DOICIMÉAD INMHEÁNACH OIBRE DE CHUID AN CHOIMISIÚIN

ACHOIMRE FEIDHMIÚCHÁIN AR AN MEASÚNÚ TIONCHAIR

Doiciméad a ghabhann leis an

Athbhreithniú ar Rialachán (CE) Uimh. 1346/2000 maidir le himeachtaí dócmhainneachta

1.           Réamhrá

Agus aghaidh á tabhairt ag an Aontas Eorpach ar an ngéarchéim eacnamaíochta is mó a tharla ó a bunaíodh é, tá curtha i dtábhacht arís agus arís eile ag an gComhairle Eorpach an ról an Aontais i gcur chun cinn an fháis inbhuanaithe agus i gcothú an chomhdhlúthaithe airgeadais. Tá an fás curtha dá bhrí sin i gcroílár chlár oibre an Choimisiúin maidir le ceartas ('Ceartas ar mhaithe le Fás').

Ar na beartais a thugann tacaíocht do ghníomhaíochtaí eacnamaíochta i réimse an cheartais tá an t‑athbhreithniú ar Rialachán (CE) Uimh. 1346/2000 ón gComhairle maidir le himeachtaí dócmhainneachta (an ‘Rialachán’ feasta). Idir 2009‑2011 thit, ar an méan, 200 000 gnólacht i bhféimheacht in aghaidh na bliana san AE, rud as ar tháinig caillteanas 1.7 milliún post díreach gach bliain. Tá gné trasteorann ag thart ar aon cheathrú de na féimheachtaí sin agus dá bhrí sin tá siad ag teacht faoi réir an Rialacháin. Ós rud é gur gnách gnólachtaí a bhíonn i mbun trádála trasteorann a bheith níos mó ná an meánmhéid, is dóchúla go mbeidh an sciar post a ndéanfar difear dóibh níos mó ná an sciar féimheachtaí, fiú sula gcuirtear san áireamh an tionchar ar chreidiúnaithe na ngnólachtaí seo.

Tá athbhreithniú an Rialacháin seo curtha ina Chlár Oibre do 2012 ag an gCoimisiún, i gcomhréir le clásal athbhreithnithe an Rialacháin, Airteagal 46. Tá an t‑athbhreithniú i gcomhréir le Eoraip 2020, an Gníomh um Ghnóthas Beag, an Suirbhé Bliantúil Fáis, agus Gníomh um an Margadh Aonair II. I mí Deireadh Fómhair 2012, ghlac Parlaimint na hEorpa rún á iarraidh go ndéanfaí athbhreithniú ar an Rialachán agus á mholadh go ndéanfaí gnéithe áirithe den dlí dócmhainneachta agus de dhlí na gcuideachtaí a chomhchuibhiú. Glacfar an t‑athbhreithniú i dteannta tuarascála maidir lena chur chun feidhme, i gcomhréir le clásal athbhreithnithe an Rialacháin.

2.           Sainiú na faidhbe

2.1.        Meastóireacht ar an Rialachán

Le Rialachán (CE) Uimh. 1346/2000 maidir le himeachtaí dócmhainneachta bunaíodh creat dlíthiúil maidir le dócmhainneachtaí trasteorann san Aontas Eorpach. Tá leagtha síos sa Rialachán rialacha aonfhoirmeacha maidir le dlínse, maidir le cinntí a bhaineann le dócmhainneacht a aithint agus a fhorfheidhmiú, agus maidir leis an dlí is infheidhme. Ina theannta sin foráiltear ann maidir le comhordú il‑imeachtaí a bhaineann leis an bhféichiúnaí céanna. Go hachomair:

· Tá feidhm ag an Rialachán maidir le daoine nádúrtha nó dlítheanacha, i gcás ina bhfuil sócmhainní nó creidiúnaithe ag an bhféichiúnaí i níos mó ná Ballstát amháin.

· Is ag an gcúirt atá san áit a bhfuil lárionad príomhleasa fhéichiúnaí a bhíonn an dlínse príomhimeachtaí dócmhainneachta a thionscnamh. Déantar an cinneadh tionscanta agus gach cinneadh eile arna n‑eisiúint ag an gcúirt sin a aithint agus a chur chun feidhme i ngach Ballstát eile.

· Is féidir imeachtaí tánaisteacha a thionscnamh in aon Bhallstát a bhfuil bunaíocht ag an bhféichiúnaí ann, i.e. aon áit a mbíonn an féichiúnaí i mbun gníomhaíochta eacnamaíche. Tá éifeacht imeachtaí tánaisteacha teoranta do na sócmhainní atá lonnaithe sa Bhallstát sin. Tá ar leachtaitheoir na n‑imeachtaí tánaisteacha comhoibriú lena contrapháirt sna príomhimeachtaí (nó a mhalairt) chun na himeachtaí a chomhordú.

· I bprionsabal, is é dlí na tíre inar tionscnaíodh na himeachtaí an dlí is infheidhme sna himeachtaí dócmhainneachta. Leis an dlí sin cinntear, go háirithe, rangú éileamh agus cearta nós imeachta an chreidiúnaí.

Cé go bhfuil glacadh ginearálta leis go bhfuil ag éirí go maith leis an Rialachán imeachtaí dócmhainneachta trasteorann laistigh den Aontas Eorpach a éascú, léirítear sa mheastóireacht go bhfuil neart fadhbanna ag baint le cur i bhfeidhm an Rialacháin. Léirítear sa mheastóireacht, leis, nach bhfuil tosaíochtaí reatha an AE ná cleachtais náisiúnta maidir leis an dlí dócmhainneachta curtha san áireamh mar is ceart sa Rialachán, go háirithe a fhad a bhaineann le héascaíocht a dhéanamh do tharrtháil fiontar atá i ngátar.

Sainaithníodh sa mheastóireacht ar an Rialachán na príomhfhadhbanna seo a leanas:

(1) Bacainní ar tharrtháil cuideachtaí agus ar shaorghluaiseacht fiontraithe agus daoine scaoilte ó fhiacha;

(2) Deacrachtaí an dlínse cheart a chinneadh inar cóir na himeachtaí a thionscnamh;

(3) Nósanna imeachta trasteorann neamhéifeachtúla;

(4) Gan aon chreat dlíthiúil a bheith ann a chumhdaíonn dócmhainneacht grúpaí cuideachtaí.

Déantar anailís ar na ceithre fhadhb sin sa chuid seo; nasctar le chéile iad de réir na bainte atá eatarthu agus grúpáiltear iad in dhá chatagóir.

2.2.        Grúpa fadhbanna 1: Fadhbanna a bhaineann le raon feidhme an Rialacháin

Is éard atá sa chéad ghrúpa fadhbanna ceisteanna a bhaineann le bearnaí i raon feidhme an Rialacháin, amhail an easpa forálacha maidir le scéimeanna réamhdhócmhainneachta, forálacha maidir le nósanna imeachta scaoilte fiach do dhaoine nádúrtha agus sainrialacha i ndáil le grúpaí cuideachtaí.

