Togra le haghaidh RIALACHÁIN Ó PHARLAIMINT NA hEORPA AGUS ÓN gCOMHAIRLE maidir le rochtain earraí agus seirbhísí tríú tíortha ar mhargadh inmheánach soláthair phoiblí an Aontais agus maidir le nósanna imeachta atá ceaptha an chaibidlíocht i leith rochtain earraí agus seirbhísí an Aontais ar mhargaí soláthair phoiblí tríú tíortha a éascú /* COM/2012/0124 final - 2012/0060 (COD) */
MEABHRÁN MÍNIÚCHÁIN 1. COMHTHÉACS AN TOGRA Forais agus cuspóirí an togra Is togra nua é seo a bhaineann le beartas
idirnáisiúnta an Aontais Eorpaigh maidir le soláthar. Is é is príomhchuspóir
don tionscnamh seo feabhas a chur ar na coinníollacha faoinar féidir do
ghnólachtaí an AE dul san iomaíocht le haghaidh conarthaí poiblí i dtríú
tíortha. I láthair na huaire, bíonn soláthróirí ón AE i ngleic leis an iomad
cleachtas sriantach i ndáil le soláthar i gcuid mhór de na tíortha arb iad
príomh‑chomhpháirtithe trádála an AE iad. Lena chois sin, daingnítear leis an
tionscnamh seo stádas dlíthiúil tairgeoirí, earraí agus seirbhísí ó thíortha a
bhfuil comhaontú idirnáisiúnta acu leis an AE i réimse an tsoláthair phoiblí
agus soiléirítear leis na rialacha is infheidhme ar thairgeoirí, ar earraí agus
ar sheirbhísí nach bhfuil cumhdaithe ag na comhaontuithe sin. Comhthéacs ginearálta Le linn na caibidlíochta i dtaobh an
athbhreithnithe ar an gComhaontú maidir le Soláthar Rialtais (CSR) faoi
choimirce na hEagraíochta Domhanda Trádála agus le linn na caibidlíochta
déthaobhaí le tríú tíortha, chuir an AE chun cinn oscailt ardaidhmeannach a
dhéanamh ar mhargaí soláthair phoiblí go hidirnáisiúnta. Tá luach tuairim is EUR 352 billiún ar na
margaí soláthair phoiblí de chuid an AE atá ar oscailt do thairgeoirí ó
thíortha ar comhaltaí iad de chomhaontú na hEagraíochta Domhanda Trádála maidir
le soláthar rialtais. Tá leisce, áfach, ar chuid mhór tríú tíortha a
margaí soláthair a oscailt d'iomaíocht idirnáisiúnta, nó na margaí sin a
oscailt a thuilleadh. Níl ach luach EUR 178 billiún ar na margaí soláthair
de chuid na Stát Aontaithe ar fáil do thairgeoirí coigríche, agus níl ach luach
EUR 27 billiún orthu i gcás na Seapáine, san am céanna, níl ach cuid an‑bheag
de mhargadh soláthair phoiblí na Síne ar oscailt do ghnólachtaí coigríche. Tá bearta cosantacha glactha ag cuid mhór tíortha
freisin, agus chuir an ghéarchéim eacnamaíoch leis an gclaonadh sin. Ar an
iomlán, tá níos mó ná an leathchuid de mhargadh soláthair an domhain as rochtain
de dheasca beart cosantach, agus is i méid atá an chuid sin ag dul. Dá
bhrí sin, ní théann ach luach EUR 10 billiún d'onnmhairí ón AE
(0.08 % d’Olltáirgeacht intíre an AE) isteach i margaí soláthair an
domhain, agus meastar go bhfuil luach EUR 12 billiún ar na honnmhairí ón
AE nach ndéantar de dheasca srianta. Os a choinne sin, choinnigh an AE an chuid is
mó dá mhargadh soláthair phoiblí ar oscailt d'iomaíocht idirnáisiúnta, in
ainneoin an mhéadaithe faoin mbrú ar a mhargadh intíre, go mór mór an brú a bhí
na geilleagair éiritheacha a chur ar phríomhearnálacha áirithe (iarnróid,
foirgníocht, seirbhísí TF). Seachas roinnt forálacha a raibh a raon feidhme
srianta go conarthaí soláthair agus seirbhíse in earnáil na bhfóntas[1], níor úsáid an AE an chumhacht
atá aige chun rialáil a dhéanamh ar an rochtain atá ag cuideachtaí coigríche,
agus ag a n‑earraí agus a seirbhísí, ar mhargadh soláthair phoiblí an AE. I bhfianaise an mhéadaithe atá faoi
gheilleagair mhargaidh éiritheacha, tá a lán fadhbanna ag eascairt as an easpa
cothroim iomaíochta. An phríomhfhadhb atá ag an AE nach bhfuil giaráil aige ina
chuid caibidlíochta idirnáisiúnta le comhpháirtithe trádála chun an
éagothromaíocht a cheartú agus chun gealltanais mhóra maidir le rochtain ar
mhargaí a bhaint amach ar son ghnólachtaí an AE. Lena chois sin, níl creat
soiléir ag údaráis chonarthacha a thabharfadh ar a gcumas gealltanais
idirnáisiúnta an AE a chur i bhfeidhm. Tá an tionscnamh seo dírithe ar na fadhbanna
sin a réiteach, ar an gcéad dul síos, trí dhaingniú a dhéanamh ar sheasamh an
Aontais Eorpaigh agus é i mbun caibidlíochta maidir le rochtain cuideachtaí de
chuid an AE ar mhargaí soláthair phoiblí tríú tíortha, chun margaí ár
gcomhpháirtithe trádála a oscailt tuilleadh. Ar an dara dul síos, tá sé d'aidhm
ag an tionscnamh soiléiriú a dhéanamh, chun na críche sin, ar na rialacha
maidir le rochtain cuideachtaí tríú tíortha, agus a n‑earraí agus a seirbhísí,
ar mhargadh soláthair phoiblí an AE. Sa deireadh thiar, is é is cuspóir don
tionscnamh feabhas a chur, de réir straitéis 2020 an AE, ar na deiseanna
gnó atá ag gnólachtaí ón AE ar leibhéal an domhain, rud a chruthóidh poist nua
agus a chothóidh nuálaíocht. Forálacha atá ann faoi láthair a
bhaineann leis an togra Sa dá bhuntreoir de chuid an Aontais Eorpaigh[2] a bhaineann le soláthar poiblí
níl creat ginearálta le fáil chun déileáil le tairiscintí a chuimsíonn earraí
coigríche agus seirbhísí coigríche ar mhargadh soláthair phoiblí an AE. Tá a
bhfuil de rialacha sonracha ann leagtha amach in Airteagal 58 agus in Airteagal 59
de Threoir 2004/17/CE. Ní chumhdaíonn na forálacha sin ach soláthar i
gcomhair seirbhísí fóntais, áfach, agus tá a raon feidhme róchúng le tionchar
mór a imirt ar chaibidlíocht maidir le rochtain ar an margadh. Go deimhin, níl
i gceist le soláthar poiblí an AE in earnáil na bhfóntas ach tuairim is
20 % de mhargadh iomlán soláthair phoiblí an AE. Sa togra ón gCoimisiún maidir le nuachóiriú
rialacha an AE maidir le soláthar poiblí, chinn an Coimisiún ceal a chur in Airteagal 58
agus in Airteagal 59 den Treoir maidir le fóntais , ó bhí an tionscnamh
seo beartaithe[3]. Comhsheasmhacht le beartais agus cuspóirí
eile an Aontais Cuirtear chun
feidhme leis an tionscnamh seo an straitéis Eoraip 2020 maidir le fás
cliste inbhuanaithe agus cuimsitheach [COM(2010) 2020] agus tionscnamh
suaitheanta Eoraip 2020 maidir le beartas comhtháite tionsclaíoch do ré an
domhandaithe [COM(2010) 614]. Cuirtear chun feidhme leis freisin an Gníomh
um an Margadh Aonair [COM(2011) 206] agus an Teachtaireacht maidir le Trádáil,
Fás agus Cúrsaí Domhanda [COM(2010) 612]. Is tionscnamh straitéiseach de
chuid Chlár Oibre an Choimisiúin 2011 é (COM(2010) 623 final). Tá an togra seo comhsheasmhach le beartais
forbartha agus le cuspóirí forbartha an Aontais, agus léirítear an chomhsheasmhacht
sin go háirithe trí earraí agus seirbhísí ó na tíortha is lú forbairt a
chosaint go ginearálta ar aon bheart faoin ionstraim seo. 2. TORTHAÍ AN CHOMHAIRLIÚCHÁIN LEIS NA
PÁIRTITHE LEASMHARA AGUS NA MEASÚNUITHE TIONCHAIR Comhairliúchán leis na páirtithe
leasmhara Reáchtáil an
Coimisiún sraith comhairliúchán agus imeachtaí for‑rochtana, maille le
cruinnithe aonair, chun tuairimí páirtithe leasmhara a bhailiú. Rinneadh comhairliúchán
oscailte ar líne idir an 7 Meitheamh agus an 2 Lúnasa 2011.
Is é a bhí ann trí cheistneoir mhionsonraithe dírithe (i) ar údaráis
chonarthacha agus ar na Ballstáit, (ii) ar chuideachtaí agus/nó ar a n‑ionadaithe,
agus (iii) ar pháirtithe eile a d'fhéadfadh leas a bheith acu ann (saoránaigh,
eagraíochtaí neamhrialtais, ceardchumainn). Fuair an Coimisiún 215 freagra san
iomlán[4].
Tá tuarascáil achomair ar na freagraí le fáil in Iarscríbhinn I a ghabhann
leis an tuarascáil ar an Measúnú Tionchair. Mar chuid den phróiseas sin,
reáchtáil an Coimisiún éisteacht phoiblí an 8 Meitheamh 2011 sa
Bhruiséil. Lena chois sin, bhí deis ag comhpháirtithe sóisialta a dtuairimí a
chur in iúl le linn an Fhóraim Chomhchaidrimh a reáchtáil Ard‑Stiúrthóireacht
na Fostaíochta an 7 Feabhra 2011. Rinneadh comhairliúcháin ar leith freisin le toscaireachtaí
de chuid an AE i dtríú tíortha agus leis na Ballstáit sa Choiste
Comhairleach um Chonarthaí Poiblí. Pléadh ábhair ar leith (i.e. Airteagal 58
den Treoir maidir le fóntais agus an dóigh le déileáil le tairiscintí atá thar
a bheith íseal) le linn an chomhairliúcháin i ndáil le nuachóiriú an bheartais
maidir le soláthar poiblí. Comhlíonadh ina n‑iomláine íoschaighdeáin an
Choimisiúin maidir le comhairliúcháin. Achoimre ar
na freagraí agus ar an dóigh ar cuireadh san áireamh iad Go ginearálta, bhí
fáilte roimh thionscnamh an Choimisiúin. D’aontaigh formhór mór na bhfreagróirí
le tuairisc an Choimisiúin ar an leibhéal rochtana atá ag cuideachtaí
coigríche, agus ag a n‑earraí agus a seirbhísí, faoi láthair ar mhargadh
soláthair phoiblí an AE agus bhí siad i bhfách le cuspóirí sainaitheanta an
tionscnaimh. I dtaca leis na
roghanna beartais ar cuireadh síos orthu, ní mór a lua nárbh ionann na tuairimí
a cuireadh in iúl: ar an iomlán, tá an chuma ar an scéal go bhfuil móramh mór
de na geallsealbhóirí i bhfách le tionscnamh reachtach (tuairim is 65 %),
ach go bhfuil mionlach nach beag (tuairim is 35 %) ar fearr leo an rogha
‘gan beart a dhéanamh’. Ní hionann tuairimí laistigh de na grúpaí éagsúla
geallsealbhóirí ach oiread, áfach, maidir le rogha na tosaíochta. As measc na n‑eintiteas
conarthach agus na n‑údarás rialtais (lena n‑áirítear iad siúd as tríú
tíortha), mar shampla, tá dhá thrian díobh i bhfách leis an rogha 'gan beart a
dhéanamh' nó leis an rogha neamhreachtach, ach as measc na gcuideachtaí agus na
ngeallsealbhóirí eile, tá 75 % díobh i bhfách le tionscnamh reachtach. Ní
hionann na tuairimí maidir leis an rud ba cheart a bheith sa rogha reachtach
sin ach oiread. Cé go bhfuil chóir a bheith leathchuid de na freagróirí i
bhfách leis an rogha reachtach ‘cur chuige A’[5],
tá líon nach beag de na freagróirí i bhfách le cineálacha malartacha cur chuige
freisin. Is fiú a lua freisin go bhfuair ‘cur chuige B’[6], cé go bhfuil sé ar an rogha is
lú tosaíocht, toiliú ó líon nach beag de na freagróirí. I measc na bpríomhchúiseanna
a chuir na geallsealbhóirí chun cinn le bheith i bhfách le rogha beartais
áirithe nó ina coinne, bhí an tábhacht atá leis an luach is fearr a fháil ar
airgead, an seans go ndéanfadh cuid de na roghanna beartais dochar d'iomaíocht
agus do tháirgiúlacht, an chontúirt go ndéanfadh ár gcomhpháirtithe trádála
frithbheartaíocht, an t‑ualach riaracháin a d'fhéadfadh a bheith ag gabháil
leis an tionscnamh sin agus go gcuirfeadh an tionscnamh stádas an AE mar
thathantóir ar son margaí oscailte i mbaol. Bhí na ceardchumainn agus na
heagraíochtaí neamhrialtasacha measartha neodrach maidir leis na roghanna agus
bhí a bhfreagraí dírithe go ginearálta ar an ngá atá ann go gcomhlíonfaidh tríú
tíortha Coinbhinsiúin na hEagraíochta Idirnáisiúnta Saothair agus iad ag
tairiscint san AE nó go n‑osclóidh an AE a cuid teorainneacha le go leanfar de
thrádáil chóir leis na tíortha is lú forbairt. Saineolas a bhailiú agus a úsáid Níor measadh go raibh gá le saineolas
seachtrach a úsáid ar bharr na gcomhairliúchán thuasluaite. Tá saineolas nach
beag á léiriú le fada ag an gCoimisiún i réimse an tsoláthair phoiblí. Measúnú tionchair Dhearc an Coimisiún ar chuid mhór roghanna
lena dhéanamh amach cén ceann acu is iomchuí. Is é an chéad rogha gan aon ghníomh breise a
dhéanamh sa réimse seo, agus leanúint den chaibidlíocht idirnáisiúnta le
comhpháirtithe trádála an Aontais Eorpaigh maidir le rochtain ar mhargaí (ar
bhealach treisithe, b'fhéidir). I bhfianaise na taithí atá againn, áfach, ní
dócha go dtiocfadh feabhsuithe móra ar theidlíocht earraí, seirbhísí agus
soláthróirí ón AE a bheith rannpháirteach i bpróisis soláthair i dtríú tíortha
a bhuí leis an rogha sin. Is cinnte gur cailliúint leanúnach deiseanna
tairisceana ar scála mór an toradh a bheadh air. An dara cineál rogha a bheadh ann, cur chun
feidhme uirlisí atá ann cheana faoi Theoir 2004/17/CE (Airteagal 58
agus Airteagal 59) a uasghrádú, agus, mar bhonn leis sin, treoir níos
fearr a thabhairt nó réimse na n‑uirlisí sin a shíneadh go gcumhdódh siad raon
feidhme iomlán Threoir 2004/17/CE agus Threoir 2004/18/CE. Ní bheadh
ar údaráis chonarthacha/eintitis chonarthacha aonair na huirlisí sin a úsáid sa
chás seo, agus is léir nach gcuirfeadh sé go mór leis an ngiaráil atá ag an AE
i gcaibidlíocht idirnáisiúnta. B’fhéidir tríú rogha a bheith ann, deireadh a
chur le rochtain earraí, seirbhísí agus soláthróirí ó thríú tíortha ar mhargadh
soláthair phoiblí an AE, go ginearálta nó de réir earnála, faoi réir
oibleagáidí idirnáisiúnta an AE sa réimse sin. Is ábhar mór imní, áfach, an
