(1)

I gcomhréir le hAirteagal 18.1 de Reacht an Chórais Eorpaigh Banc Ceannais agus an Bhainc Ceannais Eorpaigh, féadfaidh an Banc Ceannais Eorpach (BCE) agus bainc cheannais náisiúnta na mBallstát arb é an euro an t-airgeadra iontu (dá ngairtear “BCNanna” anseo feasta), oibríochtaí creidmheasa a sheoladh le hinstitiúidí creidmheasa agus le rannpháirtithe eile sa mhargadh chun cuspóirí an Chórais Eorpaigh Banc Ceannais a bhaint amach, oibríochtaí ina mbeidh an chomhthaobhacht leordhóthanach ina bonn faoin iasachtú. Leagtar síos na coinníollacha ginearálta faoina mbeidh BCE agus na bainc cheannais náisiúnta ullamh chun dul i mbun oibríochtaí creidmheasa, lena n-áirítear na critéir lena gcinntear incháilitheacht na comhthaobhachta chun críocha oibríochtaí creidmheasa an Eurochórais i dTreoirlíne (AE) 2015/510 ón mBanc Ceannais Eorpach (BCE/2014/60) (1).

(2)

Is gá tuilleadh soiléireacht a thabhairt maidir leis an láimhseáil a dhéantar chun críoch incháilitheachta ar rátaí tagartha úis le haghaidh sócmhainní indíolta.

(3)

Rinne an Chomhairle Rialaithe athbhreithniú cuimsitheach ar na bearta éascaithe comhthaobhachta sealadacha a glacadh ó bhí 2020 ann chun aghaidh a thabhairt ar na cúinsí eisceachtúla eacnamaíocha agus airgeadais a bhaineann le spré ghalar an choróinvíris (COVID-19). Áiríodh ar na bearta sin caolchorrlaigh luachála a laghdú go sealadach; incháilitheacht sócmhainní, agus eisitheoirí agus ráthóirí na sócmhainní sin, a chomhlíon íoscheanglais cáilíochta creidmheasa an Eurochórais an 7 Aibreán 2020 ach a íosghrádaíodh ina dhiaidh sin, a choinneáil ar bun; agus cead a thabhairt do bhainc cheannais náisiúnta glacadh le hurrúis fiachais cheannasaigh arna n-eisiúint ag rialtas láir na Poblachta Heilléanaí agus nach gcomhlíontar ceanglais cáilíochta creidmheasa an Eurochórais leo, mar chomhthaobhacht incháilithe. Cuireadh san áireamh san athbhreithniú sin (a) gur cheart contrapháirtithe an Eurochórais a ghlacann páirt in oibríochtaí athmhaoiniúcháin spriocdhírithe fadtéarmacha a dhéantar faoi Chinneadh (AE) 2019/1311 ón mBanc Ceannais Eorpach (BCE/2019/21) (2) a bheith in ann leanúint de chomhthaobhacht leordhóthanach a shlógadh le haghaidh na n-oibríochtaí sin; (b) an tionchar comhthaobhachta ar chontrapháirtithe an Eurochórais a bhfuil baint acu le gach ceann de na bearta sin; (c) breithnithe riosca a bhaineann le gach ceann de na bearta sin; (d) breithnithe eile margaidh agus beartais.

(4)

Sa chomhthéacs sin, chinn an Chomhairle Rialaithe an 23 Márta 2022, inter alia, deireadh a chur de réir a chéile leis an laghdú caolchorrlaigh thuasluaite ina dhá chéim, agus go dtosódh an chéad chéim acu sin an 8 Iúil 2022 chun cosaint riosca agus éifeachtúlacht riosca an Eurochórais a mhéadú.

(5)

Maidir le sócmhainní indíolta, agus eisitheoirí agus ráthóirí na sócmhainní sin a chomhlíon íoscheanglais cáilíochta creidmheasa an Eurochórais an 7 Aibreán 2020 ach a rinne na gníomhaireachtaí rátála creidmheasa a nglactar leo san Eorachóras iad a íosghrádú ina dhiaidh sin go leibhéal cáilíochta creidmheasa atá faoi bhun íosmhéid an Eurochórais, chinn sí freisin gan glacadh a thuilleadh leo mar incháilithe, ón 8 Iúil 2022, chun filleadh ar bhealach comhsheasmhach le caitheamh le heisitheoirí, sócmhainní indíolta agus ráthóirí laistigh de chreat comhthaobhachta an Eorachórais, ar neamhcheist le huair dhéanta a ngníomhaíochtaí ag gníomhaireachtaí rátála creidmheasa.