2.2.1.     Ní chumhdaíonn an Rialachán imeachtaí dócmhainneachta náisiúnta arb é is aidhm leo cuideachtaí a tharrtháil

Ón am a achtaíodh an Rialachán, tá nuashonrú déanta ag mórán Ballstát ar a ndlíthe dócmhainneachta trí nósanna imeachta nua a thabhairt isteach arb é is aidhm leo gnólachtaí a tharrtháil, an dara deis a thabhairt d'fhiontraithe macánta agus urscaoileadh ó fhiachas a thabhairt do dhaoine aonair. Léirigh staidéar Heidelberg go bhfuil imeachtaí réamhdhócmhainneachta nó hibrideacha (féichiúnaí i seilbh) nach bhfuil cumhdaithe ag an Rialachán ag nach mór dhá thrian de na Ballstáit. Tá na himeachtaí sin ceaptha gnólachtaí inmharthana a tharrtháil agus poist a chosaint, agus aithnítear go forleitheadach a dtairbhe eacnamaíoch.

I gcás nach gcumhdaítear imeachtaí leis an Rialachán, ní thugtar aitheantas ar fud an AE dá n‑éifeachtaí, go háirithe cur ar fionraí gnímh forghníomhúcháin aonair. Mar thoradh air sin, is féidir le creidiúnaithe eachtracha leanúint le gníomh forfheidhmiúcháin aonair in aghaidh cuideachta agus a cuid sócmhainní, agus is lú foinn a bhíonn orthu bheith go hiomlán páirteach i gcaibidliú athstruchtúraithe nó aontú le pleananna tarrthála. De thoradh ar an méid sin, is féidir an deis an chuideachta a tharrtháil a chailleadh, agus ansin ní féidir postanna a thabhairt slán. Chuir freagróirí sa chomhairliúchán poiblí béim ar na fadhbanna seo, agus 51 % acu á rá go dtagann fadhbanna as an easpa cumhdaigh ar imeachtaí réamhdhócmhainneachta agus imeachtaí dócmhainneachta hibrideacha. Mheas 59 % acu gur cheart imeachtaí réamhdhócmhainneachta náisiúnta a chumhdach leis an Rialachán.

Gach bliain idir 2009 agus 2011 thit breis is 200 000 gnólacht i bhféimheacht san AE. Thart ar 1.7 milliún an méid post a cailltear gach bliain, meastar. Meastar go bhfuil custaiméirí, creidiúnaithe nó páirtnéireachtaí gnó i mBallstáit eile ag thart ar 5 mhilliún cuideachta agus dá bhrí sin d'fhéadfadh tionchar a bheith ag an Rialachán orthu mar fhéichiúnaithe nó mar chreidiúnaí i gcás dócmhainneachta. Gach bliain bíonn thart ar 50 000 cuideachta (1 % de 5 mhilliún) ina bhféichiúnaithe agus bíonn ar a laghad a dhá oiread sin ina gcreidiúnaithe i gcásanna dócmhainneachta trasteorann.

Is gnách tionchar ar leith a bheith ag imeachtaí dócmhainneachta trasteorann ar mhórchuideachtaí toisc gur dóchúla iad sin a bheith i mbun gnó trasteorann ná Fiontair Bheaga agus Mheánmhéide. Bíonn éifeachtaí suntasacha ag dócmhainneacht mórchuideachtaí ar an ngeilleagar Eorpach toisc go gcruthaíonn mórchuideachtaí 30 % de phoist an AE agus 41 % den oll‑bhreisluach, cé nach bhfuil iontu ach 0.2 % de chuideachtaí na hEorpa. Is minic do mhórchuideachtaí a gcuid ábhar a fháil ó chuideachtaí beaga, cuideachtaí atá lonnaithe thar lear uaireanta, rud a fhágann gur féidir móréifeachtaí tánaisteachta teacht as dócmhainneacht mórchuideachta.

2.2.2.     Ní chumhdaíonn an Rialachán go héifeachtach an réimse iomlán scéimeanna dócmhainneachta pearsanta atá sna Ballstáit

Tá scéimeanna dócmhainneachta pearsanta curtha ar bun ag roinnt mhaith Ballstáit de thoradh an mhéadaithe ar an rófhéichiúnas pearsanta san Eoraip. Léiríonn sé sin go bhfuil ag méadú ar an tuiscint gur bacainn mhór ar an bhfiontraíocht atá sa dócmhainneacht agus san fhiachas pearsanta a thagann as. Trí chaoi a thabhairt isteach urscaoileadh ó fhiachas a fháil féachtar chomh maith le dul i ngleic leis na drochthionchair shóisialta a bhíonn ag an rófhéichiúnas príobháideach ar na daoine aonair lena mbaineann.

Cé go bhfuil roinnt nósanna imeachta dócmhainneachta pearsanta, lena n‑áirítear urscaoileadh ó fhiachas, cumhdaithe ag an Rialachán, is iomaí ceann eile nach bhfuil. Mar thoradh air sin, tá féichiúnaithe fós faoi dhliteanas ag creidiúnaithe eachtracha. Ós rud é nach gcumhdaíonn an Rialachán roinnt scéimeanna dócmhainneachta pearsanta tá bac ar fhiontraithe macánta agus ar dhaoine urscaoilte ó fhiachas an dara deis a fháil, rud a chuirfeadh ar a gcumas an fónamh ba mhó ab fhéidir a bhaint as an margadh aonair. Tá sé sin ag teacht salach ar bheartais an AE maidir le fiontraíocht.

Thart ar 200 000 cás in aghaidh na bliana an méid measta cásanna dócmhainneachta pearsanta nach gcumhdaíonn an Rialachán faoi láthair. Mheas beagnach leath na bhfreagróirí sa chomhairliúchán poiblí (49 %) gur cheart feidhm a bheith ag an Rialachán maidir le daoine aonair phríobháideacha/féinfhostaithe, agus d'easaontaigh an tríú cuid (34 %) leis sin; i measc na ndaoine a bhí ina fhábhar bhí breithiúna, cleachtóirí dócmhainneachta agus acadóirí. Mheas roinnt freagróirí nár cheart tomhaltóirí a chumhdach le haon aon fhairsingiú.

2.2.3.     Ní théann an Rialachán i ngleic go héifeachtach le dócmhainneacht grúpaí cuideachtaí

Cé go mbaineann go leor cásanna dócmhainneacht trasteorann le grúpaí cuideachtaí, níl rialacha sonracha sa Rialachán maidir le Dócmhainneacht a théann i ngleic le dócmhainneacht grúpa fiontar il‑náisiúnta. Is é is bunphrionsabal leis an Rialachán Dócmhainneachta go mbaineann imeachtaí dócmhainneachta le heintiteas dlíthiúil aonair agus, gur gá, i bprionsabal, imeachtaí ar leithligh a thionscnamh i gcás gach ball aonair den ghrúpa . Níl sé sainordaitheach imeachtaí dócmhainneachta neamhspleácha arna dtionscnamh a chomhordú i gcás máthairchuideachta agus a fochuideachtaí.