tionchar a bheadh ag an rogha sin maidir le frithbheartaíocht, maidir leis na
costais a bheadh ar údaráis chonarthacha/eintitis chonarthacha aonair agus
maidir le hiomaíochas an AE. Dá bhrí sin, tá an Coimisiún i bhfách leis an
gceathrú rogha, mar atá, ionstraim uathrialach a chruthú a choimeádfadh an
chothromaíocht mar ba cheart idir, ar thaobh amháin, an gá le seasamh an
Aontais a fheabhsú i gcaibidlíocht maidir le rochtain ar mhargaí, agus, ar an
taobh eile, córas iomaíoch soláthair a chaomhnú san Aontas Eorpach. Chuige sin, bunaítear sásra dúbáilte leis an
togra seo. Bheadh údaráis chonarthacha/eintitis chonarthacha aonair i dteideal
tairiscintí a eisiamh ar mó ná 50 % dá luach earraí agus/nó seirbhísí nach
gcumhdaíonn gealltanais idirnáisiúnta maidir le rochtain ar an margadh, agus
sin faoi mhaoirseacht an Choimisiúin. Lena chois sin, bheadh sé de chead ag an
gCoimisiún frithbheartú trí rochtain ar an margadh a shrianadh go sealadach i
gcás na dtíortha a eisiann go follasach soláthróirí, earraí agus seirbhísí an
Aontais, nó a dhéanann leithcheal orthu go follasach ina gcleachtais náisiúnta
soláthair, agus a dhiúltaíonn rochtain níos fearr ar an margadh a tabhairt le
linn caibidlíochta. Aon srianta ar rochtain ar mhargadh soláthair phoiblí an AE
a d’fhéadfadh an Coimisiún a ghlacadh amach anseo faoin Rialachán seo, beidh
siad meáite agus sonraithe go cúramach. D’eisigh Bord an Choimisiúin um Measúnú Tionchair dhá thuairim maidir
leis an tuarascáil ar an measúnú tionchair. I bhfianaise na chéad tuairime
athchóiríodh an tuarascáil ar an measúnú tionchair mar a leanas: rinneadh
coigeartú ar shainiú na faidhbe le díriú ar an tsaincheist lárnach a
sainaithníodh sa mheasúnú tionchair tríd síos, i.e. an gá le tuilleadh oscailte
ar mhargaí soláthair tríú tíortha agus na fadhbanna a bhaineann le gealltanais
idirnáisiúnta an AE a chomhlíonadh. Leathnaíodh réimse na roghanna atá le
breithniú. Le cois beartais chaibidlíochta níos gníomhaí, dearctar mar rogha sa
mheasúnú tionchair ar shíneadh an chórais atá ann cheana faoi Airteagal 58
agus Airteagal 59 de Threoir 2004/17/CE ionas go gcumhdófar faoin
gcóras an soláthar poiblí ar fad atá cumhdaithe faoi threoracha an AE agus an
deis earraí agus seirbhís coigríche nach bhfuil cumhdaithe a ghlacadh go
roghnaíoch. Ar deireadh, beachtaíodh anailís na dtionchar chun tomhas na
frithbheartaíochta agus na figiúirí dífhostaíochta a uasghrádú. In
Iarscríbhinn 10 a ghabhann leis an tuarascáil ar an measúnú tionchair, tá
achoimre níos mionsonraithe ar an dóigh ar ionchorpraíodh chéad tuairim an
Bhoird um Measúnú Tionchair isteach sa tuarascáil athchóirithe a atíolacadh an
8 Feabhra 2012. Sa tuairim a thug
sé ar an tuarascáil atíolactha, d’aithin an Bord um Measúnú Tionchair na
feabhsuithe a cuireadh ar an tuarascáil agus gur cuireadh na moltaí a rinne sé
sa chéad tuairim i bhfeidhm inti, ach mhaígh sé nach bhféadfadh sé tuairim
dheimhnitheach a thabhairt. Creideann an Bord um Measúnú Tionchair go bhfuil
líon réimsí ann go fóill inarbh fhéidir an measúnú a neartú agus sainaithníonn sé
roinnt gníomhartha a chuirfeadh tuilleadh feabhais ar an tuarascáil (i.e. cur i
láthair na roghanna a bheachtú, feabhas a chur ar chur i láthair na samhla a
úsáideadh le meastachán a dhéanamh ar na tionchair, comhréireacht rogha na
tosaíochta a chosaint ní b’fhearr etc.) Cuireadh na moltaí sin i bhfeidhm ar an
tuarascáil chríochnaitheach ar an measúnú tionchair chomh maith agus ab
fhéidir. 3. EILIMINTÍ DLÍ AN TOGRA Achoimre ar an mbeart atá beartaithe Is iad príomhchuspóirí an togra seo staid an
Aontais Eorpaigh a neartú agus é i mbun caibidlíochta maidir leis na
coinníollacha rochtana atá ag soláthróirí ón AE, agus ag a n‑earraí agus a
seirbhísí, ar na margaí soláthair phoiblí i dtríú tíortha agus soiléiriú a
dhéanamh ar an staid dlí maidir le tairgeoirí coigríche, a n‑earraí agus a
seirbhísí, atá rannpháirteach i margadh soláthair phoiblí an AE. Dá réir sin,
bunaítear sa togra seo beartas cuimsitheach don AE maidir le soláthar poiblí
seachtrach lena rialófar rochtain a bheidh ag earraí agus seirbhísí coigríche
ar mhargadh soláthair phoiblí an AE agus lena n‑áirítear sásraí a spreagfaidh
comhpháirtithe trádála an AE chun dul i mbun caibidle faoi rochtain ar mhargaí. Ar an gcéad dul síos, léirítear sa togra mar
chuid de reachtaíocht an AE an prionsabal gur cheart, ar mhargadh inmheánach
soláthair an AE, caitheamh le hearraí agus le seirbhísí atá cumhdaithe ag
gealltanais maidir le rochtain ar an margadh ar an dóigh chéanna a chaitear le
hearraí agus le seirbhísí ón AE agus síntear an gnás sin le go gcumhdófar earraí
agus seirbhísí ar de thionscnamh na dtíortha is lú forbairt iad. Maidir leis an dóigh a bpléitear le hearraí
agus le seirbhísí nach bhfuil cumhdaithe ag gealltanais maidir le rochtain ar an
margadh, tá cur chuige trí chéim beartaithe. Féadfaidh an Coimisiún a fhormheas go n‑eisiafaidh
údaráis chonarthacha/eintitis chonarthacha tairiscintí más ionann luach na n‑earraí
nó na seirbhísí nach bhfuil cumhdaithe agus breis agus 50 % de luach
iomlán na n‑earraí nó na seirbhísí a bhaineann leis an tairiscint. Tar éis dó a
chur in iúl, san fhógra conartha, go bhfuil rún aige na tairiscintí sin a
eisiamh, ní mór don údarás conarthach/eintiteas conarthach fógra a thabhairt
don Choimisiún nuair a fhaigheann sé tairiscintí ar den chatagóir sin iad.
Dheonódh an Coimisiún a fhormheas don eisiamh sin sa chás nach mbeadh
cómhalartacht shubstaintiúil ann maidir le hoscailt margaí idir an AE agus an
tír inar tionscnaíodh na hearraí agus/nó na seirbhísí. Formheasfaidh an
Coimisiún an t‑eisiamh má tá na hearraí agus na seirbhísí i gceist laistigh de
raon feidhme forchoimeádais mhargaidh atá ag an AE i gcomhaontú idirnáisiúnta. Lena chois sin, bunaítear leis an togra seo
sásra de chuid an AE chun giaráil an AE a mhéadú a thuilleadh i gcaibidlíocht
idirnáisiúnta maidir le rochtain ar mhargaí. De réir an tsásra sin, féadfaidh
an Coimisiún imscrúduithe a dhéanamh, comhairliúchán a dhéanamh le tríú
tíortha, agus, más iomchuí, bearta sealadacha srianta a chur i bhfeidhm. De bharr iarrata ó gheallsealbhóirí nó ar a
thionscnamh féin, féadfaidh an Coimisiún imscrúduithe a dhéanamh chun a
dheimhniú an raibh cleachtais shriantacha soláthair ann. I gcás ina
ndeimhneofaí gurbh ann do na cleachtais sin ann, d'iarrfadh an Coimisiún ar an
tír lena mbaineann dul i gcomhairle leis chun aghaidh a thabhairt ar na
cleachtais shriantacha sin agus dálaí níos fearr maidir le rochtain ar mhargaí
a chruthú ar an dóigh sin. Mura bhfuil an tír lena mbaineann sásta dul i
gcomhairle nó réitigh shásúla ar na cleachtais shriantacha soláthair a chur ar
fáil, féadfaidh an tAontas Eorpach cinneadh a dhéanamh srian sealadach a chur
ar rochtain earraí agus/nó seirbhísí ón tír sin ar mhargadh soláthair phoiblí
an AE. Sa deireadh, mar chomhlánú ar na forálacha
maidir le tairiscintí thar a bheith íseal san athchóiriú ar na Treoracha maidir
le soláthar poiblí atá beartaithe, ceanglófar ar na húdaráis
chonarthacha/eintitis chonarthacha é a chur in iúl do na tairgeoirí eile má tá
rún acu tairiscintí thar a bheith íseal a ghlacadh más ionann luach na n‑earraí
nó na seirbhísí nach bhfuil cumhdaithe agus breis agus 50 % de luach
iomlán na n‑earraí nó na seirbhísí a bhaineann leis an tairiscint. Ó thugtar
aghaidh ar an ngá go n‑urramódh tríú tíortha príomhchaighdeáin saothair na
hEagraíochta Idirnáisiúnta Saothair san athchóiriú atá beartaithe ar Threoracha
soláthair phoiblí, ní gá a phlé sa téacs seo. Ó ceapadh é mar uirlis beartais chun dlús a
chur le caibidlíocht, ba cheart a dhearbhú nach bhfuil sé d'aidhm ag an
tionscnamh seo an margadh soláthair san Aontas Eorpach a dhúnadh, ach rochtain
níos fearr a fháil ar mhargaí soláthair phoiblí chomhpháirtithe trádála an
Aontais Eorpaigh. Ní mór dálaí iomaíocha tairisceana ar an margadh inmheánach a
chaomhnú, dálaí a mbaineann údaráis chonarthacha/eintitis chonarthacha agus an
tsochaí ar an iomlán sochair nithiúla astu. Bunús dlí Airteagal 207 den Chonradh ar Fheidhmiú
an Aontais Eorpaigh. Prionsabal na coimhdeachta Tagann an togra faoi inniúlacht eisiach an
Aontais Eorpaigh. Dá bhrí sin, níl feidhm ag prionsabal na coimhdeachta. Prionsabal na comhréireachta Comhlíonann an togra prionsabal na
comhréireachta ar na cúiseanna seo a leanas. Tá cothromaíocht chúramach sa togra seo idir
leasa na ngeallsealbhóirí ábhartha uile agus ní théann foirm ná substaint na
gníomhaíochta seo ón AE thar a bhfuil riachtanach le cuspóirí an Chonartha a
bhaint amach. Ar an gcéad dul síos, beidh sé de cheart ag
údaráis chonarthacha/eintitis chonarthacha tairiscintí a eisiamh, faoi
mhaoirseacht an Choimisiúin, nuair is earraí agus seirbhísí nach bhfuil cumhdaithe
iad breis agus 50 % den tairiscint. Áirithítear leis sin go bhfágtar an
rogha ag údaráis chonarthacha/eintitis chonarthacha earraí agus seirbhísí a
ghlacadh is cuma cárb as iad nó srian a chur ar rochtain earraí agus seirbhísí
nach bhfuil cumhdaithe ag comhaontuithe idirnáisiúnta an AE, a mhéid atá na
srianta sin ag teacht le comhbheartas tráchtála an AE, comhbheartas atá faoi
inniúlacht an AE amháin. Dearadh an mhaoirseacht a dhéanfaidh an Coimisiún go
cúramach chun aonfhoirmeacht agus comhréireacht a áirithiú. Ar an dara dul
síos, áiritheoidh an uirlís le haghaidh an Choimisiúin a bhunaítear leis an
Rialachán seo go mbeidh sásra le fáil ag an AE chun cleachtais shriantacha i
réimse an tsoláthair a imscrúdú agus chun dul i gcomhairle leis an tríú tír lena
mbaineann. Ní ghlacfaidh an Coimisiún bearta sealadacha sriantacha ach sa chás
nach bhfuil aon réiteach eile le fáil. Coinnítear na costais riaracháin chomh híseal
agus is féidir, ach is gá bearta a dhéanamh chun comhsheasmhacht an
chomhbheartais tráchtála a chaomhnú. Is seirbhísí de chuid an Choimisiúin atá
ag obair faoi láthair ar an mbeartas maidir le soláthar poiblí seachtrach agus
ar fhaireachán ar rochtain ar mhargaí a dhéanfaidh na sásraí maoirseachta agus
imscrúdaithe a chur ar bun, rud a chuirfidh srian ar an tionchar ar acmhainní
daonna laistigh den Choimisiún. Ní bhainfidh an t‑ualach riaracháin ar údaráis
chonarthacha/eintitis chonarthacha ach le cásanna ina ndéanfaidh an Coimisiún
bearta sriantacha nó ina dtogróidh údaráis chonarthacha/eintitis chonarthacha
an sásra a úsáid, agus bheidh sé bunaithe ar fhoirmeacha caighdeánacha nó ar
fhéindearbhuithe, rud a chuirfidh teorainn leis na himscrúduithe a dhéanfaidh
eintitis aonair chun a dheimhniú cárb as earraí agus seirbhísí. Rogha ionstraimí Rialachán an ionstraim atá beartaithe. Níor leor modhanna eile, ó nach féidir ach do
Rialachán a áirithiú go leordhóthanach go ndéanfaidh an tAontas Eorpach
gníomhaíocht aonfhoirmeach i réimse an chomhbheartais tráchtála. Lena chois
sin, tugann an ionstraim seo cumhachtaí don Choimisiún Eorpach, rud is ionann
is a rá nach mbeadh trasuí úsáideach. 4. IMPLEACHT BHUISÉADACH Níl impleachtaí buiséadacha ag baint leis an
togra féin. Na hacmhainní atá ann faoi láthair, is leor iad le haghaidh na
dtascanna breise. 5. EILIMINTÍ ROGHNACHA Clásal athbhreithnithe/leasaithe/éaga Tá clásal athbhreithnithe sa togra seo. An Limistéar Eorpach Eacnamaíoch Ábhar a bhaineann leis an LEE atá sa ghníomh
atá beartaithe agus ba cheart, dá bhrí sin, an Limistéar Eorpach Eacnamaíoch a
chuimsiú ann. Míniú mionsonraithe ar an togra Sainítear in Airteagal 1 ábhar
agus raon feidhme an Rialacháin seo, a bhfuil Treoir 2004/17/CE agus
Treoir 2004/18/CE ón AE maidir le soláthar poiblí agus an Treoir maidir le
conarthaí lamháltais a dhámhachtain mar bhonn leis, mar a mhol an Coimisiún[7]. In Airteagal 2 tá sainithe
ábhartha, ar baineadh an mhórchuid acu as Treoracha ón AE maidir le soláthar
poiblí. Sainítear sa téacs fosta "na hearraí agus na seirbhísí atá
cumhdaithe" agus earraí agus seirbhísí gan chumhdach, sainithe is bunús
don Rialachán seo. In Airteagal 3 leagtar amach ,
chun críche an Rialacháin seo, na rialacha is infheidhme ar thionscnamh maidir
le hearraí agus seirbhísí a sholáthraíonn údaráis chonarthacha/eintitis
chonarthacha. De réir ghealltanais idirnáisiúnta an AE, tá na rialacha maidir
le tionscnamh earraí ag teacht leis na rialacha neamhfhabhracha maidir le
tionscnamh mar a shainítear i gCód Custaim an AE (Rialachán 2913/92). Tá
