MEABHRÁN MÍNIÚCHÁIN

1.           COMHTHÉACS AN TOGRA

Ní foláir an Rialachán Airgeadais[1] a leasú chun na hathruithe atá molta sa togra ón gCoimisiún le haghaidh Rialacháin ó Pharlaimint na hEorpa agus ón gComhairle maidir le reacht agus cistiú páirtithe polaitiúla Eorpacha agus fondúireachtaí polaitiúla Eorpacha[2] a chur san áireamh. Tiocfaidh an Rialachán sin in ionad Rialachán (CE) Uimh. 2004/2003[3] atá ann faoi láthair. Maidir le cur i bhfeidhm Airteagal 224 den Chonradh ar Fheidhmiú an Aontais Eorpaigh (CFAE), tá rialacha nua sa dréacht‑Rialachán a thagann in ionad Rialachán (CE) Uimh. 2004/2003 i ndáil le, inter alia, cistiú páirtithe polaitiúla agus fondúireachtaí polaitiúla ar leibhéal Eorpach. Ar mhaithe lena gcur i bhfeidhm, ní foláir tacar comhfhreagrach rialacha airgeadais a bheith ag gabháil leo, a bhfuil bonn leis sa Rialachán Airgeadais.

Moltar an Teideal nua "Ranníocaíochtaí" a chur isteach ag deireadh chuid a dó den Rialachán Airgeadais ("cuid speisialta") díreach roimh chuid a trí ("forálacha idirthréimhseacha agus deiridh").

Ar deireadh, níl foráil déanta ag an bpointe seo maidir le gníomh tarmligthe ar bith a bheith ann, bunaithe ar Airteagal 290 den CFAE, don Teideal nua seo.

2.           TORTHAÍ AN CHOMHAIRLIÚCHÁIN LEIS NA PÁIRTITHE LEASMHARA AGUS MEASÚNUITHE TIONCHAIR

Thig an togra as rún Pharlaimint na hEorpa maidir le maoiniú páirtithe polaitiúla Eorpacha (tuarascáil Giannakou)[4] ina meastar, i bhfianaise na taithí a fuarthas, gur cheart maoiniú páirtithe polaitiúla Eorpacha agus fondúireachtaí polaitiúla Eorpacha a fheabhsú i dtaobh cúpla pointe. Go háirithe, iarrann sé deireadh le córas na ndeontas agus ionstraim nua maoiniúcháin a chruthú leis an Rialachán Airgeadais a bheadh dírithe ina hiomláine ar pháirtithe agus ar fhondúireachtaí Eorpacha a mhaoiniú, agus a bheadh curtha in oiriúint go sonrach dóibh sin.

Tar éis grinnanailís a dhéanamh, moltar gur cheart páirtithe polaitiúla a mhaoiniú trí bhíthin ionstraime nua ("ranníocaíochtaí") mar atá léirithe sa dréacht‑togra seo, seachas trí dheontas oibriúcháin, mar a dhéantar faoi láthair.

Maidir le fondúireachtaí polaitiúla Eorpacha, meastar gur cheart leanúint de dheontas oibriúcháin a thabhairt dóibh. Níl údar cuí leis an iarraidh ó Pharlaimint na hEorpa fondúireachtaí polaitiúla Eorpacha a eisiamh freisin ón gcóras deontas, i bhfianaise nach bhfuil sainiúlachtaí na bpáirtithe polaitiúla Eorpacha san áireamh sna fondúireachtaí polaitiúla Eorpacha. Ina theannta sin, nuair a chuirfear i bhfeidhm an Rialachán Airgeadais, cuirfear deireadh le formhór na n‑ábhar imní a luaigh Parlaimint na hEorpa maidir leis na deacrachtaí a bhí ag na fondúireachtaí sin faoi Rialachán Airgeadais (CE) Uimh. 1605/2002[5] , agus ní bheidh gá le maoluithe sonracha dá bhrí sin. Is fíor sin go háirithe i bhfianaise na deise go bhfaighidh na fondúireachtaí méid iomlán an réamh‑mhaoinithe gan ráthaíocht a chur isteach, agus go gcuirfidh siad le chéile cúlchistí airgeadais óna bhfoinsí féin, toisc nach gcuirfear na méideanna atá sna cúlchistí sin san áireamh chun críche comhlíonadh a fhíorú i dtaobh na rialach neamhbhrabúis.

Tá ranníocaíochtaí le páirtithe polaitiúla Eorpacha bunaithe ar mhúnla atá cosúil leis an gcóras deontas ach a bhfuil na sainiúlachtaí a thugtar thíos acu leis.

Ina theannta sin, chuaigh an Coimisiún i gcomhairle leis na geallsealbhóirí ábhartha (ionadaithe páirtithe polaitiúla agus fondúireachtaí polaitiúla ar leibhéal Eorpach, saineolaithe náisiúnta agus acadúla...).

Ar deireadh, cuireadh an togra seo i láthair mar dhoiciméad inmheánach oibre de chuid an Choimisiúin[6] an tráth céanna leis an togra ón gCoimisiún le haghaidh Rialacháin ó Pharlaimint na hEorpa agus ón gComhairle maidir le reacht agus cistiú páirtithe polaitiúla Eorpacha agus fondúireachtaí polaitiúla Eorpacha.