Laghdaíonn sin an dóchúlacht go bhféadfar athstruchtúrú a dhéanamh agus luach na sócmhainní atá ag an ngrúpa. De réir thuarascáil Mheitheal Mhachnaimh ar Thodhchaí Dhlí na gCuideachtaí san AE a eisíodh in Aibreán 2011, grúpáil idirnáisiúnta cuideachtaí is ea an fhoirm is coitianta ina mbíonn fiontar mórmhéide san Eoraip. Meastar go mbaineann deacrachtaí a bhaineann le dócmhainneacht grúpa do thart ar 2100 cuideachta (ar FMBanna 2 000 díobh) gach bliain. Bhí beagnach leath díobh siúd a thug freagraí sa chomhairliúchán poiblí (49 %) faoin tuairim nach bhfeidhmíonn an Rialachán go héifeachtúil i gcás dócmhainneachtaí grúpa ilnáisiúnta; mheas 30 % go bhfuil a mhalairt fíor.

2.3.        Grúpa fadhbanna 2: Fadhbanna a bhaineann le cur i bhfeidhm an Rialacháin

Tá roinnt fadhbanna tagtha aníos maidir leis an Rialachán a chur i bhfeidhm, agus is féidir iad a ghrúpáil mar seo a leanas.

2.3.1.     Gan sainmhíniú ar an lárionad príomhleasa agus na deacrachtaí a thagann as sin maidir le dlínse a chinneadh i leith imeachtaí dócmhainneachta a thionscnamh agus tóraíocht fóram

Tugann an Rialachán dlínse príomhimeachtaí dócmhainneachta a thionscnamh i gcúirteanna an Bhallstáit ina bhfuil a lárionad príomhleasa ag an bhféichiúnaí. Déanfar an cás a láimhseáil sa Bhallstát ina bhfuil an lárionad príomhleasa agus beidh sé faoi réir dhlí dócmhainneachta an stáit sin, gan dochar do thionscnamh imeachtaí tánaisteacha. Cé go raibh 77 % díobh siúd a thug freagra sa chomhairliúchán poiblí ar son an lárionad príomhleasa a úsáid chun dlínse na bpríomhimeachtaí a chinneadh, tá deacrachtaí a bhaineann lena chur chun feidhme tagtha chun cinn toisc nach bhfuil cúirteanna náisiúnta feasach go leor ar chásdlí Chúirt Bhreithiúnais an Aontais Eorpaigh i leith chás Eurofood agus chás Interedil. Ina theannta sin, níl aon oibleagáid shainráite sa Rialachán ar an gcúirt a thionscnaíonn imeachtaí dócmhainneachta an dlínse idirnáisiúnta a iniúchadh. Fágann sin go bhfuil an baol ann go dtionscnófar príomhimeachtaí comhthreomhara agus go mbeidh coinbhleacht inniúlachta ann.

Cáineadh an Rialachán chomh maith toisc go ligeann sé do chuideachtaí agus do dhaoine nádúrtha tóraíocht fóram a dhéanamh trína lárionad príomhleasa a athlonnú go Ballstát eile. Níl gach athlonnú éagórach, áfach. Go bunúsach, tagann an fhadhb a bhaineann le tóraíocht fóram chun cinn de thoradh na ndifríochtaí i ndlíthe dócmhainneachta náisiúnta.

Tá cásanna ann inar athlonnaigh cuideachtaí a lárionad príomhleasa agus ghlac Cúirt Bhreithiúnais an Aontais Eorpaigh leo mar fheidhmiú dlisteanach a gceart bunaíochta. Tá roinnt cásanna inar tharla athstruchtúrú rathúil ar chuideachta tar éis don chuideachta a lárionad príomhleasa a athlonnú go dtí an Ríocht Aontaithe toisc na solúbthachta a thugann dlíthe dócmhainneachta na Breataine do chuideachtaí.

Tuairiscíodh cásanna athlonnaithe an lárionaid phríomhleasa i gcásanna daoine nádúrtha a bhfuil rófhiachas acu. Tugtar 'turasóireacht féimheachta' ar an bhfeiniméan seo. Tá go leor fadhbanna ag baint le turasóireacht féimheachta toisc go mbíonn féichiúnaí ag baint leasa as réimeas dócmhainneachta níos fabhraí i ndlínse eile gan athlonnú go fírinneach go dtí an Ballstát eile, rud a fhágann a chreidiúnaithe thíos leis toisc nach féidir leo a n‑éilimh a fhorfheidhmiú.

Is minic ceisteanna a bhaineann leis an lárionad príomhleasa ina gcúis dlíthíochta, cé go bhfuil ag laghdú air sin. De réir taighde atá déanta tagann ceisteanna chun cinn maidir leis an lárionad príomhleasa in 40–50 % de na cásanna, cé nach ceist chonspóideach é i gcónaí. Is deacair a thomhas cé chomh forleathan is atá athlonnú éagórach an lárionaid phríomhleasa; cuid den chúis leis sin is ea nach bhfuiltear ar aon tuairim faoi athlonnú an lárionaid phríomhleasa a bheith éagórach agus cuid eile den chúis is ea gur minic, i ngeall ar easpaí sa chreat nós imeachta, nach mbraitear gach athlonnú lárionaid phríomhleasa a dhéantar. Tugann staitisticí na Ríochta Aontaithe le fios gur lú ná 100 cás in aghaidh na bliana na cásanna a bhféadfaí a mheas aistriú éagórach an lárionad príomhleasa a bheith i gceist.

2.3.2.     An gaol idir na príomhimeachtaí agus na himeachtaí tánaisteacha faoin Rialachán

Ceadaíonn an Rialachán imeachtaí tánaisteacha a thionscnamh má tá bunaíocht ag an bhféichiúnaí sa tír i gceist. Mar sin féin, foráiltear leis gur gá imeachtaí tánaisteacha a bheith ina n‑imeachtaí foirceanta nó ina n‑imeachtaí leachtaithe, is é sin le rá, ní cheadófar iad a bheith ina n‑imeachtaí athstruchtúrtha ná ina n‑imeachtaí atosaithe. Tháinig as an gceanglas sin an cáineadh go bhfuil an Rialachán dírithe ar leachtú seachas ar athstruchtúrú, agus go bhfuil sé, dá bhrí sin, gan a bheith ag luí le meon 'tarrthála corparáidí' an lae inniu. Creideann tromlach mór de na páirtithe leasmhara gur fadhb é sin.

