(1)

Le Rialachán (CE) Uimh. 708/2007, bunaítear creat lena rialaítear cleachtais sa dobharshaothrú maidir le speicis choimhthíocha agus speicis nach bhfaightear go háitiúil chun measúnú a dhéanamh ar an tionchar a d’fhéadfadh a bheith ag na speicis sin agus ag speicis ghaolmhara nach spriocspeicis iad ar ghnáthóga uiscí agus chun an tionchar sin a laghdú oiread agus is féidir.

(2)

Liostaítear in Iarscríbhinn IV a ghabhann le Rialachán (CE) Uimh. 708/2007 speicis a úsáideadh go coitianta sa dobharshaothrú ar feadh i bhfad i gcodanna áirithe den Aontas, agus a fhaigheann tairbhe cóireála difreálaí, dá bhrí sin, rud a éascaíonn iad a fhorbairt gan aon ualach riaracháin breise, mar a fhoráiltear in Airteagal 2(5) den Rialachán sin.

(3)

Féadfaidh na Ballstáit a iarraidh ar an gCoimisiún speicis a chur le hIarscríbhinn IV a ghabhann le Rialachán (CE) Uimh. 708/2007 i gcomhréir le hAirteagal 24(4) de Rialachán (CE) Uimh. 708/2007. I Rialachán (CE) Uimh. 535/2008 ón gCoimisiún, sonraítear rialacha mionsonraithe maidir leis na coinníollacha is gá chun speicis a chur le hIarscríbhinn IV (2).

(4)

D’iarr an Ghréig go gcuirfí speiceas an deargáin, ar a dtugtar an garbhánach pargach Seapánach (Pagrus major) freisin le hIarscríbhinn IV a ghabhann le Rialachán (CE) Uimh. 708/2007, de bhun rialacha mionsonraithe Rialachán (CE) Uimh. 535/2008, agus go háirithe Airteagal 3 de. Cinneadh i staidéar arna chur isteach in éineacht leis an iarraidh go bhfuiltear ag saothrú an speicis sin sa dobharshaothrú Gréagach le tamall fada gan aon éifeacht dhíobhálach. Tar éis measúnú a dhéanamh ar an iarraidh sin, chinn an Coimisiún go bhfuil bonn cirt leis an iarraidh agus gur tugadh bunús di leis an bhfaisnéis ar fad a bhí ag teastáil.

(5)

Tugann an leasú ar Iarscríbhinn IV, tar éis na hiarrata ón nGréig, deis chun an téarmaíocht atá in úsáid san Iarscríbhinn a choigeartú. Mílitríodh ainm Laidine an bhradáin fearna Rúisigh (Acipenser gueldenstaedtii) agus tá ainm ceart le cur ina ionad. Is tráthúil freisin nuashonrú a dhéanamh ar ainm Laidine an charbáin cheannmhóir ó Aristichthys nobilis go Hypophthalmichthys nobilis.

(6)

Ar mhaithe le soiléireacht, mínítear i bhfonóta a cuireadh le hIarscríbhinn IV nach chun tairbhe go huathoibríoch do ghníomhaíochtaí a bhaineann le hibridí speiceas a liostaítear san Iarscríbhinn seo an chóireáil dhifreálach a dhéantar i leith na speiceas a liostaítear. D’fhonn tairbhe a bhaint as an gcóireáil sin, ní mór an nós imeachta maidir le speicis a chur leis an iarscríbhinn a leanúint.

(7)

Ba cheart, dá bhrí sin, Iarscríbhinn IV a ghabhann le Rialachán (CE) Uimh. 708/2007 a leasú dá réir,

(1)

I gCUID A – Ginearálta, cuirtear an speiceas seo a leanas leis: Pagrus major, an deargán, ar a dtugtar an garbhánach pargach Seapánach freisin.

(2)

Cuirtear Acipenser gueldenstaedtii in ionad ainm Laidine an speicis Acipenser gueldenstaeti.

(3)

Cuirtear Hypophthalmichthys nobilis in ionad ainm Laidine an speicis Aristichthys nobilis.

(4)

Cuirtear fonóta leis an teideal in Iarscríbhinn IV agus an téacs seo a leanas ann: “Níor cheart a mheas gur cuid den liosta sin iad hibridí speiceas atá ar áireamh san Iarscríbhinn seo.”