(1)

Le Rialachán (AE) 2015/1588 (2) ón gComhairle tugtar de chumhacht don Choimisiún a dhearbhú trí bhíthin rialachán go bhfuil catagóirí áirithe cabhrach ar leith maidir le gnóthais a oibríonn in earnálacha éagsúla, amhail cabhair i bhfabhar chosaint an chomhshaoil, comhoiriúnach leis an margadh inmheánach agus nach bhfuil siad faoi réir na gceanglas maidir le fógra a thabhairt atá in Airteagal 108(3) den Chonradh (“na ceanglais maidir le fógra a thabhairt”). Mar sin féin, ní chumhdaítear le Rialachán (AE) 2015/1588, i measc nithe eile, cabhair chun tacú le hiompar ar iarnród agus iompar ar uiscebhealaí intíre ná iompar ilmhódach mar a shainmhínítear i Rialachán (AE) Uimh. 1315/2013 ó Pharlaimint na hEorpa agus ón gComhairle (3). Tá na hearnálacha sin tar éis éirí níos ábhartha ar leibhéal an Aontais, i gcomhthéacs an Chomhaontaithe Ghlais don Eoraip, agus an Straitéis um an tSoghluaisteacht Inbhuanaithe agus Chliste arna leagan amach ag an gCoimisiún sna teachtaireachtaí uaidh, faoi seach, an 11 Nollaig 2019 agus an 9 Nollaig 2020.

(2)

De réir Airteagal 93 den Chonradh, meastar go bhfuil cabhair maidir le hiompar ar iarnród, iompar ar uiscebhealaí intíre agus iompar ilmhódach ag luí leis na Conarthaí, má chomhlíontar na riachtanais maidir le comhordú an iompair nó más cabhair nó más ionann í agus aisíocaíocht as comhlíonadh oibleagáidí áirithe is gné dhílis de choincheap na seirbhíse poiblí.

(3)

Tá an Coimisiún tar éis Airteagal 93, Airteagal 107(1) agus Airteagal 108 den Chonradh a chur i bhfeidhm san iliomad cinntí maidir le catagóirí áirithe Státchabhrach do ghnóthais atá gníomhach in earnálacha an iompair ar iarnród, an iompair ar uiscebhealaí intíre agus an iompair idirmhódúil, agus tá treoirlínte forbartha aige chun catagóirí státchabhrach áirithe a mheas, catagóirí a mheastar go gcomhlíonann siad na riachtanais maidir le comhordú an iompair. De réir thaithí an Choimisiúin, ní bheidh aon saobhadh suntasach ar an iomaíocht mar thoradh ar chabhair den sórt sin, ar choinníoll go ndeonaítear í bunaithe ar nósanna imeachta oscailte, trédhearcacha agus neamh-idirdhealaitheacha, agus gur féidir coinníollacha soiléire comhoiriúnachta a bhunú ar bhonn na taithí atá ann.

(4)

Dá bhrí sin, d’fhonn an riarachán a shimpliú i gcásanna ina bhfuil saobhadh ar an iomaíocht chomh teoranta agus is féidir, ba cheart cumhacht a thabhairt don Choimisiún, maidir le cabhair le haghaidh iompar a chomhordú nó aisíocaíocht as comhlíonadh oibleagáidí áirithe is gné dhílis de choincheap na seirbhíse poiblí dá dtagraítear in Airteagal 93 den Chonradh, chun a dhearbhú trí bhíthin rialachán go bhfuil an chabhair sin comhoiriúnach leis an margadh inmheánach agus nach bhfuil sí faoi réir na gceanglas maidir le fógra a thabhairt.

(5)

Státchabhair arb é atá inti aisíocaíocht as comhlíonadh oibleagáidí áirithe maidir le seirbhísí iompair phoiblí, cumhdaítear í cheana le Rialachán (CE) Uimh. 1370/2007 ó Pharlaimint na hEorpa agus ón gComhairle (4), lena n-áirítear i gcás ina gcinnfidh na Ballstáit an Rialachán sin a chur i bhfeidhm maidir le hiompar poiblí do phaisinéirí ar uiscebhealaí intíre agus ar uiscí farraige náisiúnta. Dá bhrí sin, ba cheart cúiteamh as seirbhís phoiblí a bhaineann le hiompar poiblí do phaisinéirí a eisiamh ó raon feidhme an Rialacháin seo.

