MEABHRÁN MÍNIÚCHÁIN

1.           COMHTHÉACS AN TOGRA

An 2 Feabhra 2012, rinne Cúirt Bhreithiúnais na hEorpa i gcás C-249/10 P[1] – Brosmann Footwear (HK) agus Daoine Eile v. an Chomhairle (‘Brosmann’) Rialachán ón gComhairle (CE) Uimh. 1472/2006 an 5 Deireadh Fómhair 2006 lena bhforchuirtear dleacht chinntitheach frithdhumpála agus lena mbailítear go cinntitheach an dleacht shealadach a forchuireadh ar allmhairithe coisbheart uachtar leathair áirithe dar tionscnamh Daon-Phoblacht na Síne agus Vítneam a neamhnú a mhéid a bhaineann sé leis na hiarratasóirí. Sa bhreithiúnas a thug sí, rialaigh an Chúirt Bhreithiúnais nach bhféadfar an teicníc samplála atá leagtha síos in Airteagal 17 de Rialachán (CE) Uimh. 1225/2009 a chur i bhfeidhm chun críocha éilimh a chinneadh maidir le láimhseáil geilleagair mhargaidh a dhéantar faoi réir Airteagal 2(7)(c). Sa bhreithiúnas a thug sí, chinn an Chúirt go bhfuil na táirgeoirí comhoibríocha nach n‑áirítear sa sampla iad, i dteideal scrúdaithe ar a n‑éileamh maidir le láimhseáil geilleagair mhargaidh, is cuma cé acu an raibh corrlach dumpála aonair le ríomh do na cuideachtaí sin lasmuigh den sampla nó nach raibh. Mheabhraigh Cúirt Bhreithiúnas na hEorpa fosta go bhfuil an cinneadh faoi réir Airteagal 2(7)(c) le déanamh faoi cheann trí mhí tar éis thionscnamh an imscrúdaithe.

Chuirfeadh an rialú ó Chúirt Bhreithiúnais na hEorpa maidir le cur chun feidhme Rialachán (CE) Uimh. 1225/2009 ceangal ar an gCoimisiún na hiarratais go léir maidir le láimhseáil geilleagair mhargaidh a rinne táirgeoirí comhoibríocha nach n‑áirítear sa sampla iad a chur isteach, a scrúdú, is cuma cad é líon na dtáirgeoirí. Chuirfeadh an cleachtas sin ualach riaracháin díréireach ar údaráis imscrúdúcháin an Aontais, áfach. Ar an ábhar sin, is iomchuí Rialachán (CE) Uimh. 1225/2009 a leasú, agus go háirithe leasú a dhéanamh ar an teorainn ama trí mhí nach mór don Choimisiún cinneadh a dhéanamh maidir le hiarratais ar láimhseáil geilleagair mhargaidh laistigh di.

Ba cheart a thabhairt faoi deara chomh maith, nach sárú í ar oibleagáidí an Aontais faoi rialacha na hEagraíochta Domhanda Trádála an teicníc samplála dá bhforáiltear in Airteagal 17 de Rialachán (CE) Uimh. 1225/2009 chun críocha éilimh a chinneadh maidir le láimhseáil geilleagair mhargaidh a dhéantar faoi réir Airteagal 2(7)(c) den Rialachán sin. Mar shampla, chinn painéal Chomhlacht um Réiteach Díospóide na hEagraíochta Domhanda Trádála i ndíospóid DS405 (an tAontas Eorpach — Bearta frithdhumpála maidir le Coisbhearta Áirithe ón tSín, tuarascáil a glacadh an 22 Feabhra 2012) nár shuigh an tSín gur ghníomhaigh an tAontas Eorpach ar neamhréir le hAirteagal 2.4 agus le hAirteagal 6.10.2 den Chomhaontas Frithdhumpála, Mír 15(a)(ii) de Phrótacail Aontachais na Síne, agus Míreanna 151(e) agus (f) de Thuarascáil Meithle faoi Aontachas na Síne nuair nár scrúdaigh sé na hiarratais ar láimhseáil geilleagair mhargaidh a rinne táirgeoirí comhoibríocha Síneacha, nár áiríodh sa sampla le haghaidh an imscrúdúcháin shrianta bhunaidh iad, a chur isteach.

