(1)

Is éard a fhoráiltear le Rialachán (AE) 2015/2283 nach bhféadfar ach bianna núíosacha atá údaraithe agus atá curtha ar liosta an Aontais a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

Áirítear giosta aráin (Saccharomyces cerevisiae) cóireáilte le UV mar bhia núíosach údaraithe i liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470.

(4)

Is éard a údaraíodh le Cinneadh Cur Chun Feidhme 2014/396/AE (3), i gcomhréir le Rialachán (CE) Uimh. 258/97 ó Pharlaimint na hEorpa agus ón gComhairle (4) agus tar éis na tuairime ón Údarás Eorpach um Shábháilteacht Bia (5), giosta aráin (Saccharomyces cerevisiae) cóireáilte le UV a chur ar an margadh mar bhia núíosach lena úsáid i mbianna áirithe, lena n-áirítear aráin agus rollaí a laimhínítear le giosta agus earraí míne bácála a laimhínítear le giosta, agus i bhforbhianna chomh maith mar a shainmhínítear i dTreoir 2002/46/CE ó Pharlaimint na hEorpa agus ón gComhairle (6).

(5)

Is éard a údaraíodh le Rialachán Cur Chun Feidhme (AE) 2018/1018 ón gCoimisiún (7) i gcomhréir le Rialachán (AE) 2015/2283, leathnú úsáide agus leathnú leibhéil úsáide an bhia núíosaigh giosta aráin (Saccharomyces cerevisiae) cóireáilte le UV. Go háirithe, leathnaíodh úsáid giosta aráin (Saccharomyces cerevisiae) cóireáilte le UV chun catagóirí bia eile a chumhdach, eadhon giosta úr réamhphacáilte nó giosta tirim réamhphacáilte le haghaidh bácáil bhaile agus forbhianna gan léiriú ar na huasleibhéil ceadaithe, agus leasaíodh an cion vitimín D2 sa dlúthán giosta.

(6)

An 15 Bealtaine 2020 chuir an chuideachta Lallemand Bio-Ingredients Division (“an t-iarratasóir”) iarratas faoi bhráid an Choimisiúin de bhun Airteagal 10(1) de Rialachán (AE) 2015/2283 ar leathnú úsáide i leith an bhia núíosach giosta aráin (Saccharomyces cerevisiae) cóireáilte le UV. D’iarr an t-iarratasóir úsáid giosta aráin (Saccharomyces cerevisiae) cóireáilte le UV a leathnú chun roinnt bianna eile atá ceaptha le caitheamh ag an bpobal i gcoitinne a chumhdach. Ina theannta sin d’iarr an t-iarratasóir go n-úsáidfí an bia núíosach i mbianna atá ceaptha do naíonáin agus do leanaí óga.

(7)

I gcomhréir le hAirteagal 10(3) de Rialachán (AE) 2015/2283, chuaigh an Coimisiún i gcomhairle leis an Údarás Eorpach um Shábháilteacht Bia (“an tÚdarás”) an 20 Iúil 2020, agus d’iarr an Coimisiún ar an Údarás tuairim eolaíoch a sholáthar maidir leis an leathnú úsáide i leith giosta aráin (Saccharomyces cerevisiae) cóireáilte le UV mar bhia núíosach.

(8)

An 28 Aibreán 2021, ghlac an tÚdarás a thuairim eolaíoch Safety of extended uses of UV-treated baker’s yeast as a novel food pursuant to Regulation (EU) 2015/2283 (“Sábháilteacht úsáidí leathnaithe giosta aráin cóireáilte le UV mar bhia núíosach de bhun Rialachán (AE) 2015/2283”] (8). Tá an tuairim eolaíoch sin i gcomhréir le ceanglais Airteagal 11 de Rialachán (AE) 2015/2283.

(9)

Sa tuairim uaidh, chinn an tÚdarás go bhfuil giosta aráin (Saccharomyces cerevisiae) cóireáilte le UV sábháilte faoi na coinníollacha úsáide atá beartaithe. Dá bhrí sin, is leor na forais sa tuairim ón Údarás chun a shuí go gcomhlíonann giosta aráin (Saccharomyces cerevisiae) cóireáilte le UV, faoi na coinníollacha úsáide sonracha, na coinníollacha maidir lena chur ar an margadh i gcomhréir le hAirteagal 12(1) de Rialachán (AE) 2015/2283.

(10)

I gcomhréir le Treoir 2006/125/CE ón gCoimisiún (9), ní chuirfear vitimín D le bianna do naíonáin. Mar gheall ar a chion vitimín D2, níor cheart giosta aráin (Saccharomyces cerevisiae) cóireáilte le UV a údarú lena úsáid i mbianna do naíonáin. Thairis sin, i gcomhréir le Rialachán (CE) Uimh. 1925/2006 ó Pharlaimint na hEorpa agus ón gComhairle (10), ní fhéadfar vitimíní a chur le táirgí bia neamhphróiseáilte. Dá bhrí sin, níor cheart giosta aráin (Saccharomyces cerevisiae) cóireáilte le UV a údarú in amfaibiaigh, i reiptílí, i seilidí, i bhfeithidí, in algaí, in orgánaigh phrócarótaigh, ná i bhfungais, i gcaonaigh ná i léicin i ndáil leis an úsáid atá beartaithe.

(11)

I gcomhréir le tuairim an Údaráis, is gá an giosta aráin (Saccharomyces cerevisiae) cóireáilte le UV a dhíghníomhú sula n-úsáidtear é i mbainne foirmle do naíonáin nó i mbainne foirmle leantach, i mbia gránachbhunaithe próiseáilte nó i mbianna chun críoch speisialta míochaine mar a shainítear le Rialachán (AE) Uimh. 609/2013 ó Pharlaimint na hEorpa agus ón gComhairle (11), agus dá bhrí sin is iomchuí sonraíochtaí an bhia núíosaigh a leasú.

(12)

Is leor na forais a sholáthraítear san iarratas agus sa tuairim ón Údarás chun a shuí go gcomhlíonann na hathruithe a dhéantar ar shonraíochtaí agus ar choinníollacha úsáide an bhia núíosaigh na coinníollacha maidir lena chur ar an margadh i gcomhréir le hAirteagal 12 de Rialachán (AE) 2015/2283.

(13)

Dá bhrí sin, is ceart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(14)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,