3.           EILIMINTÍ DLÍ AN TOGRA

3.1.        Teideal nua sa Rialachán Airgeadais: "Ranníocaíochtaí le páirtithe polaitiúla Eorpacha"

Bunaítear leis an togra Teideal VIII nua i gCuid a Dó den Rialachán Airgeadais atá dírithe ar Ranníocaíochtaí le páirtithe polaitiúla Eorpacha agus déanann sé na forálacha sonracha maidir le páirtithe polaitiúla Eorpacha dá bhforáiltear faoi láthair i dTeideal VI (deontais) de Chuid a hAon a aisghairm.

3.2.        Modhnuithe móra i gcomparáid leis an gcóras deontas reatha

Tugtar isteach na heilimintí seo a leanas leis an togra:

3.2.1.     Deireadh a chur leis an "clár bliantúil oibre"

I bpointe 18 i dtuarascáil Giannakou, déantar tagairt do na glaonna a rinneadh maidir le deireadh a chur leis an gclár oibre bliantúil do pháirtithe polaitiúla Eorpacha agus luaitear nach n‑oireann an réamhchoinníoll sin dóibh agus nach gceanglaítear é in aon reachtaíocht de chuid na mBallstát.

Go háirithe, éilíonn gníomhaíochtaí páirtithe polaitiúla i bhfad níos mó solúbthachta agus freagartha i dtaobh cúrsaí reatha ná an córas deontas reatha, lena gceanglaítear clár oibre bliantúil agus buiséad sealadach a chur isteach leis an iarraidh ar chistiú.

Ar an ábhar sin, ba cheart na ranníocaíochtaí a dhámhachtain gan cláir oibre bliantúla ná buiséid mheasta oibriúcháin.

3.2.2.     Critéir incháilitheachta a thabhairt isteach

Tugadh critéir incháilitheachta isteach le haghaidh páirtithe polaitiúla a chistiú i gcomhréir leis an togra le haghaidh Rialacháin maidir le reacht agus cistiú páirtithe polaitiúla Eorpacha agus fondúireachtaí polaitiúla Eorpacha. I gcleachtas, ba cheart don oifigeach údarúcháin iarratas díreach a chur faoi bhráid Chlár na bpáirtithe polaitiúla Eorpacha (arna bhunú i bParlaimint na hEorpa) ar dheimhnithe lena ndearbhófar go bhfuil páirtithe polaitiúla Eorpacha cláraithe go cuí agus go gcomhlíonann siad na gealltanais ábhartha (e.g. cuntais á gcur isteach) agus nár cuireadh ar fionraí iad ná nach bhfuil siad faoi réir aon phionóis riaracháin dá bhforáiltear sa togra le haghaidh Rialacháin thuasluaite.

3.2.3.     Deireadh a chur leis na critéir roghnúcháin

Ní cheanglófar critéir roghnúcháin sa teideal nua, ós rud é gur bheag an luach a bhainfí as fíorú a dhéanamh a fortiori ar chumas airgeadais agus oibriúcháin na bpáirtithe polaitiúla Eorpacha ionadaíocht a dhéanamh ar na saoránaigh gan clár oibre bliantúil ná buiséad measta a bheith curtha isteach.

3.2.4.     Rialú ar a n‑oibleagáidí reachtúla

Tá foráil tugtha isteach lena gceanglófar go sainráite nach mbeidh ar pháirtithe polaitiúla Eorpacha a bheith faoi réir a dtoirmisc ón gClár ná faoi réir pionóis riaracháin le linn na bliana airgeadais arna cumhdach ag an ranníocaíocht. Sna cásanna sin, laghdófaí a ranníocaíochtaí nó chuirfí deireadh leo, agus ghnóthófaí aon réamh‑mhaoiniú a íocadh.

Ba cheart don oifigeach údarúcháin an dearbhú sin a iarraidh ó Chlár Pharlaimint na hEorpa sula n‑íocfaidh sé an t‑iarmhéid.

3.2.5.     Rialuithe atá ar chaiteachas agus nach bhfuil ar ghníomhaíochtaí

Cé go bhfuiltear ag leathnú amach ón gcóras reatha deontas, atá faoi réir clár oibre agus buiséad measta a chur isteach, níor cheart breathnú air sin mar carte blanche chun ceadú do pháirtithe polaitiúla mí-úsáid a bhaint as cistí an AE. Cé gur cheart tacaíocht airgeadais a dhámhachtain gan clár oibre bliantúil agus buiséad oibriúcháin measta, ba cheart do pháirtithe polaitiúla Eorpacha údar cuí a thabhairt ex post d'úsáid fhónta chistí an Aontais.

Go háirithe, ba cheart don oifigeach údarúcháin a fhíorú ar úsáideadh cistí an AE chun caiteachas inaisíoctha a íoc, faoi mar a shuítear sa ghlaoch ar ranníocaíochtaí, laistigh de na teorainneacha ama atá leagtha síos sa Rialachán seo. Shimpleodh an réiteach sin an iarraidh ar ranníocaíochtaí toisc nach mbeadh gá cláir oibre bhliantúla ná buiséid mheasta a chur isteach, agus cheadófaí do pháirtithe polaitiúla a ngníomhaíochtaí a chur chun feidhme gan stró agus iad a choigeartú in imeacht na bliana.