Is féidir raon feidhme cúng imeachtaí tánaisteacha bheith ina bhacainn ar athstruchtúrú rathúil ar chuideachta a bhfuil brainsí aici i mBallstáit éagsúla, rud a laghdaíonn luach iomlán sócmhainní an fhéichiúnaí agus a chuireann deireadh le poist. Dá bhrí sin is amhlaidh a threisíonn an fhofhadhb sin an chéad fhofhadhb, is é sin gur bacainn atá sa Rialachán reatha ar leanúnachas gnó agus ar chosaint post. Tugadh isteach an córas imeachtaí tánaisteacha chun leasanna creidiúnaithe áitiúla a chosaint agus/nó chun an riar cásanna casta a éascú. Sa chelachtas, áfach, is féidir imeachtaí tánaisteacha a bheith ina mbacainn ar riar éifeachtach an eastáit agus ar atheagrú rathúil cuideachta. Cuireann siad cuid de na sócmhainní ó smacht an riarthóra dócmhainneachta sna príomhimeachtaí. Cuireann siad le costas na n‑imeachtaí toisc gur gá cleachtóir dócmhainneachta eile a íoc. Tá laghdú tagtha ar an méid úsáide a bhaintear as nósanna imeachta tánaisteacha toisc an claonadh atá ag cuideachtaí a gcuid gníomhaíochtaí trasteorann a eagrú trí fhochuideachtaí. Mar sin féin, is é an gnáthnós é i gcónaí in earnáil na heitlíochta brainsí a úsáid ag a bhfuil sócmhainní móra agus mórán daoine fostaithe. Meastar go dtiteann thart ar 700 cuideachta ag a bhfuil brainsí i mBallstáit eile i bhféimheacht gach bliain agus go dtionscnaítear cúpla céad imeachtaí tánaisteacha.

Nuair a thionscnaítear imeachtaí tánaisteacha, tuairiscíonn na páirtithe uile lena mbaineann go bhfuil easpa comhordaithe idir na príomhnósanna imeachta agus na nósanna imeachta tánaisteacha. Cuireann an Rialachán oibleagáid ar chleachtóiri dócmhainneachta faisnéis a chur in iúl dá chéile agus dul i gcomhar a chéile. Tá roinnt treoirlínte curtha amach ag cumainn chleachtóirí do chleachtóirí maidir le comhar agus cumarsáid i ndáil le dócmhainneachtaí trasteorann. Tá sé ráite ag cleachtóirí dócmhainneachta agus ag cúirteanna nach bhfuil an comhar éifeachtach sa chleachtas. D'fhéadfadh costas breise an chomhair, bacainní teanga agus rialacha nósanna imeachta náisiúnta a chuireann cosc ar nochtadh faisnéise bheith ina gcúis deacrachta freisin. Ina theannta sin, níl aon dualgais chomhchosúla chomhair idir cúirteanna ná idir riarthóirí dócmhainneachta agus cúirteanna. Mar thoradh air sin, ní chuirtear an breitheamh sna príomhimeachtaí ar an eolas faoi chora sna himeachtaí tánaisteacha sula ndéanann sé cinneadh gníomhú a thuilleadh, agus a mhalairt. Laghdaítear ar éifeachtúlacht na n‑imeachtaí dá thoradh sin agus cuirtear lena bhfad agus lena gcostas, agus i ndeireadh thiar thall is féidir deiseanna a chur amú an luach is mó is féidir a bhaint as na sócmhainní a chur amú. Bhí 70 % de na freagróirí sa chomhairliúchán poiblí míshásta leis an gcomhordú idir na príomhimeachtaí agus na himeachtaí tánaisteacha. Thug 61 % freagra cosúil leis sin i dtuarascáil Heidelberg.

2.3.3.     Deacrachtaí praiticiúla sa chur chun feidhme a bhaineann le heaspa poibliú cinntí maidir le nós imeachta dócmhainneachta agus maidir le taisceadh éileamh

Ní mór fios a bheith ag cúirt atá ag tionscnamh imeachtaí dócmhainneachta an bhfuil cuideachta nó duine faoi réir imeachtaí dócmhainneachta cheana féin i mBallstát eile. Faoi láthair, ní fhoilsítear ná ní dhéantar taifead córasach de na cinntí a dhéantar sna Ballstáit ina dtionscnaítear imeachtaí, ná sna ballstáit ina bhfuil bunaíocht. Tharla sé gur seoladh imeachtaí i gcomhthráth mar thoradh ar an easpa faisnéise i dtaobh imeachtaí. Tá sé ríthábhachtach rochtain a bheith ar an gcinneadh lena gcuirtear clabhsúr ar nós imeachta.

I ngach ceann de na Ballstáit, seachas péire díobh, is go lárnach a bhailítear an fhaisnéis. Cé go gcláraítear imeachtaí dócmhainneachta i leith eintiteas dlíthiúil i ngach Ballstát, ní chláraítear dócmhainneachtaí i leith daoine aonair. Ní dhéanann ach 14 Bhallstát cinntí a fhoilsiú i gClár Dócmhainneachta atá inrochtana ar line agus saor in aisce. Cuireann naoi mBallstát eile faisnéis éigin ar dhócmhainneacht ar fáil i mbunachar leictreonach sonraí, e.g. clár cuideachtaí nó leagan leictreonach den bhullaitín oifigiúil.

Tá sé léirithe ag an staidéar meastóireachta agus ag freagróirí sa chomhairliúchán poiblí (go háirithe Cumann FBManna na hEorpa) go mbíonn deacrachtaí ag creidiúnaithe éilimh a thaisceadh faoin Rialachán. Ní i gcónaí a chuireann leachtaitheoirí creidiúnaithe ar an eolas in am faoin gceart atá acu éileamh a thaisceadh. D'fhéadfadh cailliúint iomlán an éilimh teacht as sin más tar éis na ndátaí deiridh do thaisceadh faoin dlí náisiúnta a thaisctear é.

Díspreagann na costais agus na deacrachtaí sin creidiúnaithe beaga. Tuairim is EUR 2000 an meánchostas measta ar éileamh a thaisceadh do chreidiúnaí iasachta i gcás trasteorann.

2.4.        Ceart an AE chun gníomhú : Bunús dlí, coimhdeacht agus comhréireacht

Bhunófaí an leasú ar Airteagal 81(2)(a), (c) agus (f) den CFAE. Ghlacfaí na beartais leis an ngnáthnós imeachta reachtach. Tá an t‑ullmhú rialacha trasteorann níos éifeachtúla atá ar siúl ag an AE i lánchomhréir le prionsabal na comhréireachta. Tá gnéithe trasteorann sa cheist seo, gnéithe nach féidir a láimhseáil go sásúil le gníomhú aonair ar leibhéal na mBallstát. Ina theannta sin, thiocfadh buntáistí glana ó ghníomhú ar leibhéal an AE (seachas gníomhú ar leibhéal na mBallstát) i dtéarmaí éifeachtachta.

