(1)

Le Rialachán (CE) Uimh. 1831/2003 déantar foráil maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta i leith an t-údarú sin a dheonú agus a athnuachan.

(2)

Údaraíodh ullmhóid de chlóiríd amóiniam ar feadh tréimhse 10 mbliana mar bhreiseán beathaithe le haghaidh uain lena ramhrú le Rialachán Cur Chun Feidhme (AE) Uimh. 832/2012 ón gCoimisiún (2), agus le haghaidh athchogantaigh seachas uain lena ramhrú, cat agus madraí le Rialachán Cur Chun Feidhme (AE) 2016/1007 ón gCoimisiún (3).

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh isteach iarratas chun údarú na hullmhóide de chlóiríd amóiniam a athnuachan le haghaidh gach athchogantaigh, cat agus madraí. I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas eile ar úsáid nua maidir leis an ullmhóid sin le haghaidh cránacha. Sna hiarratais sin iarradh go n-aicmeofaí an breiseán sin sa chatagóir ‘breiseáin zóiteicniúla’ agus san fheidhmghrúpa ‘breiseáin zóiteicniúla eile’ agus bhí na sonraí agus na doiciméid a cheanglaítear faoi Airteagal 7(3) agus Airteagal 14(2) den Rialachán sin, faoi seach, ag gabháil leis na hiarratais.

(4)

Chinn an tÚdarás Eorpach um Shábháilteacht Bia (‘an tÚdarás’) sa tuairim uaidh an 22 Samhain 2022 (4) go bhfuil an ullmhóid de chlóiríd amóiniam fós sábháilte d’uain lena ramhrú, d’athchogantaigh seachas uain lena ramhrú, do chait agus madraí agus freisin do thomhaltóirí agus don chomhshaol faoi na coinníollacha úsáide a údaraítear faoi láthair. Tháinig an tÚdarás ar an gconclúid freisin go bhfuil an ullmhóid sin sábháilte agus éifeachtúil maidir le pH an fhuail a laghdú i gcránacha nuair a úsáidtear í ag leibhéal 5 000 mg/kg d’ábhar beatha ón 9ú go dtí an 11ú seachtain den tréimhse iompair agus ón 15ú seachtain den tréimhse iompair go dtí an chéad seachtain den lachtadh agus go bhfuil sé sábháilte do thomhaltóirí agus don chomhshaol nuair a úsáidtear í mar bhreiseán beathaithe le haghaidh cránacha. Tháinig an tÚdarás ar an gconclúid thairis sin gur cheart an ullmhóid a mheas mar íogróir riospráide féideartha ach ní mar íogróir craicinn ná mar ghreannaitheoir craicinn. Ní raibh sé in ann teacht ar chonclúid maidir leis an ngreannú súl a d’fhéadfadh an ullmhóid a dhéanamh. Níor mheas an tÚdarás go bhfuil gá le ceanglais shonracha maidir le faireachán iarmhargaidh.

(5)

I gcomhréir le hAirteagal 5(4), pointí (a) agus (c) de Rialachán (CE) Uimh. 378/2005 ón gCoimisiún (5), ba é meas na Saotharlainne Tagartha a bunaíodh le Rialachán (CE) Uimh. 1831/2003 maidir leis na conclúidí agus na moltaí ar ar thángthas sa mheasúnú roimhe seo i ndáil leis na modhanna a úsáidtear chun an ullmhóid clóiríde amóiniam i mbeatha a rialú, go bhfuil na conclúidí agus na moltaí sin bailí agus infheidhme maidir leis na hiarratais atá ann faoi láthair.

(6)

Léirítear sa mheasúnú ar an ullmhóid de chlóiríd amóiniam go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan le haghaidh gach athchogantaigh, cat agus madraí, agus ba cheart úsáid na hullmhóide sin a údarú le haghaidh cránacha. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Mar thoradh ar údarú na hullmhóide de chlóiríd amóiniam a athnuachan le haghaidh gach athchogantaigh, cat agus madraí mar bhreiseán beathaithe, ba cheart Rialacháin Cur Chun Feidhme (AE) Uimh. 832/2012 agus (AE) 2016/1007 a aisghairm.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,