(1)

Le hAirteagal 10 de Rialachán Tarmligthe (AE) 2018/389 (2) ón gCoimisiún déantar foráil maidir le díolúine ón gceanglas a leagtar síos in Airteagal 97 de Threoir (AE) 2015/2366 fíordheimhniú láidir custaiméara a chur i bhfeidhm i gcás ina bhfuil rochtain á fáil ag úsáideoir seirbhísí íocaíochta ar iarmhéid cuntais agus ar idirbhearta cuntais íocaíochta a rinneadh le déanaí gan sonraí íocaíochta íogaire a nochtadh. Sa chás sin, ní cheadaítear do sholáthraithe seirbhísí íocaíochta fíordheimhniú láidir custaiméara a chur i bhfeidhm maidir le rochtain a fháil ar fhaisnéis faoin gcuntas, ar choinníoll go cuireadh fíordheimhniú láidir custaiméara i bhfeidhm nuair a fuarthas rochtain ar fhaisnéis faoin gcuntas den chéad uair, agus ar a laghad gach 90 lá ina dhiaidh sin.

(2)

Úsáid na díolúine sin ba chúis le cleachtais an-éagsúla i dtaca le cur i bhfeidhm Rialachán Tarmligthe (AE) 2018/389, ar cásanna iad ina n-iarrann roinnt soláthraithe seirbhísí íocaíochta is riarthóirí cuntas fíordheimhniú láidir custaiméara gach 90 lá, iarann soláthraithe eile an fíordheimhniú níos minice ná sin, agus níl an díolúine curtha i bhfeidhm ag roinnt soláthraithe eile, soláthraithe a iarann na fíordheimhniú láidir custaiméara le haghaidh gach rochtain ar chuntas. Tá an díolúine ina húdar achrainn neamh-inmhianaithe ó thaobh eispearas custaiméirí de aon uair a úsáideann siad seirbhísí faisnéise seirbhísí faisnéise cuntas agus tá drochthionchar ar sheirbhísí na soláthraithe seirbhísí faisnéise cuntas dá deasca freisin.

(3)

Chun cothromaíocht a áirithiú idir cuspóirí Threoir (AE) 2015/2366 maidir le slándáil a fheabhsú, nuálaíocht a éascú agus iomaíocht sa mhargadh inmheánach a fheabhsú, is gá cur i bhfeidhm na díolúine a leagtar amach in Airteagal 10 de Rialachán Tarmligthe (AE) 2018/389 a shonrú tuilleadh, le haghaidh cásanna ina bhfaightear rochtain ar an fhaisnéis faoin gcuntas trí sholáthraí seirbhísí faisnéise cuntas. Dá réir sin, i gcás mar sin, níor cheart soláthraithe seirbhísí íocaíochta a cheadú rogha a dhéanamh cé acu a chuirfidh siad fíordheimhniú láidir custaiméara i bhfeidhm nó nach gcuirfidh, agus ba cheart an díolúine a bheith sainordaitheach, faoi réir coinníollacha arb é is aidhm dóibh a áirithiú go mbaintear amach sábháilteacht agus slándáil shonraí na n-úsáideoirí seirbhísí íocaíochta.

(4)

Ba cheart an díolúine a theorannú do rochtain ar iarmhéid cuntais agus d’idirbhearta cuntais a rinneadh le déanaí gan sonraí íocaíochta íogaire a nochtadh. Níor cheart feidhm a bheith ag an díolúine ach amháin i gcás inar chuir soláthraithe seirbhísí íocaíochta fíordheimhniú láidir custaiméara i bhfeidhm cheana féin le haghaidh na chéad rochtana tríd an soláthraí seirbhísí faisnéise cuntas ábhartha agus ba cheart an díolúine a athnuachan ar bhonn tréimhsiúil.

(5)

Chun sábháilteacht agus slándáil shonraí na n-úsáideoirí seirbhísí íocaíochta a áirithiú, ba cheart go mbeadh soláthraithe seirbhísí íocaíochta in ann, tráth ar bith, fíordheimhniú láidir custaiméara a chur i bhfeidhm i gcás ina bhfuil cúiseanna acu a bhfuil bonn cirt oibiachtúil leo agus a bhfuil fianaise chuí ag gabháil leo a bhaineann le rochtain neamhúdaraithe nó chalaoiseach. Feadfaidh sé sin a bheith amhlaidh i gcás ina mbraitear riosca méadaithe rochtana neamhúdaraithe nó calaoisí le sásraí faireacháin ar idirbhearta de chuid an tsoláthraí seirbhísí íocaíochta is riarthóir cuntas. Chun cur i bhfeidhm comhsheasmhach na díolúine a áirithiú, i gcásanna mar sin, ba cheart do sholáthraithe seirbhísí íocaíochta is riarthóirí na cúiseanna a bhaineann le fíordheimhniú láidir custaiméara a chur i bhfeidhm a thaifeadadh agus údar cuí a thabhairt i leith na gcúiseann sin agus iad a chur in iúl dá n-údarás inniúil náisiúnta arna iarraidh sin dó.