3.2.6.     Teorainneacha ama le húsáid chistí an AE

I bpointe 24 i dtuarascáil Giannakou, iarrtar an deis cúlchistí a chur le chéile agus cistí a thabhairt ar aghaidh. Ní chuireann an Teideal nua cosc ar pháirtithe polaitiúla Eorpacha cistí a chur le chéile óna bhfoinsí féin. Ina theannta sin, ba cheart solúbthacht éigin a bheith ann do pháirtithe polaitiúla Eorpacha maidir leis na teorainneacha ama le cistí an AE arna ndámhachtain a úsáid. Dá gcuirfí i bhfeidhm go dian an oibleagáid na cistí sin a úsáid sa bhliain airgeadais inar dámhadh iad, bheadh sé deacair é a thabhairt chun réitigh leis an ngá atá le páirtithe polaitiúla Eorpach a n‑acmhainní a chur in oiriúint don timthriall toghchánach.

Mar sin féin, ba cheart cistí an AE nach bhfuil caite a úsáid laistigh de thréimhse réasúnta. Ba cheart ranníocaíochtaí a dhéantar le páirtithe polaitiúla Eorpacha a chaitheamh chun caiteachas inaisíoctha a chumhdach laistigh de dhá bhliain airgeadais tar éis na bliana airgeadais dar ndámhadh iad (n+2) agus ina dhiaidh sin, ba cheart don oifigeach údarúcháin aon chistí nár caitheadh a ghnóthú.

3.2.7.     Cómhaoiniú

Déanfar páirtithe polaitiúla Eorpach a mhaoiniú de réir phrionsabal na cómhaoinithe arna bhunú le Rialachán xx/xxxx, gan dochar don deis dá dtagraítear thuas aon chuid nár úsáideadh de ranníocaíocht an AE a úsáid chun caiteachas inaisíoctha a chumhdach laistigh den dá bhliain airgeadais tar éis a dhámhachtana.

3.2.8.     Modhanna maoiniúcháin

Amhail i gcás deontas, féadfar ranníocaíochtaí a íoc trí chéatadán den chaiteachas arna thabhú a aisíoc, nó trí chóras ina n‑íocfar cnapshuim réamhshainithe, costais aonaid, agus ráta comhréidh (forfaits).

3.2.9.     100 % réamh‑mhaoiniú

Ba cheart ranníocaíochtaí a íoc in íocaíocht réamh‑mhaoinithe amháin a chumhdaíonn 100 % den tsuim, ach amháin má chineann an t‑oifigeach údarúcháin a mhalairt ar chúiseanna a bhfuil údar cuí leo.

3.2.10.   Ús ar réamh‑mhaoiniú

De mhaolú ar Airteagal 5 den Rialachán Airgeadais, ba cheart aon ús ar na méideanna réamh‑mhaoinithe a bhraitheann páirtithe polaitiúla Eorpacha a úsáid chun caiteachas inaisíoctha a úsáid laistigh den dá bhliain airgeadais ina dhiaidh sin.

3.2.11.   Córas pionós agus rialuithe

Amhail i gcás deontas, ba cheart a áireamh sa Teideal nua forálacha caighdeánacha maidir le rialú ar Pharlaimint na hEorpa, ar an Oifig Frith‑Chalaoise Eorpach agus ar an gCúirt Iniúchóirí. Ba cheart a áireamh ann freisin an córas pionós céanna (pionóis riaracháin agus airgeadais) is infheidhme maidir le tairbhithe deontas.

4.           IMPLEACHT BHUISÉADACH

Ní bheidh aon impleacht bhuiséadach ag an modhnú atá beartaithe ar an Rialachán Airgeadais.

2012/0336 (COD)

Togra le haghaidh

RIALACHÁIN Ó PHARLAIMINT NA hEORPA AGUS ÓN gCOMHAIRLE

lena leasaítear Rialachán (AE, Euratom) Uimh. 966/2012 maidir le maoiniú páirtithe polaitiúla Eorpacha

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 322 de, i gcomhar leis an gConradh ag bunú an Chomhphobail Eorpaigh do Fhuinneamh Adamhach, agus go háirithe Airteagal 106a de,

Ag féachaint don togra ón gCoimisiún Eorpach,

Tar éis an dréachtghníomh reachtach a chur chuig na parlaimintí náisiúnta,

Ag féachaint don tuairim ón gCúirt Iniúchóirí[7],

Ag gníomhú dóibh i gcomhréir leis an ngnáthnós imeachta reachtach,

De bharr an méid seo a leanas:

(1)       Tá tábhacht le páirtithe polaitiúla ar leibhéal Eorpach mar ghné ar mhaithe le lánpháirtiú laistigh den Aontas.

(2)       In Airteagal 10 den Chonradh ar an Aontas Eorpach agus in Airteagal 12(2) de Chairt um Chearta Bunúsacha an Aontais Eorpaigh, dearbhaítear go gcuireann páirtithe polaitiúla ar leibhéal Eorpach le feasacht pholaitiúil Eorpach a mhúnlú agus le toil pholaitiúil shaoránaigh an Aontais a chur in iúl.

(3)       An 4 Samhain 2003, ghlac Parlaimint na hEorpa agus an Chomhairle Rialachán (CE) Uimh. 2004/2003 maidir leis na rialacháin lena rialaítear páirtithe polaitiúla ar an leibhéal Eorpach agus maidir leis na rialacha a bhaineann lena gcistiú[8].

