1.   Tá feidhm ag an Treoir seo maidir le seiceálacha arna ndéanamh ag na Ballstáit ar iompar earraí contúirteacha de bhóthar i bhfeithiclí atá ag taisteal ina gcríoch nó atá ag dul isteach ann ó thríú tír.

Níl feidhm aici maidir le hiompar earraí contúirteacha i bhfeithiclí ar leis na fórsaí armtha iad nó atá faoina bhfreagracht.

2.   Ní dhéanfaidh an Treoir seo difear do cheart na mBallstát, agus aird chuí á tabhairt ar dhlí an Aontais, seiceálacha a dhéanamh ar iompar náisiúnta agus idirnáisiúnta earraí contúirteacha laistigh dá gcríocha ar fheithiclí nach gcumhdaítear leis an Treoir seo.

1.   Áiritheoidh na Ballstáit go mbeidh cion ionadaíoch de choinsíneachtaí earraí contúirteacha a iompraítear de bhóthar faoi réir na seiceálacha a leagtar síos leis an Treoir seo, d’fhonn a sheiceáil an gcomhlíonann siad na dlíthe a bhaineann le hiompar earraí contúirteacha de bhóthar.

2.   Déanfar na seiceálacha sin ar chríoch Ballstáit i gcomhréir le hAirteagal 3 de Rialachán (CE) Uimh. 1100/2008 agus le hAirteagal 1 de Rialachán (CEE) Uimh. 3912/92.

1.   Chun na seiceálacha dá bhforáiltear sa Treoir seo a dhéanamh, úsáidfidh na Ballstáit an seicliosta a leagtar amach in Iarscríbhinn I. Déanfar cóip den seicliosta sin nó deimhniú a léiríonn toradh na seiceála arna tharraingt suas ag an údarás a rinne í a thabhairt do thiománaí na feithicle agus taispeánfaidh an tiománaí é arna iarraidh sin ar an tiománaí chun na seiceálacha a dhéanfar ina dhiaidh sin a shimpliú nó a sheachaint, más féidir.

Ní dhéanfaidh an chéad fhomhír seo dochar do cheart na mBallstát bearta sonracha a dhéanamh atá dírithe ar sheiceálacha mionsonraithe.

2.   Déanfar na seiceálacha go randamach agus cumhdófar leo, a mhéid is féidir, cuid fhairsing den ghréasán bóithre.

3.   I gcás na n-áiteanna a roghnaítear i gcomhair na seiceálacha, ceadóidh siad feithiclí a sháraíonn na rialacha a thabhairt chun comhréireachta nó, má mheasann an t-údarás a bheidh ag déanamh na seiceála gur iomchuí sin, iad a chur ó ghluaiseacht ar an láthair nó ag áit a ainmníonn an t-údarás sin chun na críche sin gan guais don tsábháilteacht a chruthú.

4.   I gcás inarb iomchuí, agus ar an gcoinníoll nach guais don tsábháilteacht iad, féadfar samplaí de na hearraí a bheidh á n-iompar a ghlacadh le haghaidh scrúdú ag saotharlanna atá aitheanta ag an údarás inniúil.

5.   Ní rachaidh na seiceálacha thar thréimhse réasúnta ama.

1.   Féadfar seiceálacha a dhéanamh freisin ag áitreabh gnóthas, mar bheart coisctheach nó i gcás inar taifeadadh, cois bóthair, sáruithe a chuireann sábháilteacht iompair earraí contúirteacha i mbaol.

Is é cuspóir na seiceálacha sin a áirithiú go gcomhlíonann na coinníollacha sábháilteachta a bhaineann le hiompar earraí contúirteacha de bhóthar na dlíthe ábhartha.

2.   I gcás ina suífear sárú amháin nó níos mó, go háirithe na sáruithe sin a liostaítear in Iarscríbhinn II, i ndáil le hiompar earraí contúirteacha de bhóthar, déanfar an t-iompar sin a thabhairt chun comhréireachta sula bhfágfaidh na hearraí an gnóthas nó beidh sé faoi réir bearta iomchuí eile.

1.   Tabharfaidh na Ballstáit cúnamh dá chéile chun éifeacht chuí a thabhairt don Treoir seo.

2.   Déanfar sáruithe tromchúiseacha nó sáruithe a dhéantar arís agus arís eile, arna ndéanamh ag feithicil neamhchónaitheach nó gnóthas neamhchónaitheach, a chuireann sábháilteacht iompair earraí contúirteacha i mbaol a thuairisciú chuig údaráis inniúla an Bhallstáit ina bhfuil an fheithicil cláraithe nó ina bhfuil an gnóthas bunaithe.

