‘5a.   De mhaolú ar Airteagal 2, féadfaidh údaráis inniúla Ballstáit a údarú, faoi cibé coinníollacha a mheasann siad a bheith iomchuí, go ndéanfar cistí nó acmhainní eacnamaíocha reoite áirithe ar leis an eintiteas a liostaítear faoi na huimhreacha iontrála 82 agus 101 faoin gceannteideal ‘Eintitis’ in Iarscríbhinn I a scaoileadh, nó cistí nó acmhainní eacnamaíocha áirithe a chur ar fáil don eintiteas sin, tar éis dóibh an méid seo a leanas a chinneadh:

(a)

go bhfuil cistí nó acmhainní eacnamaíocha den sórt sin riachtanach chun go mbeidh eintiteas atá bunaithe san Aontas in ann urrúis a dhiúscairt nó a aistriú, ar eintiteas é atá á rialú faoi láthair nó a bhí roimhe sin ag an eintiteas atá liostaithe faoi uimhir iontrála 82 faoin gceannteideal ‘Eintitis’ in Iarscríbhinn I;

(b)	go mbeidh an diúscairt nó an t-aistriú sin curtha i gcrích faoin 31 Nollaig 2023; agus,

(c)

go ndéanfar diúscairt nó aistriú den sórt sin ar bhonn oibríochtaí, conarthaí nó comhaontuithe eile arna dtabhairt i gcrích leis an eintiteas, nó a bhaineann leis ar shlí eile, a liostaítear faoi na huimhreacha iontrála 82 agus 101 faoin gceannteideal ‘Eintitis’ in Iarscríbhinn I, roimh an 3 Meitheamh 2022.’

‘5aa.   De mhaolú ar Airteagal 2, féadfaidh údaráis inniúla a cheadú faoin 25 Nollaig 2023, tiontú ag náisiúnaigh nó cónaitheoirí Ballstáit, nó ag eintiteas atá bunaithe san Aontas, ar admháil taisclainne le hurrús foluiteach Rúiseach i seilbh an eintitis a liostaítear faoi uimhir iontrála 101 faoin gceannteideal ‘Eintitis’ in Iarscríbhinn I chun an t-urrús foluiteach a dhíol, agus chun cistí a chur ar fáil a bhaineann le tiontú ar admháil taisclainne agus le díol an urrúis fholuitigh go díreach nó go hindíreach leis an eintiteas sin sa Rúis, faoi cibé coinníollacha a mheasann na húdaráis inniúla a bheith iomchuí agus tar éis dóibh an méid seo a leanas a chinneadh:

(a)	eisíodh an admháil taisclainne roimh an 3 Meitheamh 2022;

(b)	cuirtear an iarraidh ábhartha ar údarú isteach faoin 25 Meán Fómhair 2023;

(c)	is féidir le sealbhóir na hadmhála taisclainne a léiriú go raibh an tiontú sin riachtanach chun an t-urrús foluiteach a dhíol;

(d)	tá díol an urrúis fholuitigh i gcomhréir le toirmisc faoi Rialachán (AE) Uimh. 833/2014 ón gComhairle, lena n-áirítear Airteagail 5 agus 5f; agus

(e)	ní chuirfear aon chiste ar fáil d’aon eintiteas eile a liostaítear in Iarscríbhinn I.’

‘5c.   De mhaolú ar Airteagal 2, féadfaidh údaráis inniúla Ballstáit a údarú cistí reoite áirithe nó acmhainní eacnamaíocha áirithe a scaoileadh ar leis an duine nádúrtha a liostaítear faoin uimhir iontrála 695 faoin gceannteideal “Daoine” in Iarscríbhinn I, nó cistí áirithe nó acmhainní eacnamaíocha áirithe a chur ar fáil don duine nádúrtha sin nó d’eintiteas faoi úinéireacht an duine nádúrtha sin, faoi cibé coinníollacha a mheasfaidh na húdaráis inniúla a bheith iomchuí agus tar éis dóibh a chinneadh go bhfuil cistí nó acmhainní eacnamaíocha den sórt sin riachtanach chun idirbhearta, lena n-áirítear díolacháin, a thabhairt i gcrích, ar idirbhearta iad a bhfuil géarghá leo don fhoirceannadh, faoin 31 Lúnasa 2023, i ndáil le comhfhiontar nó comhshocrú dlíthiúil comhchosúil arna bhunú sa Rúis leis an duine nádúrtha sin nó leis an eintiteas faoi úinéireacht an duine nádúrtha sin roimh an 28 Feabhra 2022.’

