(1)

De bhun Airteagal 67(1) de Rialachán (CE) Uimh. 1107/2009, tá úsáideoirí gairmiúla táirgí cosanta plandaí le taifid a choinneáil ar na táirgí sin a úsáideann siad, taifid ina bhfuil ainm an táirge, an tráth a úsáideadh an táirge agus an dáileog a úsáideadh, an limistéar a cóireáladh agus an barr ar ar úsáideadh an táirge.

(2)

Faoi Airteagal 67(1) de Rialachán (CE) Uimh. 1107/2009, tá ar úsáideoirí gairmiúla an fhaisnéis ábhartha a chur ar fáil don údarás inniúil freisin arna iarraidh sin dó. Thairis sin, féadfaidh tríú páirtithe iarraidh ar na húdaráis inniúla rochtain a thabhairt ar an bhfaisnéis sin agus tá ar na húdaráis inniúla an rochtain sin a thabhairt i gcomhréir leis an dlí náisiúnta nó le dlí an Aontais is infheidhme.

(3)

Tá sé d’aidhm ag an Straitéis “ón bhfeirm go dtí an forc” le haghaidh córas bia atá cothrom, sláintiúil agus neamhdhíobhálach don chomhshaol (an Straitéis “ón bhfeirm go dtí an forc”) (2), straitéis a ghlac an Coimisiún in 2020, an spleáchas ar tháirgí cosanta plandaí ceimiceacha agus ar a n-úsáid a laghdú. Dá bhrí sin, tá sé ríthábhachtach go ndéanfar taifead leordhóthanach ar úsáid táirgí cosanta plandaí, agus ar ghníomhaíochtaí faireacháin agus rialaithe atá bunaithe ar na taifid sin, chun go dtabharfar cuspóirí na Straitéise “ón bhfeirm go dtí an forc” i gcrích.

(4)

Tá difríochtaí idir na córais náisiúnta a mhéid a bhaineann le taifid a choinníonn úsáideoirí gairmiúla táirgí cosanta plandaí faoi Airteagal 67(1) de Rialachán (CE) Uimh. 1107/2009 agus cé acu an gcoinnítear nó nach gcoinnítear go leictreonach iad. Dá bhrí sin, leis an Rialachán seo leagtar síos rialacha mionsonraithe maidir le hinneachar agus formáid na dtaifead sin.

(5)

Sainítear sna rialacha sin an chaoi ina bhfuil taifead le déanamh ar na heilimintí a liostaítear in Airteagal 67(1) de Rialachán (CE) Uimh. 1107/2009 agus a bhaineann le húsáid táirgí cosanta plandaí (ainm an táirge a úsáidtear, an tráth a úsáidtear é, an dáileog a úsáidtear agus an limistéar agus an barr ar a n-úsáidtear é) ionas go n-áiritheofar cáilíocht leordhóthanach agus aonfhoirmeach na dtaifead a choinnítear faoin Airteagal sin ar fud an Aontais.

(6)

Ós rud é go n-úsáideann úsáideoirí gairmiúla táirgí cosanta plandaí mar chuid de ghníomhaíochtaí talmhaíochta den chuid is mó, agus d’fhonn ailíniú a dhéanamh leis na ceanglais atá ann cheana atá ábhartha don talmhaíocht, más féidir, ba cheart suíomh an limistéir nó na saoráide inar úsáideadh an táirge cosanta plandaí a shainaithint tríd an aonad talún faoi raon feidhme an iarratais ar chabhair gheospásúil de chuid an chórais chomhtháite riaracháin agus rialaithe dá dtagraítear i Rialachán Cur Chun Feidhme (AE) 2022/1173 ón gCoimisiún (3). Nuair nach féidir sin a dhéanamh, ba cheart do na Ballstáit modhanna malartacha iomchuí a sholáthar do na húsáideoirí gairmiúla chun suíomh an limistéir inar úsáideadh an táirge cosanta plandaí a shainaithint, agus, i gcás inarb ábhartha, an suíomh geospáisiúil.

(7)

D’fhonn aonfhoirmeacht a bhaint amach maidir leis na taifid, ba cheart taifead a dhéanamh ar ainmneacha na mbarr, na gcúinsí nó na n-úsáidí talún, i gcás inarb infheidhme, i gcomhréir leis na cóid a úsáideann an Eagraíocht Eorpach agus Meánmhara um Chosaint Plandaí (“cóid EPPO”) agus ar chéimeanna fáis na bplandaí, i gcás inarb infheidhme, i gcomhréir leis an monagraf BBCH (4).

(8)

Chun go seachnófar ceangal a chur ar úsáideoirí gairmiúla iliomad tacar taifead a chruthú le haghaidh na húsáide céanna chun oibleagáidí éagsúla a chomhlíonadh, is iomchuí a shoiléiriú go bhfuil an fhéidearthacht ag na Ballstáit ceangal a chur ar na húsáideoirí faisnéis eile a bheith i gcomhcheangal leis na taifid a cheanglaítear faoi Airteagal 67(1) de Rialachán (CE) Uimh. 1107/2009.

(9)

Ba cheart na taifid a choinneáil go leictreonach, toisc gurb iad modhanna leictreonacha coinneála taifead na modhanna is oiriúnaí chun gur féidir an oibleagáid maidir le taifead a choinneáil a chur i bhfeidhm go haonfhoirmeach. Leis sin áirithítear taifid níos iontaofa, éascaítear a mbailiú agus a bhfíorú do na húdaráis inniúla agus ar deireadh tacaítear le gníomhaíochtaí faireacháin agus rialaithe atá cruinn, éifeachtúil agus éifeachtach sna Ballstáit. Chuige sin, ba cheart na formáidí leictreonacha a úsáidtear a bheith inléite ag meaisín mar a shainmhínítear i dTreoir (AE) 2019/1024 ó Pharlaimint na hEorpa agus ón gComhairle (5).

(10)

D’fhonn an t-ualach riaracháin a laghdú, ba cheart a ndóthain ama a bheith ag úsáideoirí gairmiúla idir taifeadadh gach úsáid táirge cosanta plandaí agus aistriú na dtaifead go dtí formáid leictreonach.

(11)

Féadfaidh úsáideoir gairmiúil táirgí cosanta plandaí a úsáid faoi shocruithe conarthacha le haghaidh duine nádúrtha nó dlíthiúil eile. Sna cásanna sin, ba cheart don úsáideoir gairmiúil rochtain ar na taifid a thabhairt don duine sin nó cóip de na taifid ábhartha a thabhairt dó gan moill mhíchuí ná srianta míchuí.

(12)

Tá an Rialachán seo gan dochar d’úsáid na sonraí atá sna taifid chun críoch eile lasmuigh de raon feidhme Rialachán (CE) Uimh. 1107/2009 i gcomhréir le dlí an Aontais nó le dlí náisiúnta. Má chuirtear taifid leictreonacha chomhchuibhithe ar fáil, d’fhéadfaí úsáid na faisnéise le haghaidh cuspóirí dlisteanacha eile a éascú, agus ar an gcaoi sin dúbláil iarrachtaí a sheachaint agus an t-ualach ar úsáideoirí gairmiúla agus ar údaráis phoiblí a laghdú.

(13)

D’fhonn deis a thabhairt d’úsáideoirí gairmiúla iad féin a ullmhú chun na ceanglais a leagtar amach sa Rialachán seo a chomhlíonadh, ba cheart tréimhse réasúnta a thabhairt dóibh sula dtiocfaidh na ceanglais a bhaineann leis i bhfeidhm.

(14)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,