(1)

Tá gníomhaíochtaí coiriúla trasnáisiúnta ina mbagairt shuntasach ar shlándáil inmheánach an Aontais agus ní mór freagairt chomhordaithe, spriocdhírithe agus oiriúnaithe a thabhairt ina leith. Cé go bhfuil na húdaráis náisiúnta atá ag oibriú ar an láthair ar thús cadhnaíochta sa chomhrac i gcoinne na coireachta agus na sceimhlitheoireachta, tá gníomhaíocht ar leibhéal an Aontais ríthábhachtach chun comhar éifeachtúil agus éifeachtach a áirithiú a mhéid a bhaineann le malartú faisnéise. Ina theannta sin, is iad an choireacht eagraithe agus an sceimhlitheoireacht, go háirithe, a léiríonn an nasc idir an tslándáil inmheánach agus an tslándáil sheachtrach. Téann gníomhaíochtaí coiriúla trasnáisiúnta thar theorainneacha agus feictear iad i ngrúpaí coireachta eagraithe agus i ngrúpaí sceimhlitheoireachta a bhíonn i mbun raon leathan gníomhaíochtaí coiriúla a bhíonn ag éirí níos dinimiciúla agus níos casta i gcónaí. Dá bhrí sin, tá gá le creat dlíthiúil feabhsaithe chun a áirithiú gur féidir leis na húdaráis forfheidhmithe dlí inniúla cionta coiriúla a chosc, a bhrath agus a imscrúdú ar bhealach níos éifeachtúla.

(2)

Chun limistéar saoirse, slándála agus ceartais a fhorbairt, arb é is príomhthréith ann an easpa rialuithe teorann inmheánaí, tá sé bunriachtanach go mbeadh an deis ag na húdaráis forfheidhmithe dlí inniúla i mBallstát amháin, faoi chuimsiú dhlí an Aontais agus an dlí náisiúnta is infheidhme, rochtain choibhéiseach a fháil ar an bhfaisnéis atá ar fáil dá gcomhghleacaithe i mBallstát eile. Maidir leis sin, ba cheart d’údaráis forfheidhmithe dlí inniúla comhoibriú go héifeachtach agus ar fud an Aontais. Dá bhrí sin, tá an comhar póilíneachta maidir le malartú faisnéise ábhartha chun cionta coiriúla a chosc, a bhrath nó a imscrúdú ina chuid bhunriachtanach de na bearta atá mar bhonn faoin tslándáil phoiblí i limistéar idirspleách gan rialuithe teorann inmheánaí. Tá an malartú faisnéise maidir le coireacht agus gníomhaíochtaí coiriúla, lena n-áirítear an sceimhlitheoireacht, ag fónamh don chuspóir foriomlán i dtaca le slándáil daoine nádúrtha a chosaint agus leasanna tábhachtacha daoine dlítheanacha a chosnaítear leis an dlí a choimirciú.

(3)

Tá formhór na ngrúpaí coireachta eagraithe i láthair i níos mó ná trí thír agus tá siad comhdhéanta de bhaill a bhfuil náisiúntachtaí iomadúla acu agus a bhíonn i mbun gníomhaíochtaí coiriúla éagsúla. Tá struchtúr na ngrúpaí coireachta eagraithe níos sofaisticiúla ná riamh agus tá córais chumarsáide agus comhar atá láidir agus éifeachtúil acu idir a mbaill thar theorainneacha.

(4)

Chun an choireacht trasteorann a chomhrac go héifeachtach, tá sé ríthábhachtach go ndéanfadh na húdaráis forfheidhmithe dlí inniúla faisnéis a mhalartú go tapa agus go gcomhoibreoidís go hoibríochtúil le chéile. Cé go bhfuil feabhas tagtha ar an gcomhar trasteorann idir na húdaráis forfheidhmithe dlí inniúla le blianta beaga anuas, tá constaicí áirithe praiticiúla agus dlíthiúla fós ann. I ndáil leis sin, le Moladh (AE) 2022/915 ón gComhairle (2), cuideofar leis na Ballstáit an comhar oibríochtúil trasteorann a fheabhsú tuilleadh.

(5)

Tá tionscadail phíolótacha forbartha ag roinnt Ballstát chun an comhar trasteorann a neartú atá dírithe, mar shampla, ar phatróil chomhpháirteacha arna ndéanamh ag póilíní ó Bhallstáit chomharsanachta i réigiúin teorann. Tá roinnt Ballstát tar éis comhaontuithe déthaobhacha nó comhaontuithe iltaobhacha, fiú, a thabhairt i gcrích freisin chun an comhar trasteorann a neartú, lena n-áirítear malartú faisnéise. Leis an Treoir seo, ní chuirtear teorainn le féidearthachtaí den sórt sin, ar choinníoll go bhfuil na rialacha maidir le malartú faisnéise a leagtar amach sna comhaontuithe sin comhoiriúnach leis an Treoir seo i gcás ina bhfuil feidhm aici. Os a choinne sin, moltar do na Ballstáit na dea-chleachtais agus na ceachtanna a foghlaimíodh ó na tionscadail phíolótacha agus comhaontuithe sin a mhalartú agus úsáid a bhaint as cistiú ón Aontas atá ar fáil i ndáil leis sin, go háirithe as an gCiste Slándála Inmheánaí, arna bhunú le Rialachán (AE) 2021/1149 ó Pharlaimint na hEorpa agus ón gComhairle (3).

(6)

Tá an malartú faisnéise idir Ballstáit chun cionta coiriúla a chosc agus a bhrath á rialáil leis an gCoinbhinsiún lena ndéantar Comhaontú Schengen an 14 Meitheamh 1985 (4) a chur chun feidhme, a glacadh an 19 Meitheamh 1990, go háirithe Airteagail 39 agus 46 de. Tháinig Cinneadh Réime 2006/960/CGB ón gComhairle (5) in ionad na bhforálacha sin go páirteach agus tugadh isteach rialacha nua leis maidir le malartú faisnéise agus eolais idir na húdaráis forfheidhmithe dlí inniúla.

(7)

Léirigh meastóireachtaí, lena n-áirítear na meastóireachtaí a rinneadh faoi Rialachán (AE) Uimh. 1053/2013 ón gComhairle (6), nach bhfuil Cinneadh Réime 2006/960/CGB sách soiléir agus nach n-áirithítear leis go ndéanfar faisnéis ábhartha a mhalartú go leormhaith agus go mear idir na Ballstáit. Thug meastóireachtaí le fios freisin gur ar éigean a úsáidtear an Cinneadh Réime sin i ndáiríre, i bpáirt mar gheall ar an easpa soiléireachta atá ann sa chleachtas idir raon feidhme an Choinbhinsiúin lena ndéantar Comhaontú Schengen a chur chun feidhme agus raon feidhme an Chinnidh Réime sin.

(8)

Dá bhrí sin, ba cheart an creat dlíthiúil atá ann cheana a thabhairt cothrom le dáta d’fhonn deireadh a chur le neamhréireachtaí agus rialacha soiléire agus comhchuibhithe a bhunú chun malartú leormhaith agus mear faisnéise idir údaráis forfheidhmithe dlí inniúla Ballstát éagsúil a éascú agus a áirithiú agus chun gur féidir leis na húdaráis forfheidhmithe dlí inniúla iad féin a chur in oiriúint don chaoi a bhfuil an choireacht eagraithe ag athrú agus ag leathnú go tapa, lena n-áirítear i gcomhthéacs dhomhandú agus dhigitiú na sochaí.

