(1)

Allmhairí píopaí agus feadán gan uaim áirithe de chruach dhosmálta de thionscnamh Dhaon-Phoblacht na Síne, is allmhairí iad atá faoi réir dleachtanna frithdhumpála cinntitheacha a fhorchuirtear le Rialachán Cur Chun Feidhme(AE) 2018/330 ón gCoimisiún. (2)

(2)

Zhejiang Tsingshan Steel Pipe, Co. Ltd, Lishui, a bhfuil cód breise TARIC (3) B 263 aige, ar cuideachta é atá faoi réir an ráta dleachta 56,9 % le haghaidh táirgeoirí comhoibríocha neamhshampláilte, chuir sé an Coimisiún ar an eolas an 10 Eanáir 2023 gur athraigh sé a ainm go Tsingshan Steel Pipe, Co. Ltd, Lishui.

(3)

D’iarr an chuideachta ar an gCoimisiún a dheimhniú nach ndéanann an t-athrú ar an ainm aon difear do cheart na cuideachta tairbhiú den ráta dleachta frithdhumpála ab infheidhme maidir léi faoin seanainm a bhí uirthi roimhe sin.

(4)

Scrúdaigh an Coimisiún an fhaisnéis a soláthraíodh, agus ba é a chonclúid go raibh an t-athrú ar an ainm cláraithe i gceart leis na húdaráis ábhartha, agus nach raibh aon ghaol nua ann dá bharr le grúpaí eile cuideachtaí nach ndearna an Coimisiún imscrúdú orthu.

(5)

Dá réir sin, ní dhéanann an t-athrú ar an ainm difear do thorthaí Rialachán Cur Chun Feidhme (AE) 2018/330 ón gCoimisiún, agus go háirithe don ráta dleachta frithdhumpála is infheidhme maidir leis. Dheimhnigh an fhianaise sa chomhad freisin go raibh an t-athrú ar an ainm infheidhme ón 21 Meán Fómhair 2022 ar aghaidh, an lá a d’fhormheas Oifig Riaracháin Chontae Qingtian um Rialáil Margaidh an t-athrú ar an ainm.

(6)

Tá na bearta dá bhforáiltear sa Rialachán seo i gcomhréir le tuairim ón gCoiste a bunaíodh le hAirteagal 15(1) de Rialachán (AE) 2016/1036.