(1)

Le Rialachán Cur Chun Feidhme (AE) 2018/2019 ón gCoimisiún (2) bunaítear, ar bhonn réamh-mheasúnú riosca, liosta plandaí, táirgí plandaí agus réad eile a mbaineann ardriosca leo.

(2)

Le Rialachán Cur Chun Feidhme (AE) 2018/2018 ón gCoimisiún (3) leagtar síos rialacha sonracha maidir leis an nós imeachta atá le leanúint chun an measúnú riosca dá dtagraítear in Airteagal 42(4) de Rialachán (AE) 2016/2031 a dhéanamh ar phlandaí, táirgí plandaí agus réada eile a mbaineann ardriosca leo.

(3)

Tar éis réamh-mheasúnú a dhéanamh, áiríodh 34 ghéineas agus speiceas amháin de phlandaí le haghaidh plandú de thionscnamh gach ceann de na tríú tíortha san Iarscríbhinn a ghabhann le Rialachán Cur Chun Feidhme (AE) 2018/2019 mar phlandaí a mbaineann ardriosca leo, lena n-áirítear an géineas Prunus L.

(4)

An 18 Deireadh Fómhair 2019, chuir an Úcráin iarraidh faoi bhráid an Choimisiúin chun plandaí Prunus domestica le haghaidh plandú agus iad beangaithe ar fhréamhstoic Prunus cerasifera, ar plandaí iad atá fréamhlom, suanach agus gan duilleoga, a onnmhairiú chuig an Aontas. Cuireadh an sainchomhad teicniúil ábhartha isteach leis an iarraidh.

(5)

An 17 Bealtaine 2022, ghlac an tÚdarás Eorpach um Shábháilteacht Bia (“an tÚdarás”) tuairim eolaíoch maidir leis an measúnú riosca tráchtearraí ar phlandaí Prunus domestica le haghaidh plandú ar de thionscnamh na hÚcráine iad (4). D’aithin an tÚdarás Lopholeucaspis japonica, Eotetranychus prunicola, Erwinia amylovora agus Xanthomonas arboricola pv. pruni mar lotnaidí atá ábhartha maidir leis na plandaí le haghaidh plandú sin, rinne sé meastóireacht ar na bearta maolaithe riosca a bhfuil tuairisc orthu sa sainchomhad agus rinne sé meastachán ar an dóchúlacht atá ann go mbeadh an tráchtearra saor ó na lotnaidí sin.

(6)

Liostaítear Lopholeucaspis japonica mar lotnaid choraintín de chuid an Aontais in Iarscríbhinn II a ghabhann le Rialachán Cur Chun Feidhme (AE) 2019/2072 ón gCoimisiún (5). Liostaítear Erwinia amylovora agus Xanthomonas arboricola pv. pruni mar lotnaidí coraintín de chuid criosanna cosanta in Iarscríbhinn III agus mar lotnaidí neamhchoraintín rialáilte de chuid an Aontais in Iarscríbhinn IV a ghabhann leis an Rialachán sin, faoi seach.

(7)

Ní áirítear Eotetranychus prunicola fós sa liosta de lotnaidí coraintín de chuid an Aontais. Mar sin féin, ar bhonn fianaise arna soláthar ag na Ballstáit, níl tionchar suntasach ag an lotnaid sin ar a plandaí óstacha san Aontas. Dá réir sin, ní gá aon cheanglas allmhairiúcháin maidir leis an lotnaid sin.

(8)

Ar bhonn na tuairime sin ón Údarás, meastar gur inghlactha atá an riosca fíteashláintíochta ó phlandaí fréamhloma, suanacha, gan duilleoga Prunus domestica le haghaidh plandú agus iad beangaithe ar fhréamhstoic Prunus cerasifera de thionscnamh na hÚcráine a thabhairt isteach san Aontas, ar choinníoll go gcomhlíontar na ceanglais allmhairiúcháin ábhartha arna leagan amach in Iarscríbhinn VII a ghabhann le Rialachán Cur Chun Feidhme (AE) 2019/2072.

(9)

Dá bhrí sin, plandaí fréamhloma, suanacha, gan duilleoga Prunus domestica le haghaidh plandú agus iad beangaithe ar fhréamhstoic Prunus cerasifera de thionscnamh na hÚcráine, is iomchuí nach meastar a thuilleadh gur plandaí iad a mbaineann ardriosca leo.

(10)

Dá bhrí sin, ba cheart Rialachán Cur Chun Feidhme (AE) 2018/2019 a leasú dá réir.

(11)

Chun oibleagáidí an Aontais a chomhlíonadh, ar oibleagáidí iad a eascraíonn as Comhaontú na hEagraíochta Trádála Domhanda maidir le Bearta Sláintíochta agus Fíteashláintíochta a Chur i bhFeidhm (6), ba cheart allmhairiú na dtráchtearraí sin a atosú a luaithe is féidir. Dá bhrí sin, ba cheart an Rialachán seo a theacht i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,