(9)

Go háirithe, leis an Treoir seo, ba cheart malartú faisnéise a chumhdach chun cionta coiriúla a chosc, a bhrath nó a imscrúdú agus, ar an gcaoi sin, sáraíocht iomlán a dhéanamh, a mhéid a bhaineann le malartuithe den sórt sin, ar Airteagail 39 agus 46 den Choinbhinsiún lena ndéantar Comhaontú Schengen a chur chun feidhme agus an deimhneacht dhlíthiúil is gá a sholáthar. Ina theannta sin, ba cheart na rialacha ábhartha a shimpliú agus a shoiléiriú chun a gcur i bhfeidhm éifeachtach sa chleachtas a éascú.

(10)

Is gá rialacha comhchuibhithe a leagan síos lena rialófar na gnéithe trasnaí den mhalartú faisnéise idir na Ballstáit faoin Treoir seo ag céimeanna éagsúla d’imscrúdú, ón gcéim a bhailítear faisnéis choiriúil go céim an imscrúdaithe choiriúil. Ba cheart a áireamh ar na rialacha sin malartú faisnéise trí Lárionaid um Chomhar Póilíneachta agus Custaim arna mbunú idir dhá Bhallstát nó níos mó ar bhonn socruithe déthaobhacha nó iltaobhacha chun cionta coiriúla a chosc, a bhrath nó a imscrúdú. Níor cheart, áfach, a áireamh ar na rialacha sin an malartú déthaobhach faisnéise le tríú tíortha. Níor cheart do na rialacha a leagtar síos sa Treoir seo difear a dhéanamh do chur i bhfeidhm rialacha dhlí an Aontais maidir le córais nó creataí sonracha le haghaidh na malartuithe sin, amhail Rialacháin (AE) 2016/794 (7), (AE) 2018/1860 (8), (AE) 2018/1861 (9) agus (AE) 2018/1862 (10) ó Pharlaimint na hEorpa agus ón gComhairle, Treoracha (AE) 2016/681 (11) agus (AE) 2019/1153 (12) ó Pharlaimint na hEorpa agus ón gComhairle, agus Cinntí 2008/615/CGB (13) agus 2008/616/CGB (14) ón gComhairle.

(11)

Is coincheap uathrialach de dhlí an Aontais é “cion coiriúil” mar a léirmhíníonn Cúirt Bhreithiúnais an Aontais Eorpaigh é. Chun críocha na Treorach seo, ar mhaithe leis an gcoireacht a chomhrac go héifeachtach, ba cheart “cion coiriúil” a thuiscint mar thagairt d’aon iompar a ngabhann pionós leis faoi dhlí coiriúil an Bhallstáit a fhaigheann faisnéis, de bhun iarrata nó de bhun soláthar faisnéise féintionscnaimh i gcomhréir leis an Treoir seo, gan beann ar an bpionós is féidir a fhorchur sa Bhallstát sin agus gan beann ar phionós a bheith ag gabháil freisin leis an iompar faoi dhlí coiriúil an Bhallstáit a sholáthraíonn faisnéis, gan dochar do na forais le haghaidh diúltú iarrataí ar fhaisnéis a leagtar amach sa Treoir seo.

(12)

Ní dochar an Treoir seo don Choinbhinsiúin arna tharraingt suas ar bhonn Airteagal K.3 den Chonradh ar an Aontas Eorpach, maidir le cúnamh frithpháirteach agus comhar idir údaráis chustaim (15) (Napoli II).

(13)

Ós rud é nach bhfuil feidhm ag an Treoir seo maidir le próiseáil faisnéise le linn gníomhaíocht nach dtagann faoi raon feidhme dhlí an Aontais, ní thagann gníomhaíochtaí a bhaineann le slándáil náisiúnta faoi raon feidhme na Treorach seo.

(14)

Ní rialaítear soláthar agus úsáid faisnéise mar fhianaise in imeachtaí breithiúnacha leis an Treoir seo. Go háirithe, níor cheart a thuiscint go mbunaítear ceart leis an Treoir seo úsáid a bhaint as an bhfaisnéis a sholáthraítear i gcomhréir leis an Treoir seo mar fhianaise agus, dá bhrí sin, ní dhéanann sí difear d’aon cheanglas dá bhforáiltear sa dlí is infheidhme toiliú an Bhallstáit a sholáthraíonn an fhaisnéis don úsáid sin a fháil. Ní dhéanann an Treoir seo difear do ghníomhartha dlí an Aontais maidir le fianaise, amhail Rialachán ó Pharlaimint na hEorpa agus ón gComhairle maidir le hOrdú Eorpach chun Fianaise a Thabhairt ar Aird agus maidir le hOrdú Eorpach um Chaomhnú i gcomhair fianaise leictreonach in imeachtaí coiriúla agus chun pianbhreitheanna coimeádta a fhorghníomhú tar éis imeachtaí coiriúla, Treoir 2014/41/AE ó Pharlaimint na hEorpa agus ón gComhairle (16) agus Treoir ó Pharlaimint na hEorpa agus ón gComhairle lena leagtar síos rialacha comhchuibhithe maidir le bunaíochtaí ainmnithe a ainmniú agus ionadaithe dlíthiúla a cheapadh chun críche fianaise leictreonach a bhailiú in imeachtaí coiriúla ó Pharlaimint na hEorpa agus ón gComhairle. Dá bhrí sin, cé nach bhfuil ceangal orthu é sin a dhéanamh faoin Treoir seo, ba cheart cead a bheith ag na Ballstáit a sholáthraíonn faisnéis faoin Treoir seo toiliú a thabhairt, tráth a sholáthraítear an fhaisnéis nó ina dhiaidh sin, an fhaisnéis sin a úsáid mar fhianaise in imeachtaí breithiúnacha, lena n-áirítear, i gcás inar gá faoin dlí náisiúnta, trí úsáid a bhaint as ionstraimí maidir leis an gcomhar breithiúnach atá i bhfeidhm idir na Ballstáit.

(15)

