TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir 2009/45/CE ó Pharlaimint na hEorpa agus ón gComhairle an 6 Bealtaine 2009 maidir le rialacha agus caighdeáin sábháilteachta le haghaidh longa paisinéirí (1), agus go háirithe Airteagal 10(2) agus (3) de,

De bharr an mhéid seo a leanas:

(1)	I Rialachán Tarmligthe (AE) 2020/411 (2) ón gCoimisiún bhí earráid i Roinn 2, Caibidil II-1, Cuid B d’Iarscríbhinn I arna leasú a ghabhann le Treoir 2009/45/CE.

(2)

Le Roinn 2, Caibidil II-1, Cuid B d’Iarscríbhinn I a ghabhann le Treoir 2009/45/CE, arna leasú le Rialachán Tarmligthe (AE) 2020/411, ní eisiatar Rialachán 8.1 ó raon feidhme na coda ábhartha den Choinbhinsiún Idirnáisiúnta um Shábháilteacht Anama ar Muir, arna dhéanamh i Londain an 1 Samhain 1974 (Coinbhinsiún SOLAS 1974), arna leasú, maidir le longa paisinéirí de chatagóirí B, C agus D.

(3)

Le linn na caibidlíochta maidir le dréacht Rialachán Tarmligthe (AE) 2020/411, chomhaontaigh na saineolaithe, i ndáil leis na ceanglais maidir leis an bhFilleadh Sábháilte ar Chalafort a ionchódaítear i Rialachán 8.1 de Chaibidil II-1, Cuid B de Choinbhinsiún SOLAS 1974, nár cheart feidhm a bheith ag na ceanglais sin ar longa paisinéirí de chatagóirí B, C agus D toisc go mbeadh sé sin díréireach tar éis na cúinsí ina n-oibrítear na longa de na catagóirí sin a mheas.

(4)	Ba cheart, dá bhrí sin, Treoir 2009/45/CE a cheartú dá réir sin,

TAR ÉIS AN RIALACHÁN SEO A GHLACADH:

Airteagal 1

I Roinn 2, Caibidil II-1 d’Iarscríbhinn I a ghabhann le Treoir 2009/45/CE, cuirtear an méid seo a leanas in ionad Chuid B:

“CUID B —

Maidir leis na ceanglais sna forálacha iomchuí de Chaibidil II-1, codanna B go B-4 de SOLAS, arna leasú, cuirfidh na longa na ceanglais sin, seachas Rialachán 8-1, i bhfeidhm.”

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 11 Eanáir 2022.

Thar ceann an Choimisiúin

An tUachtarán

Ursula VON DER LEYEN

(2) Rialachán Tarmligthe (AE) 2020/411 ón gCoimisiún an 19 Samhain 2019 lena leasaítear Treoir 2009/45/CE ó Pharlaimint na hEorpa agus ón gComhairle maidir le rialacha agus caighdeáin sábháilteachta le haghaidh longa paisinéirí, a mhéid a bhaineann le longa paisinéirí i mbun turais inmheánacha (IO L 83, 19.3.2020, lch. 1).