(4)       I rún uaithi an 6 Aibreán 2011 maidir le cur i bhfeidhm Rialachán (CE) Uimh. 2004/2003 maidir leis na rialacháin lena rialaítear páirtithe polaitiúla ar an leibhéal Eorpach agus maidir leis na rialacha a bhaineann lena gcistiú[9], mhol Pharlaimint na hEorpa, i bhfianaise na taithí a bhí aici, feabhsuithe áirithe ar mhaoiniú páirtithe polaitiúla Eorpacha agus fondúireachtaí polaitiúla Eorpacha.

(5)       An [...] ghlac Parlaimint na hEorpa agus an Chomhairle Rialachán (AE) Uimh. [...] maidir le reacht agus cistiú páirtithe polaitiúla Eorpacha agus fondúireachtaí polaitiúla Eorpacha[10], Rialachán lena n‑aisghairtear Rialachán (CE) Uimh. 2004/2003. Leagtar síos leis an Rialachán sin rialacha nua maidir le, inter alia, cistiú páirtithe polaitiúla agus fondúireachtaí polaitiúla ar an leibhéal Eorpach, go háirithe maidir le coinníollacha cistiúcháin, modh agus leithdháileadh cistiúcháin, tabhartais agus ranníocaíochtaí, maoiniú feachtas le haghaidh thoghcháin Pharlaimint na hEorpa, caiteachas réasúnta, toirmeasc a chur ar chistiú, cuntais, cur chun feidhme agus rialú, pionóis agus trédhearcacht.

(6)       Ba cheart a áireamh i Rialachán (AE, Euratom) Uimh. 966/2012 ó Pharlaimint na hEorpa agus ón gComhairle an 25 Deireadh Fómhair 2012 maidir leis na rialacha airgeadais is infheidhme i ndáil le buiséad ginearálta an Aontais[11] (dá ngairtear "an Rialachán Airgeadais" anseo feasta), rialacha maidir le ranníocaíochtaí Pharlaimint na hEorpa le páirtithe polaitiúla Eorpacha. Leis na rialacha sin, ba cheart a chur ar chumas páirtithe polaitiúla ar an leibhéal Eorpach tuilleadh solúbthachta a bheith acu maidir leis na teorainneacha ama chun na ranníocaíochtaí sin a úsáid, faoi mar a éilíonn na cineálacha sin gníomhaíochtaí.  

(7)       Ní oireann an córas i dtaca le tacaíocht airgeadais a sholáthar do pháirtithe polaitiúla Eorpacha trí bhíthin deontais oibriúchán dá bhforáiltear in Airteagal 125(6) den Rialachán Airgeadais do riachtanais na bpáirtithe sin, go háirithe i ndáil leis an gceanglas clár oibre bliantúil agus buiséad oibriúcháin measta a chur isteach, ceanglas nach bhfuil ann i reachtaíocht na mBallstát. Dá bhrí sin, ba cheart don tacaíocht a thugtar do pháirtithe polaitiúla Eorpacha a bheith i bhfoirm ranníocaíochta sonraí, a fhreastalóidh ar riachtanais shonracha páirtithe polaitiúla Eorpacha.

(8)       Cé go ndeonaítear tacaíocht gan clár oibre bliantúil agus buiséad oibriúcháin measta, ba cheart do pháirtithe polaitiúla Eorpacha údar cuí a léiriú ex post maidir le húsáid fhónta chistí an Aontais. Go háirithe, ba cheart don oifigeach údarúcháin a fhíorú ar úsáideadh na cistí chun caiteachas inaisíoctha a íoc, faoi mar a shuítear sa ghlaoch ar ranníocaíochtaí, laistigh de na teorainneacha ama atá leagtha síos sa Rialachán seo. Ba cheart ranníocaíochtaí a dhéantar le páirtithe polaitiúla Eorpacha a chaitheamh laistigh de dhá bhliain airgeadais tar éis na bliana airgeadais inar deonaíodh iad agus ina dhiaidh sin ba cheart don oifigeach údarúcháin aon chistiú nár caitheadh a ghnóthú.

(9)       Cistí an Aontais a dámhadh chun costais oibriúcháin páirtithe polaitiúla Eorpacha a mhaoiniú, níor cheart iad a úsáid chun críocha eile seachas na críocha sin atá bunaithe i Rialachán (AE) Uimh. [...], go háirithe chun eintitis eile amhail páirtithe polaitiúla náisiúnta a mhaoiniú go díreach nó go hindíreach. Ba cheart do pháirtithe polaitiúla Eorpacha na ranníocaíochtaí a úsáid chun céatadán den chaiteachas reatha agus de chaiteachas na todhchaí a íoc seachas caiteachas nó fiacha arna dtabhú sular cuireadh isteach na hiarratais ar ranníocaíochtaí.

(10)     Ba cheart dámhachtain na ranníocaíochtaí a shimpliú freisin agus a chur in oiriúint do shainiúlachtaí na bpáirtithe polaitiúla Eorpacha, go háirithe trí gan critéir roghnúcháin a bheith ann, 100 % réamh‑mhaoiniú a bhunú mar riail ghinearálta nó an deis cnapshuimeanna, maoiniú ar ráta comhréidh agus maoiniú costais aonaid a úsáid.

(11)     Ba cheart na ranníocaíochtaí ó bhuiséad an Aontais a laghdú nó deireadh a chur leo i gcás ina sáraíonn páirtithe polaitiúla Eorpacha na hoibleagáidí atá leagtha síos i Rialachán (AE) Uimh. [...].

