(1)

An cinneadh chun fíneáil riaracháin a ghearradh ar oibreoir eacnamaíoch ar mhaithe le tacú le bearta ceartaitheacha agus sriantacha i gcomhréir le hAirteagal 85 de Rialachán (AE) 2018/858, ba cheart don Choimisiún é sin a dhéanamh mar thoradh ar chomhairliúcháin leis na Ballstáit lena mbaineann agus leis an oibreoir eacnamaíoch ábhartha nó na hoibreoirí eacnamaíocha ábhartha faoi Airteagal 53(6) de Rialachán (AE) 2018/858 agus ba cheart é sin a léiriú sa chinneadh chun bearta ceartaitheacha agus sriantacha a fhorchur.

(2)

Is gá céimeanna áirithe nós imeachta a leagan síos nuair atá sé ar intinn ag an gCoimisiún fíneálacha riaracháin a fhorchur chun tacú le bearta ceartaitheacha agus sriantacha, rud a chuirfidh leis an nós imeachta a leagtar amach in Airteagal 53(6) de Rialachán (AE) 2018/858. Tá sé tábhachtach, go háirithe, an ceart chun éisteacht a fháil agus an ceart rochtain a fháil ar an gcomhad a ráthú trí rochtain a thabhairt don oibreoir eacnamaíoch ar fhaisnéis ábhartha agus an ceart a thabhairt do a chuid barúlacha a chur isteach mar aon leis an bhfianaise is gá chun tacú leis na barúlacha sin i ndáil leis an bhfíneáil riaracháin atá beartaithe a fhorchur. Ina theannta sin, is gá rialacha a leagan amach chun cosaint iomchuí sonraí a áirithiú, sonraí a mheasann oibreoirí eacnamaíocha a bheith rúnda.

(3)

Is gá modh a leagan síos chun fíneálacha riaracháin a ríomh de réir thromchúis an neamhchomhlíonta. Ba cheart go mbeadh na hoibreoirí eacnamaíocha ar an eolas roimh ré faoin modh sin. Ba cheart fíneálacha riaracháin a bheith athchomhairleach chun oibreoirí eacnamaíocha a dhíspreagadh ó cheanglais Rialachán (AE) 2018/858 a shárú agus ba cheart na fíneálacha riaracháin sin a bheith comhréireach le tromchúis an tsáraithe. Ós rud é go bhfuil na fíneálacha riaracháin le gearradh in aghaidh na feithicle, an chórais, na comhpháirte nó an aonaid theicniúil ar leithligh, ba cheart na critéir chun an fhíneáil a ríomh a mheas dá réir sin. Ba cheart a chur san áireamh agus fíneálacha riaracháin á ríomh aon bhuntáiste eacnamaíoch míchuí a fhaightear trí fheithicil neamhchomhlíontach a dhíol nó a dháileadh, rud a d’fhéadfadh an iomaíocht a shaobhadh i leith oibreoirí eacnamaíocha eile a chloíonn leis na rialacha. Aon chaillteanas a bhaineann do thomhaltóirí, lena n-áirítear athrú a dhéanamh ar fheidhmíocht na feithicle, ar caillteanais iad a eascraíonn as neamh-chomhlíonadh, ba cheart iad a chur san áireamh freisin agus measúnú á dhéanamh ar thromchúis an tsáraithe ós rud é go bhféadfadh neamhchomhlíonadh den sórt sin dochar a dhéanamh do chosaint sláinte agus sábháilteachta tomhaltóirí a lorgaítear leis an Rialachán sin. Ina theannta sin, ba cheart méid na bhfíneálacha riaracháin a bheith comhréireach leis an líon feithiclí neamhchomhlíontacha atá cláraithe san Aontas, nó leis an líon córas, comhpháirteanna agus aonad teicniúil ar leithligh neamhchomhlíontacha atá curtha ar fáil ar mhargadh an Aontais.

(4)

Ba cheart aird chuí a thabhairt ar thromchúis agus ar éifeachtaí an tsáraithe, mar aon le haon toisc ghéaraitheach nó mhaolaitheach agus fíneálacha riaracháin á ríomh, ar cheart a mheas go ndéanann siad tairbhí an neamhchomhlíonta a dhíspreagadh agus a fhritháireamh, agus go bhfuil siad comhréireach leo. Ba cheart a áireamh le tosca géaraitheacha an tionchar ar an tsábháilteacht, ar an tsláinte agus ar an gcomhshaol ós rud é go gcinntear ardleibhéal sábháilteachta, sláinte agus cosanta comhshaoil mar chuspóir de Rialachán (AE) 2018/858. Ba cheart go gcuideofaí le baint amach na gcuspóirí sin trí scéim pionóis stóinsithe a shocrú ar leibhéal an Aontais, ar scéim í a ghníomhaíonn mar bhac trí smachtbhannaí maidir le neamhchomhlíonadh a dhéanann difear diúltach do shábháilteacht daoine atá i bhfeithiclí agus úsáideoirí eile bóthair agus do chosaint shláinte an duine agus an chomhshaoil. Maidir le méid an chomhair a dhéanann an t-oibreoir eacnamaíoch, lena n-áirítear gníomhaíochtaí ceartaitheacha arna ndéanamh ag an oibreoir eacnamaíoch, measfar gur eilimintí maolaitheacha iad agus an fhíneáil riaracháin á ríomh.

(5)

Chun íoc fíneálacha riaracháin a éascú, is gá modh a leagan síos chun iad a bhailiú. Ba cheart na fíneálacha sin a bhailiú i gcomhréir leis na rialacha maidir le fíneálacha, pionóis nó smachtbhannaí eile arna bhforchur ag institiúidí an Aontais a aisghabháil, rialacha a leagtar síos i Rialachán (AE, Euratom) 2018/1046 ó Pharlaimint na hEorpa agus ón gComhairle (2),