Féadfaidh údaráis inniúla an Bhallstáit inar taifeadadh na sáruithe tromchúiseacha nó na sáruithe a rinneadh arís agus arís eile a iarraidh ar údaráis inniúla an Bhallstáit ina bhfuil an fheithicil cláraithe nó ina bhfuil an gnóthas bunaithe, bearta iomchuí a ghlacadh maidir leis an gciontóir nó na ciontóirí.

Tabharfaidh údaráis inniúla an Bhallstáit ina bhfuil an fheithicil cláraithe nó ina bhfuil an gnóthas bunaithe fógra d’údaráis inniúla an Bhallstáit inar taifeadadh na sáruithe ar aon bheart arna dhéanamh i ndáil leis an iompróir nó an gnóthas lena mbaineann.

1.   Déanfaidh gach Ballstát tuarascáil, arna tarraingt suas i gcomhréir leis an bhfoirm chaighdeánach a leagtar amach in Iarscríbhinn III a ghabhann leis an Treoir seo, maidir le cur i bhfeidhm Threoir 95/50/CE agus na Treorach seo, a chur chuig an gCoimisiún le haghaidh gach bliana féilire, tráth nach déanaí ná 12 mhí tar éis dheireadh na bliana sin, ina mbeidh na sonraí seo a leanas:

2.   Seolfaidh an Coimisiún tuarascáil ar chur i bhfeidhm Threoir 95/50/CE agus na Treorach seo ag na Ballstáit chuig Parlaimint na hEorpa agus chuig an gComhairle den chéad uair in 1999 agus, ina dhiaidh sin, gach 3 bliana agus luafaidh sé inti na sonraí i gcomhréir le mír 1.

1.   Is faoi réir na gcoinníollacha a leagtar síos san Airteagal seo a thugtar an chumhacht don Choimisiún chun gníomhartha tarmligthe a ghlacadh.

2.   Déanfar an chumhacht chun gníomhartha tarmligthe dá dtagraítear in Airteagal 10 a thabhairt don Choimisiún go ceann tréimhse 5 bliana ón 26 Iúil 2019. Déanfaidh an Coimisiún, tráth nach déanaí ná 9 mí roimh dheireadh na tréimhse 5 bliana, tuarascáil a tharraingt suas maidir le tarmligean na cumhachta. Déanfar tarmligean na cumhachta a fhadú go hintuigthe go ceann tréimhsí comhfhaid mura rud é go gcuireann Parlaimint na hEorpa nó an Chomhairle in aghaidh an fhadaithe sin tráth nach déanaí ná 3 mhí roimh dheireadh gach tréimhse.

3.   Féadfaidh Parlaimint na hEorpa nó an Chomhairle tarmligean na cumhachta dá dtagraítear in Airteagal 10 a chúlghairm aon tráth. Déanfaidh cinneadh chun cúlghairm a dhéanamh deireadh a chur le tarmligean na cumhachta atá sonraithe sa chinneadh sin. Gabhfaidh éifeacht leis an lá tar éis fhoilsiú an chinnidh in Iris Oifigiúil an Aontais Eorpaigh nó ar dháta níos déanaí a shonrófar sa chinneadh. Ní dhéanfaidh sé difear do bhailíocht aon ghníomhartha tarmligthe atá i bhfeidhm cheana.

4.   Roimh dó gníomh tarmligthe a ghlacadh, rachaidh an Coimisiún i mbun comhairliúchán le saineolaithe arna n-ainmniú ag gach Ballstát i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr.

5.   A luaithe a ghlacfaidh sé gníomh tarmligthe, tabharfaidh an Coimisiún fógra, an tráth céanna, do Pharlaimint na hEorpa agus don Chomhairle faoi.

6.   Ní thiocfaidh gníomh tarmligthe a ghlactar de bhun Airteagal 10 i bhfeidhm ach amháin mura mbeidh aon agóid curtha in iúl ag Parlaimint na hEorpa ná ag an gComhairle laistigh de thréimhse 2 mhí tar éis fógra faoin ngníomh sin a thabhairt do Pharlaimint na hEorpa agus don Chomhairle nó más rud é, roimh dhul in éag na tréimhse sin, go mbeidh Parlaimint na hEorpa agus an Chomhairle araon tar éis a chur in iúl don Choimisiún nach ndéanfaidh siad aon agóid. Déanfar an tréimhse sin a fhadú 2 mhí ar thionscnamh Pharlaimint na hEorpa nó na Comhairle.