(1)

Bunscileanna digiteacha ar a laghad, arna dtomhas mar chéatadán de na daoine idir 16 agus 74 bliana d’aois, agus iad imdhealaithe de réir gnéis, ag a bhfuil scileanna digiteacha atá ‘bunúsach’ nó ‘os cionn bunúsach’ i ngach ceann de na cúig ghné seo a leanas: faisnéis, cumarsáid, réiteach fadhbanna, cruthú ábhair dhigitigh agus scileanna sábháilteachta. Déantar é a thomhas ar bhonn na ngníomhaíochtaí atá déanta ag daoine le linn na 3 mhí roimhe sin (2); agus cóineasú inscne, arna thomhas mar chéatadán na mban agus na bhfear i measc na ndaoine aonair sin a bhfuil scileanna digiteacha acu atá ‘bunúsach’ nó ‘os cionn bunúsach’.

(2)

Speisialtóirí TFC, arna dtomhas de réir an líon daoine idir 15 agus 74 bliana d’aois atá fostaithe mar speisialtóirí TFC; agus cóineasú inscne, arna thomhas mar chéatadán na mban agus na bhfear i measc na ndaoine sin atá fostaithe mar speisialtóirí TFC. I gcomhréir le haicmiú cód ISCO-08 (3), is oibrithe iad speisialtóirí TFC a bhfuil an cumas acu córais TFC a fhorbairt, a oibriú agus a chothabháil, agus arb é TFC an chuid is mó dá bpost, lena n-áirítear bainisteoirí seirbhísí TFC, gairmithe TFC, teicneoirí TFC, suiteálaithe TFC agus seirbhíseoirí TFC, ach gan a bheith teoranta dóibh sin.

(3)

Nascacht ghigighiotáin, arna tomhas mar chéatadán na dteaghlach a chumhdaítear le Líonraí Fíor-Ardacmhainneachta (VHCN). Is iad na teicneolaíochtaí a mheastar na teicneolaíochtaí sin atá in ann nascacht ghigighiotáin a sholáthar faoi láthair, is iad sin Snáithín chomh fada leis an Áitreabh agus Cábla DOCSIS (4) 3.1 (5). Déanfar faireachán ar leithligh ar an bhforbairt ar chumhdach an tsnáithín chomh fada leis an áitreabh agus cuirfear san áireamh í nuair a bheidh sonraí cumhdaigh VHCN á léirmhíniú.

(4)

Cumhdach 5G, arna thomhas mar chéatadán na limistéar a bhfuil daonra iontu a chumhdaítear le líonra 5G amháin ar a laghad gan beann ar an mbanda speictrim a úsáidtear.

(5)

Leathsheoltóirí, arna dtomhas mar luach arna ghiniúint i dtéarmaí ioncaim, le gníomhaíochtaí leathsheoltóra san Aontas, ag gach céim den slabhra luacha, i ndáil leis an luach margaidh domhanda. Don chéad bhliain, déanfar tuairisciú ar bhonn na ngníomhaíochtaí sin san Eoraip.

(6)

Imeallnóid, arna dtomhas mar an líon nód ríofa a sholáthraíonn agaí folaigh faoi bhun 20 milleasoicind; amhail freastalaí aonair nó sraith eile d’acmhainní ríomhaireachta nasctha, a oibrítear mar chuid de bhonneagar imeall-ríomhaireachta, arb iondúil é a bheith laistigh d’imeallionad sonraí atá ag feidhmiú ar imeall an bhonneagair, agus atá níos gaire go fisiciúil, dá bhrí sin, do na húsáideoirí beartaithe ná mar atá néalnód i lárionad sonraí láraithe.

(7)

Ríomhaireacht chandamach arna tomhas mar líon na ríomhairí candamacha oibríochtúla nó líon na n-ionsamhlóirí candamacha, lena n-áirítear luasairí sár-ríomhairí Ríomhaireachta Ardfheidhmíochta, a chuirtear in úsáid agus a bhfuil rochtain ag na pobail úsáideoirí orthu.