(12)     Ba cheart don institiúid chéanna pionóis atá bunaithe ar an Rialachán Airgeadais agus Rialachán (AE) Uimh. [...] araon a fhorchur, agus ba cheart iad a fhorchur ar bhealach comhleanúnach agus prionsabal non bis in idem á urramú. I gcomhréir le Rialachán (AE) Uimh. [...] ní fhorchuirfear pionóis riaracháin agus/nó airgeadais dá bhforáiltear sa Rialachán Airgeadais i gceann de na cásanna inar forchuireadh pionóis cheana féin ar bhonn Rialachán (AE) Uimh. [...].

(13)     Ba cheart, dá bhrí sin, an Rialachán Airgeadais a leasú dá réir sin,

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán (AE, Euratom) Uimh. 966/2012 mar seo a leanas:

(1)          I gCuid a dó, cuirtear Teideal VIII isteach mar seo a leanas:

"TEIDEAL VIII RANNÍOCAÍOCHTAÍ LE PÁIRTITHE POLAITIÚLA EORPACHA

Airteagal 204a Forálacha ginearálta

1.           Chun críocha an Rialacháin seo, ciallaíonn páirtithe polaitiúla Eorpacha na heintitis atá bunaithe agus cláraithe amhlaidh i gcomhréir le Rialachán (AE) Uimh. [...] ó Pharlaimint na hEorpa agus ón gComhairle (*).

2.           Féadfar ranníocaíochtaí díreacha airgeadais ón mbuiséad a dhámhachtain ar pháirtithe polaitiúla Eorpacha i bhfianaise a róil i bhfeasacht pholaitiúil Eorpach a mhúnlú agus i dtoil pholaitiúil shaoránaigh an Aontais a chur in iúl.

Airteagal 204b Prionsabail

1.           Ní úsáidfear ranníocaíochtaí ach chun céatadán de chostais oibriúcháin páirtithe polaitiúla Eorpacha a aisíoc, ar costais iad atá nasctha go díreach le cuspóirí na bpáirtithe sin. Ní úsáidfear ranníocaíochtaí chun aon bhuntáiste phearsanta a thabhairt go díreach nó go hindíreach, in airgead tirim nó i gcomhchineál, d'aon bhall aonair nó ball foirne de pháirtí polaitiúil Eorpach.

2.           Ní úsáidfear ranníocaíochtaí le gníomhaíochtaí tríú páirtithe a chistiú, go háirithe páirtithe polaitiúla náisiúnta nó fondúireachtaí polaitiúla ar an leibhéal Eorpach nó an leibhéal náisiúnta, is cuma an i bhfoirm deontas, tabhartas, iasachtaí nó aon chomhaontuithe cosúla iad.

3.           Beidh ranníocaíochtaí faoi réir phrionsabail na trédhearcachta agus na córa comhionainne, i gcomhréir leis na critéir atá leagtha síos i Rialachán (AE) Uimh. [...].

4.           Dámhfaidh Parlaimint na hEorpa ranníocaíochtaí ar bhonn bliantúil agus foilseofar iad i gcomhréir le hAirteagal 35(2).

5.           Páirtithe polaitiúla Eorpacha a fhaigheann ranníocaíocht, ní bhfaighidh siad cistí eile ón mbuiséad chun na gcríoch céanna. Ní dhéanfar i gcás ar bith aon ítim costais a mhaoiniú faoi dhó ón mbuiséad.

Airteagal 204c Gnéithe buiséadacha

Íocfar ranníocaíochtaí ó chuid Pharlaimint na hEorpa den bhuiséad.

Airteagal 204d Glaoch ar ranníocaíochtaí

1.           Dámhfar ranníocaíochtaí trí bhíthin glaoch ar ranníocaíochtaí a fhoilseofar gach bliain, ar shuíomh gréasáin Pharlaimint na hEorpa ar a laghad.

2.           Ní féidir ach ranníocaíocht amháin in aghaidh na bliana a dhámhachtain ar pháirtí polaitiúil Eorpach.

3.           Ní féidir le páirtí polaitiúil Eorpach ranníocaíocht a fháil ach amháin má dhéanann sé iarratas ar chistiú ar na téarmaí agus na coinníollacha atá leagtha síos sa ghlaoch ar ranníocaíochtaí.

4.           Cinnfear sa ghlaoch ar ranníocaíochtaí na critéir incháilitheachta atá le comhlíonadh ag an iarratasóir mar aon leis na critéir eisiaimh.

5.           Cinnfear sa ghlaoch ar ranníocaíochtaí, ar a laghad, an cineál caiteachais is féidir a aisíoc leis an ranníocaíocht.

Airteagal 204e Nós imeachta um dhámhachtain

1.           Déanfar na hiarratais ar ranníocaíocht a chur isteach i scríbhinn, lena n‑áirítear, más iomchuí, i bhformáid leictreonach slán.

2.           Ní dhámhfar ranníocaíochtaí ar iarratasóirí, tráth an nós imeachta um dhámhachtain na ranníocaíochta, a mbaineann aon cheann de na cásanna dá dtagraítear in Airteagal 106(1) agus Airteagal 107 agus pointe (a) d'Airteagal 109(1) leo, ná ar iarratasóirí atá cláraithe sa bhunachar sonraí lárnach maidir le heisiamh dá dtagraítear in Airteagal 108.

