RIALACHÁN CUR CHUN FEIDHME (AE) 2022/933 ÓN gCOIMISIÚN

an 13 Meitheamh 2022

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)	Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)	De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoi na cóid AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir an fhaisnéis sin a agairt fós, go ceann tréimhse áirithe, i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)	Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoi na cóid AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 13 Meitheamh 2022.

Thar ceann an Choimisiúin

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Custaim

(1) IO L 269, 10.10.2013, lch. 1.

(2) Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).

IARSCRÍBHINN

Tuairisc ar na hearraí

Aicmiú

(Cód AC)

Cúiseanna

(1)

(2)

(3)

Trí ítim a chóirítear le chéile lena miondíol, lena n-áirítear:

(a)

ball éadaigh cniotáilte gan mhuinchillí (veist aclaíochta mar a thugtar air) (93 % snáithíní sintéiseacha agus 7 % leaisteán) lena gcumhdaítear uachtar an choirp síos go dtí an choim. Tá V-mhuineál ar a bhrollach, agus osclaítear é go hiomlán ar a bhrollach le ceangal zip, gan aon dúnadh forluiteach. Ar bhrollach an bhaill éadaigh, tá dhá phóca brollaigh oscailte dhronuilleogacha atá tuairim is 19 cm × 8 cm agus dhá phóca cúil oscailte dhronuilleogacha atá tuairim is 12 cm × 14 cm.

Ar a chúl, tá póca amháin ag a bhfuil strapaí rubair atá ceaptha chun rudaí a chur i gceangal, mar shampla, maidí siúil infhillte.

(b)	dhá fhleascán bhoga, a bhfuil tóin réidh orthu, a bhfuil toirt 500 ml an ceann acu, ar féidir iad a chur sna pócaí brollaigh, atá déanta as polúireatán agus a bhfuil claibín plaistigh orthu a bhfuil sconna intarraingthe air.

Féach na híomhánna (*).

Is le rialacha ginearálta 1 agus 6 maidir le léirmhíniú na hAinmníochta Comhcheangailte (RLG) a chinntear an t-aicmiú.

Na trí ítim mar a chuirtear i láthair le chéile iad, is trí ítim ar leithligh iad. Ní earraí comhchodacha iad, óir ní dhéantar earra iomlán díobh i gcás ina gcuirtear le chéile iad, ar earra iomlán é sin nach gcuirfí ar díol ina chodanna ar leith de ghnáth. Ní earraí iad a chóirítear ina dtacair lena miondíol de réir bhrí RLG 3(b), óir ní chóirítear le chéile iad chun freastal ar riachtanas áirithe nó chun gníomhaíocht shonrach a dhéanamh, go háirithe toisc nach gcuirtear teorainn lena n-úsáid maidir le táirgí sonracha a iompar le haghaidh riachtanais shonracha nó gníomhaíochtaí sonracha i ngeall ar dhearadh na bpócaí. Is ítimí aonair iad na hítimí, ar féidir iad a úsáid go neamhspleách ar a chéile. Gníomhaíochtaí difriúla is ea ball éadaigh a chaitheamh agus deochanna a ól, agus ní fhreastalaíonn siad ar an riachtanas sonrach céanna (cumhdaítear uachtar an choirp leis an mball éadaigh agus úsáidtear fleascáin chun deochanna a ól).

Más rud é nach bhfreastalaíonn earra amháin de “thacar” nó níos mó ar an riachtanas áirithe céanna nó nach bhfuil sé/siad ceaptha chun an ghníomhaíocht shonrach chéanna a dhéanamh, ní mór gach earra a aicmiú ar leithligh (féach freisin Treoirlínte maidir le hearraí a chóirítear ina dtacair lena miondíol a aicmiú san Ainmníocht Chomhcheangailte, Cuid B (II) (1) (1).

Dá bhrí sin, tá na hítimí le haicmiú ar leithligh.

Na hearraí aonair dá dtagraítear sa tuairisc ar na hearraí, tá siad le haicmiú mar seo a leanas:

6110 30 99

(a)	Cinntear an t-aicmiú le Nóta 9, an dara mír, a ghabhann le Caibidil 61 agus le foclaíocht chóid AC 6110 , 6110 30 agus 6110 30 99 .

I bhfianaise a saintréithe oibiachtúla, is ball éadaigh de cheannteideal 6110 í an veist. Cumhdaítear leis an gceannteideal sin catagóir earraí cniotáilte nó cróiseáilte, atá ceaptha chun uachtar an choirp a chumhdach (geansaithe spóirt, geansaithe, cairdeagain, bástchótaí agus earraí comhchosúla) (féach freisin Nóta míniúcháin an Chórais Chomhchuibhithe a ghabhann le ceannteideal 6110 , an chéad mhír).

Tá baill éadaigh an cheannteidil sin beartaithe chun uachtar an choirp a chumhdach, bíodh muinchillí orthu nó ná bíodh, bíodh aon chineál muiníl orthu, bíodh bóna orthu nó ná bíodh, bíodh pócaí orthu nó ná bíodh. Is féidir iad a bheith déanta as aon chineál ábhair chniotáilte nó chróiseáilte, lena n-áirítear fabraicí éadroma nó fabraicí atá cniotáilte go fíneálta, nó aon snáithín teicstíle (féach freisin na nótaí Míniúcháin a ghabhann leis an Ainmníocht Chomhcheangailte a ghabhann le ceannteideal 6110 ).

Ní féidir an veist a aithint mar veist atá deartha d’fhir nó do mhná. Tá an veist le haicmiú mar gheansaí spóirt, geansaí, cairdeagan, bástchóta agus earraí comhchosúla mná nó cailín, atá cniotáilte nó cróiseáilte, atá déanta as snáithíní de dhéantús an duine.

3924 90 00

(b)	Cinntear an t-aicmiú le foclaíocht chóid AC 3924 agus 3924 90 00 .

Tá na fleascáin le haicmiú mar earraí tí eile agus mar earraí sláinteacha nó leithris, atá déanta as plaisteach.

(1) IO C 105, 11.4.2013, lch. 1.

(*) Is le faisnéis a thabhairt, agus lena aghaidh sin amháin, atá na híomhánna ann.