3.           cuspóirí beartais

Cuspóir ginearálta

Éifeachtúlacht an chreata Eorpaigh a fheabhsú maidir le cásanna dócmhainneachta trasteorann a réiteach d'fhonn feabhas a chur ar fheidhmiú an mhargaidh inmheánaigh agus ar a fhrithsheasmhacht in aghaidh géarchéimeanna eacnamaíochta.

Cuspóirí sonracha

Féachaint chuige go n‑aithneofar ar fud an AE imeachtaí náisiúnta a bhaineann le dócmhainneacht naisiúnta a rannchuidíonn le gnólachtaí a tharrtháil, infheistíocht a chosaint, poist a chosaint agus fiontraíocht a spreagadh; agus an dara deis a thabhairt d'fhiontraithe macánta agus do thomhaltóirí a bhfuil rófhiachas acu. Deimhneacht dhlíthiúil do chreidiúnaithe a mhéadú, agus ar an dóigh sin trádáil agus infheistíochta trasteorann a spreagadh. Riar éifeachtúil dócmhainneachtaí trasteorann a fheabhsú féachaint leas gach uile creidiúnaí agus duine eile lena mbaineann, leas an fhéichiúnaí san áireamh, a chosaint. Feabhas a chur ar riar éifeachtúil dócmhainneacht ball de grúpa cuideachtaí ilnáisiúnta, agus ar an dóigh sin luach a sócmhainní a uasmhéadú agus tarrtháil a éascú.

Cuspóirí oibriúcháin

Aghaidh a thabhairt ar an bhfadhb a bhaineann le raon feidhme an Rialacháin, is é sin nach gcuirtear san áireamh ann an méadú atá ag teacht ar úsáid imeachtaí neamhleachtaithe (e.g. imeachtaí réamhdhócmhainneachta agus imeachtaí hibrideacha); próiseas a chur ar bun a chuirfidh an Rialachán in oiriúint d'athruithe ar dhlíthe náisiúnta dócmhainneachta agus a fhágfaidh go gcumhdóidh imeachtaí tánaisteacha athstruchtúrú, imeachtaí réamhdhócmhainneachta agus imeachtaí hibrideacha. Na rialacha a bhaineann le dlínse tionscanta imeachtaí dócmhainneachta a shoiléiriú, gan dochar do chearta cuideachtaí ná daoine nádúrtha a gceart bunaíochta agus gluaiseachta san Aontas a fheidhmiú go dlísteanach. Feabhas a chur ar an gcreat nós imeachta lena gcinntear dlínse agus féachaint chuige go bhfuil an deis ag páirtithe leasmhara athbhreithniú breithiúnach a fháil. Comhordú idir cúirteanna agus cleachtóirí a fheabhsú, roimh imeachtaí agus lena linn; trédhearcacht a fheabhsú trí fhoilsiú gach cinnidh ábhartha a bheith sainordaitheach i ngach Ballstát; agus feabhas a chur ar an rochtain atá ar an gceartas, go háirithe i gcás FBManna, trí bheartais a cheapadh lena n‑éascófaí taisceadh éileamh. Sainchreat dlíthiúil a cheapadh do dhócmhainneacht ghrúpa.

4.           Roghanna beartais

Sainaithníodh trí rogha beartais chun aghaidh a thabhairt ar na fadhbanna thuas agus na cuspóirí thuas a bhaint amach. Seo iad:

1) An status quo, nó an cás bunlíne;

2) Rogha A, an Rialachán atá ann cheana a thabhairt bord ar bhord leis an aimsirdáta, agus an chothromaíocht idir creidiúnaithe agus féichiúnaithe, agus an chothromaíocht idir uilíocht agus críochachas, a choinneáil ar bun; agus

3) Rogha B, bunphrionsabail an Rialacháin a athrú, rud a dteastódh comhfhogasú agus cóineasú éigin ar imeachtaí agus dlíthe dócmhainneachta náisiúnta lena aghaidh.

Leagtar amach sa tábla ar an leathanach thall gnéithe éagsúla na roghanna seo, i dtaca leis na fadhbanna a atá roinnt in dhá chatagóir. Tá roinnt ghnéithe coiteann do roghanna A agus B toisc go gcuirfeadh an dá rogha síneadh le raon feidhme an Rialacháin, e.g. maidir leis na cláir náisiúnta dócmhainneachta agus maidir leis na próisis simplithe taiscthe éileamh.

Fadhb || An status quo (an cás bunlíne) || Rogha A 'An creat imeachtaí dócmhainneachta trasteorann a thabhairt bord ar bhord leis an aimsir' || Rogha B 'I dtreo comhfhogasú imeachtaí agus dlíthe náisiúnta dócmhainneachta'

Raon feidhme teoranta an Rialacháin Dócmhainneachta || Ní chumhdaíonn raon feidhme ná sainiú an Rialacháin imeachtaí réamhdhócmhainneachta, imeachtaí hibrideacha ná formhór na n‑imeachtaí dócmhainneachta pearsanta. || Raon feidhme an Rialacháin a shíneadh d'fhonn imeachtaí hibrideacha, imeachtaí réamhdhócmhainneachta agus imeachtaí dócmhainneachta pearsanta a chumhdach agus deireadh a chur leis an gceangal gur gá imeachtaí tánaisteacha a bheith ina n‑imeachtaí foirceanta.

Níl aon rialacha ann do ghrúpaí cuideachtaí. || Comhordú príomhimeachtaí trí shásraí comhair, agus an rogha ann, nuair is cuí, príomhchleachtóir dócmhainneachta a ainmniú. || Aon chúirt inniúil amháin do na príomhimeachtaí go léir; aon riarthóir dócmhainneachta amháin ceaptha do bhaill uile an ghrúpa ('comhdhlúthú nós imeachta').

Fadhbanna ag baint le cur i bhfeidhm an Rialacháin Dócmhainneachta || Gan oibleagáid maidir le foilsiú agus gan clár leictreonach sonraí a bheith ag gach Ballstát. || Ceangal a chur ar gach Ballstát gach cinneadh ábhartha de chuid imeachtaí dócmhainneachta a fhoilsiú gclár náisiúnta leictreonach agus sonraí agus catagóirí coiteanna a shainiú ionas go bhféadfaí cláir náisiúnta a nascadh leis an Tairseach Eorpach don Cheartas.

Gan foirmeacha caighdeánacha a bheith ann chun éilimh a thaisceadh. Fágtar na nósanna imeachta go hiomlán faoi na dlíthe náisiúnta. || Nósanna imeachta agus foirmeacha caighdeánaithe a thabhairt isteach ar leibhéal an AE maidir le héilimh a thaisceadh agus na Ballstáit a spreagadh chun modh leictreonach a chur ar bun lena bhféadfar éilimh a thaisceadh.

Fanann dlínse sa lárionad príomhleasa , rud atá sainithe ag an gcásdlí. || An creat nós imeachta a fheabhsú. || Eilimintí de dhlíthe náisiúnta dócmhainneachta a chomhchuibhiú.