(8)

Néalríomhaireacht, arna tomhas mar chéatadán de na fiontair a úsáideann ceann amháin ar a laghad de na seirbhísí néalríomhaireachta seo a leanas: feidhmchláir bogearraí airgeadais nó cuntasaíochta, feidhmchláir bogearraí maidir le pleanáil acmhainní fiontraíochta (PAF), feidhmchláir bogearraí maidir le bainistíocht caidreamh custaiméirí (CRM), feidhmchláir bogearraí slándála, bunachar/bunachair sonraí an fhiontair a óstáil, agus ardán ríomhaireachta a chuireann timpeallacht óstáilte ar fáil d’fhorbairt, tástáil nó cur in úsáid feidhmchlár (6).

(9)

Mórshonraí, arna dtomhas mar chéatadán na bhfiontar a dhéanann anailís ar mhórshonraí ó aon fhoinse sonraí (inmheánach nó seachtrach) (7). Amhail ó thuarascáil 2024, déanfar mórshonraí a thomhas de réir chéatadán na bhfiontar a dhéanann anailísíocht sonraí (go hinmheánach nó go seachtrach).

(10)

Intleacht shaorga, arna tomhas mar chéatadán de na fiontair a úsáideann teicneolaíocht intleachta saorga amháin ar a laghad (8).

(11)

FBManna ag a bhfuil bunleibhéal déine digití ar a laghad, arna thomhas mar chéatadán de na FBManna a úsáideann 4 as 12 theicneolaíocht dhigiteacha roghnaithe ar a laghad (9).

(12)

Aonbheannaigh, arna dtomhas mar shuim na n-aonbheannach dá dtagraítear in Airteagal 2, pointe (11)(a), de Chinneadh (AE) 2022/2481 agus iad siúd dá dtagraítear in Airteagal 2, pointe (11)(b), den Chinneadh sin.

(13)

Soláthar seirbhísí poiblí tábhachtacha ar líne do shaoránaigh, arna thomhas mar an sciar de na céimeanna riaracháin is féidir a dhéanamh go hiomlán ar líne le haghaidh mórimeachtaí saoil. Cuirtear na mórimeachtaí saoil seo a leanas san áireamh: aistriú tí; iompar; nós imeachta um éilimh bheaga a thionscnamh; cúrsaí teaghlaigh; gairm; staidéar; sláinte.

(14)

Soláthar seirbhísí poiblí tábhachtacha ar líne do ghnólachtaí, arna thomhas mar an sciar de na céimeanna riaracháin is gá chun gnó a thosú agus oibríochtaí gnó rialta a dhéanamh, ar féidir iad a dhéanamh go hiomlán ar líne.

(15)

Rochtain ar ríomhthaifid sláinte, arna dtomhas mar seo a leanas: (i) seirbhísí rochtana ar líne a bheith ar fáil ar fud na tíre do shaoránaigh ar a sonraí ríomhthaifead sláinte (trí thairseach othar, nó aip mhóibíleach othar) agus bearta breise a bheith i bhfeidhm a chuireann ar chumas catagóirí áirithe daoine (e.g. caomhnóirí do leanaí, daoine faoi mhíchumas, daoine scothaosta) rochtain a fháil ar a sonraí freisin, agus (ii) an céatadán daoine atá in ann a sraith íosta sonraí sláinte féin, atá stóráilte faoi láthair i gcórais phoiblí agus phríobháideacha ríomhthaifead sláinte, a fháil nó a úsáid.

(16)

Rochtain ar ríomh-shainaitheantas arna thomhas le dhá KPI: (1) mar líon na mBallstát a thug fógra maidir le scéim náisiúnta ríomh-shainaitheantais amháin ar a laghad i gcomhréir le Rialachán (AE) Uimh. 910/2014 agus (2) mar líon na mBallstát a bhfuil rochtain tugtha acu ar ríomh-shainaitheantas slán lena gcuirtear feabhas ar an bpríobháideachas trí Thiachóg na Céannachta Digití Eorpaí i gcomhréir leis an Togra le haghaidh Rialachán ó Pharlaimint na hEorpa agus ón gComhairle lena leasaítear Rialachán (AE) Uimh. 910/2014 a mhéid a bhaineann le creat a bhunú le haghaidh na Céannachta Digití Eorpaí (10).