an sainiú ar thionscnamh seirbhíse bunaithe ar na rialacha ábhartha sa Chonradh
ar Fheidhmiú an Aontais Eorpaigh maidir leis an gceart bunaíochta agus ar na
sainmhínithe atá sa Chomhaontú Ginearálta maidir le Trádáil Seirbhísí (Airteagal XXVIII). In Airteagal 4 leagtar síos na
rialacha maidir le rochtain ar mhargadh soláthair phoiblí an AE is infheidhme
ar earraí agus ar sheirbhísí coigcríche atá cumhdaithe ag gealltanais ón AE
maidir le rochtain ar an margadh (ar a dtugtar ‘earraí agus seirbhísí atá
cumhdaithe') agus ar earraí agus ar sheirbhísí as na tíortha is lú forbairt. Ní
mór caitheamh leis an dá chatagóir sin ar an dóigh chéanna a gcaitear le
hearraí agus le seirbhísí an AE. In Airteagal 5 tá cur síos ar na
rialacha maidir le rochtain earraí agus seirbhísí de thionscnamh tríú tíortha
nach bhfuil cumhdaithe ag gealltanais ón AE i ndáil le rochtain ar an margadh
(ar a dtugtar 'earraí agus seirbhísí nach bhfuil cumhdaithe’). Féadfaidh
rochtain na n‑earraí agus na seirbhísí sin bheith faoi réir beart srianta a
dhéanfadh údaráis chonarthacha/eintitis chonarthacha nó an Coimisiún faoi réir
na sásraí a bhunaítear leis an Rialachán seo. In Airteagal 6 leagtar amach na
coinníollacha faoinar féidir leis an gCoimisiún a fhormheas go n‑eisiafaidh na
húdaráis chonarthacha/eintitis chonarthacha tairiscintí ó nósanna imeachta
tairisceana, más fiú níos mó ná 50 % de luach iomlán na n‑earraí agus na
seirbhísí sa tairiscint luach na n‑earraí agus/nó na seirbhísí nach bhfuil
cumhdaithe i gcás conarthaí arb ionann a luach measta agus EUR 5 000 000
ar a laghad. Nuair atá sé sonraithe ag údarás
conarthach/eintiteas conarthach san fhógra conartha gur rún leis earraí agus
seirbhísí gan chumhdach a eisiamh agus go bhfaigheann sé tairiscintí as an
gcatagóir sin, ní mór dó fógra a thabhairt don Choimisiún agus tréithe na
dtairiscintí lena mbaineann a shonrú. De réir na bhfógraí a foilsíodh san Iris
Oifigiúil (TED, Tenders European Daily) níl ach 7 % de na conarthaí uile a
foilsíodh san Iris Oifigiúil a bhfuil luach níos mó ná EUR 5 milliún
orthu. Os a choinne sin, is ionann na conarthaí sin agus 61 % de mhargadh
iomlán soláthair phoiblí an AE. Is é an meastachán a rinne an Coimisiún go
bhfaigheann sé 35‑45 fógra in aghaidh na bliana ar a mhéad. I gcás conarthaí arb ionann a luach measta ar
a laghad EUR 5 000 000, níor mhór don Choimisiún cinneadh a
ghlacadh maidir leis an eisiamh. Ba cheart don Choimisiún, i gcás na gconarthaí
uile, an t‑eisiamh atá beartaithe a fhormheas má tá na hearraí agus na
seirbhísí lena mbaineann faoi réir forchoimeádais maidir le rochtain ar an
margadh faoi chomhaontuithe idirnáisiúnta an AE maidir le soláthar poiblí. Mura
bhfuil comhaontú mar sin ann, formheasfaidh an Coimisiún an t‑eisiamh má tá
bearta sriantacha i bhfeidhm ag an tríú tír ar sholáthar poiblí a fhágann go
bhfuil easpa cómhalartachta substaintiúla idir an tAontas agus an tríú tír lena
mbaineann maidir le hoscailt an mhargaidh. Agus measúnú á dhéanamh ag an
gCoimisiún an bhfuil easpa cómhalartachta substaintiúla ann, déanfaidh sé
imscrúdú ar an méid a éiríonn le dlíthe soláthair phoiblí na tíre lena
mbaineann trédhearcacht a áirithiú i gcomhréir le caighdeáin idirnáisiúnta i
réimse an tsoláthair phoiblí agus aon idirdhealú i gcoinne earraí, seirbhísí
agus oibreoirí eacnamaíocha an Aontais a chosc. Lena chois sin, scrúdóidh sé an
méid a choimeádann ar siúl nó a ghlacann údaráis soláthair phoiblí agus/nó
eintitis soláthair aonair cleachtais idirdhealaitheacha i gcoinne earraí,
seirbhísí agus oibreoirí an Aontais. In Airteagal 7 cuirtear an
oibleagáid shonrach ar údaráis chonarthacha/eintitis chonarthacha go gcuirfidh
siad in iúl do na tairgeoirí eile i nós imeachta dámhachtana gur chinn siad
tairiscint thar a bheith íseal a ghlacadh ar mó ná 50 % de luach iomlán na
n‑earraí agus na seirbhísí sa tairiscint luach na n‑earraí agus/nó na seirbhísí
nach bhfuil cumhdaithe. In Airteagal 8 leagtar amach na
coinníollacha faoina bhféadfaidh an Coimisiún, dá thionscnamh féin nó ar
iarraidh Ballstát ná páirtithe leasmhara, imscrúdú seachtrach maidir le
soláthar a thionscnamh ar bhearta sriantacha soláthair a ghlac tríú tíortha,
agus an dóigh leis an imscrúdú sin a dhéanamh. Bunaítear le hAirteagal 9 sásra le
haghaidh comhairliúchán le tríú tíortha i gcásanna ina gcinneann an Coimisiún,
tar éis dó imscrúdú seachtrach maidir le soláthar a dhéanamh, gur ghlac an tír
lena mbaineann cleachtas sriantach maidir le soláthar poiblí, nó go bhfuil an
tír sin ag leanúint de chleachtas den sórt sin. Faoin sásra sin, tabharfaidh an
Coimisiún cuireadh don tír lena mbaineann dul i mbun caibidle d'fhonn an
cleachtas sriantach maidir le soláthar a chur ar ceal agus a áirithiú gurb ann
do thrédhearcacht i gcomhair soláthróirí ón AE, agus a n‑earraí agus a
seirbhísí, agus go gcaitear go cothrom leo. Cuirtear san áireamh sa scéim
comhairliúcháin na dálaí éagsúla a bheidh le breithniú, amhail sásra réitigh
aighneas a bheith ann i gcás cleachtas sriantach soláthair a bhaineann le
soláthar poiblí atá cumhdaithe, bearta ceartaitheacha aontaobhacha nó tabhairt
i gcrích comhaontaithe idirnáisiúnta ina n‑áirithítear go gcaifear go cothrom
le soláthróirí ón AE, agus lena n‑earraí agus a seirbhísí, ar cuireadh
cleachtais shriantacha soláthair i bhfeidhm orthu roimhe sin. Tugtar cumhacht
don Choimisiún gníomh cur chun feidhme a ghlacadh a thoirmeascfaidh eisiamh
tairiscintí a chuimsíonn earraí agus seirbhísí nach bhfuil cumhdaithe agus atá
de thionscnamh tíortha a ndéantar caibidlíocht shubstainteach leo maidir le
rochtain ar an margadh agus a bhfuil bunús réasúnach ann le bheith ag súil go
gcuirfear na cleachtais soláthair shriantacha ar ceal go luath. In Airteagal 10, tugtar cumhacht
don Choimisiún gníomh cur chun feidhme a ghlacadh maidir le ‘bearta
sriantacha’, ar choinníoll gur deimhníodh san imscrúdú a rinne sé go bhfuil
bearta sriantacha soláthair ann i dtríú tír, agus gur fhéach an Coimisiún le dul
i mbun caibidle maidir le rochtain ar an margadh faoi réir an tsásra
comhairliúcháin. Ar na bearta sin, d’fhéadfadh bheith, go teoiriciúil (i)
dícháiliú tairiscintí áirithe ina bhfuil níos mó ná 50 % de na hearraí
agus na seirbhísí de thionscnamh na tíre lena mbaineann; agus/nó (ii) pionós
praghais sainordaitheach ar na hearraí nó ar na seirbhísí sin atáthar a
thairgeadh ar de thionscnamh na tíre lena mbaineann iad. In Airteagal 11 leagtar amach
rialacha maidir le bearta sriantacha a glacadh a tharraingt siar nó a chur ar
fionraí, chomh maith le cinneadh ón gCoimisiún a thoirmeascfaidh ar údaráis
chonarthacha/eintitis chonarthacha Airteagal 6 a úsáid. In Airteagal 12 leagtar amach
rialacha maidir le faisnéis a chur ar fáil do thairgeoirí i leith cur i bhfeidhm
beart sriantach a ghlac an Coimisiún i gcomhthéacs nósanna imeachta aonair
maidir le soláthar poiblí. In Airteagal 13 leagtar amach na
dálaí ina bhfuil údaráis chonarthacha/eintitis chonarthacha údaraithe le bearta
a glacadh de bhun an Rialacháin seo a chur i leataobh. Is é is cuspóir don
fhoráil seo, an méid solúbthachta is gá a thabhairt d’údaráis
chonarthacha/eintitis chonarthacha chun a riachtanais cheannaithe a riar agus,
ag an am chéanna, faireachán ceart ón gCoimisiún a áirithiú trí bhíthin na
hoibleagáide fógra a thabhairt. In Airteagal 14 leagtar amach agus
Airteagal 15 na cumhachtaí a thugtar don Choimisiún gníomhartha
tarmligthe a ghlacadh i gcomhréir le hAirteagal 14 maidir le leasuithe ar
an Iarscríbhinn chun comhaontuithe idirnáisiúnta nua arna gcur i gcrích ag an
Aontas i réimse an tsoláthair phoiblí a chur san áireamh. In Airteagal 16, cuirtear bearta
ceartaitheacha dlí ar fáil maidir le forálacha an Rialacháin seo. In Airteagal 17 leagtar síos an
nós imeachta coiste ábhartha chun gníomhartha cur chun feidhme a ghlacadh. Lena
chois sin, tugtar cumhacht ann don Choimisiún bearta cur chun feidhme a
ghlacadh chun foirmeacha caighdeánacha a ghlacadh. In Airteagal 18 leagtar síos nach
mór don Choimisiún tuairisc a thabhairt ar chur chun feidhme an Rialacháin seo
gach tríú bliain ar a laghad tar éis don Rialachán seo teacht i bhfeidhm. In Airteagal 18 tá rialacha maidir
le rúndacht faisnéise a fuarthas de bhun an Rialacháin seo. In Airteagal 20 déantar foráil
maidir le haisghairm Airteagal 58 agus Airteagal 59 de
Threoir 2004/17/CE. In Airteagal 21 cinntear teacht i
bhfeidhm an Rialacháin seo. 2012/0060 (COD) Togra le haghaidh RIALACHÁIN Ó PHARLAIMINT NA hEORPA AGUS
ÓN gCOMHAIRLE maidir le rochtain earraí agus seirbhísí tríú
tíortha ar mhargadh inmheánach soláthair phoiblí an Aontais agus maidir le
nósanna imeachta atá ceaptha an chaibidlíocht i leith rochtain earraí agus
seirbhísí an Aontais ar mhargaí soláthair phoiblí tríú tíortha a éascú (Téacs atá ábhartha maidir leis an LEE) TÁ PARLAIMINT NA hEORPA AGUS
COMHAIRLE AN AONTAIS EORPAIGH, Ag féachaint don Chonradh ar Fheidhmiú an
Aontais Eorpaigh, agus go háirithe Airteagal 207 de, Ag féachaint don togra ón gCoimisiún Eorpach, Tar éis dóibh an dréachtghníomh reachtach a
chur chuig na Parlaimintí náisiúnta, Ag féachaint don tuairim ó Choiste Eacnamaíoch
agus Sóisialta na hEorpa[8], Ag féachaint don tuairim ó Choiste na
Réigiún[9], Ag gníomhú dóibh i gcomhréir leis
an ngnáthnós imeachta reachtach, De bharr an méid seo a leanas: (1) Foráiltear le hAirteagal 21
den Chonradh ar an Aontas Eorpach go saineoidh agus go saothróidh an tAontas
comhbheartais agus comhghníomhaíochtaí, agus go bhféachfaidh sé le hardleibhéal
comhair a bhaint amach i ngach réimse den chaidreamh idirnáisiúnta, chun
cuidiú, inter alia, gach tír a lánpháirtiú i ngeilleagar an domhain, lena n‑áirítear
trí bhíthin deireadh a chur de réir a chéile le srianta ar an trádáil
idirnáisiúnta. (2) De bhun Airteagal 206
den Chonradh ar Fheidhmiú an Aontais Eorpaigh (CFAE), rannchuideoidh an tAontas,
trí bhíthin aontas custaim a bhunú, ar mhaithe leis an leas coitinn, le
forbairt chomhchuí na trádála domhanda, le deireadh a chur de réir a chéile le
srianta ar an trádáil idirnáisiúnta agus ar infheistíocht dhíreach choigríche,
agus le bacainní custaim agus bacainní eile a laghdú. (3) I gcomhréir le hAirteagal 26
den CFAE glacfaidh an tAontas bearta a mbeidh d'aidhm leo an margadh inmheánach
a bhunú nó feidhmiú an mhargaidh inmheánaigh a áirithiú sa chaoi is gurb é a
bheidh ann limistéar gan teorainneacha inmheánacha ina n‑áiritheofar
saorghluaiseacht earraí, daoine agus seirbhísí i gcomhréir le forálacha na
gconarthaí. (4) Le hAirteagal III:8 den
Comhaontú Ginearálta um Tharaifí agus Trádáil 1994 agus le hAirteagal XIII
den Chomhaontú Ginearálta maidir le Trádáil Seirbhísí eisiatar soláthar poiblí
arna dhéanamh ag comhlachtaí rialtais ó raon feidhme phríomhsmachta iltaobhacha
na hEagraíochta Domhanda Trádála. (5) Laistigh den Eagraíocht
Dhomhanda Trádála agus trína chaidreamh déthaobhach féin, cuireann an tAontas
chun cinn oscailt uaillmhianach a dhéanamh ar mhargaí soláthair phoiblí an
Aontais agus a gcomhpháirtithe trádála, de mheon cómhalartachta agus
comhshochair. (6) Tá leisce ar chuid mhór tríú
tíortha iomaíocht idirnáisiúnta a ligean isteach ina margaí soláthair phoiblí,
nó an rochtain atá ar na margaí sin cheana féin a oscailt a thuilleadh. Dá
thoradh sin, tá oibrithe eacnamaíocha an Aontais faoi réir cleachtas sriantach
soláthair i gcuid mhaith de na tíortha ar comhpháirtithe trádála de chuid an
Aontais iad. Caillteanas mórdheiseanna trádála an toradh atá ar na cleachtais
shriantacha soláthair sin. (7) I dTreoir 2004/17/CE ó
Pharlaimint na hEorpa agus ón gComhairle an 31 Márta 2004 lena gcomhordaítear
na nósanna imeachta um sholáthar de chuid eintiteas a oibríonn in earnálacha an
uisce, an fhuinnimh, an iompair agus na seirbhísí poist[10], agus i dTreoir 2004/18/CE ó
Pharlaimint na hEorpa agus ón gComhairle an 31 Márta 2004 maidir leis na
nósanna imeachta um dhámhachtain conarthaí oibreacha poiblí, conarthaí
soláthair phoiblí agus conarthaí seirbhíse poiblí a chomhordú[11], níl ach líon beag forálacha
maidir leis an ngné sheachtrach de bheartas an Aontais maidir le soláthar
poiblí, go háirithe Airteagal 58 agus Airteagal 59 de Threoir
2004/17/CE. Níl ach raon feidhme teoranta ag na forálacha sin, áfach, agus i
ngeall ar easpa treoraithe ní minic a chuireann na heintitis chonarthacha i
