(1)

Tugadh an Comhaontú Comhpháirtíochta Iascaigh i gcrích idir an tAontas Eorpach agus Poblacht Oileán Mhuirís (1) (“an Comhaontú”) le Cinneadh 2014/146/AE ón gComhairle (2) agus tháinig sé i bhfeidhm an 28 Eanáir 2014.

(2)

Sa chéad phrótacal (3) a ghabhann leis an gComhaontú, leagadh amach na deiseanna iascaireachta a deonaíodh, ar feadh tréimhse 3 bliana, do shoithí de chuid an Aontais in uiscí Oileán Mhuirís agus an ranníocaíocht airgeadais arna deonú ag an Aontas. Chuaigh tréimhse chur i bhfeidhm an phrótacail sin in éag an 27 Eanáir 2017.

(3)

Sa dara prótacal (4) a ghabhann leis an gComhaontú, leagadh amach na deiseanna iascaireachta a deonaíodh, ar feadh tréimhse 4 bliana, do shoithí de chuid an Aontais in uiscí Oileán Mhuirís agus an ranníocaíocht airgeadais arna deonú ag an Aontas. Chuaigh tréimhse chur i bhfeidhm an phrótacail sin in éag an 7 Nollaig 2021.

(4)

Údaraíodh comhaontú i bhfoirm malartú litreacha idir an tAontas agus Oileán Mhuirís (5) le Cinneadh (AE) 2022/614 ón gComhairle lenar cuireadh síneadh le cur i bhfeidhm an dara prótacal a ghabhann leis an gComhaontú go dtí an 4 Deireadh Fómhair 2022.

(5)

An 28 Meán Fómhair 2021, thug an Chomhairle údarú don Choimisiún tús a chur le caibidlíocht le hOileán Mhuirís chun prótacal nua a thabhairt i gcrích chun an Comhaontú a chur chun feidhme.

(6)

Tugadh an chaibidlíocht sin i gcrích go sásúil agus cuireadh inisealacha le prótacal nua an 7 Bealtaine 2022, lena gcuirtear an Comhaontú chun feidhme (“an Prótocal”) ar feadh tréimhse 4 bliana.

(7)

Is é is cuspóir don Phrótacal an Comhaontú a chur chun feidhme ionas go mbeidh an tAontas agus Oileán Mhuirís in ann oibriú níos dlúithe le chéile chun an comhar a chur chun cinn i réimsí an gheilleagair mhuirí, an dobharshaothraithe, fhorbairt inbhuanaithe na n-aigéan, na pleanála spásúla muirí, an fhuinnimh mhuirí agus na muirthimpeallachta, agus fhorbairt an bheartais mhuirí agus an gheilleagair ghoirm, agus ag an am céanna cur le dálaí oibre cuibhiúla in earnáil an iascaigh.

(8)

Dá bhrí sin, ba cheart an Prótacal a shíniú thar ceann an Aontais, faoi réir a thabhairt i gcrích ar dháta níos déanaí.

(9)

I bhfianaise na tábhachta eacnamaíche a bhaineann le gníomhaíochtaí iascaireachta an Aontais i limistéar iascaireachta Oileán Mhuirís agus an ghá atá ann le briseadh i ngníomhaíochtaí den sórt sin a laghdú a oiread is féidir, ba cheart an Prótacal a chur chun feidhme a luaithe is féidir.

(10)

Ba cheart, dá bhrí sin, an Prótacal a chur i bhfeidhm ar bhonn sealadach amhail ó dháta a shínithe go dtí go dtabharfar chun críche na nósanna imeachta is gá chun go dtiocfaidh sé i bhfeidhm, agus ba cheart an Cinneadh seo a theacht i bhfeidhm tráth a ghlactha.

(11)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42 de Rialachán (AE) 2018/1725 ó Pharlaimint na hEorpa agus ón gComhairle (6) agus thug sé a thuaraim uaidh an 24 Deireadh Fómhair 2022,