(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta chun an t-údarú sin a dheonú. Go háirithe, in Airteagal 10(2), i gcomhar le hAirteagal 10(7) den Rialachán sin, tá foráil maidir le nósanna imeachta sonracha i leith athmheastóireacht ar bhreiseáin a formheasadh de bhun Threoir 70/524/CEE ón gComhairle (2) agus Threoir 82/471/CEE ón gComhairle (3).

(2)

Údaraíodh hiodrocsanasól búitilithe gan teorainn ama mar bhreiseán beathaithe le haghaidh gach speicis ainmhíoch i gcomhréir le Treoir 70/524/CEE ón gComhairle. Ina dhiaidh sin cuireadh an breiseán sin i gClár na mbreiseán beathaithe mar tháirge a bhí ann cheana, i gcomhréir le hAirteagal 10(1) de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh isteach iarratas chun athmheastóireacht a dhéanamh ar hiodrocsanasól búitilithe mar bhreiseán beathaithe le haghaidh gach speicis ainmhíoch. Ina dhiaidh sin rinne an t-iarratasóir an t-iarratas a tharraingt siar maidir le cait, toisc gur an 12 Samhain 2019 (4) ghlac EFSA tuairim neamhfhabhrach maidir le sábháilteacht úsáid an bhreiseáin le haghaidh cat. Is é an toradh a bhí ar an athmheastóireacht ar hiodrocsanasól búitilithe an t-údarú ina leith mar bhreiseán beathaithe le haghaidh gach speicis ainmhíoch seachas cait, le Rialachán Cur Chun Feidhme (AE) 2020/1399 ón gCoimisiún (5).

(4)

Le hAirteagal 10(5) de Rialachán (CE) Uimh. 1831/2003, ceanglaítear go nglacfar Rialachán lena ndéantar breiseáin bheathaithe a tharraingt siar ón margadh, breiseáin nár cuireadh isteach aon iarratas ina leith i gcomhréir le hAirteagal 10(2) agus (7) den Rialachán sin roimh an sprioc-am a leagtar síos sna forálacha sin, nó ar cuireadh iarratas isteach ina leith ach ar tarraingíodh siar ina dhiaidh sin é.

(5)

Ós rud é gur tharraing an t-iarratasóir siar an t-iarratas maidir le cait, ba cheart hiodrocsanasól búitilithe (E 320) a tharraingt siar ón margadh mar bhreiseán beathaithe le haghaidh cat.

(6)

I gcomhréir le hAirteagal 7 de Rialachán (CE) Uimh. 1831/2003, cuireadh iarratas nua isteach chun údarú a fháil maidir le hiodrocsanasól búitilithe mar bhreiseán beathaithe le haghaidh cat, chun go n-aicmeofar é i gcatagóir na mbreiseán “breiseáin theicneolaíocha” agus san fheidhmghrúpa “frithocsaídeoirí”. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(7)

Chinn an tÚdarás Eorpach um Shábháilteacht Bia (“an tÚdarás”) ina thuairim an 23 Meitheamh 2021 (6) nach bhfuil tionchar díobhálach ag hiodrocsanasól búitilithe ar shláinte ainmhithe, ar shábháilteacht an tomhaltóra ná ar an gcomhshaol, faoi na coinníollacha úsáide atá beartaithe. Chinn sé freisin gur cheart a mheas gur greannaitheoir don chraiceann agus do na súile agus gur íogróir craicinn féideartha atá sa bhreiseán. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe a mhéid a bhaineann le húsáideoirí an bhreiseáin. Chinn an tÚdarás freisin, ós rud é go bhfuil hiodrocsanasól búitilithe údaraithe mar fhrithocsaídeoir lena úsáid i mbia ar leibhéil úsáide inchomparáide, nach gá aon staidéar a dhéanamh chun éifeachtúlacht hiodrocsanasóil bhúitilithe mar fhrithocsaídeoir i mbeatha le haghaidh cat a léiriú. D’fhíoraigh sé freisin an tuarascáil ar na modhanna a úsáidtear chun anailís a dhéanamh ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(8)

Léiríonn an measúnú ar hiodrocsanasól búitilithe go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid hiodrocsanasóil bhúitilithe a údarú faoi mar a shonraítear san Iarscríbhinn a ghabhann leis an Rialachán seo.

(9)

Ós rud é go bhfuil hiodrocsanasól búitilithe mar bhreiseán beathaithe le haghaidh cat réidh le bheith nua-údaraithe an tráth céanna a ghlacfar beart lena gceanglaítear an breiseán a tharraingt siar ón margadh faoi na coinníollacha maidir le húdarú roimhe seo i gcomhréir le hAirteagal 10(5) de Rialachán (CE) Uimh. 1831/2003, níor cheart an tarraingt siar ón margadh sin cosc a chur ar chur i bhfeidhm éifeachtach an údaraithe nua. Tá téarmaí an údaraithe nua éagsúil leis na téarmaí a bhí ann roimhe seo go háirithe sa mhéid go ndéantar foráil leo maidir le tuairisc níos sonraí ar an mbreiseán agus maidir leis na modhanna anailíse gaolmhara, maidir le huimhir aitheantais nua an bhreiseáin agus le forálacha eile a bhaineann leis na treoracha úsáide agus le sábháilteacht na n-úsáideoirí i ndáil leis an mbreiseán agus leis an réamh-mheascán lena mbaineann.

(10)

Ós rud é nach bhfuil aon chúis sábháilteachta ann lena n-éilítear hiodrocsanasól búitilithe a tharraingt siar ón margadh láithreach mar bhreiseán beathaithe le haghaidh cat faoi na coinníollacha maidir le húdarú roimhe seo, is iomchuí idirthréimhse theoranta a cheadú le haghaidh páirtithe leasmhara, idirthréimhse inar féidir na stoic hiodrocsanasóil bhúitilithe mar bhreiseán beathaithe le haghaidh cat, na réamh-mheascáin, na hábhair bheatha agus an bheatha cumaisc a tháirgtear leis an mbreiseán sin a ídiú, chun na ceanglais nua a eascraíonn as an údarú a chomhlíonadh.

(11)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,