bhfeidhm iad. (8) I gcomhréir le hAirteagal 207
den CFAE bunófar an comhbheartas tráchtála i réimse an tsoláthair phoiblí ar
phrionsabail aonfhoirmeacha. (9) Ar mhaithe le deimhneacht
dhlíthiúil a bheith ag an Aontas agus ag oibreoirí eacnamaíocha agus eintitis
chonarthacha/údaráis chonarthacha tríú tíortha, ba cheart léiriú a bheith i
ndlíchóras an Aontais ar ghealltanais idirnáisiúnta an Aontais maidir le
rochtain ar mhargaí i ndáil le tríú tíortha i réimse an tsoláthair phoiblí
d'fhonn a gcur chun feidhme éifeachtach a áirithiú. Ba cheart don Choimisiún
treorú a thabhairt maidir le cur i bhfeidhm na ngealltanas idirnáisiúnta atá ag
an Aontas Eorpach cheana maidir le rochtain ar mhargaí. Ba cheart an treorú sin
a thabhairt cothrom le dáta go rialta agus ba cheart faisnéis sho‑úsáidte a
bheith ann. (10) Maidir leis an gcuspóir
feabhas a chur ar an rochtain atá ag oibreoirí eacnamaíocha an AE ar mhargaí
soláthair phoiblí tríú tíortha áirithe atá faoi chosaint ag bearta sriantacha
soláthair agus an gcuspóir dálaí cothroma iomaíochta a chaomhnú laistigh den
Mhargadh Aonair Eorpach, chun iad a bhaint amach is gá an chaoi a gcaitear le
hearraí agus seirbhísí tríú tíortha nach bhfuil cumhdaithe ag gealltanais
idirnáisiúnta an Aontais a chomhchuibhiú ar fud an Aontais Eorpaigh. (11) Chuige sin, ba cheart rialacha
maidir le tionscnamh a bhunú ionas go mbeidh a fhios ag na húdaráis chonarthacha/na
heintitis chonarthacha cé acu atá nó nach bhfuil na hearraí agus na seirbhísí
cumhdaithe ag gealltanais idirnáisiúnta an Aontais Eorpaigh. Ba cheart
tionscnamh earraí a chinneadh i gcomhréir le hAirteagal 22 go hAirteagal 26
de Rialachán (CE) Uimh. 2913/1992 ó Pharlaimint na hEorpa agus ón
gComhairle an 12 Meán Fómhair 1992 lena mbunaítear Cód Custaim an Chomhphobail[12]. De réir an Rialacháin sin ba
cheart a mheas gur earraí de chuid an Aontais earraí sa chás go bhfaightear nó
go dtáirgtear ina n‑iomláine iad san Aontas. Earraí a raibh tríú tír amháin nó
níos mó bainteach lena dtáirgeadh, ba cheart a mheas gurb í an tír tionscnaimh
an tír ina ndearnadh an phróiseáil shubstaintiúil deiridh nó an t‑oibriú
substaintiúil deiridh lena raibh bunús eacnamaíoch i ngnóthas a bhfuil an
trealamh chuige sin aige, agus ar a raibh mar thoradh táirge nua, nó céim
thábhachtach den phróiseas monaraíochta a bhaint amach. Ba cheart tionscnamh
seirbhíse a chinneadh ar bhonn thionscnamh an duine nádúrtha nó dhlítheanaigh
atá á soláthar. Ba cheart an treorú dá dtagraítear in aithris 9 cur i bhfeidhm
praiticiúil na rialacha maidir le tionscnamh a chumhdach. (12) Ba cheart don Choimisiún a
mheas cé acu a cheadóidh sé nó nach gceadóidh sé údaráis chonarthacha/eintitis
chonarthacha de réir bhrí Threoracha [2004/17/CE, 2004/18/CE agus Threoir
[....] ó Pharlaimint na hEorpa agus ón gComhairle an [....] maidir le conarthaí
lamháltais a dhámhachtain[13]],
i gcás conarthaí a bhfuil a luach measta cothrom le EUR 5 000 000
nó níos mó, earraí agus seirbhísí nach bhfuil cumhdaithe ag gealltanais
idirnáisiúnta an Aontais Eorpaigh a eisiamh ó dheonú conarthaí. (13) Ar mhaithe le trédhearcacht,
aon údarás conarthach/eintiteas conarthach a bhfuil rún aige a chuid cumhachta
a úsáid i gcomhréir leis an Rialachán seo chun tairiscintí a bhaineann le
hearraí agus/nó seirbhísí nach de thionscnamh an Aontais Eorpaigh iad, agus ina
bhfuil luach na n‑earraí nó na seirbhísí nach bhfuil cumhdaithe níos mó ná 50%
de luach iomlán na n‑earraí nó na seirbhísí i gceist, a eisiamh ó nósanna
imeachta um dhámhachtain conarthaí, ba cheart dó é sin a chur in iúl
d'oibritheoirí eacnamaíocha san fhógra conartha a fhoilsítear in Iris
Oifigiúil an Aontais Eorpaigh. (14) D'fhonn é a chur ar chumas an
Choimisiúin cinneadh a dhéanamh maidir le heisiamh seirbhísí agus earraí tríú
tíortha nach bhfuil cumhdaithe ag gealltanais idirnáisiúnta an Aontais, ba
cheart do na húdaráis chonarthacha/eintitis chonarthacha fógra a thabhairt don
Choimisiún maidir lena rún earraí agus seirbhísí den sórt sin a eisiamh, trí
bhíthin foirm chaighdeánach a úsáid ina bhfuil eolas leordhóthanach a chuirfidh
ar chumas an Choimisiúin cinneadh a dhéanamh. (15) I gcás conarthaí a bhfuil a
luach measta cothrom le EUR 5 000 000 nó níos mó ná sin ba cheart
don Choimisiún an t‑eisiamh atá beartaithe a fhormheas má tá forchoimeádais
shainráite déanta ag an Aontas maidir le rochtain ar an margadh, i gcás na n‑earraí
agus/nó na seirbhísí a bhfuiltear ag beartú an eisiata dóibh, sa chomhaontú
idirnáisiúnta maidir le rochtain ar mhargaí i réimse an tsoláthair phoiblí idir
an tAontas agus tír tionscnaimh na n‑earraí agus/nó na seirbhísí. Mura bhfuil
comhaontú mar sin ann, ba cheart don Choimisiún an t‑eisiamh a fhormheas má tá
bearta sriantacha soláthair i bhfeidhm ag an tríú tír a fhágann go bhfuil easpa
cómhalartachta substaintiúla idir an tAontas agus an tríú tír i gceist maidir
le hoscailt an mhargaidh. Ba cheart a mheas go bhfuil easpa cómhalartachta
substaintiúla ann i gcás ina bhfuil bearta sriantacha soláthair ina gcúis le
hidirdhealuithe tromchúiseacha athfhillteacha i gcoinne oibreoirí eacnamaíocha,
earraí agus seirbhísí de chuid an Aontais. (16) Agus measúnú á dhéanamh ag an
gCoimisiún cé acu atá nó nach bhfuil easpa cómhalartachta substaintiúla ann, ba
cheart dó scrúdú a dhéanamh ar a mhéid a dhéanann dlíthe soláthair phoiblí na
tíre i gceist trédhearcacht a áirithiú i gcomhréir le caighdeáin idirnáisiúnta
i réimse an tsoláthair phoiblí agus a mhéid a choscann siad aon idirdhealú i
leith earraí, seirbhísí agus oibreoirí eacnamaíocha an Aontais. Lena chois sin,
ba cheart dó scrúdú a dhéanamh ar a mhéid a leanann nó a ghlacann údaráis
phoiblí agus/nó eintitis soláthair aonair cleachtais idirdhealaitheacha i leith
earraí, seirbhísí agus oibreoirí an Aontais. (17) Ba cheart an Coimisiún a
bheith in ann cosc a chur ar an éifeacht dhíobhálach a d'fhéadfadh a bheith ag
eisiamh a bheifí a bheartú ar chaibidlíocht trádála a bheadh ar siúl leis an
tír lena mbaineann. Dá bhrí sin, i gcás ina bhfuil tír i mbun caibidlíochta
substaintí leis an Aontas maidir le rochtain ar an margadh i réimse an
tsoláthair phoiblí agus i gcás ina measfaidh an Coimisiún go bhfuil sé dóchúil
go maith go gcuirfear deireadh leis na cleachtais shriantacha soláthair gan
rómhoill, ba cheart go mbeadh sé in ann gníomh cur chun feidhme a ghlacadh á
fhoráil nár cheart earraí ná seirbhísí ón tír sin a eisiamh ó nósanna imeachta
um dhámhachtain conarthaí ar feadh tréimhse bliana. (18) Ós rud é go bhfuil rochtain
earraí agus seirbhísí tríú tíortha ar mhargadh soláthair phoiblí an Aontais
faoi raon feidhme an chomhbheartais tráchtála, níor cheart na Ballstáit na a n‑údaráis
chonarthacha/a n‑eintitis chonarthacha a bheith in ann srian a chur ar an
rochtain atá ag earraí agus seirbhísí ar a nósanna imeachta tairisceana le haon
bheart seachas na bearta dá bhforáiltear sa Rialachán seo. (19) I bhfianaise an dua bhreise a
bhíonn ar údaráis chonarthacha/eintitis chonarthacha measúnú a dhéanamh ar
mhínithe tairgeoirí ar thairiscintí a bhaineann le hearraí agus/nó seirbhísí
nach de thionscnamh an Aontais Eorpaigh iad agus ina bhfuil luach na n‑earraí
nach bhfuil cumhdaithe níos mó 50% de luach iomlán na n‑earraí nó na seirbhísí
sin, is iomchuí foráil a dhéanamh maidir le trédhearcacht bhreise i leith na
slí a gcaitear le tairiscintí thar a bheith íseal. I dteannta na rialacha dá
bhforáiltear le hAirteagal 69 den Treoir maidir le soláthar poiblí agus le
hAirteagal 79 den Treoir maidir le soláthar ag eintitis atá ag oibriú in
earnálacha an uisce, an fhuinnimh, an iompair agus na seirbhísí poist, ba
cheart don údarás conarthach/eintiteas conarthach a bhfuil sé beartaithe aige
glacadh le tairiscint thar a bheith íseal a chur in iúl do gach tairgeoir eile
i scríbhinn go bhfuil sé sin beartaithe aige, lena n‑áirítear an fáth a bhfuil
an praghas nó na costais arna muirearú thar a bheith íseal. Dá bharr sin bheadh
sé níos fusa ag na tairgeoirí eile sin a mheas an mbeidh an tairgeoir a
roghnófar in ann an conradh ina iomláine a chomhlíonadh faoi na coinníollacha
atá leagtha amach sa doiciméad tairisceana. D'fhágfadh an fhaisnéis bhreise sin
go mbeadh margadh soláthair phoiblí an AE níos cothroime. (20) Ba cheart an Coimisiún a
bheith in ann, ar a thionscnamh féin nó ar iarratas ó pháirtithe leasmhara nó ó
Bhallstát, imscrúdú seachtrach soláthair a thionscnamh faoi bhearta sriantacha
soláthair a líomhnaítear a bheith ar siúl ag tríú tír. Cuirfear san áireamh, go
háirithe, go bhfuil líon áirithe eisiamh atá beartaithe i dtaobh tríú tír arna
bhformheas ag an gCoimisiún de bhun Airteagal 6(2) den Rialachán seo. Ba
cheart nósanna imeachta imscrúdaithe den sórt sin a bheith gan dochar do
Rialachán (CE) Uimh. 3286/94 ón gComhairle an 22 Nollaig 1994
lena leagtar síos nósanna imeachta Comhphobail i réimse an chomhbheartais
tráchtála d'fhonn feidhmiú chearta an Chomhphobail faoi rialacha trádála
idirnáisiúnta a áirithiú, go háirithe na cearta sin a bunaíodh faoi choimirce
na hEagraíochta Domhanda Trádála[14]. (21) I gcás ina bhfuil cúis ag an
gCoimisiún a chreidiúint, ar bhonn faisnéise a bhfuil fáil aici uirthi, go
bhfuil cleachtas sriantach soláthair curtha i bhfeidhm nó a á choinneáil i
bhfeidhm ag tríú tír, ba cheart é a bheith de chumhacht aige tús a chur le
himscrúdú. Má dhearbhaítear don Choimisiún go bhfuil cleachtas sriantach soláthair
ar siúl ag tríú tír, ba cheart dó iarraidh ar an tír sin tús a chur le
comhairliúchán d'fhonn feabhas a chur ar na deiseanna tairisceana atá ag
oibreoirí eacnamaíocha, earraí agus seirbhísí an AE sa tír sin. (22) Mura bhfuil mar thoradh ar an
gcomhairliúchán leis an tír sin feabhas sásúil ar na deiseanna tairisceana atá
ag oibreoirí eacnamaíocha, earraí agus seirbhísí an AE, ba cheart don
Choimisiún bearta sriantacha iomchuí a dhéanamh. (23) D'fhéadfadh a bheith i gceist
leis na bearta sin eisiamh sainordaitheach earraí agus seirbhísí áirithe de
chuid tríú tíortha ó nósanna imeachta soláthair phoiblí san Aontas Eorpach, nó
pionós sainordaitheach praghais a chur ar thairiscintí a bhaineann le hearraí
agus seirbhísí de thionscnamh na tíre sin. Ionas nach bhféadfar dul timpeall ar
na bearta sin, d'fhéadfadh sé gur ghá daoine dlítheanacha áirithe a eisiamh atá
faoi úinéireacht choigríche nó faoi rialú coigríche agus atá bunaithe san
Aontas Eorpach agus nach bhfuil ag gabháil d'oibríochtaí substainteacha gnó a
bhfuil baint dhíreach éifeachtach acu le geilleagar an Bhallstáit lena
mbaineann. Níor cheart na bearta iomchuí a bheith ar neamhréir leis na
cleachtais shriantacha soláthair a bhfuil siad ceaptha dul i ngleic leo. (24) Tá sé ríthábhachtach rochtain
a bheith ag údaráis chonarthacha/eintitis chonarthacha, ag praghas iomaíoch, ar
raon táirgí ardchaighdeáin a riarann dá riachtanais cheannaithe. Dá bhrí sin,
ba cheart údaráis chonarthacha/eintitis chonarthacha a bheith in ann gan bearta
a chuireann srian ar an rochtain ar earraí nach bhfuil cumhdaithe a chur i
bhfeidhm sa chás nach bhfuil aon earraí nó seirbhísí de chuid an Aontais ná
earraí nó seirbhísí atá cumhdaithe a riarann do riachtanais an údaráis
chonarthaigh/an eintitis chonarthaigh maidir le bunleasanna poiblí amhail
sláinte nó slándáil phoiblí a chosaint, nó sa chás gurb é toradh a bheadh ar
chur i bhfeidhm an bhirt i gceist méadú díréireach ar phraghas nó ar chostais
an chonartha. (25) I gcás ina ndéanann údaráis
chonarthacha/eintitis chonarthacha eisceachtaí ar bhearta a chuireann srian ar
rochtain ar earraí agus seirbhísí nach bhfuil cumhdaithe a chur chun
mífheidhme, ba cheart an Coimisiún a bheith in ann sásra ceartaitheach Airteagal 3
de Threoir 89/665/CEE ón gComhairle maidir le comhordú a dhéanamh ar dhlíthe,
ar rialacháin agus ar fhorálacha riaracháin a bhaineann le cur i bhfeidhm
nósanna imeachta athbhreithnithe ar dhámhachtain conarthaí soláthair phoiblí
agus oibreacha poiblí[15]
nó Airteagal 8 de Threoir 92/13/CEE ón gComhairle an 25 Feabhra 1992 lena
gcomhordaítear na dlíthe, na rialacháin agus na forálacha riaracháin a
bhaineann le rialacha an Chomhphobail a chur i bhfeidhm maidir le nósanna
imeachta um sholáthar de chuid eintiteas a oibríonn in earnálacha an uisce, an
fhuinnimh, an iompair[16].
