(1)

Le Rialachán (AE) 2017/745, cuirtear creat rialála nua chun feidhmiú rianúil an mhargaidh inmheánaigh a mhéid a bhaineann le feistí leighis a áirithiú. Leis an Rialachán sin, neartaítear go mór an mhaoirseacht ar chomhlachtaí faoina dtugtar fógra agus na nósanna imeachta um measúnú comhréireachta.

(2)

Foráiltear le hAirteagal 44(10) de Rialachán (AE) 2017/745 go ndéanfar athmheasúnú iomlán ar chomhlachtaí faoina dtugtar fógra 3 bliana tar éis fógra a thabhairt do chomhlacht faoina dtugtar fógra, agus arís gach ceathrú bliain ina dhiaidh sin, chun a chinneadh an bhfuil na ceanglais a leagtar amach in Iarscríbhinn VII den Rialachán sin fós á gcomhlíonadh ag an gcomhlacht faoina dtugtar fógra.

(3)

Mar gheall ar an líon teoranta comhlachtaí faoina dtugtar fógra agus cumas teoranta na gcomhlachtaí sin arna n-ainmniú faoi Rialachán (AE) 2017/745, bhí baic ann i ndáil le feistí leighis diagnóiseacha a dheimhniú le linn na dtréimhsí dá bhforáiltear in Airteagal 120(3) den Rialachán sin.

(4)

Chun go mbeidh na húdaráis atá freagrach as comhlachtaí faoina dtugtar fógra sa Bhallstát ina bhfuil an comhlacht faoina dtugtar fógra bunaithe in ann díriú ar an measúnú ar iarratais nua ar ainmniú mar chomhlacht faoina dtugtar fógra agus chun go mbeidh comhlachtaí faoina dtugtar fógra in ann líon ard deimhniúchán a phróiseáil le linn na hidirthréimhse dá bhforáiltear in Airteagal 120(3) de Rialachán (AE) 2017/745, ba cheart an chéad athmheasúnú iomlán ar chomhlacht faoina dtugtar fógra tar éis fógra a thabhairt a chur siar go 5 bliana tar éis an fógra a thabhairt.

(5)

Ós rud é go bhfuil comhlachtaí faoina dtugtar fógra faoi réir gníomhaíochtaí leanúnacha faireacháin agus measúnaithe i gcomhréir le hAirteagal 44(4) de Rialachán (AE) 2017/745, ba cheart minicíocht na n-athmheasúnuithe iomlána ina dhiaidh sin a athrú go gach 5 bliana freisin.

(6)

Ba cheart an deis a bheith ag an údarás atá freagrach as comhlachtaí faoina dtugtar fógra athmheasúnú iomlán a dhéanamh níos luaithe ná uainiú an ghnáth-thimthrialla, i gcás ina bhfuil bonn cirt leis i ngeall ar thorthaí ghníomhaíochtaí measúnaithe bliantúla an chomhlachta faoina dtugtar fógra nó arna iarraidh sin don chomhlacht faoina dtugtar fógra.

(7)

Ba cheart athmheasúnuithe iomlána ar cuireadh tús leo, i bprionsabal, a dhéanamh go fóill chun an úsáid is fearr is féidir a bhaint as na hacmhainní a caitheadh cheana féin. Mar sin féin, an t-údarás atá freagrach as comhlachtaí faoina dtugtar fógra sa Bhallstát ina bhfuil an comhlacht faoina dtugtar fógra bunaithe, tar éis dó éisteacht a thabhairt don chomhlacht faoina dtugtar fógra atá i gceist, féadfaidh sé cinneadh a dhéanamh athmheasúnú iomlán leantach a chur ar fionraí nó a fhoirceannadh, agus na hacmhainní a caitheadh cheana féin ar an athmheasúnú agus torthaí na measúnuithe bliantúla a rinneadh cheana á gcur san áireamh.

(8)

Dá bhrí sin, ba cheart Rialachán (AE) 2017/745 a leasú dá réir.

(9)

I bhfianaise an phríomhghá atá ann feabhas láithreach a chur ar chumas na gcomhlachtaí faoina dtugtar fógra ar mhaithe leis an tsláinte phoiblí, ba cheart an Rialachán seo a theacht i bhfeidhm mar ábhar práinne,