3.           Ní mór d'iarratasóirí a dheimhniú nach mbaineann ceann de na cásanna dá dtagraítear i mír 2 leo.

4.           Dámhfar ranníocaíochtaí trí bhíthin comhaontú ranníocaíochtaí nó cinnidh mar atá sonraithe sa ghlaoch ar ranníocaíochtaí.

5.           Féadfaidh coiste a bheith de chúnamh ar an oifigeach údarúcháin chun measúnú a dhéanamh ar an gcinneadh dámhachtana agus chun é a ghlacadh. Sonróidh an t‑oifigeach údarúcháin na rialacha maidir le comhdhéanamh, ceapadh agus feidhmiú an choiste sin, agus rialacha chun coinbhleacht leasa a sheachaint.

Airteagal 204f Nós imeachta meastóireachta

1.           Roghnófar iarratais ar bhonn na gcritéar dámhachtana atá leagtha amach i Rialachán (AE) Uimh. [...] as measc iarratas a urramaíonn na critéir incháilitheachta agus eisiaimh.

2.           Cinnfear sna critéir incháilitheachta na coinníollacha faoina mbeidh iarratasóir in ann ranníocaíocht a fháil de réir na rialacha atá leagtha síos i Rialachán (AE) Uimh. [...].

3.           Luafar i gcinneadh an oifigigh údarúcháin atá freagrach an méid seo a leanas ar a laghad:

(a) an t‑ábhar agus méid foriomlán na ranníocaíochta;

(b) ainm na n‑iarratasóirí arna roghnú agus na méideanna arna nglacadh;

(c) ainmneacha aon iarratasóirí arna ndiúltú agus na cúiseanna leis an diúltú sin.

4.           Cuirfidh an t‑oifigeach údarúcháin atá freagrach an cinneadh maidir lena n‑iarratas in iúl do na hiarratasóirí i scríbhinn. Má dhiúltaítear an iarraidh ar ranníocaíocht nó mura ndámhtar na méideanna arna n‑iarraidh i bpáirt nó ina n‑iomláine, tabharfadh an t‑oifigeach údarúcháin na cúiseanna le diúltú an iarratais nó le gan na méideanna arna n‑iarraidh a dhámhachtain, ag tagairt go háirithe do na critéir incháilitheachta agus dámhachtana dá dtagraítear i mír 1 agus i mír 2.

Airteagal 204g Na cineálacha ranníocaíochtaí

1.           Féadfar ranníocaíochtaí a dhéanamh sna foirmeacha seo a leanas:

(a) aisíocaíocht ar chéatadán den chaiteachas iarbhír arna thabhú;

(b) aisíocaíocht ar bhonn costas aonaid;

(c) cnapshuimeanna;

(d) maoiniú ar ráta comhréidh;

(e) meascán de na cineálacha ranníocaíochtaí dá dtagraítear i bpointe (a) go pointe (d).

2.           Ní féidir ach an caiteachas a chomhlíonann na critéir arna mbunú sna glaonna ar ranníocaíochtaí agus nár tabhaíodh roimh an dáta ar a gcuirtear an t‑iarratas isteach a aisíoc.

Airteagal 204h  Rialacha maidir le ranníocaíocht

1.           Cumhdóidh cnapshuimeanna, i dtéarmaí domhanda, caiteachas áirithe is gá chun gníomhaíocht shonrach de chuid an pháirtí pholaitiúil Eorpaigh a thabhairt i gcrích. Ní úsáidfear cnapshuimeanna ach in éineacht le cineálacha eile ranníocaíochtaí.

2.           Cumhdóidh costas aonaid catagóirí ar fad nó catagóirí sonracha caiteachais inaisíoctha arna sonrú go soiléir roimh ré, trí thagairt a dhéanamh do mhéid in aghaidh an aonaid.

3.           Cumhdóidh maoiniú ar ráta comhréidh catagóirí sonracha de chaiteachas inaisíoctha arna sonrú go soiléir roimh ré, trí chéatadán a chur i bhfeidhm.

4.           I gcás ina n‑úsáidtear cnapshuimeanna, maoiniú ar ráta comhréidh agus costais aonaid, saineofar iad sa ghlaoch ar ranníocaíochtaí. Áireofar sa chomhaontú nó sa chinneadh maidir le ranníocaíochtaí, forálacha lena bhfíorófar gur urramaíodh na coinníollacha maidir le cnapshuimeanna, maoiniú ar ráta comhréidh nó costais aonaid a dhámhachtain.

Airteagal 204i Réamh‑mhaoiniú

Íocfar na ranníocaíochtaí i bhfoirm réamh‑mhaoinithe 100 %, ach amháin má chinneann an t‑oifigeach údarúcháin, i gcásanna a bhfuil údar cuí leo, a mhalairt.