Chun na críocha céanna, aon chonradh a thugtar i gcrích le hoibreoir
eacnamaíoch de shárú ar chinntí an Choimisiúin maidir le heisiaimh atá
beartaithe agus ar thug na húdaráis chonarthacha/na heintitis chonarthacha
fógra ina leith nó de shárú ar bhearta a chuireann srian ar rochtain earraí
agus seirbhísí nach bhfuil cumhdaithe, ba cheart a dhearbhú go bhfuil sé gan
éifeacht de réir bhrí Threoir 2007/66/CE ó Pharlaimint na hEorpa agus ón
gComhairle[17]. (26) I bhfianaise bheartas
ginearálta an Aontais maidir leis na tíortha is lú forbairt dá bhforáiltear,
inter alia, i Rialachán (CE) Uimh. 732/2008 ón gComhairle an 22 Iúil 2008
lena ndéantar scéim um fhabhair tharaife ghinearálaithe ón 1 Eanáir 2009 a chur
i bhfeidhm, is iomchuí earraí agus seirbhísí de chuid na dtíortha sin a
chomhshamhlú le hearraí agus seirbhísí Aontais. (27) D'fhonn na gealltanais
idirnáisiúnta maidir le rochtain ar mhargaí i réimse an tsoláthair phoiblí a
dhéanfar i ndiaidh ghlacadh an Rialacháin seo a léiriú i ndlíchóras an Aontais
Eorpaigh, ba cheart a thabhairt de chumhacht don Choimisiún gníomhartha a
ghlacadh i gcomhréir le hAirteagal 290 den Chonradh ar Fheidhmiú an
Aontais Eorpaigh d'fhonn leasuithe a dhéanamh ar an liosta comhaontuithe
idirnáisiúnta atá i gceangal leis an Rialachán seo. Tá sé ríthábhachtach go
rachaidh an Coimisiún i mbun comhairliúchán iomchuí le linn a chuid oibre
ullmhúcháin, comhairliúcháin le saineolaithe san áireamh. Le linn dó
gníomhartha tarmligthe a ullmhú agus a tharraingt suas, ba cheart don
Choimisiún a áirithiú go ndéanfar doiciméid ábhartha a chur chuig Parlaimint na
hEorpa agus chuig an gComhairle ar bhealach comhuaineach, tráthúil agus
iomchuí. (28) D'fhonn coinníollacha
aonfhoirmeacha do chur chun feidhme an Rialacháin seo a áirithiú, ba cheart
cumhachtaí cur chun feidhme a thabhairt don Choimisiún. Ba cheart na cumhachtaí
sin a fheidhmiú i gcomhréir le Rialachán (AE) Uimh. 182/2011 ó
Pharlaimint na hEorpa agus ón gComhairle an 16 Feabhra 2011 lena leagtar síos
na rialacha agus na prionsabail ghinearálta a bhaineann le sásraí lena
rialaíonn na Ballstáit mar a fheidhmíonn an Coimisiún cumhachtaí cur chun
feidhme. (29) Ba cheart an nós imeachta
comhairliúcháin a úsáid chun gníomhartha cur chun feidhme a ghlacadh maidir le
tarraingt suas na bhfoirmeacha caighdeánacha a úsáidfear chun fógraí a
fhoilsiú, chun fógraí a chur isteach chun an Choimisiúin agus le haghaidh
tionscnaimh earraí agus seirbhísí. Níl aon impleachtaí ag na cinntí sin ó
thaobh airgeadais de ná do chineál agus raon feidhme na n‑oibleagáidí a
eascróidh ón Rialachán seo. A mhalairt sin, de chineál riaracháin amháin atá na
gníomhartha seo agus iad ceaptha cur i bhfeidhm na rialacha a leagtar síos leis
an Rialacháin seo a éascú. (30) Ba cheart don
Choimisiún tuairisciú gach trí bliana ar a laghad maidir le cur i bhfeidhm an
Rialacháin seo. (31) I gcomhréir le
prionsabal na comhréireachta, is gá agus is iomchuí, d'fhonn an bunchuspóir
comhbheartas seachtrach i réimse an tsoláthair phoiblí a bhaint amach, rialacha
a leagan síos maidir le conas caitheamh le hearraí agus seirbhísí nach bhfuil
cumhdaithe ag gealltanais idirnáisiúnta an Aontais Eorpaigh. Ní théann
an Rialachán seo maidir le rochtain oibreoirí eacnamaíocha, earraí agus
seirbhísí tríú tíortha thar a bhfuil riachtanach chun na cuspóirí atáthar a
shaothrú a bhaint amach, i gcomhréir leis an tríú mír d'Airteagal 5 den
Chonradh ar an Aontas Eorpach,
TAR ÉIS AN RIALACHÁN SEO A
GHLACADH: Caibidil I
Forálacha ginearálta
Airteagal 1
Ábhar agus raon feidhme
1. Leis an Rialachán seo leagtar
síos rialacha maidir le rochtain earraí agus seirbhísí tríú tíortha ar
chonarthaí a dhámhann údaráis chonarathacha/eintitis chonarthacha an Aontais i
dtaca le hobair nó oibreacha a dhéanamh, earraí a sholáthar agus seirbhisí a
chur ar fáil, agus bunaítear nósanna imeachta chun an chaibidlíocht i leith
rochtain earraí agus seirbhísí an Aontais ar mhargaí soláthair phoiblí tríú
tíortha a éascú. 2. Beidh feidhm ag an Rialachán
seo maidir le conarthaí atá cumhdaithe ag na gníomhartha seo a leanas: (a)
Treoir [2004/17/CE]; (b)
Treoir [2004/18/CE]; (c)
Treoir [201./...(maidir le conarthaí lamháltais
a dhámhachtain)]. Beidh feidhm ag an Rialachán seo maidir le
dámhachtain conarthaí ina bhfuil na hearraí nó na seirbhísí á soláthar chun
críocha rialtasacha agus ní ar mhaithe lena n‑athdhíol ná lena n‑úsáid chun
earraí a tháirgeadh nó seirbhísí tráchtála a chur ar fáil. Airteagal 2
Sainmhínithe
1. Chun críocha an Rialacháin
seo beidh feidhm ag na sainmhínithe seo a leanas: (a)
ciallaíonn 'soláthróir' aon duine nádúrtha nó
dlítheanach a thairgeann earraí ar an margadh; (b)
ciallaíonn 'soláthraí seirbhísí' aon duine nádúrtha
nó dlítheanach a thairgeann oibreacha nó obair a dhéanamh, nó a thairgeann
seirbhísí ar an margadh; (c)
ciallaíonn 'údarás conarthach/eintiteas conarthach'
'údarás conarthach' mar atá sainmhínithe in [Airteagal 1(9) de Threoir
2004/18/CE, agus 'eintiteas conarthach' mar atá sainmhínithe in Airteagal 2
de Threoir 2004/17/CE agus in Airteagal 3 agus Airteagal 4 de Threoir
20... maidir le conarthaí lamháltais a dhámhachtain]; (d)
ciallaíonn 'earraí nó seirbhísí atá cumhdaithe'
earra nó seirbhís de thionscnamh tíre a bhfuil comhaontú idirnáisiúnta tugtha i
gcrích ag an Aontas léi i réimse an tsoláthair phoiblí, lena n‑áirítear
gealltanais maidir le rochtain ar an margadh, agus ar earra nó seirbhís é a
bhfuil feidhm ag an gcomhaontú ábhartha maidir leis. Tá in Iarscríbhinn I a
ghabhann leis an Rialachán seo liosta de chomhaontuithe ábhartha; (e)
ciallaíonn 'seirbhísí nó earraí nach bhfuil
cumhdaithe' earra no seirbhís de thionscnamh tíre nach bhfuil comhaontú
idirnáisiúnta tugtha i gcrích ag an Aontas léi i réimse an tsoláthair phoiblí,
lena n‑áirítear gealltanais maidir le rochtain ar an margadh, nó earra nó
seirbhís de thionscnamh tíre a bhfuil comhaontú den sórt sin tugtha i gcrích ag
an Aontas léi, ach nach bhfuil feidhm ag an gcomhaontú ábhartha i ndáil leis; (f)
ciallaíonn 'beart' aon dlí, rialachán, cleachtas,
nó aon teaglaim de na nithe sin; (g)
Ciallaíonn 'páirtí leasmhar' cuideachta nó gnóthas
a bunaíodh i gcomhréir le dlí Ballstáit agus a bhfuil a oifig chláraithe, a
lárionad riaracháin nó a phríomhionad gnó laistigh den Aontas, ar cuideachta nó
gnóthas é a bhíonn ag plé go díreach le táirgeadh earraí nó soláthar seirbhísí
atá faoi réir beart sriantach soláthair tríú tíortha. 2. Chun críocha an Rialacháin
seo (a)
is é brí a fhéadfaidh a bheith le 'tír' aon Stát nó
críoch chustaim ar leith, ach gan impleachtaí ceannasachta a bheith aige sin; (b)
cuimseoidh an téarma 'oibreoir eacnamaíoch' an dá
choincheap 'soláthróir' agus 'soláthraí seirbhíse'; (c)
aon oibreoir eacnamaíoch a bhfuil tairiscint curtha
isteach aige, ainmneofar ina 'tairgeoir' é; (d)
measfar gur soláthar seirbhíse é aon obair nó
oibreacha a dhéantar de réir bhrí Threoracha [2004/17/CE, 2004/18/CE, agus
Treoir 201./.. maidir le conarthaí lamháltais a dhámhachtain]. (e)
is é brí a bheidh le 'pionós sainordaitheach
praghais' oibleagáid ar eintitis chonarthacha praghas seirbhísí agus/nó earraí
de thionscnamh tríú tíortha áirithe a tairgeadh faoi nósanna imeachta um
dhámhachtain conarthaí a ardú, faoi réir eisceachtaí áirithe. Airteagal 3
Rialacha maidir le tionscnamh
1. Is i gcomhréir le hAirteagal 22
go hAirteagal 26 de Rialachán (CE) Uimh. 2913/1992 ó Pharlaimint na
hEorpa agus ón gComhairle an 12 Meán Fómhair 1992 lena mbunaítear an Cód
Custaim Comhphobail[18]
a chinnfear tionscnamh earra. 2. Cinnfear tionscnamh seirbhíse
ar bhonn thionscnamh an duine nádúrtha nó dhlítheanaigh atá á soláthar. Measfar
gurb éard a bheidh i dtionscnamh soláthraí seirbhíse: (a)
i gcás duine nádúrtha, an tír ar náisiúnach di é nó
an tír a bhfuil ceart buanchónaithe aige inti; (b)
i gcás duine dhlítheanaigh aon cheann den dá rud
seo: (1)
má sholáthraítear an tseirbhís ar bhealach seachas
trí láithreacht tráchtála laistigh den Aontas, an tír ina bhfuil an duine
dlítheanach bunaithe nó ina bhfuil sé curtha ar bun ar shlí eile faoi dhlíthe
na tíre sin agus a bhfuil sé ag gabháil d'oibríochtaí substainteacha gnó ar a
críoch; (2)
má sholáthraítear an tseirbhís trí láithreacht
tráchtála laistigh den Aontas, an Ballstát ina bhfuil an duine dlítheanach
bunaithe agus bhfuil sé ag gabháil d'oibríochtaí substainteacha gnó ar a
chríoch a bhfuil baint dhíreach éifeachtach acu le geilleagar an Bhallstáit
lena mbaineann; Chun críocha phointe (2) mura bhfuil an duine
dlítheanach ag gabháil do ghníomhaíochtaí substainteacha gnó a bhfuil baint
dhíreach éifeachtach acu le geilleagar an Bhallstáit lena mbaineann, tionscnamh
na ndaoine nádúrtha nó dlítheanacha ar leo an duine dlítheanach atá ag soláthar
na seirbhíse nó a rialaíonn an duine dlítheanach sin. Maidir leis an duine dlítheanach atá ag soláthar
na seirbhíse: measfar go bhfuil sé "faoi úinéireacht"
daoine de chuid tíre áirithe má tá níos mó ná 50% dá leas cothromais faoi
úinéireacht tairbhiúil daoine den tír sin agus measfar go bhfuil sé "faoi
rialú" ag daoine de chuid tíre áirithe, má tá sé de chumhacht ag na daoine
sin tromlach de na stiúrthóirí a ainmniú nó a ghníomhaíochtaí a stiúradh go
dlíthiúil ar bhealach eile. 3. Chun críocha an Rialacháin
seo, caithfear le hearraí agus le seirbhísí de thionscnamh tíortha an Limistéir
Eorpaigh Eacnamaíoch ar an tslí chéanna a chaitear le hearraí agus le seirbhísí
de thionscnamh na mBallstát. Caibidil II
Mar a chaitear le hearraí agus seirbhísí atá cumhdaithe agus le hearraí agus seirbhísí nach bhfuil cumhdaithe,
Tairiscintí atá thar a bheith íseal
Airteagal 4
Mar a chaitear le hearraí
agus seirbhísí atá cumhdaithe
Agus conarthaí á ndámhachtain chun oibreacha
agus/nó obair a dhéanamh, earraí a sholáthar nó seirbhísí a chur ar fáil,
caithfidh údaráis chonarthacha/eintitis chonarthacha le hearraí agus seirbhísí
atá cumhdaithe go díreach mar a chaitear le hearraí agus seirbhísí atá de
thionscnamh an Aontais Eorpaigh. Aon earraí nó seirbhísí de thionscnamh na
dtíortha is lú forbairt atá liostaithe in Iarscríbhinn I a ghabhann leis
an Rialachán (CE) Uimh. 732/2008, caithfear leo mar earraí agus
seirbhísí atá cumhdaithe. Airteagal 5
Rialacha maidir le rochtain i