(6)

Maidir le hurrúis fiachais indíolta arna n-eisiúint ag rialtas láir na Poblachta Heilléanaí nach gcomhlíontar ceanglais cáilíochta creidmheasa an Eorachórais leo ach lena gcomhlíontar gach critéar incháilitheachta eile is infheidhme maidir le sócmhainní indíolta, chinn an Chomhairle Rialaithe ina theannta sin leanúint de chead a thabhairt do BCNanna glacadh leo mar chomhthaobhacht incháilithe, ar a laghad fad a mhairfidh athinfheistíochtaí sna hurrúis sin faoin gclár ceannaigh le haghaidh éigeandáil na paindéime (PEPP) (3), faoi réir sceideal sonrach caolchorrlach. Beart sealadach a bheidh sa bheart sin agus is faoi réir na mbreithnithe breise seo a leanas a bheidh sé: (a) an gá atá ann leanúint de chosc a chur le rochtain ar bheartas airgeadaíochta an Eurochórais imeacht ina conamar, ilroinnt a chuirfeadh isteach ar oibriú ceart mheicníocht tharchurtha an bheartais airgeadaíochta de chuid gheilleagar na Gréige fad atá sí fós ag téarnamh ó dheasca na paindéime; (b) na gealltanais a thug an Phoblacht Heilléanach i gcomhthéacs an fhaireachais fheabhsaithe faoi Rialachán (AE) Uimh. 472/2013 ó Pharlaimint na hEorpa agus ón gComhairle (4) agus faireachán ar a chur chun feidhme ag institiúidí an Aontais; (c) gurb amhlaidh atá bearta faoisimh ó fhiachais meántéarmacha le haghaidh na Poblachta Heilléanaí a sheachadtar tríd an tSaoráid Eorpach um Chobhsaíocht Airgeadais agus tríd an Sásra Cobhsaíochta Eorpach ag brath ar chur chun feidhme na ngealltanas sin a leanúint ar aghaidh; (d) an fhaisnéis faoi staid eacnamaíoch agus airgeadais na Poblachta Heilléanaí atá le fáil ag BCE de thoradh BCE a bheith rannpháirteach sa chreat faireacháin fheabhsaithe; (e) gurb amhlaidh a bheidh, fiú tar éis dheireadh an fhaireachais fheabhsaithe: (i) staid eacnamaíoch, fhioscach agus airgeadais na Poblachta Heilléanaí á hathbhreithniú go tráthrialta i gcomhthéacs an fhaireachais iarchláir faoi Airteagal 14 de Rialachán (AE) Uimh. 472/2013 agus i gcomhthéacs chóras réamhrabhaidh ráithiúil an tSásra Cobhsaíochta Eorpaigh, (ii) bearta faoisimh ó fhiachais le haghaidh na Poblachta Heilléanaí á nascadh fós leis an bhfaireachas iarchláir sin, agus (iii) íocaíochtaí amach atá beartaithe leis an bPoblacht Heilléanach i gcomhthéacs na Saoráide Téarnaimh agus Athléimneachta faoi Rialachán (AE) 2021/241 ó Pharlaimint na hEorpa agus ón gComhairle (5) faoi réir na ngarspriocanna agus na spriocanna comhaontaithe á gcur i gcrích go rathúil i gcomhréir le hAirteagal 24 den Rialachán sin; (f) an Sásra Cobhsaíochta Eorpach, an Coimisiún Eorpach, agus BCE ag déanamh measúnuithe tráthrialta ar inbhuanaitheacht fiachais cheannasaigh; (g) rochtain ag BCE fós ar fhaisnéis ar staid eacnamaíoch agus airgeadais na Poblachta Heilléanaí, fiú tar éis dheireadh an fhaireachais fheabhsaithe, trí na sásraí a dtugtar tuairisc orthu faoi phointí (e)(i) agus (e)(iii) thuas.

(7)

Dá bhrí sin, ba cheart Treoirlíne 2014/528/AE ón mBanc Ceannais Eorpach (BCE/2014/31) (6) a leasú dá réir,