Airteagal 204j  Ráthaíochtaí

Féadfaidh an t‑oifigeach údarúcháin atá freagrach, má mheasann sé é a bheith iomchuí agus comhréireach, ar bhonn cás ar chás agus faoi réir anailíse riosca, a cheangal ar an bpáirtí polaitiúil Eorpach ráthaíocht a chur isteach roimh ré chun na rioscaí airgeadais a bhaineann le réamh‑mhaoiniú a íoc a theorannú i gcás, faoi réir a mheasúnaithe riosca, go bhfuil gar-riosca ann go mbeidh an páirtí polaitiúil i gceann amháin de na cásanna a bhfuil tuairisc orthu i bpointí (a) agus (d) d'Airteagal 106(1), agus sa chás sin amháin, nó i gcás ina dtionscnaíonn Parlaimint na hEorpa go foirmiúil nós imeachta riaracháin a bhféadfadh toirmeasc agus/nó aisghairm a ranníocaíochta a bheith mar thoradh leis.

Beidh feidhm mutatis mutandis ag na forálacha atá leagtha síos in Airteagal 134 maidir leis an ráthaíocht réamh‑mhaoinithe do dheontais i ndáil le ráthaíochtaí a d'fhéadfaí a cheangal sna cásanna dá bhforáiltear sa mhír thuas i gcás íocaíochtaí réamh‑mhaoinithe a dhéantar le páirtithe polaitiúla Eorpacha.

Airteagal 204k Úsáid ranníocaíochtaí

1.           Déanfar ranníocaíochtaí a chaitheamh i gcomhréir le hAirteagal 204b.

2.           Déanfar aon chuid den ranníocaíocht nach n‑úsáidtear laistigh den bhliain airgeadais arna cumhdach leis an ranníocaíocht sin a chaitheamh ar aon chaiteachas inaisíoctha arna thabhú faoin 31 Nollaig de bhliain n+2. Gnóthófar an chuid eile den ranníocaíocht nach gcaitear laistigh den teorainn ama n+2 i gcomhréir le Caibidil 5 de Chuid a hAon.

3.           Urramóidh páirtithe polaitiúla Eorpacha an t‑uasráta cómhaoinithe arna bhunú i Rialachán xx/xxxx. Ní fhéadfar an méid atá fágtha de ranníocaíochtaí an dá bhliain roimhe sin a úsáid chun an chuid nach mór do pháirtithe polaitiúla Eorpacha a sholáthar óna n‑acmhainní féin a mhaoiniú.

4.           I dtús báire, úsáidfidh páirtithe polaitiúla Eorpacha na cistí nár úsáideadh sa bhliain airgeadais arna cumhdach leis an ranníocaíocht sula n‑úsáidfidh siad na ranníocaíochtaí arna ndámhachtain tar éis na bliana sin.

5.           Measfar gur cuid de ranníocaíocht an Aontais aon ús ar na híocaíochtaí réamh‑mhaoinithe.

Airteagal 204l Tuarascáil maidir le húsáid na ranníocaíochtaí

I gcomhréir leis na coinníollacha agus leis na teorainneacha ama arna leagan síos sa ghlaoch ar ranníocaíochtaí, cuirfidh an páirtí polaitiúil Eorpach a chuntais agus tuarascáil deiridh maidir le húsáid na ranníocaíochta faoi bhráid an oifigigh údarúcháin lena bhformheas.

Dréachtóidh an t‑oifigeach údarúcháin an tuarascáil bhliantúil gníomhaíochta dá dtagraítear in Airteagal 66(9) ar bhonn na gcuntas agus na tuarascála deiridh dá dtagraítear sa chéad mhír. Féadfaidh sé aon doiciméid tacaíochta eile a úsáid chun críocha a thuarascála.

Airteagal 204m  An t‑iarmhéid a íoc

1.           Ní dhéanfar cinneadh deiridh maidir le méid na ranníocaíochta go dtí go bhfuil an tuarascáil deiridh agus na cuntais dá dtagraítear in Airteagal 204l glactha ag an oifigeach údarúcháin. Glacfar an tuarascáil agus na cuntais gan dochar do sheiceálacha a dhéanfaidh Parlaimint na hEorpa ina dhiaidh sin.

2.           Ní dhéanfar cinneadh deiridh maidir leis an méid den réamh‑mhaoiniú nach bhfuil caite go dtí go bhfuil an réamh‑mhaoiniú úsáidte ag an bpáirtí polaitiúil Eorpach chun caiteachas inaisíoctha a íoc

3.           I gcás ina dteipeann ar an bpáirtí polaitiúil Eorpach na hoibleagáidí a bhaineann le húsáid na ranníocaíochta a chomhlíonadh, déanfar na ranníocaíochtaí a fhionraí, a laghdú nó deireadh a chur leo tar éis an deis a thabhairt don pháirtí polaitiúil Eorpach a bharúlacha a chur i láthair.

4.           Sula ndéanfar an t‑iarmhéid a íoc, fíoróidh an t‑oifigeach údarúcháin go bhfuil an páirtí polaitiúil Eorpach cláraithe fós sa chlár dá dtagraítear in Airteagal 6 de Rialachán (AE) Uimh. [...] agus nach raibh sé faoi réir aon cheann de na pionóis dá bhforáiltear in Airteagal 22 den Rialachán sin idir dáta a chur i bhfeidhm agus deireadh na bliana airgeadais arna cumhdach leis an ranníocaíocht.