gcás earraí agus seirbhísí nach bhfuil cumhdaithe
Féadfaidh earraí agus seirbhísí nach bhfuil
cumhdaithe a bheith faoi réir beart sriantach arna ndéanamh ag an gCoimisiún: (a) arna iarraidh sin d’eintitis
chonarthacha aonair de réir na rialacha atá leagtha amach in Airteagal 6; (b) de réir na rialacha atá
leagtha amach in Airteagal 10 agus in Airteagal 11. Airteagal 6
Cumhacht a thabhairt
d’údaráis chonarthacha/eintitis chonarthacha tairiscintí a chuimsíonn earraí
agus seirbhísí nach bhfuil cumhdaithe a eisiamh
1. Arna iarraidh sin d’údaráis
chonarthacha/eintitis chonarthacha, déanfaidh an Coimisiún a mheas an gceadófar,
i gcás conarthaí a bhfuil a luach measta cothrom le EUR 5 000 000
nó níos mó gan cáin bhreisluacha (CBL) a áireamh, tairiscintí a chuimsíonn
earraí nó seirbhísí nach de thionscnamh an Aontais iad a eisiamh ó nósanna
imeachta um dhámhachtain conarthaí más ionann luach na n‑earraí nó na seirbhísí
nach bhfuil cumhdaithe agus breis agus 50 % de luach iomlán na n‑earraí nó
na seirbhísí a bhaineann leis an tairiscint faoi na coinníollacha a leanas. 2. I gcás ina bhfuil sé
beartaithe ag údaráis chonarthacha/eintitis chonarthacha a iarraidh go n‑eisiafar
tairiscintí ó nósanna imeachta um dhámhachtain conarthaí ar bhonn mhír 1,
sonróidh siad é sin san fhógra conartha a fhoilseoidh siad de bhun Airteagal 35
de Threoir 2004/18/CE nó de bhun Airteagal 42 de Threoir 2004/17/CE
nó Airteagal 26 den Treoir maidir le conarthaí lamháltais a dhámhachtain. Cuirfidh údaráis chonarthacha/eintitis
chonarthacha de cheangal ar thairgeoirí faisnéis a sholáthar maidir le
tionscnamh na n‑earraí agus/nó na seirbhísí a luaitear sa tairiscint agus ar
luach na n‑earraí agus/nó na seirbhísí sin. Glacfaidh siad le féindearbhuithe
mar réamhfhianaise nach féidir tairiscintí a eisiamh de bhun mhír 1. Tráth
ar bith le linn an nós imeachta, féadfaidh údarás conarthach iarraidh ar
thairgeoir an doiciméadacht riachtanach ar fad nó codanna de sin a chur isteach
más cosúil gur gá sin chun a áirithiú go seolfar an nós imeachta mar is
iomchuí. Féadfaidh an Coimisiún gníomhartha cur chun feidhme a ghlacadh lena
mbunófar foirmeacha caighdeánacha le haghaidh dearbhuithe i ndáil le tionscnamh
earraí agus seirbhísí. Glacfar na gníomhartha cur chun feidhme sin i gcomhréir
leis an nós imeachta comhairliúcháin dá dtagraítear in Airteagal 17(3). I gcás ina bhfaighidh údaráis
chonarthacha/eintitis chonarthacha tairiscintí a chomhlíonann coinníollacha
mhír 1 agus ina mbeidh sé beartaithe acu eisiamh a iarraidh ina leith mar
gheall air sin, tabharfaidh siad fógra don Choimisiún faoi sin. Le linn an nós
imeachta um fhógra a thabhairt, féadfaidh an t‑údarás conarthach/eintiteas
conarthach leanúint d'anailís a dhéanamh ar na tairiscintí. Tabharfar an fógra trí mheán leictreonach i
bhfoirm chaighdeánach. Glacfaidh an Coimisiún gníomhartha cur chun feidhme lena
mbunófar na foirmeacha caighdeánacha. Glacfar na gníomhartha cur chun feidhme
sin i gcomhréir leis an nós imeachta comhairliúcháin dá dtagraítear in Airteagal 17(3).
Áireofar an fhaisnéis seo a leanas san fhoirm chaighdeánach sin: (a)
ainm agus sonraí teagmhála an údaráis
chonarthaigh/eintitis chonarthaigh; (b)
tuairisc ar chuspóir an chonartha; (c)
ainm agus sonraí teagmhála an oibreora eacnamaíoch
a ndéanfaí a thairiscint a eisiamh; (d)
faisnéis faoi thionscnamh an oibreora eacnamaíoch,
faoi thionscnamh na n‑earraí agus/nó na seirbhísí agus faoi luach na n‑earraí
agus/nó na seirbhísí sin. Féadfaidh an Coimisiún faisnéis bhreise a iarraidh
ar an údarás conarthach/eintiteas conarthach. Cuirfear an fhaisnéis sin ar fáil laistigh d'ocht
lá oibre dar tosach an chéad lá oibre tar éis an dáta a gheobhaidh sé an
iarraidh ar fhaisnéis bhreise. Mura bhfaigheann an Coimisiún faisnéis faoi
dheireadh na tréimhse sin, cuirfear an tréimhse a bhunaítear i mír 3 ar
fionraí go bhfaighidh an Coimisiún an fhaisnéis a iarradh. 3. I gcás conarthaí dá
dtagraítear i mír 1, glacfaidh an Coimisiún gníomh cur chun feidhme maidir
le formheas an eisiaimh atá beartaithe laistigh de dhá mhí dar tosach an chéad
lá oibre tar éis an dáta a gheobhaidh sé an fógra. Déanfar na gníomhartha cur
chun feidhme sin a ghlacadh i gcomhréir leis an nós imeachta scrúdúcháin dá
dtagraítear in Airteagal 17(2). I gcásanna cuí‑réasúnaithe féadfar cur
leis an tréimhse sin uair amháin ar feadh tréimhse nach faide ná dhá mhí, go
háirithe má tá an fhaisnéis san fhógra nó sna doiciméid a ghabhann leis an
bhfógra neamhiomlán nó míchruinn nó má thagann aon athrú substainteach ar na
fíricí mar a thuairiscítear san fhógra iad. Más rud é, faoi dheireadh na
tréimhse dhá mhí nó faoi dheireadh na tréimhse fadaithe, nach bhfuil cinneadh
glactha ag an gCoimisiún chun an t‑eisiamh a fhormheas nó a dhiúltú, measfar go
bhfuil an t‑eisiamh sin diúltaithe ag an gCoimisiún. 4. Agus gníomhartha cur chun
feidhme á nglacadh ag an gCoimisiún de bhun mhír 3, formheasfaidh sé an t‑eisiamh
atá beartaithe sna cásanna seo a leanas: (a)
má tá forchoimeádais shainráite déanta ag an Aontas
maidir le rochtain ar an margadh, i gcás na n‑earraí agus/nó na seirbhísí a
bhfuiltear ag beartú an eisiaimh dóibh, sa chomhaontú idirnáisiúnta maidir le
rochtain ar an margadh i réimse an tsoláthair phoiblí idir an tAontas agus tír tionscnaimh
na n‑earraí agus/nó na seirbhísí; (b)
mura bhfuil comhaontú den sórt dá dtagraítear i
bpointe (a) ann agus má tá bearta sriantacha soláthair i bhfeidhm ag an
tríú tír a fhágann go bhfuil easpa cómhalartachta substaintiúla idir an tAontas
agus an tríú tír lena mbaineann maidir le hoscailt an mhargaidh. Chun críocha phointe (b), glactar leis go
bhfuil easpa cómhalartachta substaintiúla ann i gcás ina bhfuil bearta
sriantacha soláthair ina gcúis le hidirdhealuithe tromchúiseacha athfhillteacha
i gcoinne oibreoirí eacnamaíocha, earraí agus seirbhísí de chuid an Aontais. Agus gníomhartha cur chun feidhme á nglacadh ag an
gCoimisiún de bhun mhír 3, ní fhormheasfaidh sé an t‑eisiamh atá
beartaithe dá mba rud é go sáródh an t‑eisiamh sin gealltanais maidir le
rochtain ar mhargaí a thug an tAontas ina gcomhaontuithe idirnáisiúnta. 5. Agus measúnú á dhéanamh ag an
gCoimisiún féachaint an bhfuil easpa cómhalartachta substaintiúla ann, cuirfidh
sé an méid seo a leanas san áireamh: (a) a mhéid a éiríonn le dlíthe soláthair
phoiblí na tíre i gceist trédhearcacht a áirithiú i gcomhréir le caighdeáin
idirnáisiúnta i réimse an tsoláthair phoiblí agus bac a chur ar aon idirdhealú
i gcoinne earraí, seirbhísí agus oibreoirí eacnamaíocha an Aontais; (b) a mhéid a leanann nó a ghlacann údaráis
phoiblí agus/nó eintitis soláthair aonair cleachtais idirdhealaitheacha i
gcoinne earraí, seirbhísí agus oibreoirí eacnamaíocha an Aontais. 6. Sula ndéanann an Coimisiún
cinneadh de bhun mhír 3 tabharfaidh sé éisteacht don tairgeoir nó do na
tairgeoirí lena mbaineann. 7. Má dhéanann údaráis
chonarthacha/eintitis chonarthacha tairiscintí a eisiamh de bhun mhír 1,
sonróidh siad sin san fhógra faoi dhámhachtain conarthaí a fhoilseoidh siad de
bhun Airteagal 35 de Threoir 2004/18/CE, Airteagal 42 de
Threoir 2004/17/CE, nó Airteagal 27 den Treoir maidir le conarthaí
lamháltais a dhámhachtain. Glacfaidh an Coimisiún gníomhartha cur chun feidhme
lena mbunófar na foirmeacha caighdeánacha le haghaidh fógraí faoi dhámhachtain
conarthaí. Glacfar na gníomhartha cur chun feidhme sin i gcomhréir leis an nós
imeachta comhairliúcháin dá dtagraítear in Airteagal 17(3). 8. Ní bheidh feidhm ag
mír 1 i gcás ina bhfuil an gníomh cur chun feidhme glactha ag an
gCoimisiún maidir le rochtain shealadach a bheith ag earraí agus seirbhísí ó
thír atá i mbun caibidlíochta substaintí leis an Aontas mar atá leagtha amach
in Airteagal 9(4). Caibidil III
Rialacha maidir le tairiscintí atá thar
a bheith íseal
Airteagal 7
Tairiscintí atá thar a bheith
íseal
Más rud é, faoi Airteagal 69 den Treoir
maidir le soláthar poiblí nó faoi Airteagal 79 den Treoir maidir le
soláthar de chuid eintiteas a oibríonn in earnálacha an uisce, an fhuinnimh, an
iompair agus na seirbhísí poist, agus tar éis mínithe an tairgeora a fhíorú, go
bhfuil sé beartaithe ag an údarás conarthach/eintiteas conarthach glacadh le
tairiscint atá thar a bheith íseal agus a bhaineann le hearraí agus/nó
seirbhísí nach de thionscnamh an Aontais iad, agus gurb ionann luach na n‑earraí
nó na seirbhísí nach bhfuil cumhdaithe agus breis agus 50 % de luach
iomlán na n‑earraí nó na seirbhísí a bhaineann leis an tairiscint, cuirfidh an
t‑údarás conarthach/eintiteas conarthach sin na tairgeoirí eile ar an eolas i
scríbhinn go bhfuil sé beartaithe aige glacadh leis an tairiscint sin, lena n‑áirítear
an fáth go bhfuil an praghas nó na costais arna muirearú thar a bheith íseal. Féadfaidh údarás conarthach/eintiteas
conarthach gan faisnéis a thabhairt amach dá mba rud é go gcuirfeadh scaoileadh
na faisnéise sin bac ar fhorfheidhmiú an dlí, go mbeadh sé in aghaidh leas an
phobail ar bhealach eile, go ndéanfadh sé dochar do leasanna dlisteanacha
tráchtála oibreoirí eacnamaíocha, cibé acu poiblí nó príobháideach, nó dá mba
rud é go bhféadfadh sé dochar a dhéanamh d’iomaíocht chóir idir na hoibreoirí
sin. Caibidil IV
Imscrúdú an Choimisiúin, comhairliúchán
agus bearta lena gcuirtear srian
sealadach ar rochtain earraí agus seirbhísí nach bhfuil cumhdaithe ar mhargadh
soláthair phoiblí an AE
Airteagal 8
Imscrúdú i ndáil le rochtain
oibreoirí eacnamaíocha, earraí agus seirbhísí de chuid an AE ar mhargaí
soláthair phoiblí tríú tíortha
1. I gcás ina measann an
Coimisiún gur chun leas an Aontais é, féadfaidh sé, tráth ar bith, ar a
thionscnamh féin nó ar iarratas ó pháirtithe leasmhara nó ó Bhallstát, imscrúdú
seachtrach soláthair a thionscnamh i ndáil le bearta sriantacha soláthair a
líomhnaítear a bheith ann. Go háirithe, cuirfidh an Coimisiún i gcuntas má
rinneadh líon áirithe eisiamh a bhí beartaithe a fhormheas de bhun Airteagal 6(3)
den Rialachán seo. Má thionscnaítear imscrúdú, foilseoidh an
Coimisiún fógra faoi in Iris Oifigiúil an Aontais Eorpaigh, lena n‑iarrtar
ar pháirtithe leasmhara agus ar Bhallstáit gach faisnéis ábhartha a thabhairt
don Choimisiún laistigh de thréimhse shonrach ama. 2. Déanfar an t‑imscrúdú dá
dtagraítear i mír 1 ar bhonn na gcritéar atá leagtha síos in Airteagal 6.