(6)

I gcás ina bhfaigheann an t-úsáideoir seirbhísí íocaíochta rochtain dhíreach ar fhaisnéis faoin gcuntas, ba cheart do sholáthraithe seirbhísí íocaíochta a bheith in ann fós rogha a dhéanamh cé acu a chuirfidh siad fíordheimhniú láidir custaiméara i bhfeidhm nó nach gcuirfidh. Is é is cúis leis sin nár tugadh saincheisteanna ar leith faoi deara lena gceanglaítear leasú ar an díolúine a leagtar síos in Airteagal 10 de Rialachán Tarmligthe (AE) 2018/389 sna cásanna sin, murab ionann agus cás na rochtana trí sholáthraí seirbhísí faisnéise cuntas.

(7)

Chun cothrom iomaíochta a áirithiú idir na soláthraithe seirbhísí íocaíochta ar fad, agus i gcomhréir le cuspóirí Threoir (AE) 2015/2366 maidir le forbairt seirbhísí soláimhsithe nuálacha a éascú, tá sé comhréireach an amlíne chéanna 180 lá a bhunú le haghaidh athnuachan fíordheimhnithe láidir custaiméara chun rochtain dhíreach a fháil ar fhaisnéis na gcuntas leis an soláthraí seirbhísí íocaíochta is riarthóir cuntas agus trí sholáthraí seirbhísí faisnéise cuntas araon. Dá n-athnuafaí fíordheimhniú láidir custaiméara ag an minicíocht reatha, d’fhéadfadh sé achrann neamh-inmhianaithe a chruthú ó thaobh eispearas custaiméirí de agus d’fhéadfadh sé cosc a chur ar sholáthraithe seirbhísí faisnéise cuntas a seirbhísí a chur ar fáil agus ar úsáideoirí na seirbhísí sin a fháil.

(8)

Soláthraithe seirbhísí íocaíochta is riarthóirí cuntas a chuireann comhéadan tiomnaithe ar fáil agus a chuir sásra teagmhais chun feidhme mar a leagtar amach in Airteagal 33(4) de Rialachán Tarmligthe (AE) 2018/389, níor cheart a cheangal ar na soláthraithe sin an díolúine shainordaitheach nua a chur chun feidhme ina gcomhéadain dhíreacha custaiméirí chun críoch an tsásra teagmhais, ar choinníoll nach gcuireann siad an díolúine a leagtar síos in Airteagal 10 de Rialachán Tarmligthe (AE) 2018/389 i bhfeidhm ina gcomhéadain dhíreacha custaiméirí. Bheadh sé díréireach a cheangal ar sholáthraithe seirbhísí íocaíochta is riarthóirí cuntas a chuireann comhéadan tiomnaithe ar fáil, comhéadan ina bhfuil sé de cheangal orthu an díolúine sainordaitheach nua a chur chun feidhme, an díolúine céanna sin a chur chun feidhme ina gcomhéadain dhíreacha custaiméirí chun críoch an tsásra teagmhais.

(9)

Chun a áirithiú go bhfuil a dhóthain ama ag na soláthraithe seirbhísí íocaíochta na hathruithe is gá a dhéanamh ar na córais atá acu, ba cheart do sholáthraithe seirbhísí íocaíochta is riarthóirí cuntas na hathruithe a rinneadh ar shonraíochtaí teicniúla chomhéadain na soláthraithe seirbhísí íocaíochta a chur ar fáil do na soláthraithe seirbhísí íocaíochta chun an Rialachán seo a chomhlíonadh tráth nach déanaí ná 2 mhí sula gcuirfear na hathruithe sin chun feidhme.

(10)

Ba cheart, dá bhrí sin, Rialachán Tarmligthe (AE) 2018/389 a leasú dá réir sin.

(11)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Baincéireachta Eorpach faoi bhráid an Choimisiúin.

(12)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo ann agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (3).

(13)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé barúlacha foirmiúla an 7 Meitheamh 2022.

(14)

Chun aistriú rianúil chuig na ceanglais nua a leagtar amach sa Rialachán seo a áirithiú, na soláthraithe seirbhísí íocaíochta a chuir an díolúine a leagtar síos in Airteagal 10 de Rialachán Tarmligthe (AE) 2018/389 i bhfeidhm roimh dháta chur i bhfeidhm an Rialacháin seo, ba cheart na soláthraithe sin a cheadú leanúint de bheith ag cur na díolúine sin i bhfeidhm suas le 90 lá ón uair dheireanach a cuireadh fíordheimhniú láidir custaiméara i bhfeidhm,