Ba cheart gach malartú faisnéise faoin Treoir seo a bheith faoi réir cúig phrionsabal ghinearálta, eadhon prionsabail na hinfhaighteachta, na rochtana coibhéisí, na rúndachta, na húinéireachta sonraí agus na hiontaofachta sonraí. Cé nach dochar na prionsabail sin d’fhorálacha níos sonraí na Treorach seo, ba cheart dóibh a léirmhíniú agus a cur i bhfeidhm a threorú i gcás inarb ábhartha. Ar dtús, ba cheart an tuiscint a bhaint as prionsabal na hinfhaighteachta gur cheart faisnéis ábhartha atá ar fáil do Phointe Teagmhála Aonair nó údaráis forfheidhmithe dlí inniúla Ballstáit amháin a chur ar fáil freisin, a mhéid is féidir, do Phointe Teagmhála Aonair nó údaráis forfheidhmithe dlí inniúla Ballstát eile. Mar sin féin, níor cheart don phrionsabal sin difear a dhéanamh, i gcás ina mbeadh údar cuí leis, do chur i bhfeidhm fhorálacha sonracha na Treorach seo lena gcuirtear srian le hinfhaighteacht faisnéise, amhail na forálacha sin maidir leis na forais le haghaidh diúltú iarrataí ar fhaisnéis agus maidir le húdaruithe breithiúnacha, ná do chur i bhfeidhm na hoibleagáide toiliú a fháil ón mBallstát nó an tríú tír a sholáthair an fhaisnéis ar dtús sular comhroinneadh í. Ar an dara dul síos, de bhun phrionsabal na rochtana coibhéisí, ba cheart do na Ballstáit a áirithiú go bhfuil an rochtain atá ag bPointe Teagmhála Aonair agus údaráis forfheidhmithe dlí inniúla Ballstát eile ar fhaisnéis ábhartha, go bhfuil an rochtain sin mar an gcéanna a bheag nó a mhór leis an rochtain atá ag a bPointe Teagmhála Aonair féin agus ag na húdaráis forfheidhmithe dlí inniúla ar an bhfaisnéis sin agus, dá bhrí sin, nach bhfuil sí níos déine ná níos scaoilte ná an rochtain atá ag a bPointe Teagmhála Aonair féin agus ag na húdaráis forfheidhmithe dlí inniúla, faoi réir fhorálacha níos sonraí na Treorach seo. Ar an tríú dul síos, le prionsabal na rúndachta, ceanglaítear ar na Ballstáit rialacha náisiúnta a chéile maidir le rúndacht a urramú agus iad ag déileáil le faisnéis atá marcáilte mar fhaisnéis rúnda a sholáthraítear dá bPointe Teagmhála Aonair nó dá n-údaráis forfheidhmithe dlí inniúla, trí leibhéal comhchosúil rúndachta a áirithiú i gcomhréir leis na rialacha maidir le rúndacht a leagtar amach sa dlí náisiúnta. Ar an gceathrú dul síos, de bhun phrionsabal na húinéireachta sonraí, níor cheart faisnéis a fhaightear ar dtús ó Bhallstát eile nó ó thríú tír a sholáthar ach amháin le toiliú ón mBallstát sin nó ón tríú tír sin agus i gcomhréir leis na coinníollacha arna bhforchur ag an mBallstát sin nó ag an tríú tír sin. Ar an gcúigiú dul síos, de bhun phrionsabal na hiontaofachta sonraí, ba cheart sonraí pearsanta a bhfaightear amach ina leith go bhfuil siad míchruinn, neamhiomlán nó nach bhfuil siad cothrom le dáta a thuilleadh a léirscriosadh nó a cheartú nó ba cheart próiseáil na sonraí sin a shrianadh, de réir mar is iomchuí, agus ba cheart fógra a thabhairt gan mhoill d’aon fhaighteoir a fhaigheann na sonraí sin.

(16)

Chun an cuspóir a bhaint amach maidir le malartú leormhaith agus mear faisnéise idir na Ballstáit a éascú agus a áirithiú, ba cheart leis an Treoir seo an deis a thabhairt do na Ballstáit faisnéis a fháil trí iarraidh ar fhaisnéis a dhíriú ar Phointe Teagmhála Aonair Ballstát eile, i gcomhréir le ceanglais shoiléire, shimplithe agus chomhchuibhithe áirithe. A mhéid a bhaineann le hábhar na n-iarrataí ar fhaisnéis, ba cheart a shonrú sa Treoir seo, go háirithe, ar bhealach uileghabhálach agus sách mionsonraithe agus gan dochar don ghá atá le measúnú cás ar chás, na cásanna ina measfar iarrataí ar fhaisnéis a bheith práinneach, na mionsonraí is lú is gá a bheith iontu agus an teanga inar cheart iad a thíolacadh.

(17)

Cé gur cheart do Phointe Teagmhála Aonair gach Ballstáit a bheith in ann, in aon chás, iarrataí ar fhaisnéis a chur faoi bhráid Pointe Teagmhála Aonair Ballstáit eile, ar mhaithe le solúbthacht, ba cheart cead a bheith ag na Ballstáit, ina theannta sin, cuid dá n-údaráis forfheidhmithe dlí inniúla, a d’fhéadfadh a bheith rannpháirteach sa chomhar Eorpach, a ainmniú mar údaráis forfheidhmithe dlí ainmnithe chun críche iarrataí den sórt sin a chur faoi bhráid an Phointí Teagmhála Aonair Ballstát eile. Ba cheart do gach Ballstát liosta dá údaráis forfheidhmithe dlí ainmnithe a chur faoi bhráid an Choimisiúin. Ba cheart do na Ballstáit an Coimisiún a chur ar an eolas i gcás ina ndéanfar aon athruithe ar an liosta sin. Ba cheart don Choimisiún na liostaí a fhoilsiú ar líne. Chun go mbeidh Pointí Teagmhála Aonair in ann a bhfeidhmeanna comhordaithe a dhéanamh faoin Treoir seo, is gá, áfach, i gcás ina gcinneann Ballstát cead a thabhairt do chuid dá údaráis forfheidhmithe dlí inniúla iarrataí ar fhaisnéis a chur faoi bhráid Pointí Teagmhála Aonair Ballstát eile, go gcuireann an Ballstát sin a Phointe Teagmhála Aonair ar an eolas faoi gach iarraidh amach ar fhaisnéis agus faoi aon chumarsáid a bhaineann leis sin, trína Phointe Teagmhála Aonair a chur i gcóip i gcónaí. Ba cheart do na Ballstáit féachaint leis an dúbláil sonraí pearsanta nach bhfuil údar léi a theorannú a oiread is féidir.

(18)

Tá gá le teorainneacha ama chun a áirithiú go ndéanfar próiseáil mhear ar iarrataí ar fhaisnéis arna gcur faoi bhráid Pointe Teagmhála Aonair. Ba cheart na teorainneacha ama sin a bheith soiléir agus cuí agus ba cheart a chur san áireamh iontu an bhfuil práinn leis an iarraidh ar fhaisnéis agus an mbaineann an iarraidh le faisnéis atá inrochtana go díreach nó le faisnéis atá inrochtana go hindíreach. Chun a áirithiú go gcomhlíonfar na teorainneacha ama is infheidhme agus leibhéal solúbthachta á lamháil ag an am céanna, i gcás ina mbeidh údar cuí oibiachtúil leis, níor cheart é a bheith indéanta imeacht ó na teorainneacha ama sin ach amháin, ar bhonn eisceachtúil, i gcás ina mbeidh am breise ag teastáil ó údarás breithiúnach inniúil an Bhallstáit iarrtha chun cinneadh a dhéanamh maidir leis an údarú breithiúnach is gá a dheonú agus sa mhéid sin amháin. D’fhéadfadh cás den sórt sin teacht chun cinn, mar shampla, mar gheall ar raon feidhme leathan nó castacht na n-ábhar a eascraíonn as an iarraidh ar fhaisnéis. Chun a áirithiú, a mhéid is féidir, nach gcaillfear deiseanna atá criticiúil ó thaobh ama de chun gníomhaíocht a dhéanamh i gcásanna sonracha, ba cheart don Bhallstát iarrtha aon fhaisnéis arna hiarraidh a sholáthar a luaithe a bheidh sí i seilbh an Phointe Teagmhála Aonair, fiú i gcás nach í an fhaisnéis sin an t-aon fhaisnéis atá ar fáil atá ábhartha don iarraidh. Ba cheart an chuid eile den fhaisnéis arna hiarraidh a sholáthar go pras ina dhiaidh sin, a luaithe a bheidh sí i seilbh an Phointe Teagmhála Aonair.

(19)

Ba cheart do na Pointí Teagmhála Aonair a mheas an bhfuil an fhaisnéis arna hiarraidh riachtanach agus comhréireach chun críocha na Treorach seo a bhaint amach agus an bhfuil an míniú ar na cúiseanna oibiachtúla a thugann údar cuí leis an iarraidh soiléir agus mionsonraithe go leor, chun soláthar faisnéise gan údar cuí nó soláthar méideanna díréireacha faisnéise a sheachaint.

