(1)

Is éard a bhunaítear le Rialachán Cur Chun Feidhme (AE) 2018/2019 ón gCoimisiún (2), ar bhonn réamh-mheasúnú riosca, liosta plandaí, táirgí plandaí agus réad eile a mbaineann ardriosca leo.

(2)

Le Rialachán Cur Chun Feidhme (AE) 2018/2018 ón gCoimisiún (3) leagtar síos rialacha sonracha maidir leis an nós imeachta atá le leanúint chun an measúnú riosca dá dtagraítear in Airteagal 42(4) de Rialachán (AE) 2016/2031 a dhéanamh ar na plandaí, táirgí plandaí agus réada eile a mbaineann ardriosca leo.

(3)

Tar éis réamh-mheasúnú a dhéanamh, áiríodh 34 ghéineas agus speiceas amháin de phlandaí le haghaidh plandú, de thionscnamh gach ceann de na tríú tíortha, san Iarscríbhinn a ghabhann le Rialachán Cur Chun Feidhme (AE) 2018/2019 mar phlandaí a mbaineann ardriosca leo. Áirítear san Iarscríbhinn sin an géineas Jasminum L.

(4)

Déantar foráil i Rialachán Cur Chun Feidhme (AE) 2020/1213 ón gCoimisiún (4) maidir le liosta na bplandaí, na dtáirgí plandaí nó na réad eile, a baineadh den Iarscríbhinn a ghabhann le Rialachán Cur Chun Feidhme (AE) 2018/2019 agus nach féidir a thabhairt isteach nó a aistriú laistigh de chríoch an Aontais ach amháin má chomhlíontar ceanglais speisialta.

(5)

An 4 Nollaig 2019, chuir Uganda iarratas faoi bhráid an Choimisiúin maidir le gearrthóga neamhfhréamhaithe de Jasminum polynathum Franchet a onnmhairiú chuig an Aontas. Cuireadh an sainchomhad teicniúil ábhartha isteach leis an iarraidh sin.

(6)

An 31 Márta 2022, ghlac an tÚdarás Eorpach um Shábháilteacht Bia (“an tÚdarás”) tuairim eolaíoch maidir leis an measúnú riosca tráchtearraí ar ghearrthóga neamhfhréamhaithe de Jasminum polyanthum Franchet ó Uganda (5). Shainaithin an tÚdarás Bemisia tabaci (pobail neamh-AE), Coccus viridis, Diaphania indica, Pulvinaria psidii, Scirtothrips dorsalis agus Selenaspidus articulatus mar lotnaidí atá ábhartha maidir leis na plandaí sin le haghaidh plandú.

(7)

Rinne an tÚdarás meastóireacht ar na bearta maolaithe riosca a bhfuil tuairisc orthu sa sainchomhad i dtaca le Bemisia tabaci (pobail neamh-AE), Coccus viridis, Diaphania indica, Pulvinaria psidii, Scirtothrips dorsalis agus Selenaspidus articulatus agus rinne sé meastachán ar an dóchúlacht atá ann go mbeadh an tráchtearra sin saor ó na lotnaidí sin.

(8)

Ar bhonn na tuairime sin, meastar go bhfuil an riosca fíteashláintíochta ó thabhairt isteach i gcríoch an Aontais laghdaithe go leibhéal inghlactha i dtaca le gearrthóga neamhfhréamhaithe de Jasminum polyanthum Franchet, de thionscnamh Uganda, ar choinníoll go gcuirtear i bhfeidhm bearta maolaithe iomchuí chun aghaidh a thabhairt ar an riosca lotnaidí a bhaineann leis na plandaí sin le haghaidh plandú. Dá thoradh sin, níor cheart gearrthóga neamhfhréamhaithe de Jasminum polyanthum Franchet de thionscnamh Uganda a mheas a thuilleadh mar phlandaí a mbaineann ardriosca leo.

(9)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2018/2019 a leasú dá réir.

(10)

Meastar gur leor na bearta a bhfuil tuairisc orthu tugtha ag Uganda sa sainchomhad chun an riosca ó thabhairt isteach an tráchtearra i gcríoch an Aontais a laghdú go leibhéal inghlactha. Dá bhrí sin, ba cheart na bearta sin a glacadh mar cheanglais allmhairiúcháin fíteashláintíochta chun cosaint fíteashláintíochta chríoch an Aontais ar thabhairt isteach an tráchtearra sin inti a áirithiú.

(11)

Liostaítear Bemisia tabaci (pobail neamh-AE) agus Scirtothrips dorsalis mar lotnaidí coraintín de chuid an Aontais in Iarscríbhinn II a ghabhann le Rialachán Cur Chun Feidhme (AE) 2019/2072 ón gCoimisiún (6). Níl Coccus viridis, Pulvinaria psidii ná Selenaspidus articulatus san áireamh go fóill i liosta na lotnaidí coraintín de chuid an Aontais, ach d’fhéadfadh na lotnaidí sin na coinníollacha a chomhlíonadh le bheith san áireamh nuair a bheidh measúnú riosca iomlán déanta.

(12)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2020/1213 a leasú dá réir.

(13)

Tugtar le fios i dtuairim an Údaráis nach bhfuil aon taifead ar fáil go dtí seo ar Diaphania indica lena mbaineann Jasminum polyanthum Franchet mar óstach. Ar an gcúis sin, ní gá aon cheanglas allmhairiúcháin maidir leis an lotnaid sin.

(14)

Le Rialachán Cur Chun Feidhme (AE) 2021/419 (7) leasaíodh Rialachán Cur Chun Feidhme (AE) 2018/2019 trína shonrú go bhfuil toirmeasc ar phlandaí Jasminum L. le haghaidh plandú, seachas gearrthóga neamhfhréamhaithe de phlandaí Jasminum polyanthum Franchet le haghaidh plandú de thionscnamh Iosrael, a thabhairt isteach san Aontas. Leasaíodh an Iarscríbhinn a ghabhann le Rialachán Cur Chun Feidhme (AE) 2020/1213 chun na ceanglais allmhairiúcháin fíteashláintíochta is gá chun a áirithiú go bhfuil an riosca ó thabhairt isteach na bplandaí sin le haghaidh plandú san Aontas ó Iosrael inghlactha. Áiríodh go hearráideach sna ceanglais fíteashláintíochta sin bearta maidir le lotnaid choraintín de chuid an Aontais, is é sin Scirtothrips dorsalis. Ós rud é, de bhun Airteagal 5(1) de Rialachán (AE) 2016/2031, go bhfuil toirmeasc ar lotnaidí coraintín de chuid an Aontais a thabhairt isteach, a choinneáil inti, a iolrú nó a scaoileadh i gcríoch an Aontais, mar aon lena ngluaiseacht laistigh di, níor ghá aon bheart maidir le Scirtothrips dorsalis a áireamh san Iarscríbhinn a ghabhann le Rialachán Cur Chun Feidhme (AE) 2020/1213.

(15)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2020/1213 a cheartú dá réir.

(16)

Chun oibleagáidí an Aontais a eascraíonn as comhaontú na hEagraíochta Trádála Domhanda maidir le bearta sláintíochta agus fíteashláintíochta a chur i bhfeidhm a chomhlíonadh (8), ba cheart leanúint ar aghaidh le hallmhairiú gearrthóg neamhfhréamhaithe de Jasminum polyanthum Franchet ó Uganda a luaithe is féidir. Dá bhrí sin, ba cheart don Rialachán seo teacht i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh.

(17)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,