3. Déanfaidh an Coimisiún a
mheas an bhfuil bearta sriantacha soláthair i bhfeidhm ag an tríú tír lena
mbaineann ar bhonn na faisnéise ó pháirtithe leasmhara agus Ballstáit agus/nó
ar bhonn fíoras arna mbailiú ag an gCoimisiún le linn a imscrúdaithe, agus
críochnóidh sé an measúnú sin laistigh de naoi mí ón imscrúdú a thionscnamh. I
gcásanna cuí‑réasúnaithe, féadfar trí mhí a chur leis an tréimhse sin. 4. Má chinneann an Coimisiún, de
bharr an imscrúdaithe sheachtraigh maidir le soláthar, nach bhfuil na bearta
sriantacha soláthair a líomhnaíodh i bhfeidhm sa tríú tír lena mbaineann,
glacfaidh an Coimisiún cinneadh lena gcuirfear deireadh leis an imscrúdú.
Déanfar na gníomhartha cur chun feidhme sin a ghlacadh i gcomhréir leis an nós
imeachta scrúdúcháin dá dtagraítear in Airteagal 17(2). Airteagal 9
Comhairliúchán le tríú tír
1. Má fhaightear amach, de bharr
imscrúdaithe, go bhfuil bearta sriantacha soláthair i bhfeidhm i dtríú tír agus
má mheasann an Coimisiún go bhfuil call le comhairliúchán léi chun leas an AE,
iarrfaidh an Coimisiún ar an tríú tír sin dul i mbun comhairliúcháin leis
d’fhonn a áirithiú go bhféadfaidh oibreoirí eacnamaíocha, earraí agus seirbhísí
an AE a bheith rannpháirteach i nósanna imeachta tairisceana chun conarthaí
soláthair phoiblí a dhámhachtain sa tír sin faoi choinníollacha nach lú fabhar
ná na coinníollacha sin a bhfuil feidhm acu maidir le hoibreoirí eacnamaíocha,
earraí agus seirbhísí de thionscnamh na tíre féin, agus d'fhonn a áirithiú
freisin go bhfuil prionsabail na trédhearcachta agus na córa comhionainne á
gcur i bhfeidhm. Má dhiúltaíonn an tír lena mbaineann dul i
gcomhairle leis an gCoimisiún, is ar bhonn na bhfíoras atá ar fáil a dhéanfaidh
an Coimisiún a chinneadh agus gníomhartha cur chun feidhme á nglacadh aige faoi
Airteagal 10 chun an rochtain atá ag earraí agus seirbhísí ón tríú tír sin
a theorannú. 2. Más páirtí i gComhaontú na
hEagraíochta Domhanda Trádála maidir le Soláthar Rialtais í an tír lena
mbaineann nó má tá comhaontú trádála tugtha i gcrích aici leis an AE ina bhfuil
forálacha maidir le soláthar poiblí, cloífidh an Coimisiún leis na sásraí
comhairliúcháin agus/nó na nósanna imeachta um réiteach díospóide atá leagtha
amach sa chomhaontú sin nuair a bhaineann na cleachtais shriantacha le soláthar
atá cumhdaithe ag gealltanais maidir le rochtain ar an margadh a thug an tír
lena mbaineann don AE. 3. Más rud é, tar éis
comhairliúchán a thionscnamh, go ndéanann an tír lena mbaineann bearta
feabhais/ceartaitheacha atá sásúil, ach nach dtugann sí gealltanais nua maidir
le rochtain ar an margadh, féadfaidh an Coimisiún an comhairliúchán a chur ar
fionraí nó deireadh a chur leis: Déanfaidh an Coimisiún faireachán ar chur i
bhfeidhm na mbeart feabhais/ceartaitheach sin, ar bhonn faisnéise arna soláthar
go tráthrialta nuair is iomchuí, ar faisnéis í a fhéadfaidh an Coimisiún a
iarraidh ón tríú tír lena mbaineann. I gcás ina gcealaítear na bearta feabhais/ceartaitheacha
arna ndéanamh ag an tríú tír lena mbaineann, nó ina gcuirtear iad ar fionraí nó
mura gcuirtear chun feidhme go cuí iad, féadfaidh an Coimisiún: (i) athchromadh ar an gcomhairliúchán leis an tríú
tír lena mbaineann nó é a thosú as an nua, agus/nó (ii) gníomhú faoi Airteagal 10 chun
gníomhartha cur chun feidhme a ghlacadh lena gcuirfear srian ar an rochtain atá
ag earraí agus seirbhísí de thionscnamh tríú tír Déanfar na gníomhartha cur chun feidhme dá
dtagraítear sa mhír seo a ghlacadh i gcomhréir leis an nós imeachta scrúdúcháin
dá dtagraítear in Airteagal 17(2). 4. Más rud é, tar éis
comhairliúchán a thionscnamh, gur cosúil gurb é an dóigh is iomchuí le deireadh
a chur le cleachtas sriantach soláthair comhaontú idirnáisiúnta a thabhairt i gcrích,
rachfar i mbun caibidlíochta i gcomhréir le forálacha Airteagal 207 agus Airteagal 218
den Chonradh ar Fheidhmiú an Aontais Eorpaigh. Má chuaigh tír i mbun
caibidlíochta substaintí leis an Aontas Eorpach maidir le rochtain ar an
margadh i réimse an tsoláthair phoiblí, féadfaidh an Coimisiún gníomh cur chun
feidhme a ghlacadh lena bhforáilfear nach féidir earraí ná seirbhísí ón tír sin
a eisiamh ó nósanna imeachta um dhámhachtain conarthaí de bhun Airteagal 6. 5. Féadfaidh an Coimisiún
deireadh a chur leis an gcomhairliúchán má thugann an tír lena mbaineann
gealltanais idirnáisiúnta, ar gealltanais iad a chomhaontófar leis an Aontas
faoi aon cheann de na creataí seo a leanas: (a)
Aontachas le Comhaontú na hEagraíochta Domhanda
Trádála maidir le Soláthar Rialtais, (b)
Tabhairt i gcrích comhaontaithe dhéthaobhaigh leis
an Aontas lena gcuimseofar gealltanais maidir le rochtain ar an margadh i
réimse an tsoláthair phoiblí, nó (c)
Forleathnú a gealltanas maidir le rochtain ar an
margadh a tugadh faoi Chomhaontú na hEagraíochta Domhanda Trádála maidir le
Soláthar Rialtais nó faoi chomhaontú déthaobhach leis an Aontas sa chreat sin, Féadfar deireadh a chur leis an gcomhairliúchán
freisin i gcás ina mbeidh na bearta sriantacha soláthair i bhfeidhm go fóill
tráth a thugtar na gealltanais sin, fad is atá forálacha mionsonraithe sna
gealltanais maidir le deireadh a chur leis na cleachtais shriantacha sin de
réir a chéile. 6. Mura dtugann comhairliúchán
le tríú tír torthaí sásúla laistigh de 15 mhí ón lá a tosaíodh an
comhairliúchán leis an tríú tír, cuirfidh an Coimisiún deireadh leis an
gcomhairliúchán agus déanfaidh sé a mhachnamh ar ghníomhú faoi Airteagal 10
chun gníomhartha cur chun feidhme a ghlacadh chun an rochtain atá ag earraí
agus seirbhísí de thionscnamh tríú tír a theorannú. Airteagal 10
Bearta a ghlacadh lena
gcuirtear srian ar rochtain earraí agus seirbhísí nach bhfuil cumhdaithe ar
mhargadh soláthair phoiblí an AE
1. I gcás ina bhfaightear amach
in imscrúdú de bhun Airteagal 8, agus tar éis an nós imeachta dá bhforáiltear
in Airteagal 9 a leanúint, go bhfuil bearta sriantacha soláthair a glacadh
nó atá i bhfeidhm sa tríú tír sin ina gcúis le heaspa cómhalartachta
substaintiúla idir an tAontas agus an tríú tír, mar a thagraítear dó in Airteagal 6,
féadfaidh an Coimisiún gníomhartha cur chun feidhme a ghlacadh chun an rochtain
atá ag earraí agus seirbhísí nach bhfuil cumhdaithe agus ar de thionscnamh tríú
tír iad a theorannú ar bhonn sealadach. Déanfar na gníomhartha cur chun feidhme
sin a ghlacadh i gcomhréir leis an nós imeachta scrúdúcháin dá dtagraítear in Airteagal 17(2). 2. Féadfaidh na bearta arna
nglacadh de bhun mhír 1 a bheith in aon cheann de na foirmeacha seo a
leanas: (a)
eisiamh tairiscintí a mbaineann breis agus
50 % dá luach iomlán le hearraí nó seirbhísí nach bhfuil cumhdaithe agus
ar de thionscnamh na tíre a bhfuil cleachtas sriantach soláthair á ghlacadh
aici nó a bhfuil cleachtas den sórt sin i bhfeidhm inti iad; agus/nó (b)
pionós sainordaitheach praghais ar an gcuid sin den
tairiscint lena mbaineann earraí nó seirbhísí nach bhfuil cumhdaithe agus ar de
thionscnamh na tíre a bhfuil cleachtas sriantach soláthair á ghlacadh aici nó a
bhfuil cleachtas den sórt sin i bhfeidhm inti iad. 3. Féadfar bearta arna nglacadh
de bhun mhír 1 a theorannú don mhéid seo a leanas go háirithe: (a)
soláthar poiblí ag catagóirí sainithe áirithe
d'údaráis chonarthacha/eintitis chonarthacha; (b)
soláthar poiblí maidir le catagóirí sainithe
áirithe d'earraí nó seirbhísí; (c)
soláthar poiblí os coinn nó faoi bhun tairseach
sainithe áirithe. Airteagal 11
Bearta a tharraingt siar nó a
chur ar fionraí 1. I
gcás ina measann an Coimisiún nach infheidhme a thuilleadh na cúiseanna a thug
údar leis na bearta a glacadh de bhun Airteagal 9(4) agus Airteagal 10,
féadfaidh an Coimisiún gníomh cur chun feidhme a ghlacadh: (a)
chun na bearta a aisghairm; nó (b)
chun cur i bhfeidhm na mbeart a chur ar fionraí go
ceann tréimhse bliana ar a mhéad. Chun críocha phointe (b), féadfaidh an
Coimisiún na bearta a chur i bhfeidhm arís, tráth ar bith, trí ghníomh cur chun
feidhme. 2. Déanfar
na gníomhartha cur chun feidhme dá dtagraítear san Airteagal seo a ghlacadh i
gcomhréir leis an nós imeachta scrúdúcháin dá dtagraítear in Airteagal 17(2). Airteagal 12
Tairgeoirí a chur ar an eolas 1. Nuair a sheolann
údaráis chonarthacha/eintitis chonarthacha nós imeachta soláthair faoi réir
beart sriantach arna nglacadh de bhun Airteagal 10 nó arna gcur i bhfeidhm
arís de bhun Airteagal 11, sonróidh siad sin san fhógra conartha a
fhoilseoidh siad de bhun Airteagal 35 de Threoir 2004/18/CE nó de
bhun Airteagal 42 de Threoir 2004/17/CE. Glacfaidh an Coimisiún
gníomhartha cur chun feidhme lena mbunófar na foirmeacha caighdeánacha i
gcomhréir leis an nós imeachta comhairliúcháin dá dtagraítear in Airteagal 17(3).2 I
gcás ina mbeidh eisiamh tairisceana bunaithe ar fheidhmiú beart arna nglacadh
de bhun Airteagal 10 nó arna gcur i bhfeidhm arís de bhun Airteagal 11,
cuirfidh údaráis chonarthacha/eintitis chonarthacha tairgeoirí nár éirigh leo
ar an eolas faoi sin. Airteagal 13
Eisceachtaí 1. Féadfaidh údaráis
chonarthacha/eintitis chonarthacha a chinneadh gan na bearta a chur i bhfeidhm
de bhun Airteagal 10 i ndáil le nós imeachta soláthair sna cásanna seo a
leanas: (a)
mura bhfuil aon earraí nó seirbhísí de chuid an
Aontais agus/nó aon earraí nó seirbhísí atá cumhdaithe ann a chomhlíonann
ceanglais an eintitis chonarthaigh; nó (b)
dá dtiocfadh méadú díréireach ar phraghas nó ar
chostais an chonartha toisc an beart a chur i bhfeidhm. 2. I gcás ina bhfuil sé
beartaithe ag údarás conarthach/eintiteas conarthach gan bearta arna nglacadh
de bhun Airteagal 10 den Rialachán seo a chur i bhfeidhm, nó gan iad a
chur i bhfeidhm arís de bhun Airteagal 11, sonróidh sé go bhfuil sé
beartaithe aige sin a dhéanamh san fhógra conartha a fhoilseoidh sé de bhun Airteagal 35
de Threoir 2004/18/CE nó de bhun Airteagal 42 de
Threoir 2004/17/CE. Tabharfaidh sé fógra don Choimisiún faoi sin tráth
nach déanaí ná deich lá féilire tar éis fhoilsiú an fhógra conartha. Tabharfar an fógra sin trí mheán leictreonach i
bhfoirm chaighdeánach. Glacfaidh an Coimisiún gníomhartha cur chun feidhme lena
mbunófar na foirmeacha caighdeánacha le haghaidh fógraí conartha agus na
foirmeacha caighdeánacha a úsáidtear chun fógra a thabhairt i gcomhréir leis an
nós imeachta comhairliúcháin dá dtagraítear in Airteagal 17(3). Beidh an fhaisnéis
seo a leanas san fhógra: (a)
ainm agus sonraí teagmhála an údaráis
chonarthaigh/eintitis chonarthaigh; (b)
tuairisc ar chuspóir an chonartha; (c)
faisnéis faoi thionscnamh na n‑oibreoirí
eacnamaíocha, na n‑earraí agus/nó na seirbhísí atá le ceadú; (d)
an foras ar ar bunaíodh an cinneadh gan na bearta
sriantacha a chur i bhfeidhm, agus an réasúnú mionsonraithe atá le húsáid na
