(1)

Cuireadh IPBC le hIarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineál táirge 8. Dá bhrí sin, de bhun Airteagal 86 de Rialachán (AE) Uimh. 528/2012, measadh an tsubstaint a bheith formheasta go dtí an 30 Meitheamh 2020 faoin Rialachán sin faoi réir na gceanglas a leagtar amach in Iarscríbhinn I a ghabhann le Treoir 98/8/CE.

(2)

An 20 Nollaig 2018, cuireadh isteach iarratas i gcomhréir le hAirteagal 13(1) de Rialachán (AE) Uimh. 528/2012 chun athnuachan a dhéanamh ar an bhformheas maidir le IPBC a úsáid i dtáirgí bithicídeacha de chineál táirge 8 (“an t-iarratas”).

(3)

An 11 Aibreán 2019, chuir údarás inniúil meastóireachta na Danmhairge in iúl don Choimisiún gur chinn sé, de bhun Airteagal 14(1) de Rialachán (AE) Uimh. 528/2012, go raibh gá le meastóireacht iomlán ar an iarratas. De bhun Airteagal 8(1) den Rialachán sin, tá an t-údarás inniúil meastóireachta le meastóireacht iomlán a dhéanamh ar an iarratas laistigh de 365 lá tar éis a bhailíochtaithe.

(4)

De bhun Chinneadh Cur Chun Feidhme (AE) 2019/1969 ón gCoimisiún (3), cuireadh ar atráth go dtí an 31 Nollaig 2022 dáta éaga an fhormheasa maidir le IPBC a úsáid i dtáirgí bithicídeacha de chineál táirge 8 chun go mbeidh go leor ama ann d’fhonn scrúdú a dhéanamh ar an iarratas.

(5)

An 24 Bealtaine 2022, chuir an t-údarás inniúil meastóireachta in iúl don Choimisiún go bhfuil moill ar an meastóireacht mar go bhfuil gá le staidéir bhreise chun measúnú a dhéanamh ar na critéir d’fhonn airíonna suaiteora inchrínigh a chinneadh i gcás orgánaigh nach spriocorgánaigh iad. D’iarr an t-údarás inniúil meastóireachta ar an iarratasóir an fhaisnéis bhreise a chur isteach chun an mheastóireacht a dhéanamh, i gcomhréir le hAirteagal 8(2) de Rialachán (AE) Uimh. 528/2012. Tá coinne leis go gcuirfear an fhaisnéis sin faoi bhráid an údaráis inniúil meastóireachta faoi mhí Iúil 2023.

(6)

Laistigh de 270 lá tar éis di moladh a fháil ón údarás inniúil meastóireachta, déanfaidh an Ghníomhaireacht Eorpach Ceimiceán tuairim maidir le hathnuachan fhormheas na substainte gníomhaí a ullmhú agus a chur faoi bhráid an Choimisiúin i gcomhréir le hAirteagal 14(3) de Rialachán (AE) Uimh. 528/2012.

(7)

Dá bharr sin, ar chúiseanna nach bhfuil neart ag an iarratasóir orthu, is cosúil gur in éag a rachaidh an formheas maidir le IPBC a úsáid i dtáirgí bithicídeacha de chineál táirge 8 sula nglacfar cinneadh maidir lena athnuachan. Dá bhrí sin, is iomchuí dáta éaga an fhormheasa a chur ar atráth go ceann tréimhse leordhóthanach chun gur féidir scrúdú a dhéanamh ar an iarratas. Agus an t-am á chur san áireamh a theastaíonn ón údarás inniúil meastóireachta meastóireacht a dhéanamh chun an tuairim ón nGníomhaireacht Eorpach Ceimiceán a ullmhú agus a chur isteach, agus a theastaíonn ón gCoimisiún a chinneadh an ndéanfar athnuachan ar an bhformheas maidir le IPBC lena úsáid i dtáirgí bithicídeacha de chineál táirge 8, ba cheart an dáta éaga a chur ar atráth go dtí an 31 Iúil 2025.

(8)

Tar éis dáta éaga an fhormheasa a chur ar atráth, leanfaidh IPBC de bheith formheasta lena úsáid i dtáirgí bithicídeacha de chineál táirge 8 faoi réir na gceanglas a leagtar amach in Iarscríbhinn I a ghabhann le Treoir 98/8/CE,