Ar an ábhar sin, tar éis an cúlra sin a chur san áireamh agus ar chúiseanna maidir le deimhneacht dhlíthiúil, meastar gur iomchuí foráil a thabhairt isteach chun a shoiléiriú go bhfuil an cinneadh sin nach ndéanfaí imscrúdú ach ar líon réasúnta táirgeoirí trí shamplaí a úsáid ar bhonn Airteagal 17 de Rialachán (CE) Uimh. 1225/2009 infheidhme fosta maidir leis na páirtithe atá faoi réir scrúdú maidir le láimhseáil geilleagair mhargaidh a chur orthu, i gcomhréir le hAirteagal 2(7)(b) agus le hAirteagal 2(7)(c). Dá bharr sin, is iomchuí fosta a shoiléiriú nár cheart cinneadh faoi Airteagal 2(7)(c) a dhéanamh maidir le táirgeoirí nach n‑áirítear sa sampla iad mura n‑iarrfadh na táirgeoirí sin scrúdú aonair i gcomhréir le hAirteagal 17(3) agus mura lámhálfaí an t‑iarratas.

Lena chois sin, meastar gur iomchuí a shoiléiriú nach mbeidh an dleacht frithdhumpála, atá le cur i bhfeidhm maidir le hallmhairí ó tháirgeoirí a chuir iad féin in aithne i gcomhréir le hAirteagal 17 ach nár áiríodh sa scrúdú iad, nach mbeidh an dleacht sin níos mó ná an meánchorrlach meáite dumpála arna shocrú do na páirtithe sa sampla, is cuma cé acu ar cinneadh an gnáthluach a socraíodh do na páirtithe sin ar bhonn Airteagail 2(1) go 2(6) nó Airteagal 2(7)(a) nó nár cinneadh.

Ar deireadh, léiríodh nárbh fhéidir cinneadh de bhun Airteagal 2(7)(c) a dhéanamh laistigh de thrí mhí, mar a bhí ceangailte, i gcás cuid mhór nósanna imeachta dumpála, go háirithe má bhí an tsampláil á cur i bhfeidhm i gcomhréir le hAirteagal 17. Ina thogra chun rialacháin áirithe a leasú chun comhsheasmhacht a áirithiú leis na forálacha a tugadh isteach i gConradh Liospóin ('Omnibus um Thrádáil I’)[2], chuir an Coimisiún isteach leasú chun sé mhí a chur leis an teorainn ama in Airteagal 2(7)(c) de Rialachán (CE) Uimh. 1225/2009 ón gComhairle (pointe 1 de Cheannteideal 24 in Iarscríbhinn do ‘Omnibus um Thrádáil I’). I bhfianaise chinneadh Brosmann maidir leis an teorainn ama sin (lena ndearnadh idiragairt bliain amháin tar éis chur chun cinn an togra Omnibus I), meastar nach leor feasta sé mhí a chur leis an teorainn ama, ar chúiseanna maidir le deimhneacht dhlíthiúil. Ina ionad sin, meastar gur mó is iomchuí an teorainn ama sin a bhaint de Rialachán (CE) Uimh. 1225/2009. Ar an ábhar sin, ba cheart don Choimisiún scor dá iarrachtaí an teorainn ama in Airteagal 2(7)(c) a leasú i gcomhthéacs an togra Omnibus um Thrádála I, agus a intinn a chur in iúl don Chomhairle agus don Pharlaimint.

Ar mhaithe le deimhneacht dhlíthiúil agus priosabal an dea‑riaracháin, ní mór foráil a dhéanamh go dtiocfaidh na leasuithe sin i bhfeidhm a luaithe is féidir maidir leis na himscrúduithe nua go léir agus maidir leis na himscrúduithe go léir atá ar feitheamh.

2.           TORTHAÍ COMHAIRLIÚCHÁN LEIS NA PÁIRTITHE LEASMHARA AGUS NA MEASÚNUITHE TIONCHAIR

Níl infheidhme.

3.           EILIMINTÍ DLÍ AN TOGRA

· Bunús dlí

Is é Airteagal 207(2) den Chonradh ar Fheidhmiú an Aontais Eorpaigh is bunús dlí don togra seo, agus is i gcomhréir leis an mbunús dlí sin a dhéanfaidh Parlaimint na hEorpa agus an Chomhairle, ag gníomhú dóibh trí bhíthin rialachán i gcomhréir leis an ngnáthnós imeachta reachtach, na bearta a ghlacadh a shaineoidh an creat chun an comhbheartas tráchtála a chur chun feidhme.

Leasaítear leis an togra seo Rialachán (CE) Uimh. 1225/2009 ón gComhairle a bhí bunaithe ar an bhforáil choibhéiseach sa Chonradh ag bunú an Chomhphobail Eorpaigh, i.e. Airteagal 133.

· Prionsabal na Coimhdeachta

De bhun Airteagal 3(1)(e) den Chonradh ar Fheidhmiú an Aontais Eorpaigh, tagann an togra faoi inniúlacht eisiach an Aontais. Dá bhrí sin, níl feidhm ag prionsabal na coimhdeachta.

