(1)

Maidir le cineálacha áirithe adhmaid ó Chionanthus virginicus L., Fraxinus L., Juglans ailantifolia Carr., Juglans mandshurica Maxim., Ulmus davidiana Planch. agus Pterocarya rhoifolia Siebold & Zucc., de thionscnamh na Bealarúise, Cheanada, na Síne, Dhaon-Phoblacht Dhaonlathach na Cóiré, na Seapáine, na Mongóile, Phoblacht na Cóiré, na Rúise, na Téaváine, na hÚcráine agus na Stát Aontaithe, ní fhéadfar iad a thabhairt isteach i gcríoch an Aontais ach amháin má chomhlíonann siad na ceanglais a leagtar amach i bpointe 87 d’Iarscríbhinn VII a ghabhann le Rialachán Cur Chun Feidhme (AE) 2019/2072 ón gCoimisiún (2).

(2)

Is é is aidhm leis na ceanglais sin, an tAontas a chosaint ar Agrilus planipennis Fairmaire (‘an lotnaid shonraithe’).

(3)

De mhaolú ar phointe 87(a) d’Iarscríbhinn VII a ghabhann le Rialachán 2019/2072 féadfar adhmaid ó Fraxinus L. (‘adhmad fuinseoige’) a thabhairt isteach i gcríoch an Aontas ó Cheanada i gcomhréir leis na ceanglais speisialta a leagtar amach i Rialachán Cur Chun Feidhme (AE) 2020/918 ón gCoimisiún (3). Tá na ceanglais sin ar aon dul leis na ceanglais a leagadh síos maidir leis an adhmad céanna den tionscnamh céanna le Cinneadh Cur Chun Feidhme 2016/412 ón gCoimisiún (4). Rachaidh an Rialachán sin in éag an 30 Meitheamh 2023.

(4)

De mhaolú ar phointe 87(a) agus (b) d’Iarscríbhinn VII a ghabhann le Rialachán Cur Chun Feidhme (AE) 2019/2072, féadfar adhmad fuinseoige a thabhairt isteach i gcríoch an Aontais as na Stáit Aontaithe i gcomhréir leis na ceanglais speisialta a leagtar amach i Rialachán Cur Chun Feidhme (AE) 2020/1002 ón gCoimisiún (5). Tá na ceanglais sin ar aon dul leis na ceanglais a leagadh síos le Cinneadh Cur Chun Feidhme (EU) 2018/1203 ón gCoimisiún (6) maidir leis an adhmad céanna den tionscnamh céanna. Rachaidh an Rialachán sin in éag an 30 Meitheamh 2023 chomh maith.

(5)

Tháinig na ceanglais speisialta sin isteach go héifeachtach, le linn chur i bhfeidhm Rialacháin (AE) 2020/918 agus 2020/1002, i dtaobh críoch an Aontais a chosaint ar an lotnaid shonraithe. Thairis sin, tháinig ceanglais den chineál céanna isteach go héifeachtach le linn chur i bhfeidhm Chinntí (AE) 2016/412 agus 2018/1203.

(6)

Ar bhonn na fianaise a bailíodh, táthar tagtha ar an gconclúid gur laghdaíodh an riosca fíteashláintíochta a bhaineann le hadhmad fuinseoige a thabhairt isteach i gcríoch an Aontais ó Cheanada agus na Stáit Aontaithe go leibhéal inghlactha agus go bhfuil na bearta laghdaithe riosca curtha ar bun sna tríú tíortha sin.

(7)

Is cosúil gur bearta laghdaithe riosca oiriúnacha iad na ceanglais speisialta a leagtar amach in Rialacháin Cur Chun Feidhme (AE) 2020/918 agus 2020/1002. Dá bhrí sin, is oiriúnach iad a chur isteach i bpointe 87 d’Iarscríbhinn VII a ghabhann le Rialachán Cur Chun Feidhme 2019/2072.

