(1)

In Airteagal 63 de Rialachán (AE) 2021/23 luaitear go n-áireofar freisin sna socruithe conarthacha lena gceadaítear do chomhaltaí imréitigh iarmhairtí diúltacha na n-uirlisí réitigh a chur ar aghaidh chuig a gcliaint, ar bhonn coibhéiseach agus comhréireach, ceart na gcliant chun aon aisíocaíochta nó chun aon chúitimh a gheobhaidh comhaltaí imréitigh i gcomhréir le hAirteagal 27(6) de Rialachán (AE) 2021/23 nó aon choibhéis airgid thirim den aisíocaíocht sin nó den chúiteamh sin nó aon fháltais a bheidh faighte acu tar éis éileamh a rinneadh i gcomhréir le hAirteagal 62 de Rialachán (AE) 2021/23 (“aisíocaíocht”), a mhéid a bhaineann na fáltais sin le suíomhanna cliant agus lena ranníocaíochtaí, agus go mbeidh feidhm ag na forálacha sin freisin maidir leis na socruithe conarthacha a dhéanfaidh cliaint agus cliaint indíreacha a chuireann seirbhísí imréitigh indíreacha ar fáil dá gcliaint.

(2)

Chun dáileadh coibhéiseach agus comhréireach na haisíocaíochta a áirithiú, ba cheart do sholáthraithe seirbhísí imréitigh na cineálacha éagsúla aisíocaíochta a dháileadh ar na húsáideoirí seirbhísí imréitigh lena mbaineann ar bhealach cóir neamh-idirdhealaitheach. Ba cheart an chuid den aisíocaíocht a gheobhaidh gach úsáideoir seirbhísí imréitigh a bheith comhréireach leis an ranníocaíocht a rinne úsáideoir seirbhísí imréitigh den sórt sin le réiteach an CPL, a raibh rochtain indíreach aige air tríd an soláthraí seirbhísí imréitigh lena mbaineann agus i gcás ina ndéantar íocaíocht faoi Airteagal 27(6) nó Airteagal 62 de Rialachán (AE) 2021/23 (“ranníocaíocht cháilitheach”) mar thoradh ar an ranníocaíocht sin. Ar an gcúis chéanna, ba cheart d’úsáideoirí seirbhísí imréitigh a n-aisíocaíocht a fháil gan aon fhritháireamh, ach amháin má tá oibleagáid ar úsáideoir seirbhísí imréitigh atá dlite agus iníoctha le soláthraí seirbhísí imréitigh atá faoin oibleagáid an tráth céanna aisíocaíocht a chur ar aghaidh chuig an úsáideoir seirbhísí imréitigh sin. Mar sin féin, chun nach mbeidh, mar thoradh ar fhritháireamh nó glanluacháil den sórt sin, laghdú míchuí ar na méideanna atá dlite d’úsáideoirí seirbhísí imréitigh atá níos faide síos an slabhra imréitigh, i gcás inar soláthraí seirbhísí imréitigh an faighteoir freisin, ba cheart an aisíocaíocht atá le cur ar aghaidh chuig a gcuid úsáideoirí seirbhísí imréitigh a ríomh ar bhonn na haisíocaíochta a fuair an soláthraí seirbhísí imréitigh sular cuireadh i bhfeidhm aon asbhaintí ná fritháireamh.

(3)

Ba cheart aisíocaíochtaí a leithdháileadh, ar bhealach cóir neamh-idirdhealaitheach, ar na húsáideoirí seirbhísí imréitigh go léir a rinne ranníocaíocht cháilitheach agus ar chuntais dílse an tsoláthraí seirbhísí imréitigh i gcás ina ndearna soláthraí seirbhísí imréitigh den sórt sin ranníocaíocht cháilitheach freisin. Chun idirdhealú nó cóir éagórach a sheachaint a thuilleadh, níor cheart do sholáthraithe seirbhísí imréitigh aon chlásail fo-ordúcháin ná aon ord tosaíochta a chur i bhfeidhm agus aisíocaíochtaí den sórt sin á ndáileadh.

(4)

Is dócha go mbeidh na dálaí margaidh le linn céim réitigh an-anásta. Is gá dá bhrí sin trédhearcacht a sholáthar d’úsáideoirí seirbhísí imréitigh agus iad a chur ar a suaimhneas i dtaobh na sócmhainní agus ionstraimí airgeadais atá beartaithe le haghaidh leithdháileadh na haisíocaíochta a bheith faoi chosaint i gcás mhainneachtain a soláthraí seirbhísí imréitigh. Dá bhrí sin, ba cheart do sholáthraithe seirbhísí imréitigh, agus aisíocaíocht á fáil acu thar ceann úsáideora seirbhísí imréitigh, aisíocaíocht den sórt sin a shealbhú ar chuntas leithscartha ar leithligh.