(20)

I gcásanna eisceachtúla, d’fhéadfadh údar oibiachtúil cuí a bheith ag Ballstát iarraidh ar fhaisnéis arna cur faoi bhráid a Phointe Teagmhála Aonair a dhiúltú. Chun feidhmiú éifeachtach an chórais a chruthaítear leis an Treoir seo a áirithiú i gcomhréir iomlán leis an smacht reachta, ba cheart na cásanna sin a shonrú go mion agus a léirmhíniú go sriantach. Mar sin féin, leis na rialacha a leagtar amach sa Treoir seo, cuirtear béim láidir ar phrionsabail an riachtanais agus na comhréireachta agus, ar an gcaoi sin, déantar coimircí a sholáthar i gcoinne aon mhí-úsáide a d’fhéadfaí a bhaint as iarrataí ar fhaisnéis, lena n-áirítear i gcás ina mbeadh sáruithe follasacha ar na cearta bunúsacha i gceist léi. Dá bhrí sin, mar léiriú ar a ndícheall cuí ginearálta, ba cheart do na Ballstáit a fhíorú i gcónaí go gcomhlíonann iarrataí a chuirtear faoina mbráid faoin Treoir seo prionsabail an riachtanais agus na comhréireachta agus ba cheart dóibh na hiarrataí sin a mheasann siad a bheith neamhchomhlíontach a dhiúltú. I gcás nach mbaineann na cúiseanna atá leis an iarraidh a dhiúltú ach le codanna den fhaisnéis arna hiarraidh, ba cheart an chuid eile den fhaisnéis a sholáthar laistigh de na teorainneacha ama a leagtar amach sa Treoir seo. Chun cosc a chur le diúltú neamhriachtanach iarrataí ar fhaisnéis, ba cheart do Phointe Teagmhála Aonair nó údarás forfheidhmithe dlí ainmnithe an Bhallstáit iarrthaigh, de réir mar is infheidhme, soiléiriú nó sonraíochtaí a sholáthar, arna n-iarraidh sin, a bhfuil gá leo chun an iarraidh ar fhaisnéis a phróiseáil. Ba cheart na teorainneacha ama is infheidhme a chur ar fionraí ón uair a fhaigheann Pointe Teagmhála Aonair nó, i gcás inarb infheidhme, údarás forfheidhmithe dlí ainmnithe an Bhallstáit iarrthaigh an iarraidh ar shoiléiriú nó ar shonraíochtaí. Mar sin féin, níor cheart é a bheith indéanta soiléiriú nó sonraíochtaí a iarraidh ach amháin i gcás ina bhfuil gá oibiachtúil le soiléiriú nó sonraíochtaí agus go bhfuil siad comhréireach sa mhéid go gcaithfí an iarraidh ar fhaisnéis a dhiúltú gan iad ar cheann amháin de na cúiseanna a liostaítear sa Treoir seo. Ar mhaithe le comhar éifeachtach, ba cheart é a bheith fós indéanta freisin an soiléiriú nó na sonraíochtaí is gá a iarraidh i gcásanna eile, gan na teorainneacha ama a bheith ar fionraí dá bharr sin.

(21)

Chun go mbeidh an tsolúbthacht is gá ann i bhfianaise na riachtanas oibríochtúil a d’fhéadfadh a bheith éagsúil sa chleachtas, ba cheart foráil a dhéanamh leis an Treoir seo maidir le dhá mhodh eile chun faisnéis a mhalartú, sa bhreis ar iarrataí ar fhaisnéis arna gcur faoi bhráid na bPointí Teagmhála Aonair. Is é atá sa chéad cheann soláthar faisnéise gan iarraidh ag Pointe Teagmhála Aonair nó ag údarás forfheidhmithe dlí inniúil do Phointe Teagmhála Aonair nó údarás forfheidhmithe dlí inniúil Ballstáit eile gan iarraidh roimh ré, eadhon faisnéis a sholáthar ar a thionscnamh féin. Is é atá sa dara ceann soláthar faisnéise tar éis iarraidh ar fhaisnéis arna cur faoi bhráid údarás forfheidhmithe dlí inniúil Ballstáit eile ag Pointe Teagmhála Aonair nó ag údarás forfheidhmithe dlí inniúil go díreach. Leis an dá mhodh chun faisnéis a mhalartú, ní leagtar amach sa Treoir seo ach líon teoranta ceanglas íosta, go háirithe maidir leis na Pointí Teagmhála Aonair ábhartha a choinneáil ar an eolas agus, a mhéid a bhaineann le soláthar faisnéise féintionscnaimh, na cásanna ina bhfuil faisnéis le soláthar agus an teanga atá le húsáid. Ba cheart feidhm a bheith ag na ceanglais sin freisin maidir le cásanna ina soláthraíonn údarás forfheidhmithe dlí inniúil faisnéis do Phointe Teagmhála Aonair a Bhallstáit féin chun an fhaisnéis sin a sholáthar do Bhallstát eile, amhail i gcás inar gá na rialacha a leagtar amach sa Treoir seo maidir leis an teanga atá le húsáid agus faisnéis á soláthar a chomhlíonadh.

(22)

Is coimirce thábhachtach é an ceanglas maidir le réamhúdarú breithiúnach chun faisnéis a sholáthar, i gcás ina bhforáiltear dó sin sa dlí náisiúnta, ceanglas ar cheart é a urramú. Mar sin féin, tá córais dlí na mBallstát éagsúil ina leith sin agus níor cheart a thuiscint go ndéanann an Treoir seo difear do na rialacha agus na coinníollacha a bhaineann le réamhúdaruithe breithiúnacha a leagtar síos sa dlí náisiúnta, seachas a cheangal go gcaithfear le malartuithe intíre agus malartuithe idir na Ballstáit ar bhealach coibhéiseach, maidir le hábhar agus nós imeachta araon. Ina theannta sin, chun aon mhoilleanna agus aon chastachtaí a bhaineann le cur i bhfeidhm ceanglais den sórt sin a íoslaghdú, ba cheart do Phointe Teagmhála Aonair nó údaráis forfheidhmithe dlí inniúla Bhallstát an údaráis bhreithiúnaigh inniúil, de réir mar is infheidhme, gach beart praiticiúil agus dlíthiúil a ghlacadh, i gcás inarb ábhartha i gcomhar le Pointe Teagmhála Aonair nó údarás forfheidhmithe dlí ainmnithe an Bhallstáit iarrthaigh, chun an t-údarú breithiúnach a fháil a luaithe is féidir. Cé go bhfuil bunús dlí na Treorach seo teoranta don chomhar i bhforfheidhmiú an dlí faoi Airteagal 87(2), pointe (a), den Chonradh ar Fheidhmiú an Aontais Eorpaigh (CFAE), d’fhéadfadh an Treoir seo a bheith ábhartha d’údaráis bhreithiúnacha.