(6)

Agus rialacháin á nglacadh aige lena ndíolmhaítear catagóirí áirithe cabhrach nach bhfuil faoi réir ceanglais maidir le fógra a thabhairt de bhun an Rialacháin seo, ba cheart don Choimisiún cuspóir na cabhrach an méid seo a leanas a shonrú: catagóirí na dtairbhithe; tairseacha lena dteorannaítear an chabhair; na coinníollacha lena rialaítear carnadh na cabhrach agus na coinníollacha faireacháin, agus ba cheart dó coinníollacha mionsonraithe breise a leagan síos chun a áirithiú go mbeidh an chabhair a chumhdaítear leis an Rialachán seo comhoiriúnach leis an margadh inmheánach.

(7)

Tá sé tábhachtach go mbeadh gach páirtí in ann a sheiceáil cibé acu a dheonaítear nó nach ndeonaítear cabhair i gcomhréir leis na rialacha is infheidhme. Dá bharr sin, tá trédhearcacht na Státchabhrach riachtanach chun rialacha an Chonartha a chur i bhfeidhm i gceart agus eascraíonn comhlíonadh níos fearr, cuntasacht níos fearr, athbhreithniú piaraí agus caiteachais phoiblí níos éifeachtúla as an trédhearcacht sin. Chuige sin, ba cheart ceangal ar gach Ballstát achoimrí faisnéise a sholáthair maidir le cabhair atá curtha chun feidhme aige agus atá clúdaithe le rialachán arna ghlacadh de bhun an Rialacháin seo. Chun trédhearcacht na mbeart a ghlacann gach Ballstát a áirithiú, ba cheart don Choimisiún na hachoimrí sin a fhoilsiú.

(8)

De bhun Airteagal 108(1) den Chonradh, déanfaidh an Coimisiún athbhreithniú leanúnach ar na córais cabhrach uile atá ann, i gcomhar le Ballstáit. Chun na críche sin agus chun an leibhéal trédhearcachta is mó is féidir agus rialú leordhóthanach a áirithiú, ba cheart do gach Ballstát cur i bhfeidhm na rialachán arna nglacadh de bhun an Rialacháin seo a thaifeadadh agus a thiomsú. Uair sa bhliain ar a laghad, ba cheart do gach Ballstát tuarascáil ar chur i bhfeidhm rialachán den sórt sin a sholáthair don Choimisiún. Ba cheart don Choimisiún na tuarascálacha sin a chur ar fáil do na Ballstát eile uile.

(9)

Sula nglacann an Coimisiún rialacháin de bhun an Rialacháin seo, ba cheart dó a chur ar chumas do gach duine agus gach eagraíocht leasmhar a gcuid barúlacha a chur isteach chun aiseolas a bhailiú atá chomh cuimsitheach agus chomh hionadaíoch agus is féidir. Chun na críche sin, ba cheart dó dréachtaí de rialacháin den sórt sin a fhoilsiú.

(10)

Ba cheart dul i gcomhairle leis an gCoiste Comhairleach um Státchabhair, arna bhunú le Rialachán (AE) 2015/1588, tráth a fhoilseofar dréachtrialachán de bhun an Rialacháin seo. Mar sin féin, ar mhaithe le trédhearcacht, ba cheart an dréachtrialachán sin a phoibliú ar shuíomh gréasáin an Choimisiúin freisin.

(11)

Baineann rialú ar dheonú cabhrach le saincheisteanna fíorasacha, dlí agus eacnamaíocha an-chasta lena mbaineann an-éagsúlacht i dtimpeallacht lena mbaineann síorathrú. Dá bhrí sin, ba cheart don Choimisiún athbhreithniú rialta a dhéanamh ar na catagóirí cabhrach nár cheart a bheith faoi réir na gceanglas maidir le fógra a thabhairt. Chuige sin, ba cheart dó tuarascáil mheastóireachta maidir le cur i bhfeidhm an Rialacháin seo a chur faoi bhráid Pharlaimint na hEorpa agus na Comhairle gach 5 bliana,