(5)

Tá raon na sócmhainní airgeadais nó ionstraimí airgeadais a fhéadfar a úsáid chun comhaltaí imréitigh, cliaint agus cliaint indíreacha a chúiteamh an-leathan agus bíonn rioscaí éagsúla ag baint le sócmhainní agus ionstraimí éagsúla. Chun dáileadh cothrom comhionann na haisíocaíochta a áirithiú, ba cheart do sholáthraithe seirbhísí imréitigh na cineálacha éagsúla sócmhainní airgeadais agus ionstraimí airgeadais a fuair siad mar aisíocaíocht a roinnt go cothrom ar gach ceann de na húsáideoirí seirbhísí imréitigh agus ar a gcuntais féin. Ba cheart an roinnt sin a bheith comhréireach leis an ranníocaíocht cháilitheach a rinne na húsáideoirí seirbhísí imréitigh sin le réiteach an CPL a bhfuil rochtain indíreach acu air trí na soláthraithe seirbhísí imréitigh sin, nó leis an ranníocaíocht cháilitheach a rinne soláthraithe seirbhísí imréitigh sa nós imeachta réitigh sin.

(6)

Is gá cuntas a thabhairt ar na sainiúlachtaí agus bacainní oibríochtúla a bhaineann le cuid de na cineálacha sócmhainní airgeadais agus ionstraimí airgeadais. Is gá a áirithiú freisin a mhéid is féidir go bhfaigheann an t-úsáideoir seirbhísí imréitigh aisíocaíocht chothrom i gcás nach bhfuil an t-úsáideoir seirbhísí imréitigh in ann cineál áirithe sócmhainne airgeadais nó ionstraime airgeadais a ghlacadh nó i gcás inarbh fhearr leis gan cineál áirithe sócmhainne airgeadais nó ionstraime airgeadais a ghlacadh ar chúiseanna eile. Dá bhrí sin, ba cheart don soláthraí seirbhísí imréitigh, ar iarraidh ón úsáideoir seirbhísí imréitigh agus a mhéid is féidir, an tsócmhainn nó an ionstraim lena mbaineann a aistriú chuig faighteoir eile arna cheapadh ag an úsáideoir seirbhísí imréitigh. I gcás nach féidir é sin a dhéanamh, ba cheart don soláthraí seirbhísí imréitigh na sócmhainní nó ionstraimí ábhartha a dhíol sa mhargadh le tríú páirtí ar an bpraghas margaidh atá i réim agus ina dhiaidh sin fáltais an díola a aistriú chuig an úsáideoir seirbhísí imréitigh.

(7)

Chun trédhearcacht agus inrianaitheacht a áirithiú, ba cheart do sholáthraithe seirbhísí imréitigh a gcuid úsáideoirí seirbhísí imréitigh a chur ar an eolas, ar feadh a bhfuil siad in ann, faoi aon chinneadh a rinneadh sa phróiseas réitigh chun cúiteamh a thabhairt i leith ranníocaíochtaí cáilitheacha a rinneadh. San fhaisnéis sin ba cheart, a mhéid is féidir, na nithe seo a leanas a sholáthar, mar atá, raon feidhme an chinnidh chun rannchuidiú leis an réiteach faoi Rialachán (AE) 2021/23, comhdhéanamh na haisíocaíochta agus ríomh na haisíocaíochta lena n-áirítear an chaoi ar ríomh an soláthraí seirbhísí imréitigh aisíocaíocht an úsáideora seirbhísí imréitigh. Ar an gcúis chéanna agus chun a áirithiú go dtuigfidh úsáideoirí seirbhísí imréitigh an gaol idir an ranníocaíocht a rinne siad agus an aisíocaíocht a fuair siad, ba cheart do sholáthraithe seirbhísí imréitigh úsáideoirí seirbhísí imréitigh a chur ar an eolas, i gcás inar féidir agus gan aon srianta rúndachta a shárú, faoi dháileadh foriomlán agus comhdhéanamh na haisíocaíochta.

(8)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (ESMA) faoi bhráid an Choimisiúin.

(9)

Reáchtáil ESMA comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2),