· Prionsabal na Comhréireachta

Comhlíonann an togra prionsabal na comhréireachta.

· Rogha na n-ionstraimí

An ionstraim atá beartaithe: Rialachán ó Pharlaimint na hEorpa agus ón gComhairle.

Ní bheadh modhanna eile leormhaith ar an gcúis seo a leanas: ní mór Rialachán a leasú le Rialachán eile.

4.           IMPLEACHT BHUISÉADACH

Níl infheidhme.

5.           EILIMINTÍ ROGHNACHA

Níl infheidhme.

2012/0145 (COD)

Togra le haghaidh

RIALACHÁIN Ó PHARLAIMINT NA hEORPA AGUS ÓN gCOMHAIRLE

lena leasaítear Rialachán (CE) Uimh. 1225/2009 ón gComhairle maidir le cosaint i gcoinne allmhairí dumpáilte ó thíortha nach baill den Chomhphobal Eorpach iad

TÁ PARLAIMINT NA hEORPA AGUS COMHAIRLE AN AONTAIS EORPAIGH

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 207 de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na parlaimintí náisiúnta,

Ag gníomhú dóibh i gcomhréir leis an ngnáthnós imeachta reachtach,

De bharr an méid seo a leanas:

(1)       I gCás C‑249/10 P[3], rialaigh Cúirt Bhreithiúnais na hEorpa nach bhféadfar an teicníc samplála dá bhforáiltear in Airteagal 17 de Rialachán (CE) Uimh. 1225/2009 ón gComhairle an 30 Samhain 2009 maidir le cosaint i gcoinne allmhairí dumpáilte ó thíortha nach baill den Chomhphobal Eorpach[4] iad a chur chun feidhme chun críocha éilimh a chinneadh maidir le láimhseáil geilleagair mhargaidh atá le déanamh faoi réir Airteagal 2(7)(c) den Rialachán sin.

(2)       Chuirfeadh an rialú ó Chúirt Bhreithiúnais na hEorpa de cheangal ar an gCoimisiún go scrúdódh sé na héilimh go léir ar láimhseáil geilleagair mhargaidh a dhéanfeadh táirgeoirí comhoibríocha nach n‑áirítear sa sampla iad a chur isteach, bíodh a líon mór nó beag. Chuirfeadh an cleachtas sin ualach díréireach ar údaráis imscrúdúcháin an Aontais, áfach. Is iomchuí, dá bhrí sin, Rialachán (CE) Uimh. 1225/2009 ón gComhairle a leasú.

(3)       Lena chois sin, ceadaítear úsáid na teicníce samplála dá bhforáiltear in Airteagal 17 de Rialachán (CE) Uimh. 1225/2009 chun críocha éilimh a chinneadh maidir le láimhseáil geilleagair mhargaidh a dhéantar faoi réir Airteagal 2(7)(c) den Rialachán sin faoi rialacha na hEagraíochta Domhanda Trádála. Mar shampla, chinn painéal Chomhlacht um Réiteach Díospóide na hEagraíochta Domhanda Trádála i ndíospóid DS405 (an tAontas Eorpach — Bearta frithdhumpála maidir le Coisbhearta Áirithe ón tSín, tuarascáil a glacadh an 22 Feabhra 2012) nár shuigh an tSín gur ghníomhaigh an tAontas Eorpach ar neamhréir le hAirteagal 2.4 ná le hAirteagal 6.10.2 den Chomhaontas Frithdhumpála, Mír 15(a)(ii) de Phrótacal Aontachas na Síne, agus Mír 151(e) agus (f) de Thuarascáil Meithle faoi Aontachas na Síne, nuair nár scrúdaigh sé na hiarratais ar láimhseáil geilleagair mhargaidh a rinne táirgeoirí onnmhairiúcháin comhoibríocha Síneacha nár áiríodh sa sampla le haghaidh an imscrúdaithe shrianta bhunaidh iad, a chur isteach.

(4)       Ar an ábhar sin, tar éis an cúlra sin a chur san áireamh agus ar chúiseanna maidir le deimhneacht dhlíthiúil, meastar gur iomchuí foráil a thabhairt isteach chun a shoiléiriú go bhfuil an cinneadh sin nach ndéanfaí imscrúdú ach ar líon réasúnta páirtithe trí shamplaí a úsáid ar bhonn Airteagal 17 de Rialachán (CE) Uimh. 1225/2009 infheidhme fosta maidir leis na páirtithe atá faoi réir scrúdú i gcomhréir le hAirteagal 2(7)(b) agus le hAirteagal 2(7)(c). Dá bharr sin, is iomchuí fosta a shoiléiriú nár cheart cinneadh faoi Airteagal 2(7)(c) a dhéanamh maidir le táirgeoirí a dhéanann onnmhairiú nach n‑áirítear sa sampla iad mura n‑iarrfaidh na táirgeoirí sin imscrúdú aonair agus mura lámhálfar an t‑iarratas i gcomhréir le hAirteagal 17(3).