(23)

Tá sé tábhachtach, go háirithe, go n-áiritheofaí cosaint sonraí pearsanta, i gcomhréir le dlí an Aontais, i ndáil leis na malartuithe faisnéise uile faoin Treoir seo. Chuige sin, aon phróiseáil ar shonraí pearsanta arna déanamh ag Pointe Teagmhála Aonair nó ag údarás forfheidhmithe dlí inniúil faoin Treoir seo, ba cheart í a dhéanamh i gcomhréir iomlán le Treoir (AE) 2016/680 ó Pharlaimint na hEorpa agus ón gComhairle (17). De bhun Rialachán (AE) 2016/794, tá Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) le sonraí a phróiseáil i gcomhréir leis na rialacha a leagtar amach ann. Ní dhéanann an Treoir seo difear don Treoir sin agus don Rialachán sin. Go háirithe, ba cheart a shonrú go leanfaidh aon sonraí pearsanta arna malartú ag Pointí Teagmhála Aonair agus ag údaráis forfheidhmithe dlí inniúla de bheith teoranta do na catagóirí sonraí in aghaidh chatagóir an ábhair sonraí a liostaítear i Roinn B d’Iarscríbhinn II a ghabhann le Rialachán (AE) 2016/794. Dá réir sin, ba cheart idirdhealú soiléir a dhéanamh idir na sonraí a bhaineann le hamhrastaigh agus na sonraí a bhaineann le finnéithe, le híospartaigh nó le daoine ar de ghrúpaí eile iad, a bhfuil feidhm ag teorainneacha níos déine ina leith. Ina theannta sin, a mhéid is féidir, ba cheart aon sonraí pearsanta den sórt sin a idirdhealú de réir leibhéal cruinnis agus iontaofachta na sonraí sin. Chun cruinneas agus iontaofacht a áirithiú, ba cheart fíorais a idirdhealú ó mheasúnuithe pearsanta. Ba cheart do na Pointí Teagmhála Aonair nó, i gcás inarb infheidhme, do na húdaráis forfheidhmithe dlí inniúla iarrataí ar fhaisnéis faoin Treoir seo a phróiseáil chomh luath agus is féidir chun cruinneas agus iontaofacht sonraí pearsanta a áirithiú, chun dúbláil neamhriachtanach sonraí a sheachaint, agus chun an baol go mbeadh sonraí as dáta nó nach mbeidís ar fáil dóibh a thuilleadh a laghdú. I gcás inar cosúil go bhfuil na sonraí pearsanta mícheart, ba cheart iad a cheartú nó a léirscriosadh nó a bpróiseáil a shrianadh gan mhoill.

(24)

Ionas go bhféadfaidh na Pointí Teagmhála Aonair faisnéis a sholáthar go leormhaith agus go mear, arna iarraidh sin nó ar a dtionscnamh féin, tá sé tábhachtach go dtuigfeadh na húdaráis forfheidhmithe dlí inniúla a chéile. Ba cheart gach malartú faisnéise, lena n-áirítear soláthar faisnéise arna hiarraidh, diúltú iarrataí ar fhaisnéis, lena n-áirítear na cúiseanna atá leis an diúltú sin, agus, i gcás inarb infheidhme, iarrataí ar shoiléiriú nó sonraíochtaí agus soiléiriú nó sonraíochtaí arna soláthar a bhaineann le hiarraidh ar leith, ba cheart iad a tharchur sa teanga inar tíolacadh an iarraidh sin. Dá bhrí sin, chun cosc a chur le moilleanna i soláthar na faisnéise arna hiarraidh de bharr constaicí teanga agus chun teorainn a chur le costais aistriúcháin, ba cheart do na Ballstáit liosta a bhunú den teanga nó de na theangacha inar féidir teagmháil a dhéanamh leis an bPointe Teagmhála Aonair agus inar féidir leis cumarsáid a dhéanamh. Ós rud é gur teanga é an Béarla a thuigtear go forleathan agus a úsáidtear go praiticiúil maidir le comhar i bhforfheidhmiú an dlí laistigh den Aontas, ba cheart é a áireamh ar an liosta sin. Ba cheart do na Ballstáit an liosta sin agus aon nuashonruithe air a sholáthar don Choimisiún. Ba cheart don Choimisiún cnuasach de na liostaí sin a fhoilsiú ar líne.

(25)

Chun sábháilteacht agus slándáil shaoránaigh na hEorpa a áirithiú, tá sé bunriachtanach go mbeadh an fhaisnéis is gá ag Europol chun a ról mar mhol faisnéise coiriúla an Aontais a chomhlíonadh, ar mol é a thacaíonn leis na húdaráis forfheidhmithe dlí. Dá bhrí sin, nuair a dhéantar faisnéis a mhalartú idir na Ballstáit, gan beann ar í a bheith á malartú de bhun iarraidh ar fhaisnéis arna cur faoi bhráid Pointe Teagmhála Aonair nó údarás forfheidhmithe dlí inniúil nó ar í a bheith á soláthar ag Pointe Teagmhála Aonair nó údarás forfheidhmithe dlí inniúil ar a thionscnamh féin, ba cheart measúnú a dhéanamh, ar bhonn cás ar chás, i dtaobh ar cheart cóip den iarraidh ar fhaisnéis arna tíolacadh faoin Treoir seo nó den fhaisnéis arna malartú faoin Treoir seo a sheoladh chuig Europol i gcomhréir le hAirteagal 7(6) de Rialachán (AE) 2016/794 i gcás ina mbaineann sí le cion coiriúil a thagann faoi raon feidhme chuspóirí Europol. Ba cheart na measúnuithe sin a bheith bunaithe ar chuspóirí Europol mar a leagtar amach i Rialachán (AE) 2016/794 iad a mhéid a bhaineann le raon feidhme an chiona choiriúil. Níor cheart go mbeadh sé d’oibleagáid ar na Ballstáit cóip den iarraidh ar fhaisnéis nó den fhaisnéis a mhalartaítear a sheoladh chuig Europol i gcás ina mbeadh sé sin ar neamhréir le leasanna bunúsacha shlándáil an Bhallstáit lena mbaineann, i gcás ina gcuirfeadh sé rath imscrúdaithe atá fós ag dul ar aghaidh nó sábháilteacht duine aonair i mbaol nó i gcás ina nochtfadh sé faisnéis a bhaineann le heagraíochtaí nó gníomhaíochtaí sonracha faisnéise i réimse na slándála náisiúnta. Thairis sin, i gcomhréir le prionsabal na húinéireachta sonraí agus gan dochar don oibleagáid a leagtar amach i Rialachán (AE) 2016/794 a bhaineann le cuspóir na próiseála faisnéise ag Europol, agus srianta ar an bpróiseáil sin, a chinneadh, níor cheart faisnéis a fhaightear ar dtús ó Bhallstát eile nó ó thríú tír a sholáthar do Europol ach amháin i gcás ina bhfuil a thoiliú tugtha ag an mBallstát sin nó ag an tríú tír sin. Ba cheart do na Ballstáit a áirithiú go dtabharfar tacaíocht leormhaith d’fhoireann a bPointe Teagmhála Aonair agus a n-údarás forfheidhmithe dlí inniúil agus go gcuirfear oiliúint leormhaith orthu chun a fháil amach go tapa agus go cruinn cén fhaisnéis a mhalartaítear faoin Treoir seo a thagann faoi shainordú Europol agus a bhfuil gá léi chun a chuspóirí a chomhlíonadh.

