhairle an 11 Meitheamh 2009 maidir le cosaint i gcoinne allmhairí fóirdheontais ó thíortha nach baill den Chomhphobal Eorpach iad (IO L 188, 18.07.2009, Lch. 93).

[2]               Rialachán (CE) Uimh. 1225/2009 ón gComhairle an 30 Samhain 2009 maidir le cosaint i gcoinne allmhairí dumpáilte ó thíortha nach baill den Chomhphobal Eorpach iad (IO L 343, 22.12.2009, Lch. 51).

[3]               Rialachán (CE) Uimh. 260/2009 an 26 Feabhra 2009 ón gComhairle maidir le comhrialacha le haghaidh allmhairí (IO L 84, 31.3.2009, Lch. 1).

[4]               Rialachán (AE) Uimh. 182/2011 ó Pharlaimint na hEorpa agus ón gComhairle an 16 Feabhra 2011 lena leagtar síos na rialacha agus na prionsabail ghinearálta a bhaineann leis na sásraí maidir le rialú ag na Ballstáit ar fheidhmiú cumhachtaí cur chun feidhme ag an gCoimisiún (IO L 55, 28.2.2011, Lch. 13).

[5]               Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhthairif Chustaim (IO L 256, 7.9.1987, Lch. 1).

[6]               Rialachán (CEE) Uimh. 2913/92 ón gComhairle an 12 Deireadh Fómhair 1992 lena mbunaítear Cód Custaim an Chomhphobail (IO L 302, 19.10.1992, Lch. 1).

[7]               Rialachán (CEE) Uimh. 2454/93 ón gCoimisiún an 2 Iúil 1993 lena leagtar síos forálacha maidir le cur chun feidhme Rialachán (CEE) Uimh. 2913/92 ón gComhairle lena mbunaítear Cód Custaim an Chomhphobail (IO L 253, 11.10.1993, Lch. 1).

[8]               Rialachán (AE) Uimh. 19/2013 ó Pharlaimint na hEorpa agus ón gComhairle an 15 Eanáir 2013 lena gcuirtear chun feidhme an clásal cosanta déthaobhach agus an sásra cobhsaíochta um bananaí sa Chomhaontú Trádála idir an tAontas Eorpach agus na Ballstáit, ar thaobh amháin de, agus an Cholóim agus Peiriú ar an taobh eile (IO L 17, 19.1.2013, Lch. 1).

IARSCRÍBHINN

Cúnaint, Coinbhinsiúin agus Prótacail dá dtagraítear in Airteagal 3(c)

Coinbhinsiúin NA/EIS i dtaca le bunchearta daonna agus saothair

1.           An Coinbhinsiún maidir le Coir an Chinedhíothaithe a Chosc agus a Phionósú (1948)

2.           An Coinbhinsiún Idirnáisiúnta maidir le Gach Cineál Idirdhealaithe Chiníoch a Dhíothú (1965)

3.           An Cúnant Idirnáisiúnta maidir le Cearta Sibhialta agus Polaitiúla (1966)

4.           An Cúnant Idirnáisiúnta maidir le Cearta Eacnamaíocha, Sóisialta agus Cultúrtha (1966)

5.           An Coinbhinsiún maidir le Gach Cineál Idirdhealaithe in aghaidh na mBan a Dhíothú (1979)

6.           An Coinbhinsiún in aghaidh Céastóireachta agus in aghaidh Íde nó Pionóis Eile atá Cruálach, Mídhaonna nó Táireach (1984)

7.           An Coinbhinsiún um Chearta an Linbh (1989)

8.           An Coinbhinsiún maidir le hObair Éigeantais nó Éigeantach, Uimh. 29 (1989)

9.           An Coinbhinsiún maidir le Saoirse Comhlachais agus Cosaint an Chirt Eagrúcháin, Uimh. 87 (1948)

10.         An Coinbhinsiún maidir leis na Prionsabail a Chur i bhFeidhm i dtaca leis an gCeart Eagrúcháin agus leis an gCómhargáil, Uimh. 98 (1949)

11.         An Coinbhinsiún maidir le Luach Saothar Comhionann d'Oibrithe Fireanna agus Baineanna ar Obair arb Ionann a Luach , Uimh. 100 (1951)

12.         An Coinbhinsiún maidir le Saothar Éigeantach a chur ar ceal, Uimh. 105 (1957)

13.         An Coinbhinsiún maidir le hIdirdhealú i gcúrsaí Fostaíochta agus Slí Bheatha, Uimh. 111 (1958)

14.         An Coinbhinsiún maidir leis an Aois Íosta ag a nGlacfar Duine Isteach i bhFostaíocht, Uimh. 138 (1973)

15.         An Coinbhinsiún maidir leis na Cineálacha is measa de Shaothar Leanaí a Thoirmeasc agus le Beart Láithreach chun iad a Dhíchur, Uimh. 182 (1999)

Coinbhinsiúin maidir leis an gcomhshaol agus maidir le prionsabail rialachais

16.         An Coinbhinsiún maidir le Trádáil Idirnáisiúnta i Speicis Fauna agus Flora Fiáine i mBaol (1973)

17.         Prótacal Montréal um Shubstaintí a Ídíonn an Ciseal Ózóin (1987)

18.         Coinbhinsiún Basel maidir le Rialú Gluaiseachtaí Trasteorann Dramhaíolacha Guaiseacha agus a nDiúscairt (1989)

19.         An Coinbhinsiún maidir leis an Éagsúlacht Bhitheolaíoch (1992)

20.         Creat‑Choinbhinsiún na Náisiún Aontaithe ar an Athrú Aeráide (1992)

21.         Prótacal Cartagena ar an mBithshábháilteacht (2000)

22.         Coinbhinsiún Stócólm ar Thruailleáin Orgánacha Mharthanacha (2001)

23.         Prótacal Kyoto a ghabhann le Creat‑Choinbhinsiún na Náisiún Aontaithe ar an Athrú Aeráide (1998)

24.         Coinbhinsiún Aonair na Náisiún Aontaithe um Dhrugaí Támhshuanacha (1961)

25.         Coinbhinsiún na Náisiún Aontaithe um Shubstaintí Síceatrópacha (1971)

26.         Coinbhinsiún na Náisiún Aontaithe i gcoinne Gáinneáil Aindleathach Drugaí Támhshuanacha agus Substaintí Síceatrópacha (1988)

27.         Coinbhinsiún na Náisiún Aontaithe i gcoinne an Éillithe (2004)