(1)

Chun críocha mhéid “an chorrlaigh iomláin is gá” a shonrú, dá dtagraítear in Airteagal 23(2) de Rialachán (AE) 2019/2033, agus chun soiléireacht agus comhsheasmhacht a fheabhsú i ndáil lena chomhpháirteanna, ba cheart a shoiléiriú go n-áirítear i méid an chorrlaigh iomláin is gá aon chomhthaobhacht is gá ag an gcomhalta imréitigh i gcomhréir lena shamhail chorrlaigh.

(2)

I gcomhréir le hAirteagal 23(2) de Rialachán (AE) 2019/2033, úsáidtear an corrlach iomlán is gá ar bhonn laethúil le haghaidh K-CMG a ríomh. I gcás ina mionathraíonn comhaltaí imréitigh an corrlach is gá ina leith laistigh de 1 lá amháin, fágann sé sin go ndéantar níos mó ná glao amháin ar chorrlach ar an lá céanna. Chun éiginnteacht faoi cé acu de na ceanglais chorrlaigh is ceart a úsáid agus ós rud é go bhfuil an tríú méid is airde le linn tréimhse 3 mhí le húsáid chun K-CMG a ríomh, is gá a shonrú gur cheart an méid corrlaigh laethúil a bheith ar an gcorrlach is airde as na ceanglais chorrlaigh ar lá áirithe.

(3)

Féadfaidh gnólachtaí infheistíochta seirbhísí imréitigh na gcomhaltaí imréitigh a úsáid. I gcás suíomhanna a gcuirfear K-CMG i bhfeidhm ina leith, ba cheart go mbeadh cinneadh mhéid an chorrlaigh iomláin a éilítear ón ngnólacht infheistíochta cuimsitheach agus an corrlach iomlán a éilíonn gach comhalta imréitigh san áireamh. Dá bhrí sin, i gcás ina n-úsáideann gnólacht infheistíochta K-CMG le haghaidh suíomhanna atá faoi réir imréitigh ag roinnt comhaltaí imréitigh, ba cheart CMG a ríomh mar shuim na gcorrlach is gá ar fud na gcomhaltaí imréitigh go léir. Ba cheart do ghnólacht infheistíochta, dá réir sin, méid iomlán laethúil an chorrlaigh is gá a ríomh mar shuim an chorrlaigh iomláin a éilíonn gach comhalta imréitigh, sula gcinneann sé an tríú méid is airde de na corrlaigh iomlána ar bhonn laethúil mar a cheanglaítear in Airteagal 23(2) de Rialachán (AE) 2019/2033.

(4)

Maidir le cur chun feidhme K-CMG ar bhonn punainne, i gcás ina bhfuil an phunann uile faoi réir imréitigh nó déanamh corrlaigh, ní mór na coinníollacha a leagtar síos in Airteagal 23(1) de Rialachán (AE) 2019/2033 a chomhlíonadh. Dá bhrí sin, is féidir úsáid a bhaint as K-CMG i leith phunann na suíomhanna imréitithe atá sannta do dheasc thrádála amháin, agus ag an am céanna, is féidir úsáid a bhaint as an K-fhachtóir “suíomh an ghlanriosca” (K-NPR) i leith phunann na suíomhanna imréitithe atá sannta do dheasc thrádála eile. Chun arbatráiste a sheachaint, ba cheart úsáid K-CMG agus K-NPR ar fud na ndeasc trádála a bheith chomhsheasmhach. Dá bhrí sin, ba cheart an cur chuige céanna a úsáid le haghaidh deasca trádála atá chomhchosúil ó thaobh straitéis ghnó agus suíomhanna leabhair trádála de.

(5)

Chun críocha an mheasúnaithe faoi Airteagal 23(1), pointe (e), de Rialachán (AE) 2019/2033, ba cheart é a bheith ina cheangal ar an údarás inniúil measúnú a dhéanamh cé acu atá nó nach bhfuil an cur chuige K-CMG iomchuí sa mhéid go léiríonn sé próifíl riosca shuíomhanna leabhair trádála an ghnólachta infheistíochta. Ba cheart é a bheith ina cheangal ar ghnólacht infheistíochta comparáid a dhéanamh go rialta idir a fhéinmheasúnú riosca agus na corrlaigh arna n-éileamh ag comhaltaí imréitigh, chun críche measúnú a dhéanamh cé acu atá nó nach bhfuil na corrlaigh sin ina dtáscaire maith go fóill ar leibhéal an riosca do mhargadh an ghnólachta infheistíochta. Ag pointe an mheasúnaithe ag an údarás inniúil, ba cheart go ndéanfadh an gnólacht infheistíochta comparáid idir na ceanglais chaipitil faoi K-NPR agus K-CMG agus ba cheart dó a bheith in ann bonn cirt a thabhairt faoin difear idir na ceanglais chaipitil sin don údarás inniúil. Níor cheart go mbeadh measúnú an údaráis inniúil dearfach ach amháin nuair a chomhlíontar na coinníollacha sin go léir. Go háirithe, ba cheart don údarás inniúil a áirithiú go bhfuil an gnólacht infheistíochta in ann faireachán a dhéanamh agus bonn cirt a thabhairt i dtaobh an difir idir an toradh ar an dá mhodheolaíocht, K-NPR agus K-CMG, go háirithe i gcás athrúcháin mhóra ar na corrlaigh is gá.

(6)

Is táscaire láidir é má athraítear idir úsáid K-NPR agus K-CMG go rímhinic d’úsáid fhéideartha dhíréireach nó neamhfhónta na gceanglas cistí dílse. Is féidir cosc a chur ar arbatráiste rialála trí shrian a chur le minicíocht na n-athruithe ar shuíomhanna idir úsáid K-NPR agus K-CMG. Bheadh ceanglas chun úsáid leanúnach a bhaint as ceann den dá mhodh le haghaidh deasc thrádála ar feadh 2 bhliain ar a laghad comhréireach chun aghaidh a thabhairt ar riosca an arbatráiste rialála. I gcásanna eisceachtúla (athstruchtúrú gnólachta m.sh), áfach, i gcás ina n-athraíonn deasc thrádála a mhéid gur féidir í a mheas mar dheasc thrádála éagsúil, ba cheart don údarás inniúil cead a thabhairt do ghnólacht infheistíochta modhanna a athrú laistigh den tréimhse 2 bhliain sin.

(7)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Baincéireachta Eorpach (ÚBE).

(8)

Tá comhairliúcháin phoiblí oscailte déanta ag ÚBE maidir leis na dréachtchaighdeáin theicniúla rialála ar a bhfuil an Rialachán seo bunaithe; tá anailís déanta aige ar na costais agus ar na tairbhí a d’fhéadfadh a bheith ag baint leo ann agus d’iarr sé comhairle ón nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (2),