(1)

Is éard a bhunaítear le Rialachán Cur Chun Feidhme (AE) 2018/2019 ón gCoimisiún (2), ar bhonn réamh-mheasúnú riosca, liosta plandaí, táirgí plandaí agus réad eile a mbaineann ardriosca leo.

(2)

Is éard a leagtar síos le Rialachán Cur Chun Feidhme (AE) 2018/2018 ón gCoimisiún (3) rialacha sonracha maidir leis an nós imeachta atá le leanúint chun an measúnú riosca dá dtagraítear in Airteagal 42(4) de Rialachán (AE) 2016/2031 a dhéanamh ar na plandaí, táirgí plandaí agus réada eile a mbaineann ardriosca leo.

(3)

Tar éis réamh-mheasúnú riosca a dhéanamh, áiríodh 34 ghéineas agus speiceas amháin de phlandaí atá le cur, de thionscnamh na dtríú tíortha ar fad, san Iarscríbhinn a ghabhann le Rialachán Cur Chun Feidhme (AE) 2018/2019 mar phlandaí a mbaineann ardriosca leo, agus tá an géineas Corylus L. ar cheann acu.

(4)

An 29 Bealtaine 2020, chuir an tSeirbia iarraidh faoi bhráid an Choimisiúin chun plandaí Corylus avellana L. agus Corylus avellana L. beangaithe ar Corylus colurna L. agus iad idir bliain agus 3 bliana d’aois, le cur agus fréamhlom, agus plandaí Corylus avellana L. agus iad 2 bhliain d’aois, le cur agus le damhna fáis, atá suanach agus gan duilleoga orthu, a onnmhairiú chuig an Aontas. Cuireadh an sainchomhad teicniúil ábhartha isteach leis an iarraidh sin.

(5)

An 25 Márta 2021, ghlac an tÚdarás Eorpach um Shábháilteacht Bia (“an tÚdarás”) tuairim eolaíoch maidir leis an measúnú riosca tráchtearraí ar phlandaí Corylus avellana agus Corylus colurna atá le cur ón tSeirbia (4). Shainaithin an tÚdarás fíteaplasma flavescence dorée na fíniúna mar lotnaid ábhartha i leith na bplandaí sin atá le cur. Liostaítear an lotnaid sin i gCuid B, roinn F d’Iarscríbhinn II a ghabhann le Rialachán Cur Chun Feidhme (AE) 2019/2072 ón gCoimisiún (5), mar lotnaid choraintín de chuid an Aontais arb eol go bhfuil sí i gcríoch an Aontais.

(6)

Ar bhonn na tuairime sin, measann an Coimisiún go bhfuil an riosca fíteashláintíochta ó thabhairt isteach i gcríoch an Aontais plandaí atá le cur de Corylus avellana L. agus Corylus colurna L. de thionscnamh na Seirbia, inghlactha, ar choinníoll go gcomhlíontar na ceanglais allmhairiúcháin speisialta arna leagan amach in Iarscríbhinn VII a ghabhann le Rialachán Cur Chun Feidhme (AE) 2019/2072. Tá feidhm ag an mbreithniú sin maidir le gach planda de na speicis sin atá le cur, beag beann ar a aois, ná é a bheith fréamhlom, suanach ná gan duilleoga.

(7)

Dá réir sin, níor cheart a mheas a thuilleadh gur plandaí iad a mbaineann ardriosca leo na plandaí sin atá le cur. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2018/2019 a leasú dá réir.

(8)

Chun oibleagáidí an Aontais a eascraíonn as comhaontú na hEagraíochta Trádála Domhanda maidir le cur i bhfeidhm beart sláintíochta agus fíteashláintíochta (6) a chomhlíonadh, ba cheart allmhairiú na dtráchtearraí sin a atosú a luaithe is féidir. Dá bhrí sin, ba cheart don Rialachán seo teacht i bhfeidhm an tríú lá tar éis lá a fhoilsithe.

(9)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,