heisceachta; (e)
nuair is iomchuí, aon fhaisnéis eile a mheasann an
t‑údarás conarthach/eintiteas conarthach a bheith úsáideach. Féadfaidh an Coimisiún faisnéis bhreise a iarraidh
ar an údarás conarthach/eintiteas conarthach lena mbaineann. 3. Más rud é, faoi Airteagal 31
de Threoir 2004/18/CE nó faoi Airteagal 40(3)(2) de
Threoir 2004/17/CE, go seolann údarás conarthach/eintiteas conarthach nós
imeachta idirbheartaíochta gan iarratas ar thairiscintí a fhoilsiú roimh ré
agus má chinneann sé gan beart arna ghlacadh de bhun Airteagal 10 den
Rialachán seo a chur i bhfeidhm, nó má chinneann sé gan beart a chur i bhfeidhm
arís de bhun Airteagal 11, sonróidh sé an úsáid sin san fhógra faoi
dhámhachtain conarthaí a fhoilseoidh sé de bhun Airteagal 35 de
Threoir 2004/18/CE nó de bhun Airteagal 43 de Threoir 2004/17/CE
agus tabharfaidh sé fógra don Choimisiún faoi sin tráth nach déanaí ná deich lá
féilire tar éis fhoilsiú an fhógra faoi dhámhachtain conarthaí. Tabharfar an fógra sin trí mheán leictreonach i
bhfoirm chaighdeánach. Glacfaidh an Coimisiún gníomhartha cur chun feidhme lena
mbunófar na foirmeacha caighdeánacha le haghaidh fógraí conartha agus na
foirmeacha caighdeánacha a úsáidtear chun fógra a thabhairt i gcomhréir leis an
nós imeachta comhairliúcháin dá dtagraítear in Airteagal 17(2). Beidh an
fhaisnéis seo a leanas san fhógra: (a)
ainm agus sonraí teagmhála an údaráis
chonarthaigh/eintitis chonarthaigh; (b)
tuairisc ar chuspóir an chonartha; (c)
faisnéis faoi thionscnamh na n‑oibreoirí
eacnamaíocha, na n‑earraí agus/nó na seirbhísí atá le ceadú; (d)
an foras ar ar bunaíodh an cinneadh gan na bearta
sriantacha a chur i bhfeidhm, agus an réasúnú mionsonraithe atá le húsáid na
heisceachta; (e)
más iomchuí, aon fhaisnéis eile a mheasann an t‑eintiteas
conarthach a bheith úsáideach. Caibidil V
Cumhachtaí tarmligthe agus cur chun
feidhme, tuairisciú agus forálacha críochnaitheacha
Airteagal 14 Leasuithe ar
an Iarscríbhinn
Tabharfar de chumhacht don Choimisiún
gníomhartha tarmligthe a ghlacadh i gcomhréir le hAirteagal 14 maidir le
leasuithe ar an Iarscríbhinn chun comhaontuithe idirnáisiúnta nua arna
dtabhairt i gcrích ag an Aontas i réimse an tsoláthair phoiblí a léiriú. Airteagal 15
Tarmligean na gcumhachtaí a
fheidhmiú
1. Tugtar de chumhacht don
Choimisiún gníomhartha tarmligthe a ghlacadh faoi réir na gcoinníollacha atá
leagtha síos san Airteagal seo. 2. Bronnfar an tarmligean cumhachta
dá dtagraítear in Airteagal 14 ar an gCoimisiún go ceann tréimhse
neamhchinntithe ama ó [dháta theacht i bhfeidhm an Rialacháin seo]. 3. Féadfaidh Parlaimint na
hEorpa nó an Chomhairle an chumhacht dá dtagraítear in Airteagal 14 a
chúlghairm tráth ar bith. Má chinntear cúlghairm a dhéanamh, cuirfear deireadh
le tarmligean na cumhachta a bheidh sonraithe sa chinneadh sin. Gabhfaidh
éifeacht leis an gcúlghairm an lá tar éis fhoilsiú an chinnidh in Iris
Oifigiúil an Aontais Eorpaigh nó ar dháta níos déanaí ná sin a shonrófar
ann. Ní dhéanfaidh sé difear do bhailíocht aon ghníomhartha tarmligthe atá i
bhfeidhm cheana féin. 4. A luaithe a ghlacfaidh sé
gníomh tarmligthe, tabharfaidh an Coimisiún fógra ina leith sin do Pharlaimint
na hEorpa agus don Chomhairle ag an am céanna. 5. Ní thiocfaidh gníomh
tarmligthe arna ghlacadh de bhun an Airteagail seo i bhfeidhm ach amháin mura
bhfuil agóid déanta ag Parlaimint na hEorpa ná ag an gComhairle ina choinne
laistigh de thréimhse dhá mhí ó fhógra faoin ngníomh sin a thabhairt do
Pharlaimint na hEorpa agus don Chomhairle nó má tá sé curtha in iúl ag
Parlaimint na hEorpa agus ag an gComhairle araon, sula dtéann an tréimhse sin
in éag, nach ndéanfaidh siad agóid ina choinne. Cuirfear dhá mhí leis an
tréimhse sin ar thionscnamh Pharlaimint na hEorpa nó na Comhairle. Airteagal 16
Cur chun feidhme
1. I gcás ina ndéanann údaráis
chonarthacha/eintitis chonarthacha eisceachtaí atá leagtha síos in Airteagal 13
a chur chun mífheidhme, féadfaidh an Coimisiún an sásra ceartaitheach dá
bhforáiltear in Airteagal 3 de Threoir 89/665/CEE nó in Airteagal 8
de Threoir 92/13/CEE a chur i bhfeidhm. 2. Maidir le conarthaí arna
dtabhairt i gcrích le hoibreoir eacnamaíoch de shárú ar ghníomhartha cur chun
feidhme arna nglacadh ag an gCoimisiún de bhun Airteagal 6 tar éis
d'údaráis chonarthacha/eintitis chonarthacha fógra a thabhairt go bhfuil sé
beartaithe acu tairiscintí a eisiamh nó de shárú ar bhearta arna nglacadh de
bhun Airteagal 10 nó arna gcur i bhfeidhm arís de bhun Airteagal 11,
measfar nach bhfuil feidhm acu sin de réir bhrí Threoir 2007/66/CE. Airteagal 17
Nós imeachta coiste 1. Beidh de chúnamh ag an
gCoimisiún an Coiste Comhairleach um Chonarthaí Poiblí arna bhunú le
Cinneadh 71/306/CEE ón gComhairle[19]
agus an Coiste arna bhunú le hAirteagal 7 den Rialachán um Bhacainní
Trádála[20].
Coistí de réir bhrí Airteagal 3 de Rialachán (AE) Uimh. 182/2011 a
bheidh sna coistí sin. 2. I gcás ina ndéantar tagairt
don mhír seo, beidh feidhm ag Airteagal 5 de Rialachán (AE) Uimh. 182/2011
agus is é an Coiste arna bhunú leis an Rialachán um Bhacainní Trádála a bheidh
sa choiste inniúil. 3. I gcás ina ndéantar tagairt
don mhír seo, beidh feidhm ag Airteagal 4 de Rialachán (AE) Uimh. 182/2011
agus is é an Coiste arna bhunú le Treoir 71/306/CEE a bheidh sa choiste
inniúil. Airteagal 18
Rúndacht
1. Is chun na críche a iarradh
í, agus chun na críche sin amháin, a fhéadfar faisnéis a fhaightear de bhun an
Rialacháin seo a úsáid. 2. Ní nochtfaidh an Coimisiún,
an Chomhairle, Parlaimint na hEorpa, na Ballstáit, ná a n‑oifigigh aon
fhaisnéis de chineál rúnda arna fáil de bhun an Rialacháin seo gan cead sonrach
a fháil ó sholáthróir na faisnéise sin. 3. Féadfaidh soláthróir
faisnéise a iarraidh go gcaithfear le faisnéis arna cur ar fáil mar fhaisnéis
rúnda agus cuirfidh sé achoimre nach bhfuil rúnda leis an bhfaisnéis nó
gabhfaidh ráiteas léi ina míneofar cén fáth nach féidir achoimre a dhéanamh
uirthi. 4. Más cosúil nach bhfuil údar
maith leis an iarraidh ar rúndacht agus mura bhfuil an soláthróir toilteanach an
fhaisnéis a chur ar fáil go poiblí ná nochtadh na faisnéise i dtéarmaí
ginearálta nó i bhfoirm achoimre a údarú, féadfar neamhshuim a dhéanamh den
fhaisnéis sin. 5. Ní chuirfidh míreanna 1
go 5 bac ar údaráis an Aontais faisnéis ghinearálta a nochtadh. Ní mór leas
dlisteanach na bpáirtithe lena mbaineann, is é sin nach sceithfí a rúin ghnó, a
chur i gcuntas i nochtadh den sórt sin. Airteagal 19
Tuairisciú
Faoin 1 Eanáir 2017 agus ar a
laghad gach trí bliana tar éis theacht i bhfeidhm an Rialacháin seo, cuirfidh
an Coimisiún tuarascáil faoi bhráid Pharlaimint na hEorpa agus na Comhairle
maidir le cur i bhfeidhm an Rialacháin seo agus maidir leis an dul chun cinn a
bheidh déanta i gcaibidlíochtaí idirnáisiúnta, arna ndéanamh faoin Rialachán
seo, i dtaobh rochtain a bheith ag oibreoirí eacnamaíocha de chuid an AE ar
nósanna imeachta um dhámhachtain conarthaí poiblí i dtríú tíortha. Chuige sin,
tabharfaidh na Ballstáit faisnéis iomchuí don Choimisiún arna iarraidh sin. Airteagal 20
Aisghairmeacha
Aisghairfear Airteagal 58 agus Airteagal 59
de Threoir 2004/17/CE le héifeacht ó theacht i bhfeidhm an Rialacháin seo. Airteagal 21
Teacht i bhfeidhm
Tiocfaidh an Rialachán seo i bhfeidhm an
60ú lá tar éis lá a fhoilsithe in Iris Oifigiúil an Aontais Eorpaigh. Beidh an Rialachán seo ina cheangal
go huile agus go hiomlán agus infheidhme go díreach i ngach Ballstát. Arna dhéanamh sa Bhruiséil, an 21.3.2012 Thar ceann Pharlaimint na hEorpa Thar
ceann na Comhairle An tUachtarán An
tUachtarán IARSCRÍBHINN Liosta
de na comhaontuithe idirnáisiúnta atá tugtha i gcrích ag an Aontas i réimse an
tsoláthair phoiblí lena n‑áirítear gealltanais maidir le rochtain ar an margadh Comhaontú Ilpháirtithe - Comhaontú maidir le Soláthar Rialtais
(IO L, 336, 23.12.1994) Comhaontuithe déthaobhacha: - Comhaontú Saorthrádála idir an Comhphobal
Eorpach agus Meicsiceo (IO L 276, 28.10.2000, l 157/30.06.2000) - Comhaontú idir an Comhphobal Eorpach agus
Cónaidhm na hEilvéise maidir le gnéithe áirithe a bhaineann le soláthar
rialtais (IO L. 114, 30.04.2002) - Comhaontú Saorthrádála idir an Comhphobal
Eorpach agus an tSile (IO L 352, 30.12.2002) - Comhaontú
Cobhsaíochta agus Comhlachais idir an Comhphobal Eorpach agus a Bhallstáit agus
Iar‑Phoblacht Iúgslavach na Macadóine (IO L 87, 20.03.2004) - Comhaontú
Cobhsaíochta agus Comhlachais idir an Comhphobal Eorpach agus an Chróit
(IO L 26, 28.01.2005) - Comhaontú
Cobhsaíochta agus Comhlachais idir an Comhphobal Eorpach agus a Bhallstáit agus
Montainéagró (IO L 345, 28.12.2007) - Comhaontú
Cobhsaíochta agus Comhlachais idir an Comhphobal Eorpach agus an Albáin
(IO L 107, 28.04.2009) - Comhaontú
Saorthrádála idir an tAontas Eorpach agus an Chóiré Theas
(IO L 127/14.05.2011) [1] Airteagal 58 agus Airteagal 59 de Threoir 2004/17 maidir
le nósanna imeachta um sholáthar poiblí fóntas. [2] Treoir 2004/18/CE maidir le heintitis sna
hearnálacha clasaiceacha, mar a deirtear leo, agus Treoir 17/2004/CE
maidir le heintitis atá ag oibriú in earnálacha an uisce, an fhuinnimh, an
iompair agus an phoist (IO L 134, 30.4.2004, lch. 1 agus lch. 114,
faoi seach) [3] COM(2011) 895 final agus
COM(2011) 896 final. [4] Fuarthas
tuarimí scríofa chomh maith le freagraí ar líne. [5] Cur Chuige A: Bheadh ceanglas ar údaráis
chonarthacha/eintitis chonarthacha an AE, i bprionsabal, eisiamh a dhéanamh ar
earraí, seirbhísí agus cuideachtaí ó thríú tír nach bhfuil cumhdaithe ag
gealltanais idirnáisiúnta de chuid an AE. [6] Cur Chuige B: Faoi réir fógra a thabhairt don
Choimisiún, bheadh rogha ag údaráis chonarthacha/eintitis chonarthacha an AE
eisiamh a dhéanamh ar earraí, seirbhísí agus cuideachtaí ó thríú tír nach
bhfuil cumhdaithe ag gealltanais idirnáisiúnta de chuid an AE. Lena chois sin,
thabharfaí uirlis shonrach don Choimisiún chun fiosrúcháin a dhéanamh maidir le
staid na rochtana ar mhargaídh atá ag earraí, seirbhísí agus gnólachtaí de
chuid an AE agus bearta sriantacha a chur i bhfeidhm ar earraí agus ar
sheirbhísí de thionscnamh na dtríú tíortha sin nach gceadaíonn go leor rochtana
d'earraí, do sheirbhísí ná do ghnólachtaí de chuid an AE i margadh an
tsoláthair phoiblí sna tíortha sin. [7] COM(2011) 897 final. [8] IO C , , lch. . [9] IO C , , lch. . [10] IO L 134, 30.4.2004, lch. 1. [11] IO L 134, 30.4.2004, lch. 114. [12] IO L 302, 19.10.1992, lch. 1. [13] IO L…. [14] IO L 349, 31.12.1994 [15] IO L 395, 30.12.1989, lch. 33. [16] IO L 76, 23.3.1992, lch. 14. [17] IO L 335, 20.12.2007, lch. 31. [18] IO L 302, 19.10.1992, lch. 1. [19] IO L 185, 16.08.1971,
lch. 15. [20] IO L 349, 31.12.1994, lch. 71.