Tá comhordú teoranta do chomhordú idir chleachtóirí. || Imeachtaí tánaisteacha a choinneáil ach comhordú leis na príomhimeachtaí a fheabhsú roimh imeachtaí tánaisteacha agus lena linn. || Deireadh a chur le himeachtaí tánaisteacha.

4.1.        Rogha A

An chéad eilimint: Raon feidhme an Rialacháin a shíneadh chun imeachtaí hibrideacha a chumhdach, imeachtaí réamhdhócmhainneachta agus imeachtaí dócmhainneachta pearsanta agus deireadh a chur leis an gceangal gur gá imeachtaí tánaisteacha a bheith ina n‑imeachtaí foirceanta.

Leathnófaí an sainiú ar imeachtaí dócmhainneachta chun imeachtaí hibrideacha, imeachtaí réamhdhócmhainneachta agus imeachtaí dócmhainneachta pearsanta a chumhdach. Liostófaí san Iarscríbhinn nósanna imeachta dócmhainneachta ar thug na Ballstáit fógra ina leith agus a thagann faoin sainiú sa Rialachán. Cheanglófaí leis an sainiú sin, go háirithe, go mbeadh méid éigin maoirseachta cúirte ag baint leis an imeacht dócmhainneachta, rud atá riachtanach d'aitheantas atá bunaithe ar muiníne frithpháirtí. Chuirfí de chúram ar an gCoimisiún a áirithiú nach liostófaí in Iarscríbhinn an Rialacháin ach imeachtaí a bheadh ag comhlíonadh an tsainithe.

An ceangal atá ann faoi láthair gur gá gur imeachtaí tánaisteacha a bheith ina n‑imeachtaí foirceanta, chuirfí deireadh leis ionas go bhféadfaí imeachtaí a éascaíonn athstruchtúrú a chur san áireamh.

An dara heilimint: Comhordú príomhimeachtaí trí shásraí ginearálta comhair, agus an fhéidearthacht ann, nuair is cuí, príomhchleachtóir dócmhainneachta a ainmniú. Le Rogha A leanfaí le cur chuige an Rialacháin déileáil le gach eintiteas ar bhonn leithligh ach dhéanfaí foráil maidir le comhordú imeachtaí dócmhainneachta i leith ball den ghrúpa céanna. Bheadh feidhm ag an gcomhordú ar thrí bhealach:

(1) Bheadh ceangal ar leachtaitheoirí na bpríomhimeachtaí difriúla cumarsáid agus comhoibriú a dhéanamh le chéile, go háirithe trí iarracht a dhéanamh plean atheagraithe a ullmhú do bhaill dhócmhainneacha an ghrúpa. Chuirfeadh an oibleagáid sin leis an sásra atá ann cheana do chomhordú idir leachtaitheoirí i bpríomhimeachtaí agus in imeachtaí tánaisteacha.

(2) Chuirfeadh an Rialachán oibleagáid ar na cúirteanna inniúla maidir leis na príomhimeachtaí difriúla faisnéis a chur in iúl agus dul i gcomhar le chéile, e.g. tríd an leachtaitheoir, nó na leachtaitheoirí céanna a cheapadh a chuir in iúl go bhfuil sé ar a gcumas dul i gcomhar le chéile.

(3) Bheadh dualgas ar an leachtaitheoir sna príomhimeachtaí i leith ball amháin den ghrúpa cumarsáid a dhéanamh leis na cúirteanna inniúla agus comhoibriú leo maidir leis na himeachtaí a bhaineann le baill eile an ghrúpa.

I gcás cuideachtaí áirithe, e.g. fochuideachta atá ar lánúinéireacht, i dteannta na sásraí comhordaithe thuas, d'fhéadfaidís 'ról treorach' a thabhairt do leachtaitheoir na máthairchuideachta. Bheadh sé de chumas ag an leachtaitheoir 'treorach' atheagrú bhall dócmhainneacha an ghrúpa a stiúradh, go háirithe, trína a iarraidh ar an gcúirt inniúil an próiseas leachtaithe fochuideachta a chur ar fionraí, faisnéis a fháil ó leachtaitheoirí eile nó ó chúirteanna eile atá páirteach nó plean athstruchtúraithe a mholadh.

An tríú heilimint: Ceangal a chur ar gach Ballstát cinntí lena dtionscnaítear agus lena gcuirtear clabhsúr ar imeachtaí dócmhainneachta, mar aon le cinntí eile a eisítear sna himeachtaí, a fhoilsiú i gclár náisiúnta leictreonach sonraí agus catagóirí coiteanna a shainiú ionas go bhféadfaí cláir náisiúnta a nascadh leis an Tairseach Eorpach don Cheartas.

Chiallódh sin go gcaithfeadh na Ballstáit go léir clár leictreonach de chinntí dócmhainneachta a chur ar bun agus a choinneáil ar bun, i gcás cuideachtaí agus daoine príobháideacha araon. Shaineofaí catagóirí coiteanna chun cláir náisiúnta a nascadh leis an Tairseach Eorpach don Cheartas[1] ar mhaithe le bunachar sonraí AE d'imeachtaí dócmhainneachta a bheadh inrochtain agus cuimsitheach a chur ar fáil agus a chuirfeadh ar chumas creidiúnaithe, páirtithe leasmhara, fostaithe agus cúirteanna fáil amach ar tionscnaíodh imeachtaí dócmhainneachta i mBallstát eile nó nár tionscnaíodh.

An ceathrú heilimint: Nósanna imeachta agus foirm chaighdeánach a thabhairt isteach ar leibhéal an AE chun éilimh a thaisceadh agus na Ballstáit a spreagadh chun modh leictreonach taiscthe éilimh a chur ar bun.

Le Rogha A leagfaí síos foirm chaighdeánach amháin i dteangacha oifigiúla uile an AE a d'fhéadfadh gach creidiúnaí a úsáid le linn imeachtaí trasteorann chun éilimh a thaisceadh. Ina theannta sin shaineofaí nósanna imeachta AE d'fhonn a áirithiú go gcuirfeadh dlíthe náisiúnta gné trasteorann imeachtaí áirithe san áireamh, e.g. aga ama réasúnta a thabhairt le héileamh a thaisceadh, gearrtar pionós a ghearradh ar chleachtóirí sa chás nach leanann siad an nós imeachta maidir le faisnéis a sholáthar do chreidiúnaithe i dtaobh toradh a n‑éilimh. Ina theannta sin bheadh sé ina spreagadh ag na Ballstáit comhéadain leictreonacha taiscthe éileamh a chur ar bun a bheadh ar fáil do chreidiúnaithe eachtracha. D'fhéadfaí iad sin a chur ar bun mar fhiontar príobháideach, agus ní gá gurb iad na húdaráis phoiblí a dhéanfadh sin.