5.           I gcás nach bhfuil an páirtí polaitiúil Eorpach cláraithe a thuilleadh sa Chlár dá dtagraítear in Airteagal 6 de Rialachán (AE) Uimh. [...] nó i gcás ina raibh sé faoi réir aon cheann de na pionóis dá bhforáiltear in Airteagal 22 den Rialachán sin, féadfaidh an t‑oifigeach údarúcháin atá freagrach an ranníocaíocht a fhionraí, a laghdú nó deireadh a chur léi agus méideanna a íocadh go míchuí faoin gcomhaontú nó faoin gcinneadh deontais a ghnóthú, i gcomhréir le tromchúis na n‑earráidí, na mírialtachtaí, na calaoise, nó sáraithe ar bith eile ar na hoibleagáidí a bhaineann le húsáid na ranníocaíochta, tar éis an deis a thabhairt don pháirtí polaitiúil a bharúlacha a chur i láthair.

Airteagal 204n Rialú agus pionóis

1.           I ngach comhaontú nó cinneadh i dtaca le ranníocaíocht, déanfar foráil shainráite maidir le feidhmiú chumhachtaí Pharlaimint na hEorpa, na hOifige Eorpaí Frith‑Chalaoise agus na Cúirte Iniúchóirí maidir le rialú, ar bhonn doiciméad agus ar an láthair, ar na páirtithe polaitiúla Eorpacha agus na conraitheoirí agus fochonraitheoirí ar fad a fuair cistí ón Aontas.

2.           Féadfaidh an t‑oifigeach údarúcháin pionóis riaracháin agus airgeadais atá éifeachtach, comhréireach agus athchomhairleach a fhorchur ar iarratasóirí, i gcomhréir le hAirteagal 109 den Rialachán seo, gan dochar d'Airteagal 22(7) de Rialachán (AE) Uimh. [...].

3.           Féadfar na pionóis dá dtagraítear i mír 2 a fhorchur freisin ar pháirtithe polaitiúla Eorpacha a rinne, tráth a cuireadh isteach an t–iarratas ar ranníocaíocht nó tar éis an ranníocaíocht a fháil, dearbhuithe bréagacha agus an fhaisnéis a d'iarr an t‑oifigeach údarúcháin á soláthar nó ar pháirtithe polaitiúla Eorpacha nár sholáthar an fhaisnéis sin.

Airteagal 204o Taifid a choinneáil

1.           Coinneoidh na páirtithe polaitiúla Eorpach taifid, doiciméid tacaíochta, agus taifid eile is ábhartha maidir leis an ranníocaíocht ar feadh cúig bliana tar éis an tuarascáil deiridh agus na cuntas dá dtagraítear in Airteagal 204l a chur isteach.

2.           Coinneofar taifid a bhaineann le hiniúchóireachtaí, achomhairc, dlíthíocht nó réiteach éileamh a eascraíonn as úsáid na ranníocaíochta go dtí go dtiocfaidh deireadh leis na hiniúchóireachtaí, na hachomhairc, an dlíthíocht nó réiteach na n‑éileamh sin.

___________________

(*)     IO L […]

"

(2)          Cuirtear pointe (j) isteach i mír 2 d'Airteagal 121 mar seo a leanas:

" (j) ranníocaíochtaí leis na páirtithe polaitiúla Eorpacha dá dtagraítear i dTeideal VIII de Chuid a Dó."

(3)          Scriostar an dara fomhír d'Airteagal 125(3) agus mír 6 d'Airteagal 125.

Airteagal 2

Tiocfaidh an Rialachán seo i bhfeidhm ar an bhfichiú lá tar éis a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus infheidhme go díreach i ngach Ballstát.

Arna dhéanamh sa Bhruiséil,

Thar ceann Pharlaimint na hEorpa              Thar ceann na Comhairle

                                                                      

An tUachtarán                                               An tUachtarán

[1]               Rialachán (AE, Euratom) Uimh. 966/2012 ó Pharlaimint na hEorpa agus ón gComhairle an 25 Deireadh Fómhair 2012 maidir leis na rialacha airgeadais is infheidhme i ndáil le buiséad ginearálta an Aontais agus lena n‑aisghairtear Rialachán (CE, Euratom) Uimh. 1605/2002 ón gComhairle. (IO L 298, 26.10.2012, lch. 1.)

[2]               COM 499/2012 final, 12.9.2012

[3]               Rialachán (CE) Uimh. 2004/2003 ó Pharlaimint na hEorpa agus ón gComhairle an 4 Samhain 2003 maidir leis na rialacháin lena rialaítear páirtithe polaitiúla ar leibhéal Eorpach agus maidir leis na rialacha a bhaineann lena gcistiú. (IO L 297, 15.11.2003, lch. 1)

[4]               "Maidir le cur i bhfeidhm Rialachán (CE) Uimh. 2004/2003 maidir leis na rialacháin lena rialaítear páirtithe polaitiúla ar an leibhéal Eorpach agus maidir leis na rialacha a bhaineann lena gcistiú an 15 Márta 2011" – (2010/2201 INI)

[5]               Rialachán (CE) Uimh. 1605/2002 an 25 Meitheamh 2002 (IO L 248, 16.9.2002, lch. 1),

[6]               Doiciméad inmheánach oibre an Choimisiúin COM 500/2012 final, 19.9.2012 lena réamhfhíoraítear an togra le haghaidh leasú ar an Rialachán Airgeadais lena dtugtar isteach teideal nua maidir le maoiniú páirtithe polaitiúla Eorpacha.

[7]           IO […], […], lch. […].

[8]               IO L 297, 15.11.2003, lch. 1.

[9]               2010/2201 (INI).

[10]             IO L …

[11]             IO L 298, 26.10.2012, lch 1.