‘5d.   De mhaolú ar Airteagal 2, féadfaidh údaráis inniúla Ballstáit a údarú cistí nó acmhainní eacnamaíocha reoite áirithe a scaoileadh ar le duine nádúrtha nó dlítheanach, eintiteas nó comhlacht a liostaítear in Iarscríbhinn I iad, atá faoina n-úinéireacht, ina seilbh nó faoina rialú, nó seirbhísí a sholáthar do dhuine nádúrtha nó dlítheanach, eintiteas nó comhlacht den sórt sin, faoi cibé coinníollacha a mheaseann siad a bheith iomchuí agus tar éis dóibh a chinneadh go bhfuil géarghá leis sin chun balla dóiteáin a chur ar bun, a dheimhniú nó a mheas, ar balla dóiteáin é:

(a)

lena gcuirtear deireadh le rialú an duine nádúrtha nó dhlítheanaigh, an eintitis nó an chomhlachta a liostaítear in Iarscríbhinn I ar shócmhainní duine dhlítheanaigh, eintitis nó comhlachta neamhliostaithe atá ionchorpraithe nó comhdhéanta faoi dhlí Ballstáit agus atá faoi úinéireacht nó faoi rialú an duine, an eintitis nó an chomhlachta sin, agus

(b)	lena n-áirithítear nach bhfabhróidh tairbhe aon chistí ná acmhainní eacnamaíocha breise don duine nádúrtha nó dlítheanach, don eintiteas nó don chomhlacht atá liostaithe.’

‘1   D’ainneoin na rialacha is infheidhme a bhaineann le tuairisciú, rúndacht agus rúndacht ghairmiúil, agus atá i gcomhréir leis an urraim do rúndacht cumarsáide idir dlíodóirí agus a gcliaint mar a ráthaítear in Airteagal 7 de Chairt um Chearta Bunúsacha an Aontais Eorpaigh, déanfaidh daoine nádúrtha agus dlítheanacha, eintitis agus comhlachtaí an méid seo a leanas:’

‘4.   Déanfaidh údaráis inniúla na mBallstát, lena n-áirítear údaráis forfheidhmiúcháin, údaráis chustaim de réir bhrí Rialachán (AE) Uimh. 952/2013 ó Pharlaimint ha hEopra agus ón gComhairle (*8), údaráis inniúla de réir bhrí Rialachán (AE) Uimh. 575/2013, Treoir (AE) 2015/849 ó Pharlaimint na hEopra agus ón gComhairle (*9) agus Treoir 2014/65/AE chomh maith le riarthóirí cláruithe oifigiúla ina ndéantar daoine nádúrtha, daoine dlítheanacha, eintitis agus comhlachtaí chomh maith le maoin dhochorraithe nó maoin shochorraithe a chlárú, faisnéis, lena n-áirítear sonraí pearsanta, a phróiseáil agus a mhalartú gan mhoill agus, más gá, an fhaisnéis dá dtagraítear i míreanna 1 agus 1a a phróiseáil agus a mhalartú le húdaráis inniúla eile sa Bhallstát céanna, leis na Ballstáit eile agus leis an gCoimisiún, más gá an phróiseáil agus an malartú sin a dhéanamh chun cúraimí an údaráis próiseála nó fála a dhéanamh i gcomhréir leis an Rialachán seo, go háirithe nuair a bhraitheann siad teagmhais ina ndéantar na toirmisc a leagtar amach sa Rialachán seo a shárú nó ina dtagtar timpeall orthu, nó teagmhais ina ndéantar iarracht iad a shárú nó teacht timpeall orthu.