(26)

Ba cheart an fhadhb a bhaineann le hiomadú na mbealaí cumarsáide a úsáidtear chun faisnéis forfheidhmithe dlí a tharchur idir na Ballstáit a leigheas toisc go gcuireann sé bac ar mhalartú leormhaith agus mear na faisnéise sin agus go méadaíonn sé na rioscaí a bhaineann le slándáil sonraí pearsanta. Dá bhrí sin, maidir le húsáid an Fheidhmchláir Líonra um Malartú Slán Faisnéise (SIENA), arna bhainistiú agus arna fhorbairt ag Europol i gcomhréir le Rialachán (AE) 2016/794, ba cheart an úsáid sin a bheith éigeantach do gach tarchur agus cumarsáid faoin Treoir seo, lena n-áirítear iarrataí ar fhaisnéis a sheoladh chuig na Pointí Teagmhála Aonair agus go díreach chuig na húdaráis forfheidhmithe dlí inniúla, faisnéis a sholáthar de bhun na n-iarrataí sin agus faisnéis a bheith á soláthar ag Pointí Teagmhála Aonair agus údaráis forfheidhmithe dlí inniúla ar a dtionscnamh féin, an chumarsáid maidir le diúltú iarrataí ar fhaisnéis, soiléiriú agus sonraíochtaí, agus cóipeanna d’iarrataí ar fhaisnéis nó d’fhaisnéis a sheoladh chuig Pointí Teagmhála Aonair agus chuig Europol. Chuige sin, ba cheart nasc díreach a bheith ag na Pointí Teagmhála Aonair uile, agus ag na húdaráis forfheidhmithe dlí inniúla uile a d’fhéadfadh a bheith páirteach i malartuithe faisnéise, le SIENA. Chun gur féidir le hoifigigh thúslíne, amhail póilíní a bhfuil baint acu le hoibríochtaí gabhála, úsáid a bhaint as SIENA, ba cheart é a bheith oibríochtúil ar ghléasanna soghluaiste freisin, i gcás inarb iomchuí. I ndáil leis sin, ba cheart foráil a dhéanamh d’idirthréimhse ghearr, chun go bhféadfar SIENA a chur i bhfeidhm go hiomlán ós rud é go bhfuil athrú ar na socruithe reatha i roinnt Ballstát i gceist leis agus gur gá oiliúint a chur ar an bhfoireann sin. Chun cúrsaí oibríochtúla a chur san áireamh agus gan bac a chur ar dhea-chomhar idir na húdaráis forfheidhmithe dlí inniúla, ba cheart do na Ballstáit a bheith in ann cead a thabhairt dá bPointe Teagmhála Aonair nó dá n-údaráis forfheidhmithe dlí inniúla bealach cumarsáide slán eile a úsáid i líon teoranta cásanna a bhfuil údar cuí leo. I gcás ina gceadaíonn na Ballstáit dá bPointe Teagmhála Aonair nó dá n-údaráis forfheidhmithe dlí inniúla bealach cumarsáide eile a úsáid mar gheall ar phráinn na hiarrata ar fhaisnéis, ba cheart dóibh, i gcás inarb indéanta agus i gcomhréir leis na riachtanais oibríochtúla, SIENA a úsáid arís nuair nach mbeidh an cás práinneach a thuilleadh. Níor cheart úsáid SIENA a bheith éigeantach le haghaidh malartuithe inmheánacha faisnéise laistigh de Bhallstát.

(27)

Chun sreabha faisnéise a shimpliú, a éascú agus a bhainistiú ar bhealach níos fearr, ba cheart do gach Ballstát Pointe Teagmhála Aonair a bhunú nó a ainmniú. Ba cheart do na Pointí Teagmhála Aonair a bheith inniúil ar mhalartú faisnéise faoin Treoir seo a chomhordú agus a éascú. Ba cheart do gach Ballstát fógra a thabhairt don Choimisiún maidir le bunú nó ainmniú a Phointe Teagmhála Aonair agus le haon athruithe air sin. Ba cheart don Choimisiún na fógraí sin agus aon nuashonruithe orthu a fhoilsiú. Ba cheart do na Pointí Teagmhála Aonair, go háirithe, rannchuidiú le maolú a dhéanamh ar na bacainní ar shreabha faisnéise a eascraíonn as ilroinnt an bhealaigh a ndéanann na húdaráis forfheidhmithe dlí inniúla cumarsáid le chéile, mar fhreagairt ar an méadú ar an ngá dul i ngleic go comhpháirteach leis an gcoireacht trasteorann, amhail an gháinneáil ar dhrugaí, an chibearchoireacht, an gháinneáil ar dhaoine, agus an sceimhlitheoireacht. Ba cheart roinnt íoschúraimí sonracha a shannadh do na Pointí Teagmhála Aonair agus ba cheart íoschumais áirithe a bheith acu ionas go mbeidh siad in ann a bhfeidhmeanna comhordaithe a chomhlíonadh go héifeachtach i ndáil le malartú faisnéise trasteorann chun críocha fhorfheidhmiú an dlí faoin Treoir seo.

(28)

Ba cheart rochtain a bheith ag na Pointí Teagmhála Aonair ar an bhfaisnéis uile atá ar fáil ina mBallstát, lena n-áirítear trí rochtain sholáimhsithe a bheith acu ar gach bunachar sonraí agus ardán ábhartha de chuid an Aontais agus ar gach bunachar sonraí agus ardán ábhartha idirnáisiúnta, i gcomhréir leis na socruithe a shonraítear i ndlí an Aontais agus sa dlí náisiúnta is infheidhme. Chun go mbeidh na Pointí Teagmhála Aonair in ann ceanglais na Treorach seo a chomhlíonadh, go háirithe na ceanglais a bhaineann le teorainneacha ama, ba cheart acmhainní leormhaithe a sholáthar do na Pointí Teagmhála Aonair i dtaobh buiséid agus foirne, lena n-áirítear cumais leormhaithe aistriúcháin, agus ba cheart dóibh feidhmiú de ló agus d’oíche. I ndáil leis sin, d’fhéadfaí a n-éifeachtúlacht agus a n-éifeachtacht a mhéadú trí dheasc thosaigh a bheith ann a bheadh in ann iarrataí isteach ar fhaisnéis a scagadh, a phróiseáil agus a sheoladh. Ba cheart údaráis bhreithiúnacha atá inniúil ar údaruithe breithiúnacha is gá a dheonú a bheith ar fáil, i gcónaí, do na Pointí Teagmhála Aonair freisin. Sa chleachtas, is féidir é sin a dhéanamh, mar shampla, trína áirithiú go mbeidh na húdaráis bhreithiúnacha sin i láthair go fisiciúil in áitreabh an Phointe Teagmhála Aonair nó go mbeidh na húdaráis bhreithiúnacha sin ar fáil go feidhmiúil, bíodh sé sin in áitreabh an Phointe Teagmhála Aonair nó ar fáil go díreach ar glao-dhualgas.

(29)

Chun go mbeidh siad in ann a bhfeidhmeanna comhordaithe a fheidhmiú go héifeachtach faoin Treoir seo, ba cheart na Pointí Teagmhála Aonair a bheith comhdhéanta d’fhoireann ó na húdaráis forfheidhmithe dlí inniúla sin a bhfuil gá lena rannpháirtíocht chun faisnéis a mhalartú go leormhaith agus go mear faoin Treoir seo. Cé gur faoi gach Ballstát atá sé cinneadh a dhéanamh maidir leis an eagrú agus an comhdhéanamh beacht is gá chun an ceanglas sin a chomhlíonadh, d’fhéadfadh ionadaíocht sna Pointí Teagmhála Aonair a bheith ag póilíní, ag údaráis chustaim agus ag údaráis forfheidhmithe dlí inniúla eile atá freagrach as cionta coiriúla a chosc, a bhrath nó a imscrúdú agus ag pointí teagmhála a d’fhéadfadh a bheith ann d’oifigí réigiúnacha agus déthaobhacha, amhail oifigigh idirchaidrimh agus ataiséanna ar iasacht nó arna bpostú i mBallstáit eile agus i ngníomhaireachtaí ábhartha forfheidhmithe dlí an Aontais, amhail Europol. Ar mhaithe le comhordú éifeachtach, áfach, ar a laghad, ba cheart do na Pointí Teagmhála Aonair a bheith comhdhéanta d’ionadaithe ó aonad náisiúnta Europol, ó Bhiúró SIRENE agus ó Bhiúró Lárnach Náisiúnta Interpol, mar a bunaíodh leis an ngníomh dlí ábhartha de chuid an Aontais nó leis an gcomhaontú idirnáisiúnta ábhartha iad agus d’ainneoin nach bhfuil feidhm ag an Treoir seo maidir le malartú faisnéise a rialaítear go sonrach leis na gníomhartha dlí sin de chuid an Aontais.

