(1)

Tar éis cogadh foghach gan chúis gan údar na Rúise i gcoinne na hÚcráine, tá an tAontas ag tacú leis an Úcráin le sraith beart airgeadais. Cuireadh an tacaíocht ar fáil ar bhonn ad hoc ar feadh tréimhse theoranta ama agus bhí gá le soláthar suntasach ó bhuiséad an Aontais agus ó ráthaíochtaí na mBallstát.

(2)

Beidh cúnamh leanúnach de dhíth ar an Úcráin chun feidhmiú an Stáit a chothú. In éineacht le comhpháirtithe idirnáisiúnta eile, meastar go rannchuideoidh an tAontas chun riachtanais phráinneacha chistiúcháin na hÚcráine a chumhdach. Chuige sin, tá ionstraim nua bunaithe ag an Aontas faoi Rialachán (AE) 2022/2463 ó Pharlaimint na hEorpa agus ón gComhairle (2). Faoin ionstraim sin, tá cuid shuntasach den chúnamh airgeadais atá beartaithe le soláthar i bhfoirm iasachtaí.

(3)

I gcomhthéacs na héagobhsaíochta seachtraí méadaithe, is iomchuí foráil a dhéanamh maidir le réiteach maoinithe struchtúrtha do na blianta 2023 agus 2024 chun tacaíocht airgeadais leanúnach don Úcráin a áirithiú.

(4)

Is iomchuí, dá bhrí sin, a chur ar chumas an Aontais na hacmhainní buiséadacha is gá a chur ar fáil ar bhealach fónta inbhuanaithe. Ba cheart é sin a dhéanamh trí shíneadh a chur leis an sásra atá ann cheana i bhfoirm ráthaíocht bhuiséadach ón Aontas chun an cúnamh airgeadais a chuirtear ar fáil don Úcráin sna blianta 2023 agus 2024 a chumhdach. Leis an sásra sin, ba cheart go bhféadfaí suas le 100 % de mhéideanna an dliteanais airgeadais is gá a shlógadh chun oibleagáidí aisíocaíochta an Aontais faoi oibríochtaí trína bhfaightear agus trína dtugtar iasachtaí a chomhlíonadh i gcás nach bhfaighidh an tAontas an íocaíocht chuí in am ón Úcráin.

(5)

Ba cheart a bheith in ann na leithreasuithe is gá i mbuiséad an Aontais a shlógadh de bhreis ar uasteorainneacha an chreata airgeadais ilbhliantúil do na Ballstáit, agus le haghaidh cúnamh airgeadais don Úcráin atá ar fáil do na blianta 2023 agus 2024. Ba cheart an fhéidearthacht sin a bheith gan dochar don oibleagáid uasteorainn na n-acmhainní dílse a leagtar síos in Airteagal 3(1) de Chinneadh (AE, Euratom) 2020/2053 ón gComhairle a urramú (3).

(6)

I bprionsabal, agus mura dtiocfaidh tuilleadh forbairtí eisceachtúla chun cinn, leis an ráthaíocht bhuiséadach sin ón Aontas ba cheart go gcumhdófaí faoiseamh airgeadais gearrthéarmach don Úcráin le haghaidh méid suas le EUR 18 000 000 000 mar a shonraítear i Rialachán (AE) 2022/2463 agus ba cheart úsáid an chúnaimh mhacra-airgeadais le linn 2024 a theorannú d’eisíocaíochtaí sa chéad ráithe den bhliain sin mar a shonraítear sa Rialachán sin.

(7)

Níor cheart feidhm a bheith ag an Rialachán seo ach amháin maidir le cláir um chúnamh airgeadais don Úcráin atá ar fáil do na blianta 2023 agus 2024.

(8)

Dá bhrí sin, ba cheart Rialachán (AE, Euratom) 2020/2093 (4) ón gComhairle a leasú dá réir sin.

(9)

I bhfianaise na práinne a bhaineann leis na himthosca eisceachtúla atá ann mar thoradh ar chogadh foghach gan chúis gan údar na Rúise i gcoinne na hÚcráine, maidir leis an eisceacht ar an tréimhse 8 seachtaine dá dtagraítear in Airteagal 4 de Phrótacal Uimh. 1 maidir le ról na bParlaimintí náisiúnta san Aontas Eorpach, atá i gceangal leis an gConradh ar an Aontas Eorpach, leis an gConradh ar Fheidhmiú an Aontais Eorpaigh agus leis an gConradh ag bunú an Chomhphobail Eorpaigh do Fhuinneamh Adamhach, meastar gurb iomchuí í a agairt.

(10)

I bhfianaise na staide san Úcráin, ba cheart an Rialachán seo a theacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,