|
22.9.2023 |
GA |
Iris Oifigiúil an Aontais Eorpaigh |
L 234/101 |
RIALACHÁN CUR CHUN FEIDHME (AE) 2023/1806 ÓN gCOIMISIÚN
an 20 Meán Fómhair 2023
lena leasaítear Rialachán Cur Chun Feidhme (AE) 2019/73 ón gCoimisiún lena bhforchuirtear dleacht frithdhumpála chinntitheach agus lena mbailítear go cinntitheach an dleacht shealadach arna forchur ar allmhairí rothar leictreach de thionscnamh Dhaon-Phoblacht na Síne
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) 2016/1036 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (1), agus go háirithe Airteagal 14(1) de,
De bharr an mhéid seo a leanas:
|
(1) |
Allmhairí rothar leictreach de thionscnamh Dhaon-Phoblacht na Síne, is allmhairí iad atá faoi réir dleachtanna frithdhumpála cinntitheacha a fhorchuirtear le Rialachán Cur Chun Feidhme (AE) 2019/73 ón gCoimisiún (2). |
|
(2) |
Jinhua Enjoycare Motive Technology Co., Ltd., (3) a bhfuil cód breise TARIC C419 aige, ar cuideachta é atá faoi réir dleachtráta frithdhumpála 24,2 % le haghaidh ‘Cuideachtaí comhoibríocha eile san imscrúdú frithdhumpála (cé is moite de na cuideachtaí atá faoi réir an dleachtráta frithchúitimh chomhthreomhair le haghaidh gach cuideachta eile faoi Rialachán Cur Chun Feidhme (AE) 2019/72)’, chuir sé an Coimisiún ar an eolas an 21 Samhain 2022 gur athraigh sé a ainm go Enjoycare Technology (Zhejiang) Co., Ltd. |
|
(3) |
D’iarr an chuideachta ar an gCoimisiún a dheimhniú nach ndéanann an t-athrú ainm aon difear do cheart na cuideachta tairbhiú den ráta dleachta frithdhumpála ab infheidhme maidir léi faoin ainm a bhí uirthi roimhe seo. |
|
(4) |
Scrúdaigh an Coimisiún an fhaisnéis a soláthraíodh, agus ba é a chonclúid go raibh an t-athrú ar an ainm cláraithe i gceart leis na húdaráis ábhartha, agus nach raibh aon ghaol nua ann dá bharr le grúpaí eile cuideachtaí nach ndearna an Coimisiún imscrúdú orthu. |
|
(5) |
Dá réir sin, ní dhéanann an t-athrú ar an ainm difear do thorthaí Rialachán Cur Chun Feidhme (AE) 2019/73 ón gCoimisiún, agus go háirithe don ráta dleachta frithdhumpála is infheidhme maidir leis. |
|
(6) |
Ba cheart feidhm a bheith leis an athrú ainm ón dáta a d’athraigh an chuideachta a hainm, i.e. an 22 Meán Fómhair 2022. D’iarr an Coimisiún ar an iarratasóir a dheimhniú an raibh an dáta sin iomchuí nó nach raibh. |
|
(7) |
I bhfianaise a bhfuil sna haithrisí thuas, mheas an Coimisiún gurbh iomchuí Rialachán Cur Chun Feidhme (AE) 2019/73 ón gCoimisiún a leasú chun ainm nua na cuideachta a léiriú, ainm ar sannadh cód breise TARIC C419 dó roimhe seo. |
|
(8) |
Tá na bearta dá bhforáiltear sa Rialachán seo i gcomhréir leis an tuairim ón gCoiste a bunaíodh le hAirteagal 15(1) de Rialachán (AE) 2016/1036, |
TAR ÉIS AN RIALACHÁN SEO A GHLACADH:
Airteagal 1
1. Leasaítear Iarscríbhinn I a ghabhann le Rialachán Cur Chun Feidhme (AE) 2019/73 mar a leanas:
|
‘Jinhua Enjoycare Motive Technology Co., Ltd. |
Zhejiang |
C419’ |
cuirtear an méid seo a leanas ina ionad sin
|
‘Enjoycare Technology (Zhejiang) Co., Ltd. |
Zhejiang |
C419’ |
2. Beidh feidhm ag cód breise TARIC C419, a bhí sannta do Jinhua Enjoycare Motive Technology Co., Ltd.. roimhe seo, maidir le Enjoycare Technology (Zhejiang) Co., Ltd. ón 22 Meán Fómhair 2022 i leith. Aon dleacht chinntitheach a íocadh ar allmhairí táirgí arna monarú ag Enjoycare Technology (Zhejiang) Co., Ltd. de bhreis ar an dleacht frithdhumpála a leagtar síos in Airteagal 1(2) de Rialachán Cur Chun Feidhme (AE) 2019/73 a mhéid a bhaineann le Jinhua Enjoycare Motive Technology Co., Ltd., is dleacht í a dhéanfar a aisíoc nó a loghadh i gcomhréir leis an reachtaíocht chustaim is infheidhme.
Airteagal 2
Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, an 20 Meán Fómhair 2023.
Thar ceann an Choimisiúin
An tUachtarán
Ursula VON DER LEYEN
(1) IO L 176, 30.6.2016, lch. 21.
(2) Rialachán Cur Chun Feidhme (AE) 2019/73 ón gCoimisiún an 17 Eanáir 2019 lena bhforchuirtear dleacht chinntitheach frithdhumpála agus lena mbailítear go cinntitheach an dleacht shealadach arna forchur ar allmhairí rothar leictreach de thionscnamh Dhaon-Phoblacht na Síne (IO L 16, 18.1.2019, lch. 108).
(3) Taraif Chomhtháite an Aontais Eorpaigh.