(30)

I bhfianaise na riachtanas sonrach a bhaineann leis an gcomhar trasteorann i bhforfheidhmiú an dlí, lena n-áirítear faisnéis íogair a láimhseáil sa chomhthéacs sin, tá sé bunriachtanach go mbeadh an t-eolas agus na scileanna is gá ag foireann na bPointí Teagmhála Aonair agus na n-údarás forfheidhmithe dlí inniúil chun a bhfeidhmeanna faoin Treoir seo a dhéanamh ar bhealach dleathach, éifeachtúil agus éifeachtach. Go háirithe, ba cheart cúrsaí oiliúna leormhaithe agus tráthrialta a thairiscint d’fhoireann na bPointí Teagmhála Aonair, agus an fhoireann a spreagadh le tairbhe a bhaint na cúrsaí sin, a sholáthraítear ar leibhéal an Aontais agus ar an leibhéal náisiúnta araon, a chomhfhreagraíonn dá riachtanais ghairmiúla agus dá gcúlraí sonracha agus a éascaíonn a dteagmháil le Pointí Teagmhála Aonair agus údaráis forfheidhmithe dlí inniúla Ballstát eile, ar teagmháil í a bhfuil gá léi chun na rialacha a leagtar amach sa Treoir seo a chur i bhfeidhm. I ndáil leis sin, ba cheart aird ar leith a thabhairt ar úsáid chuí na n-uirlisí próiseála sonraí agus na gcóras teicneolaíochta faisnéise (TF), ar eolas a chomhroinnt faoi na creataí dlíthiúla ábhartha ar leibhéal an Aontais agus ar an leibhéal náisiúnta i réimse an Cheartais agus na nGnóthaí Baile, agus béim ar leith á leagan ar chosaint sonraí pearsanta, ar an gcomhar i bhforfheidhmiú an dlí agus ar láimhseáil faisnéise rúnda, agus ar na teangacha inar chuir an Ballstát lena mbaineann in iúl go bhfuil a Phointe Teagmhála Aonair in ann faisnéis a mhalartú, d’fhonn baic theanga a shárú. Chun an oiliúint a chur ar fáil, ba cheart do na Ballstáit freisin, i gcás inarb iomchuí, úsáid a bhaint as na cúrsaí oiliúna agus na huirlisí ábhartha arna dtairiscint ag Gníomhaireacht an Aontais Eorpaigh um Oiliúint i bhForfheidhmiú an Dlí (CEPOL), a bunaíodh le Rialachán (AE) 2015/2219 ó Pharlaimint na hEorpa agus ón gComhairle (18), an fhéidearthacht go gcaithfeadh an fhoireann seachtain ag Europol a mheas, agus úsáid a bhaint as na tairiscintí ábhartha arna ndéanamh faoi chláir agus tionscadail arna gcistiú ag buiséad an Aontais, amhail clár malartaithe CEPOL.

(31)

Sa bhreis ar scileanna teicniúla agus eolas dlíthiúil, is réamhriachtanais iad an mhuinín fhrithpháirteach agus an chomhthuiscint le haghaidh comhar éifeachtúil agus éifeachtach trasteorann i bhforfheidhmiú an dlí faoin Treoir seo. Le teagmhálaithe pearsanta a fhaightear trí oibríochtaí comhpháirteacha agus trí shaineolas a chomhroinnt, éascaítear cothú na hiontaoibhe agus forbairt comhchultúir póilíneachta ar leibhéal an Aontais. Ba cheart do na Ballstáit féachaint freisin ar chúrsaí oiliúna comhpháirteacha agus malartuithe foirne a bheidh dírithe ar aistriú eolais maidir le modhanna oibre, cuir chuige imscrúdaitheacha agus struchtúir eagraíochtúla na n-údarás forfheidhmithe dlí inniúil i mBallstáit eile.

(32)

Chun an rannpháirtíocht i gcúrsaí oiliúna a mhéadú d’fhoireann na bPointí Teagmhála Aonair agus na n-údarás forfheidhmithe dlí inniúil, d’fhéadfadh na Ballstáit féachaint ar dhreasachtaí sonracha don fhoireann sin.

(33)

Ní mór do na Pointí Teagmhála Aonair córas leictreonach bainistithe cásanna aonair a chur in úsáid agus a oibriú a bhfuil íosfheidhmeanna agus íoschumais áirithe aige chun go mbeidh siad in ann gach ceann dá gcúraimí faoin Treoir seo a dhéanamh ar bhealach éifeachtach agus éifeachtúil, go háirithe a mhéid a bhaineann le malartú faisnéise. Is córas sreafa oibre é an córas bainistithe cásanna lenar féidir le Pointí Teagmhála Aonair an malartú faisnéise a bhainistiú. Is inmhianaithe caighdeán na formáide uilíche teachtaireachta a bunaíodh le Rialachán (AE) 2019/818 ó Pharlaimint na hEorpa agus ón gComhairle (19) a úsáid agus an córas bainistithe cásanna á fhorbairt.

(34)

Tá feidhm ag na rialacha a leagtar amach i dTreoir (AE) 2016/680 maidir le próiseáil sonraí pearsanta sa chóras bainistithe cásanna. Áirítear stóráil sa phróiseáil. Ar mhaithe le soiléireacht agus cosaint éifeachtach sonraí pearsanta, ba cheart na rialacha a leagtar amach sa Treoir sin a shonrú tuilleadh sa Treoir seo. Go háirithe, a mhéid an bhaineann leis an gceanglas a leagtar amach i dTreoir (AE) 2016/680 nach gcoinneofaí sonraí pearsanta i bhfoirm lenar féidir ábhair sonraí a aithint níos faide ná mar is gá chun na gcríoch ar chucu a dhéantar iad a phróiseáil, ba cheart a shonrú sa Treoir seo, i gcás ina bhfaigheann Pointe Teagmhála Aonair faisnéis a mhalartaítear faoin Treoir seo ina bhfuil sonraí pearsanta, nár cheart don Phointe Teagmhála Aonair na sonraí pearsanta a choinneáil sa chóras bainistithe cásanna ach a mhéid is gá agus is cuí chun gur féidir leis a chuid cúraimí faoin Treoir seo a dhéanamh. I gcás nach amhlaidh a thuilleadh, ba cheart don Phointe Teagmhála Aonair na sonraí pearsanta a scriosadh go neamh-inchúlghairthe ón gcóras bainistithe cásanna. Chun a áirithiú nach gcoinneofar na sonraí pearsanta ach a fhad is gá agus is comhréireach, i gcomhréir leis na rialacha a bhaineann le teorainneacha ama le haghaidh stórála agus athbhreithnithe a leagtar amach i dTreoir (AE) 2016/680, ba cheart don Phointe Teagmhála Aonair athbhreithniú a dhéanamh go tráthrialta i dtaobh an bhfuil na ceanglais sin á gcomhlíonadh i gcónaí. Chun na críche sin, ba cheart an chéad athbhreithniú a dhéanamh 6 mhí ar a dhéanaí tar éis do mhalartú faisnéise faoin Treoir seo teacht chun críche, is é sin le rá, an tráth a soláthraíodh an mhír dheireanach faisnéise nó an tráth a rinneadh an chumarsáid is déanaí ina leith. Níor cheart, áfach, do cheanglais na Treorach seo maidir le hathbhreithniú agus scriosadh den sórt sin difear a dhéanamh don fhéidearthacht go ndéanfadh na húdaráis náisiúnta atá inniúil ar chionta coiriúla a chosc, a bhrath agus a imscrúdú na sonraí pearsanta a choinneáil ina gcomhaid choiriúla náisiúnta faoin dlí náisiúnta, i gcomhréir le dlí an Aontais, go háirithe Treoir (AE) 2016/680.

