(1)

An Comhaontú idir an Comhphobal Eorpach do Fhuinneamh Adamhach agus Stáit Aontaithe Mheiriceá maidir leis an gcomhar i ndáil le húsáid shíochánta an fhuinnimh núicléach, síníodh é sa Bhruiséil an 7 Samhain 1995 agus tháinig sé i bhfeidhm an 12 Aibreán 1996 (an Comhaontú).

(2)

Tá sé beartaithe go comhpháirteach ag Studiecentrum voor Kernenergie — Centre d’Étude de l’Énergie Nucléaire (SCK.CEN) agus an Institut National des Radioéléments (IRE) suiteáil a chur ar bun chun athchúrsáil a dhéanamh ar na hiarmhair ard-radaighníomhacha a eascraíonn as táirgeadh iseatóp radaighníomhach chun críoch míochaine d’fhonn bainistiú inbhuanaithe fadtéarmach na n-iarmhar sin a áirithiú agus d’fhonn tacú le soláthar slán leanúnach iseatóp radaighníomhach chun críoch míochaine. Substaint ardíonachta a bheidh oiriúnach lena hathúsáid, sin a bheidh in aschur na suiteála. Tá sé beartaithe tús a chur le tógáil na suiteála seo in 2020, ar suiteáil í ar a dtabharfar RECUMO, agus cuirfear tús leis an oibríocht in 2023. Is é SCK.CEN a bheidh á hoibriú, ar a shuíomh in Mol na Beilge.

(3)

Leis an gcinneadh uaidh an 21 Feabhra 2020 (3), dheonaigh an Coimisiún a fhormheas maidir leis na teicnící a bheidh le húsáid sa tsaoráid RECUMO le haghaidh na próiseála ceimicí a bhfuil tuairisc uirthi sna hairíonna teicniúla bunúsacha a chuir SCK.CEN isteach ag céim deartha choincheapúil an tionscadail.

(4)

Is de thionscnamh SAM iad na hábhair ionradaithe a phróiseálfar sa tsaoráid RECUMO, agus dá bhrí sin tá siad faoi réir an Chomhaontaithe. Go háirithe, le hAirteagal 8(2) den Chomhaontú ceanglaítear nach bhféadfar na hábhair ionradaithe sin a phróiseáil ach amháin sna saoráidí atá mar chuid den chlár núicléach síochánta arna leagan amach ag Euratom a bhfuil tuairisc orthu in Iarscríbhinn A a ghabhann leis an gcomhaontú céanna. I ndáil leis sin, ba cheart an tsaoráid RECUMO a chur leis an liosta saoráidí in Iarscríbhinn A.

(5)

An nós imeachta chun Iarscríbhinn A a athrú, leagtar amach é i míreanna 6 agus 7(A) de na Miontuairiscí Comhaontaithe a ghabhann leis an gComhaontú. Go háirithe, tá gá le fógra i scríbhinn agus admháil i scríbhinn ó na húdaráis iomchuí chun athruithe a dhéanamh ar na cláir núicléacha shíochánta a shainítear in Iarscríbhinn A.

(6)

Dá bhrí sin, maidir le fógra faoi shaoráid nua a chur isteach i gcomhréir le mír 7 (A) de na Miontuairiscí Comhaontaithe a ghabhann leis an gComhaontú, ba cheart an fógra sin a fhormheas lena tharchur chuig Roinn Stáit na Stát Aontaithe.

(7)

Ina theannta sin, ba cheart dhá shaoráid núicléacha dhíchoimisiúnaithe a scriosadh ón gclár núicléach síochánta arna leagan amach ag Euratom agus ba cheart fógra a thabhairt ina leith i gcomhréir le mír 7 (C) de na Miontuairiscí Comhaontaithe a ghabhann leis an gComhaontú.