An cúigiú heilimint: An creat nós imeachta a fheabhsú agus oiliúint a chur ar bhreithiúna i ndáil leis an Rialachán, toisc go soiléireodh an Rialachán sainiú an lárionaid phríomhleasa trí eilimintí áirithe de chásdlí Chúirt Bhreithiúnais an Aontais Eorpaigh a chódú. Shonródh an Rialachán chomh maith go bhfuil an chúirt a thionscnaíonn imeachtaí dócmhainneachta faoi oibleagáid scrúdú ex officio a dhéanamh ar bhonn a dlínse agus sonrú a thabhairt sa chinneadh tionscanta más príomhimeachtaí nó imeachtaí tánaisteacha iad. Má rinneadh athrú le déanaí ar an lárionad príomhleasa fanann na fiacha sa Bhallstát bunaidh, bheadh oibleagáid ar na cúirteanna scrúdú céadchéime a dhéanamh, i.e. roimh an urscaoileadh ó fhiachas a fhógairt, an fíor‑athlonnú atá i gceist nó nach ea. D'fhéadfaí é sin a dhéanamh trí bhreis doiciméad a iarraidh ar an bhféichiúnaí nó éisteacht le creidiúnaithe eachtracha. Chomh maith leis sin, bheadh leigheas éifeachtach ag na creidiúnaithe i gcoinne an chinnidh imeachtaí dócmhainneachta a thionscnamh. go háirithe, chuirfí ar an eolas iad faoin gcinneadh in am tráth a chuirfeadh ar a gcumas a dhúshlán a thabhairt. Chuirfí oiliúint ar bhreithiúna i ndáil leis an Rialachán agus i ndáil le cásdlí Chúirt Bhreithiúnais an Aontais Eorpaigh agus an lárionad príomhleasa.

An séú heilimint: Imeachtaí tánaisteacha a choinneáil ach feabhas a chur ar chomhordú leis na príomhimeachtaí roimh imeachtaí tánaisteacha agus lena linn, mar seo a leanas:

Ceangal a chur ar an gcúirt éisteacht le cleachtóir na bpríomhimeachtaí, sula dtionscnaítear imeachtaí tánaisteacha.

É a chur ar chumas na cúirte tionscnamh imeachtaí tánaisteacha a chur ar fionraí nó diúltú iad a thionscnamh dá mbeadh sé sin ina bhac ar riar éifeachtach an eastáit agus le leas creidiúnaithe áitiúla. Féadfaidh an leachtaitheoir agus na cúirteanna a chinneadh caitheamh le creidiúnaithe áitiúla amhail is go raibh na himeachtaí tánaisteacha tionscanta ('imeachtaí tánaisteacha sintéiseacha').

Oibleagáid a chur ar chúirteanna agus ar chleachtóirí dócmhainneachta dul i gcomhar le chéile, agus ar chúirteanna dul i gcumarsáid agus i gcomhar le chéile.

4.2.        Rogha B

Tá na heilimintí is coiteann do A agus B mínithe thuas, i.e.:

– An chéad eilimint: raon feidhme an Rialacháin a shíneadh;

– An tríú heilimint: ceangal a chur ar na Ballstáit cinntí a fhoilsiú i gclár náisiúnta leictreonach ;

– An ceathrú heilimint: nósanna imeachta a thabhairt isteach mar aon le foirm chaighdeánaithe taiscthe éileamh.

Tá na heilimintí a bhaineann go sonrach le Rogha B thíos.

An dara heilimint: agus aon chúirt amháin inniúil do na príomhimeachtaí uile is amhlaidh a cheapfaí aon riarthóir dócmhainneachta amháin do bhaill uile an ghrúpa ('comhdhlúthú nós imeachta'), lena ndéanfaí na himeachtaí dócmhainneachta do bhaill uile an ghrúpa a chomhdhlúthú in aon chúirt amháin san áit a bhfuil lárionad príomhleasa na máthairchuideachta. Cheapfaí an cleachtóir dócmhainneachta céanna i bpríomhimeachtaí uile na bhfochuideachtaí.

An cúigiú heilimint: Dhéanfadh comhchuibhiú gnéithe de na dlíthe náisiúnta dócmhainneachta difear do ghnéithe áirithe de na nósanna imeachta náisiúnta dócmhainneachta, go háirithe tréimhsí urscaoilte ó fhiachas, coinníollacha agus rialacha maidir le himeachtaí a thionscnamh, rialacha maidir le héisteachtaí chreidiúnaithe agus leigheas éifeachtach.

An séú heilimint: Deireadh a chur le himeachtaí tánaisteacha faoi Rogha B. In áit imeachtaí tánaisteacha, bheadh aon phríomhimeacht dócmhainneachta amháin ag a mbeadh éifeacht ar fud an AE agus a dhéileálfadh leis an máthairchuideachta agus leis na brainsí agus na bunaíochtaí uile.

4.3.        Roghanna a cuireadh as an áireamh

Bhí roinnt rudaí eile a d'fhéadfadh na fadhbanna a réiteach dar leis na geallsealbhóirí, lena n‑áirítear tréimhse fionraíochta a thabhairt isteach tar éis an oifig chláraithe nó an lárionad príomhleasa a athrú, féachaint tóraíocht fóram a chosc. Is beag seans go n‑éireodh leis sin, áfach.

5.           Anailís tionchair agus comparáid idir na roghanna

Ní réiteofaí na fadhbanna a sainaithníodh dá gcloífí leis an status quo agus is amhlaidh a bhuanófaí drochthionchar an dá ghrúpa fadhbanna. Cé go bhféadfaí a bheith ag súil le méid áirithe cóineasaithe idir na Ballstáit i roinnt réimsí, is dócha gur i ngéire a rachaidh na fadhbanna i réimsí eile.

Tríd is tríd is dea‑tionchar a bheadh ag Rogha A i gcomparáid leis an gcás bunlíne. Bhainfí amach cuspóirí an bheartais go héifeachtacht leis an rogha seo agus thabharfaí aghaidh ar na fadhbanna a sainaithníodh, gan cur isteach ar reachtaíocht náisiúnta ná ar bheartais naisiúnta. Dea‑thionchar eacnamaíoch a bheadh ag an rogha seo ar shlándáil infheistíochta, ar fheidhmiú an mhargaidh aonair agus ar an bhfiontraíocht. D'fhágfadh sí gurbh fhusa do ghnólachtaí inmharthana teacht slán agus chosnódh sí poist. Níl aon fhianaise ann go mbíonn aon tionchar breise ar staid na bhfostaithe nuair a bhíonn a bhfostóir dócmhainneach. Dá dtabharfaí an dara deis d'fhéichiúnaithe bheadh an baol ann go mbeadh tionchar aige sin ar an bhfáil a bheadh ag fiontraithe ar chreidmheas ar phraghas inacmhainne, ach cúitítear sin le héifeachtacht scéimeanna nua‑aimseartha dócmhainneachta atá dian agus a ndéantar faireachán géar orthu. Tá an baol ann chomh maith go n‑imreodh síneadh an raoin feidhme chun breis scéimeanna dócmhainneachta a chumhdach tionchar ar thóraíocht fóram. Tarrtháil a éascú is bunaidhm leis na himeachtaí hibrideacha, ámh, agus treisíonn comhordú éifeachtach na nósanna imeachta na sochair. Rannchuideodh an rogha seo leis an dara deis a chur chun cinn. Mhéadódh sí ar éifeachtúlacht, ar chothroime agus ar thrédhearcacht imeachtaí dócmhainneachta trasteorann agus d'fheabhsódh sí an rochtain atá ar an gceartas.