(35)

Chun cuidiú le Pointí Teagmhála Aonair agus údaráis forfheidhmithe dlí inniúla faisnéis a mhalartú faoin Treoir seo agus chun comhchultúr Eorpach póilíneachta a chothú idir na Ballstáit, ba cheart do na Ballstáit comhar praiticiúil a spreagadh i measc a bPointí Teagmhála Aonair agus a n-údarás forfheidhmithe dlí inniúil. Go háirithe, ba cheart don Chomhairle cruinnithe de Chinn na bPointí Teagmhála Aonair a eagrú ar bhonn bliantúil ar a laghad chun taithí agus dea-chleachtas a chomhroinnt maidir le malartú faisnéise chun críocha na Treorach seo. Ba cheart a áireamh ar fhoirmeacha eile comhair lámhleabhair a dhréachtú maidir le faisnéis i bhforfheidhmiú an dlí a mhalartú, bileoga eolais náisiúnta a chur le chéile maidir le faisnéis atá inrochtana go díreach agus go hindíreach, Pointí Teagmhála Aonair, údaráis forfheidhmithe dlí ainmnithe agus córais teanga, nó doiciméid eile maidir le nósanna imeachta comhchoiteanna, aghaidh a thabhairt ar dheacrachtaí maidir le sreafaí oibre, feasacht a mhúscailt faoi shainiúlachtaí na gcreataí dlíthiúla ábhartha agus cruinnithe a eagrú, de réir mar is iomchuí, idir Pointí Teagmhála Aonair ábhartha.

(36)

Chun go mbeifear in ann an faireachán agus an mheastóireacht is gá a dhéanamh ar chur i bhfeidhm na Treorach seo, ba cheart ceangal a bheith ar na Ballstáit sonraí áirithe a bhailiú agus a sholáthar don Choimisiún ar bhonn bliantúil maidir le cur chun feidhme na Treorach seo. Tá an ceanglas sin riachtanach, go háirithe, chun leigheas a fháil ar an easpa sonraí inchomparáide lena ndéantar malartuithe faisnéise ábhartha trasteorann idir údaráis forfheidhmithe dlí inniúla a chainníochtú agus éascaítear leis freisin oibleagáid tuairiscithe an Choimisiúin maidir le cur chun feidhme na Treorach seo. Ba cheart na sonraí is gá chun na críche sin a ghiniúint go huathoibríoch leis an gcóras bainistithe cásanna agus SIENA.

(37)

Mar gheall ar ghné thrasteorann na coireachta trasnáisiúnta agus na sceimhlitheoireachta, ní mór do na Ballstáit brath ar a chéile chun cionta coiriúla den sórt sin a chosc, a bhrath nó a imscrúdú. Ós rud é nach féidir leis na Ballstáit cuspóir na Treorach seo, eadhon sreabha leormhaithe agus meara faisnéise a áirithiú idir na húdaráis forfheidhmithe dlí inniúla agus chuig Europol, a ghnóthú go leordhóthanach agus, de bharr scála agus éifeachtaí na gníomhaíochta, gur fearr is féidir iad a ghnóthú ar leibhéal an Aontais trí rialacha comhchoiteanna agus comhchultúr a bhunú maidir le malartú faisnéise agus trí bhíthin uirlisí agus bealaí cumarsáide nua-aimseartha, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach (CAE). I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(38)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (20) agus thug an Maoirseoir tuairim an 7 Márta 2022.

(39)

Cuireann an Treoir seo leis na luachanna ar a bhfuil an tAontas fothaithe, mar a leagtar amach in Airteagal 2 CAE iad, lena n-áirítear an smacht reachta, an tsaoirse agus an daonlathas. Urramaítear léi freisin na cearta bunúsacha agus coimircí agus cloítear léi leis na prionsabail a aithnítear sa Chairt um Chearta Bunúsacha an Aontais Eorpaigh (“an Chairt”), go háirithe an ceart chun saoirse agus slándála, an ceart chun measa ar an saol príobháideach agus ar shaol an teaghlaigh agus an ceart go ndéanfaí sonraí pearsanta a chosaint dá bhforáiltear in Airteagail 6, 7 agus 8 den Chairt faoi seach, mar aon le hAirteagal 16 CFAE. Aon phróiseáil a dhéantar ar shonraí pearsanta faoin Treoir seo, ba cheart í a theorannú don phróiseáil sin atá fíor-riachtanach agus comhréireach agus faoi réir coinníollacha soiléire, diancheanglas agus maoirseacht éifeachtach ag na húdaráis mhaoirseachta náisiúnta arna mbunú le Treoir (AE) 2016/680 agus ag an Maoirseoir Eorpach ar Chosaint Sonraí, i gcás inarb iomchuí i gcomhréir lena gcuid sainorduithe faoi seach.

(40)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge atá i gceangal le CAE agus le CFAE, níl an Danmhairg rannpháirteach i nglacadh na Treorach seo agus níl sí faoi cheangal aici ná faoi réir a cur i bhfeidhm. Ós rud é go gcuireann an Treoir seo le acquis Schengen, cinnfidh an Danmhairg, i gcomhréir le hAirteagal 4 den Phrótacal sin, laistigh de thréimhse 6 mhí tar éis don Chomhairle cinneadh a dhéanamh ar an Treoir seo, an gcuirfidh sí chun feidhme ina dlí náisiúnta í.

(41)

Tá Éire rannpháirteach sa Treoir seo i gcomhréir le hAirteagal 5(1) de Phrótacal Uimh. 19 maidir le acquis Schengen arna lánpháirtiú i gcreat an Aontais Eorpaigh atá i gceangal le CAE agus le CFAE, agus i gcomhréir le hAirteagal 6(2) de Chinneadh 2002/192/CE ón gComhairle (21).

(42)

Maidir leis an Íoslainn agus an Iorua, is é atá sa Treoir seo forbairt ar fhorálacha acquis Schengen (22) de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe H, de Chinneadh 1999/437/CE ón gComhairle (23).

(43)

Maidir leis an Eilvéis, is é atá sa Treoir seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen (24) a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe H, de Chinneadh 1999/437/CE, arna léamh i gcomhar le hAirteagal 3 de Chinneadh 2008/149/CGB ón gComhairle (25).

(44)

Maidir le Lichtinstéin, is é atá sa Treoir seo forbairt ar fhorálacha acquis Schengen, de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen (26) a chur chun feidhme, a chur i bhfeidhm agus a fhorbairt, ar forálacha iad a chuimsítear faoin réimse dá dtagraítear in Airteagal 1, pointe H, de Chinneadh 1999/437/CE arna léamh i gcomhar le hAirteagal 3 Chinneadh 2011/349/AE (27),