(5)       Lena chois sin, meastar gur iomchuí a shoiléiriú nach mbeidh an dleacht frithdhumpála atá le cur i bhfeidhm maidir le hallmhairí ó onnmhaireoirí nó ó tháirgeoirí a chuir iad féin in aithne de réir Airteagal 17 ach nár áiríodh sa scrúdú iad thar an meánchorrlach meáite dumpála arna shocrú do na páirtithe sa sampla, is cuma cé acu ar cinneadh an gnáthluach a socraíodh do na páirtithe sin ar bhonn Airteagail 2(1) go 2(6) nó Airteagal 2(7)(a) nó nár cinneadh.

(6)       Ar deireadh, léiríodh nárbh fhéidir cinneadh de bhun Airteagal 2(7)(c) a dhéanamh laistigh de thrí mhí, mar a bhí ceangailte, i gcás nósanna imeachta, go háirithe má bhí sampláil a bhí i gcomhréir le hAirteagal 17 á cur i bhfeidhm. Meastar, dá bhrí sin, gurb iomchuí an teorainn sin a bhaint.

(7)       Ar mhaithe le deimhneacht dhlíthiúil agus priosabal an dea-riaracháin, ní mór foráil a dhéanamh go dtiocfaidh na leasuithe sin i bhfeidhm a luaithe is féidir maidir leis na himscrúduithe nua go léir agus maidir leis na himscrúduithe go léir atá ar feitheamh.

(8)       Ba cheart mar sin Rialachán (CE) Uimh. 1225/2009 ón gComhairle a leasú dá réir sin,

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán (CE) Uimh. 1225/2009 ón gComhairle mar seo a leanas:

(1) Leasaítear Airteagal 2(7) mar seo a leanas:

(a) Mionathraítear an abairt leathdhéanach de fhomhír (c) mar seo a leanas:

Scriostar na téarmaí "faoi cheann trí mhí ó thionscnamh an imscrúdaithe".

Cuirtear isteach an fhomhír (d) seo a leanas:

"(d) Nuair a bheidh teorainn curtha ag an gCoimisiún lena scrúdú i gcomhréir le hAirteagal 17, ní bhainfidh cinneadh de bhun fhomhír (b) agus fhomhír (c) ach leis na páirtithe a áiríodh sa scrúdú iad agus le haon táirgeoir dá dtugtar láimhseáil aonair de bhun Airteagal 17(3)".

(2) In Airteagal 9(6), cuirtear an méid seo a leanas in ionad na chéad abairte:

"Nuair a bheidh teorainn curtha ag an gCoimisiún lena scrúdú i gcomhréir le hAirteagal 17, ní rachaidh aon dleacht frithdhumpála a chuirfear i bhfeidhm ar allmhairí ó onnmhaireoirí nó ó tháirgeoirí a chuir iad féin in aithne de réir Airteagal 17 ach nár áiríodh sa scrúdú iad thar an meánchorrlach meáite dumpála arna shocrú do na páirtithe sa sampla, is cuma cé acu ar cinneadh an gnáthluach do na páirtithe sin ar bhonn Airteagail 2(1) go 2(6) nó Airteagal 2(7)a nó nár cinneadh.

Airteagal 2

Beidh an Rialachán seo infheidhme maidir leis na himscrúduithe nua go léir agus maidir leis na himscrúduithe go léir a bheidh ar feitheamh tráth a thiocfaidh an Rialachán seo i bhfeidhm.

Airteagal 3

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus infheidhme go díreach i ngach Ballstát.

Arna dhéanamh sa Bhruiséil,

Thar ceann Pharlaimint na hEorpa              Thar ceann na Comhairle

An tUachtarán                                               An tUachtarán

[1]               Cás C‑294/10 P – Brosmann Footwear (HK) agus Daoine Eile v. an Chomhairle, Breithiúnas an 2 Feabhra 2012 (nár foilsíodh go fóill san ECR).

[2]               Togra le haghaidh Rialacháin ó Pharlaimint na hEorpa agus ón gComhairle lena leasaítear rialacháin áirithe a bhaineann leis an gcomhbheartas tráchtála maidir leis na nósanna imeachta chun bearta áirithe a ghlacadh (COM(2011) 82 leagan deireanach).

[3]               Cás C‑249/10 P – Brosmann Footwear (HK) agus Daoine Eile v. an Chomhairle, Breithiúnas an 2 Feabhra 2012.

[4]               IO L 343, 22.12.2009, lch. 51.