Le Rogha A chuirfí ar údaráis na mBallstát roinnt costas a bhaineann le cláir dócmhainneachta agus le hoiliúint a chur ar bhreithiúna. Tá údar maith leis na costais toisc na leasa agus na sábhála don tsochaí trí mhéadú ar éifeachtúlacht agus cáilíocht na nósanna imeachta dócmhainneachta trasteorann.

Bheadh dea‑thionchar ag Rogha A ar an muinín fhrithpháirteach idir údaráis bhreithiúnacha na mBallstát. Coinníonn sí an chothromaíocht idir an féichiúnaí agus an creidiúnaí, chomh maith leis an gcothromaíocht idir uilíocht agus críochachas. Mar sin féin ní rachadh sé i ngleic le ceann de mhórúdair na bhfadhbanna — mí‑éifeachtúlachtaí agus difríochtaí idir dlíthe náisiúnta dócmhainneachta.

D'fhéadfadh Rogha B a bheith níos éifeachtaí na Rogha A ó thaobh na cuspóirí a bhaint amach agus leasanna eacnamaíocha agus sóisialta don margadh aonair a sholáthar. Mhéadódh sí ar éifeachtacht agus ar éifeachtúlacht imeachtaí dócmhainneachta san AE trí chéile; chruthódh se eilimintí de chóras uilíoch, ar nós gnéithe áirithe den rialachán dócmhainneachta a rialaíonn 50 stát Stáit Aontaithe Mheiriceá, an US Insolvency Act (Acht Dócmhainneachta SAM).

Is fearr a dhéileálfadh Rogha B le rún mhí na Samhna 2011 ó Pharlaimint na hEorpa, ina ndearna sí moltaí don Choimisiún maidir le comhchuibhiú gnéithe áirithe d'imeachtaí dócmhainneachta. Bunaíodh na moltaí sin ar an bprionsabal gur le leas an mhargaidh inmheánaigh cothroime iomaíochta, agus go dtagann as éagothromaíochtaí idir dhlíthe náisiúnta dócmhainneachta buntáistí nó míbhuntáistí iomaíochta agus deacrachtaí do chuideachtaí a mbíonn gníomhaíochtaí trasteorann ar bun acu, a d'fhéadfadh bheith ina gconstaic ar athstruchtúrú rathúil ar chuideachtaí dócmhainneacha agus a d'fhéadfadh bheith fábharach don tóraíocht fóram.

Bheadh tionchar níos mó ag Rogha B, áfach, ar chórais náisiúnta. Tá níos mó i gceist leis na hathruithe atá molta ná an Rialachán a thabhairt cothrom bord ar bhord leis an aimsir, agus theastódh anailís chomparáideach mhionsonraithe ar dhlíthe náisiúnta dócmhainneachta lena n‑aghaidh, rud a chuirfeadh bac le Rogha B a chur i bhfeidhm láithreach. Idir an dá linn, leanfadh na fadhbanna atá ann faoi láthair de bheith ann, agus d'fhéadfaidís siad dul in olcas fiú.

Dá bhrí sin, cé go bhfuil go cúiseanna go leor le tacú le Rogha B, tá an chuma ar an scéal gur rogha níos comhréirí atá i Rogha A ag an bpointe seo. Dá réir sin, is í Rogha A an rogha tosaíochta maidir le hathbhreithniú ar na Rialachán Dócmhainneachta.

De cheal staitisticí córasacha mionsonracha a bhaineann go sonrach le líon agus cineál na bhféimheachtaí a thagann faoi raon feidhme an Rialacháin – easpa a bhfuil na socruithe maidir le faireachán sa rialachán athbhreithnithe ceaptha a leigheas, (féach Roinn 8 thíos) – is deacair meastacháin chruinn iontaofa a dhéanamh i ndáil le scála na dtionchar dearfach a bhfuil súil leo mar thoradh ar an rogha tosaíochta. Tá roinnt mhaith fianaise ann, áfach, a thugann le fios gur féidir mórbhuntáistí eacnamaíocha teacht as an gcur chuige maidir le féimheacht agus dócmhainneacht atá leagtha amach sa rogha tosaíochta, is é sin tosaíocht a thabhairt d'athstruchtúrú thar leachtú agus gan constaicí nach bhfuil gá leo a chur roimh fhiontraithe ar theip orthu agus a bhfuil an "dara deis" uathu. Léiríonn sonraí ón Eagraíocht um Chomhar agus Forbairt Eacnamaíochta atá luaite cheana sa Mheasúnú Tionchair go bhfuil an ráta caillteanais cuideachtaí déantúsaíochta oiread le haon trian níos lú sna tíortha a bhfuil imeachtaí hibrideacha nó imeachtaí réamhdhócmhainneachta acu i gcomparáid leo siúd nach bhfuil. An t‑ábhar imní gurbh ionann éascaíocht a dhéanamh do chuideachtaí féimheacha cuideachta nua a bhunú agus a gcuid iompair mhí‑ionraic a chúiteamh, dealraíonn sé go bhfuil roinnt áibhéile ag baint leis de bhrí nach féimheachtaí calaoiseacha níos mó ná 4‑6 % d'fhéimheachtaí; ina theannta sin, ní dhéanfaidh rogha na tosaíochtaí aon difear do na smachtbhannaí is infheidhme maidir le calaois.

6.           Faireachán agus meastóireacht

D'fhonn faireachán a dhéanamh ar chur chun feidhme an Rialacháin, ullmhóidh an Coimisiún tuarascálacha meastóireachtaí go rialta, bunaithe ar chomhairliúcháin leis na Ballstáit, páirtithe leasmhara agus saineolaithe seachtracha. Spreagfaidh an Coimisiún malartú dea‑chleachtais idir na Ballstáit agus ceanglófar le hathbhreithniú ar an Rialachán go soláthrófaí sonraí staitistiúla ar fheidhmiú an Rialacháin, go háirithe maidir le líon na n‑imeachtaí tánaisteacha agus na himeachtaí a bhaineann le grúpaí cuideachtaí.

[1]               Tá an Tairseach Eorpach don Cheartas ceaptha a bheith ina ionad ilfhreastail i réimse an cheartais, faisnéis a sholáthar agus feabhas a chur an rochtain atá ar an gceartas ar fud an AE.