(8)

Ba cheart a fhoráil le hIarscríbhinn VII nach mór ceann amháin de na ceanglais speisialta seo a leanas a chomhlíonadh maidir le tabhairt adhmaid fuinseoige isteach i gcríoch an Aontais: ba cheart an t-adhmad fuinseoige a chur faoi ionradaíocht ianaithe agus é a bheith de thionscnamh limistéir saor ón lotnaid de réir coinníollacha áirithe dó é a chur faoi phróiseas rúiscthe, sábhadóireachta, cóireála teasa agus triomúcháin, faoi réir coinníollacha sonracha agus i dteannta ceanglais shonracha maidir leis an tsaoráid ina dtáirgtear, ina láimhsítear nó ina stóráiltear an t-adhmad. I gcás na rogha deiridh, agus chun a áirithiú go mbeidh rialuithe éifeachtacha agus trédhearcacht i bhfeidhm, ba cheart uimhir agus lipéad ar a bhfuil na focail ‘HT-KD’ nó ‘Heat Treated – Kiln Dried’ a bheith ar taispeáint go soiléir ar gach beart den adhmad.

(9)

Foráiltear le Rialachán Cur Chun Feidhme (AE) 2020/1164 ón gCoimisiún (7) go bhféadfar, de mhaolú ar phointe 87 d’Iarscríbhinn VII a ghabhann le Rialachán Cur Chun Feidhme (AE) 2019/2072, cineálacha áirithe adhmaid ó Fraxinus L., Juglans ailantifolia Carr., Juglans mandshurica Maxim., Ulmus davidiana Planch. agus Pterocarya rhoifolia Siebold & Zucc (‘an t-adhmad sonraithe’) de thionscnamh Cheanada agus na Stát Aontaithe, a thabhairt isteach san Aontas faoi ráitis oifigiúla dá dtagraítear i roghanna (a) agus (b) den phointe 87 sin. Rachaidh an Rialachán sin in éag an 30 Meitheamh 2023. Foráiltear leis maidir leis an dá rogha seo a leanas mar cheanglais maidir le tabhairt isteach i limistéar an Aontais: bhí an t-adhmad sonraithe le bheith de thionscnamh limistéir saor ón lotnaid faoi réir coinníollacha áirithe nó bhíothas lena chur faoi ionradaíocht ianaithe faoi réir coinníollacha sonracha.

(10)

Tháinig na ceanglais speisialta sin isteach go héifeachtach, le linn cur i bhfeidhm Rialachán Cur Chun Feidhme (AE) 2020/1164, ó thaobh críoch an Aontais a chosaint ar an lotnaid shonrach. Thairis sin, tháinig ceanglais den chineál céanna isteach go héifeachtach le linn chur i bhfeidhm Chinntí (AE) 2016/412 agus 2018/1203.

(11)

Dá bhrí sin, táthar tagtha an gconclúid go bhfuil measúnú iomlán déanta ar an riosca fíteashláintíochta a bhaineann le hadhmad fuinseoige a thabhairt isteach i gcríoch an Aontais ó Cheanada agus na Stáit Aontaithe agus go bhfuil bearta laghdaithe riosca curtha ar bun sna tríú tíortha sin.

(12)

Dá bhrí sin, maidir leis na ceanglais speisialta dá bhforáiltear i Rialachán Cur Chun Feidhme (AE) 2020/1164 maidir le hadhmad fuinseoige ó Cheanada agus na Stáit Aontaithe a thabhairt isteach i gcríoch an Aontais, is iomchuí iad a chur isteach in Iarscríbhinn VII a ghabhann le Rialachán Cur Chun Feidhme (AE) 2019/2072.

(13)

Ba cheart, ar an ábhar sin, Ceanada agus na Stáit Aontaithe a bhaint as an gceathrú colún de phointe 87 d’Iarscríbhinn VII a ghabhann le Rialachán Cur Chun Feidhme (AE) 2019/2072, agus pointe nua a chur leis an Iarscríbhinn sin, lena bhforálfar maidir leis an dá rogha chéanna sin dá bhforáiltear le Rialachán Cur Chun Feidhme (AE) 2020/1164.

(14)

Dá bhrí sin, ba cheart Iarscríbhinní VII a ghabhann le Rialachán Cur Chun Feidhme (AE) 2019/2072 a leasú dá réir sin.

(15)

Tá na bearta dá bhforáiltear sa Rialachán seo i gcomhréir le tuairim an Bhuanchoiste um Plandaí, Ainmhithe, Bia agus Beatha,